1. Paano mo mapakita nga ginahuptan mo ang imo ikasarang sa paghunahuna sing maayo? (2 Timoteo 4:5)

 KON may mga problema kita, posible matilawan ang aton katutom kay Jehova kag sa iya organisasyon. Ano ang himuon naton kon matabo ini sa aton? Dapat naton huptan ang aton ikasarang sa paghunahuna sing maayo, magpabilin nga nagamata, kag mangin malig-on sa aton pagtuo. (Basaha ang 2 Timoteo 4:5.) Mapakita naton nga ginahuptan naton ang aton ikasarang sa paghunahuna sing maayo kon kalmado kita, nagapamensar sing maayo, kag ginatinguhaan naton nga mabal-an ang pagtamod ni Jehova. Makabulig ini para indi maapektuhan sang aton ginabatyag ang aton ginahunahuna.

2. Ano ang binagbinagon naton sa sini nga artikulo?

² Sa nagligad nga artikulo, ginbinagbinag naton ang tatlo ka kabudlayan nga posible himuon sa aton sang mga indi Saksi. Sa sini nga artikulo, binagbinagon naton ang nagakatabo sa sulod sang kongregasyon nga posible magtilaw sang aton katutom kay Jehova. Binagbinagon naton ang tatlo sa sini: (1) kon pamatyag naton indi maayo ang ginhimo sa aton sang isa ka utod, (2) kon gindisiplina kita, kag (3) kon nabudlayan kita nga sundon ang mga pagbag-o sa organisasyon. Kon matabo ini sa aton, paano naton mahuptan ang aton ikasarang sa paghunahuna sing maayo kag mangin matutom kay Jehova kag sa iya organisasyon?

3. Ano ang posible nga reaksion naton kon pamatyag naton indi maayo ang ginhimo sa aton sang isa ka utod?

³ Nakaagi ka na bala nga pamatyag mo indi maayo ang ginhimo sa imo sang isa ka utod nga may responsibilidad, pareho sang isa ka  gulang? Posible nga indi hungod sang brother ang iya ginhimo. (Roma 3:23; Sant. 3:2) Pero, posible nga naglain gid ang imo buot sa iya. Posible nga daw indi ini madula sa imo pensar amo nga indi ka makatulog. Gani, basi nagapalibog ka, ‘Ngaa nahimo ini sang brother? Amo gid bala ini ang organisasyon sang Dios?’ Amo gid ina ang gusto ni Satanas nga hunahunaon naton. (2 Cor. 2:11) Kon indi kita maghalong, ining indi husto nga panghunahuna posible mangin rason para mag-untat kita sa pag-alagad kay Jehova kag biyaan ang iya organisasyon. Gani kon pamatyag naton indi maayo ang ginhimo sa aton sang isa ka utod, paano naton mahuptan ang aton ikasarang sa paghunahuna sing maayo kag malikawan naton nga maghunahuna sing indi husto?

4. Paano nahuptan ni Jose ang iya ikasarang sa paghunahuna sing maayo sang ginhimuan sia sing malain, kag ano ang matun-an naton sa iya ginhimo? (Genesis 50:19-21)

⁴ Indi maghinakit. Sang tin-edyer si Jose, ginhimuan sia sing malain sang iya mga magulang nga lalaki. Akig gid sila sa iya, kag gusto pa gani sia patyon sang pila niya ka utod. (Gen. 37:4, 18-22) Sang ulihi, ginbaligya sia sang iya mga utod para mangin ulipon. Sa sulod sang mga 13 ka tuig, grabe gid nga mga kabudlayan ang naeksperiensiahan ni Jose. May rason kuntani si Jose nga magduhaduha kon bala palangga sia ni Jehova. Kag may rason sia nga pensaron nga ginbiyaan sia ni Jehova sang kinahanglan niya ang bulig. Pero wala naghinakit si Jose. Sa baylo, nangin kalmado sia amo nga nahuptan niya ang iya ikasarang sa paghunahuna sing maayo. Sang may tsansa sia nga balusan ang iya mga utod, wala niya ini ginhimo. Sa baylo, ginpakita niya nga palangga niya sila kag ginpatawad sila. (Gen. 45:4, 5) Nahimo ini ni Jose kay nakapamensar sia sing maayo. Imbes nga hunahunaon ang iya mga problema, ginhunahuna niya kon ano ang gusto ni Jehova nga himuon niya. (Basaha ang Genesis 50:19-21.) Ano ang matun-an naton? Kon ginhimuan ka sang malain, indi ka dapat maghinakit kay Jehova ukon maghunahuna nga ginbiyaan ka niya. Pamalandungi kon paano ka niya ginbuligan nga mabatas ang imo problema. Dugang pa, kon ginhimuan ka sing malain, tinguhai nga tabunan ini sang gugma.—1 Ped. 4:8.

5. Paano nahuptan ni Miqueas ang iya ikasarang sa paghunahuna sing maayo sang pamatyag niya indi maayo ang ginhimo sa iya sang iban?

⁵ Binagbinaga ang natabo kay Miqueas b nga isa ka gulang sa South America. May tion nga nagbatyag sia nga indi maayo ang ginhimo sa iya sang mga utod nga may responsibilidad. Nagsiling sia: “Grabe gid ang akon stress kag kabalaka. Indi ako makatulog kon gab-i, kag pamatyag ko wala na ako sing mahimo amo nga nagahibi na lang ako.” Pero, ginhuptan ni Miqueas ang iya ikasarang sa paghunahuna sing maayo kag gintinguhaan niya nga indi magpaapekto sa iya ginabatyag. Pirme sia nagapangamuyo kay Jehova nga hatagan sia sing balaan nga espiritu kag buligan sia nga makabatas. Nag-research man sia sa aton mga publikasyon sang mga impormasyon nga makabulig sa iya. Ano ang matun-an naton? Kon pamatyag mo indi maayo ang ginhambal ukon ginhimo sa imo sang isa ka utod, mangin kalmado kag tinguhai nga indi magpaapekto sa imo ginabatyag. Dumduma nga posible wala mo nahibaluan kon ngaa nahambal ukon nahimo ini sang utod. Gani, mangamuyo kay Jehova, kag pangabaya sia nga buligan ka nga mahangpan ang sitwasyon sang utod. Makabulig ini sa imo nga hunahunaon nga basi indi man hungod sang utod ang iya ginhambal ukon ginhimo kag patawaron sia. (Hulu. 19:11) Tandai nga kabalo si Jehova sang nagakatabo sa imo kag buligan ka niya nga makabatas.—2 Cron. 16:9; Man. 5:8.

6. Ngaa dapat naton hunahunaon nga ginadisiplina kita ni Jehova kay palangga niya kita? (Hebreo 12:5, 6, 11)

⁶ Masakit gid kon disiplinahon kita. Pero indi  kita dapat magpokus sa kasakit nga aton ginabatyag kay posible maghunahuna kita nga indi husto ang pagdisiplina sa aton. Bangod sini, posible nga indi na naton paghunahunaon nga ginadisiplina kita kay palangga kita ni Jehova. (Basaha ang Hebreo 12:5, 6, 11.) Kag kon magpaapekto kita sa kasakit nga aton ginabatyag, hingalitan ini ni Satanas para paluyahon kita. Gusto niya nga indi naton pagbatunon ang disiplina kag amat-amat kita nga mag-untat sa pag-alagad kay Jehova kag magpalayo sa kongregasyon. Kon gindisiplina ka, paano mo mahuptan ang imo ikasarang sa paghunahuna sing maayo?

7. (a) Pareho sang makita sa piktyur, paano ginpakamaayo ni Jehova si Pedro kay ginbaton niya ang disiplina? (b) Ano ang matun-an mo sa ginhimo ni Pedro?

⁷ Batuna ang disiplina, kag maghimo sang mga pagbag-o. Pila ka beses nga gintadlong ni Jesus si Pedro sa atubangan sang iban nga apostoles. (Mar. 8:33; Luc. 22:31-34) Posible nga nahuy-an gid si Pedro. Pero, padayon sia nga nangin matutom kay Jesus. Ginbaton niya ang pagdisiplina sa iya kag naghimo sia sang mga pagbag-o. Sang ulihi, ginpakamaayo ni Jehova si Pedro bangod sa iya katutom kag gintugyanan sia sang importante nga mga responsibilidad sa kongregasyon. (Juan 21:15-17; Binu. 10:24-33; 1 Ped. 1:1) Ano ang matun-an naton sa ginhimo ni Pedro? Posible nga mahuy-an kita kon gindisiplina kita. Pero kon indi kita magpokus sa aton ginabatyag, kon batunon naton ang pagtadlong sa aton, kag kon tinguhaan naton nga maghimo sang mga pagbag-o, maayo gid ang mangin epekto sini sa aton kag sa iban. Kon himuon naton ini, mas madamo pa gid kita sing mahimo sa aton pag-alagad kay Jehova kag mas makabulig kita sa aton mga kauturan.

8-9. Ano ang ginbatyag ni Bernardo sang gindisiplina sia, pero ano ang nakabulig sa iya nga bag-uhon ang iya panghunahuna?

⁸ Binagbinaga ang natabo kay Bernardo nga isa ka brother sa Mozambique. Ginkuha sa iya ang iya pribilehiyo bilang isa ka gulang. Ano ang ginbatyag ni Bernardo? Nagsiling sia, “Pamatyag ko indi gid husto ang pagdisiplina sa akon, gani naakig gid ako.” Nagalalain gid sia sa posible hunahunaon sang mga kauturan parte sa iya. Nagsiling sia, “Mga pila man ka bulan antes ko narealisar nga husto ang pagdisiplina sa akon kag magsalig liwat kay Jehova kag sa iya organisasyon.” Ano ang nakabulig kay Bernardo?

⁹ Ginbag-o ni Bernardo ang iya panghunahuna. Nagsiling sia: “Sang gulang pa ako, pirme ko ginapalig-on sa mga kauturan ang ginsiling sang Hebreo 12:7 nga dapat husto ang aton pagtamod sa pagdisiplina ni Jehova. Gani, ginhunahuna ko, ‘Sin-o ang dapat mag-aplikar sini nga teksto?’ Ang  tanan nga alagad ni Jehova pati ako.” Dayon may ginhimo nga mga pagbag-o si Bernardo para magsalig sia liwat kay Jehova kag sa Iya organisasyon. Gindugangan pa gid niya ang iya tion sa pagbasa sing Biblia kag ang iya pagpamalandong sa sini. Nagakabalaka sia gihapon sa ginahunahuna sang mga kauturan parte sa iya, pero padayon sia nga nag-upod sa ila sa pagbantala kag nagakomento man sia sa mga miting. Sang ulihi, gintangdo liwat si Bernardo nga isa ka gulang. Pareho kay Bernardo, posible nga mahuy-an ka kon gindisiplina ka. Pero imbes nga magpokus sa imo ginabatyag, dapat mo batunon ang laygay sa imo kag maghimo sang mga pagbag-o. c (Hulu. 8:33; 22:4) Kon himuon mo ini, pakamaayuhon ka gid ni Jehova kay nangin matutom ka sa iya kag sa iya organisasyon.

10. Ano nga pagbag-o ang nagtilaw sa katutom sang pila ka Israelinhon nga mga lalaki?

¹⁰ Posible matilawan ang aton katutom kon may mga pagbag-o sa organisasyon. Posible pa gani ini mangin rason para mag-untat kita sa pag-alagad kay Jehova. Halimbawa, binagbinaga ang natabo nga pagbag-o sang panahon sang mga Israelinhon. Antes ginhatag ni Jehova sa ila ang Mosaikong Kasuguan, ang mga ulo sang pamilya amo ang nagahimo sang mga responsibilidad nga ginahimo sang mga saserdote. Sila ang nagahimo sing mga halaran kag sila ang nagahalad kay Jehova para sa ila pamilya. (Gen. 8:20, 21; 12:7; 26:25; 35:1, 6, 7; Job 1:5) Pero sang ginpatuman na ang Kasuguan, indi na dapat paghimuon sang mga ulo sang pamilya ini nga mga responsibilidad. Nagtangdo si Jehova sang mga saserdote halin sa pamilya ni Aaron nga amo na ang magahalad. Sugod sadto, kon himuon sang isa ka ulo sang pamilya nga indi kaliwat ni Aaron ang mga responsibilidad sang mga saserdote, dapat sia patyon. d (Lev. 17:3-6, 8, 9) Posible ayhan nga ini nga pagbag-o amo ang rason kon ngaa nagrebelde kay Moises kag kay Aaron sanday Kora, Datan, Abiram, kag ang 250 ka mga pangulo? (Num. 16:1-3) Indi kita makasigurado. Pero ano man ang ila rason, kabalo kita nga si Kora kag ang iya mga kaupod wala nangin matutom kay Jehova. Kon nabudlayan ka nga sundon ang mga pagbag-o sa organisasyon, ano ang puede mo himuon?

11. Ano ang matun-an naton sa pila ka Kohatnon nga mga Levinhon?

¹¹ Sakdaga sing bug-os ang mga pagbag-o sa organisasyon. Sang nagalakbay ang mga Israelinhon sa kamingawan, ginhatagan sing pinasahi nga asaynment ang mga Kohatnon. Sa kada tion nga magsaylo sang kampo ang mga Israelinhon, ang pila sa mga Kohatnon amo ang nagadala sang kaban sang katipan kag sila ang nagauna sa paglakat. (Num. 3:29, 31; 10:33; Jos. 3:2-4) Dalayawon gid ang ila pribilehiyo. Pero sang nag-istar na ang mga Israelinhon sa Ginsaad nga Duta, may pagbag-o sa asaynment sang mga Kohatnon. Kay man, indi na kinahanglan pirme isaylo ang Kaban. Gani sang nangin hari si Solomon, ginpili niya ang pila ka Kohatnon nga mangin mga manug-amba, mga manugbantay sang gawang, kag mga manugdumala sang mga bodega. (1 Cron. 6:31-33; 26:1, 24) Wala gid kita sing mabasa nga nagreklamo ang mga Kohatnon ukon nagsiling sila nga dapat hatagan sila sing pinasahi nga asaynment kay importante ang asaynment nila sadto. Ano ang matun-an naton? Sakdaga sing bug-os ang mga pagbag-o sa organisasyon ni Jehova bisan pa may epekto ini sa imo asaynment. Panikasugi nga mangin malipayon bisan ano man nga asaynment ang ihatag sa imo. Tandai nga hamili ka kay Jehova kag wala ini nagadepende sa imo asaynment.  Mas importante kay Jehova ang imo pagkamatinumanon sangsa bisan ano nga pribilehiyo sa pag-alagad.—1 Sam. 15:22.

12. Ano ang ginbatyag ni Zaina sang nagbag-o ang iya asaynment?

¹² Binagbinaga ang natabo kay Zaina nga isa ka sister sa Middle East. Nanamian gid sia sa iya pribilehiyo, pero ginhatagan sia sang bag-o nga asaynment. Pagkatapos sang sobra 23 ka tuig niya nga pag-alagad sa Bethel, gin-asayn sia nga mag-alagad bilang espesyal payunir. Nagsiling sia: “Nakibot gid ako nga nagbag-o ang akon asaynment. Pamatyag ko indi na ako kinahanglan kag pirme ako nagapamensar, ‘May ginhimo bala ako nga indi maayo?’” Naglalain pa gid sia bangod sa ginsiling sang pila ka kauturan sa iya. Ginsilingan nila sia: “Siguro ara ka pa sa Bethel kon ginahimo mo sing maayo ang imo asaynment.” Nasubuan gid si Zaina amo nga nagahibi sia kada gab-i. Pero nagsiling sia: “Padayon ako nga nagsalig nga palangga ako sang organisasyon kag ni Jehova.” Paano nahuptan ni Zaina ang iya ikasarang sa paghunahuna sing maayo?

13. Ano ang ginhimo ni Zaina para mangin malipayon sia liwat?

¹³ Nasarangan ni Zaina nga mangin malipayon liwat. Paano? Ginbasa niya ang mga artikulo sa aton mga publikasyon nga nagabinagbinag parte sa iya sitwasyon kag nakabulig ini sa iya nga magbatas. Nakabulig gid sa iya ang artikulo nga “Malandas Mo ang Pagluya sing Buot!” sa Pebrero 1, 2001, nga Ang Lalantawan. Ginbinagbinag sa sini nga artikulo nga posible nagluya man ang buot sang manunulat sang Biblia nga si Marcos sang nagbag-o ang iya asaynment. Nagsiling si Zaina, “Nakabulig gid sa akon ang halimbawa ni Marcos nga madula ang pagluya sang akon buot.” Wala man nagpalayo si Zaina sa iya mga abyan. Padayon sia nga nagbantala upod sa mga kauturan, kag wala niya ginhunahuna nga wala sia sing pulos. Nahangpan niya nga ginatuytuyan sang balaan nga espiritu ang desisyon sang organisasyon ni Jehova kag palangga gid sia sang nagapanguna nga mga brother. Nahangpan man niya nga dapat himuon sang organisasyon sang Dios ang pinakamaayo para matuman ang hilikuton nga ginsugo ni Jehova.

14. Ano nga pagbag-o sa organisasyon ang nabudlayan ni Vlado nga sundon, kag ano ang nakabulig sa iya?

¹⁴ Binagbinaga ang eksperiensia ni Vlado nga 73 anyos nga gulang sa Slovenia. Naglalain gid sia sang gintingob ang ila kongregasyon sa isa pa ka kongregasyon kag indi na paggamiton ang ila Kingdom Hall. Nagsiling sia: “Nagapalibog ako kon ngaa indi na paggamiton ang Kingdom Hall kay katahom sini. Nasakitan gid ako kay bag-o  lang namon ini gin-renovate. Bangod panday ako, ako ang naghimo sang pila ka bag-o nga mga gamit sa Kingdom Hall. Kag bangod gintingob kami sa iban nga kongregasyon, kinahanglan namon mag-adjust kag mabudlay gid ini para sa amon nga mga tigulang.” Ano ang nakabulig kay Vlado nga sakdagon ini nga pagbag-o? Nagsiling sia: “Ang pagsunod sa mga pagbag-o sa organisasyon ni Jehova pirme gid nagaresulta sa mga pagpakamaayo. Makabulig ini sa aton nga sundon ang dalagku nga mga pagbag-o sa ulihi.” Nabudlayan ka bala nga sundon ang mga pagbag-o parte sa pagtingob sang mga kongregasyon ukon ang pagbag-o sang asaynment? Nahangpan ni Jehova ang imo ginabatyag. Kon sakdagon mo ini nga mga pagbag-o kag padayon ka nga mangin matutom kay Jehova kag sa iya organisasyon, pakamaayuhon ka gid niya.—Sal. 18:25.

15. Paano naton mahuptan ang aton ikasarang sa paghunahuna sing maayo kon may matabo sa sulod sang kongregasyon nga posible magtilaw sang aton katutom kay Jehova?

¹⁵ Malapit na gid matapos ining sistema sang mga butang. Pero may mga nagakatabo sa sulod sang kongregasyon nga posible magtilaw sang aton katutom kay Jehova. Gani, dapat naton huptan ang aton ikasarang sa paghunahuna sing maayo. Kon pamatyag mo indi maayo ang ginhimo sa imo sang isa ka utod, indi maghinakit. Kon gindisiplina ka, posible nga mahuy-an ka. Pero imbes nga magpokus sa imo ginabatyag, dapat mo batunon ang laygay kag maghimo sang mga pagbag-o. Kag kon may mga pagbag-o sa organisasyon ni Jehova nga makaapekto sa imo, sakdaga ini sing bug-os kag sunda ini.

16. Ano ang himuon mo para padayon ka nga magsalig kay Jehova kag sa iya organisasyon?

¹⁶ Padayon nga magsalig kay Jehova kag sa iya organisasyon kon ginatilawan ang imo katutom. Para mahimo ini, dapat mo huptan ang imo ikasarang sa paghunahuna sing maayo. Mapakita mo ini kon kalmado ka, nagapamensar sing maayo, kag ginatinguhaan mo nga mabal-an ang pagtamod ni Jehova. Tun-i kag pamalandungi ang mga ginhimo sang mga karakter sa Biblia nga nakaeksperiensia man sang imo sitwasyon. Mangamuyo kay Jehova nga buligan ka niya. Kag indi gid magpalayo sa kongregasyon. Kon himuon mo ini, indi ka gid mapauntat ni Satanas sa pag-alagad kay Jehova kag indi gid niya maguba ang imo pagsalig sa organisasyon ni Jehova.—Sant. 4:7.