TULUN-AN NGA ARTIKULO 47
Indi Gid Mag-untat sa Pag-alagad kay Jehova
“Nagasalig ako sa imo, O Jehova.”—SAL. 31:14.
AMBAHANON 122 Mangin Malig-on kag Mapag-on!
ANG BINAGBINAGON SA SINI NGA ARTIKULO a
1. Ngaa masiling naton nga gusto ni Jehova nga mangin suod kita sa iya?
GINAAGDA kita ni Jehova nga mangin suod sa iya. (Sant. 4:8) Gusto niya nga mangin Dios naton sia, aton Amay, kag aton Abyan. Ginasabat niya ang aton mga pangamuyo kag ginabuligan niya kita kon may mga problema kita. Kag paagi sa iya organisasyon, ginatudluan niya kita kag ginaamligan. Pero ano ang himuon naton para mangin suod kita kay Jehova?
2. Ano ang himuon naton para mangin suod kita kay Jehova?
2 Mangin suod kita kay Jehova kon mangamuyo kita sa iya kag basahon naton ang iya Pulong kag pamalandungan ini. Makabulig ini sa aton nga palanggaon sia kag pasalamatan. Magapalig-on man ini sa aton nga tumanon sia kag dayawon kay takus gid sia sa sini. (Bug. 4:11) Importante gid nga makilala naton sing maayo si Jehova kay magabulig ini sa aton nga magsalig pa gid sa iya kag sa iya organisasyon nga ginagamit niya para buligan kita.
3. Paano ginatinguhaan sang Yawa nga mag-untat kita sa pag-alagad kay Jehova, pero ano ang makabulig sa aton para indi kita magbiya sa aton Dios kag sa iya organisasyon? (Salmo 31:13, 14)
3 Pero, ginatinguhaan sang Yawa nga mag-untat kita sa pag-alagad kay Jehova kon makaeksperiensia kita sing mga kabudlayan. Paano niya ini ginahimo? Amat-amat niya nga ginaguba ang aton pagsalig kay Jehova kag sa iya organisasyon. Pero may mahimo kita para indi niya kita madaug. Dapat mabakod ang aton pagtuo kag pagsalig kay Jehova kay magabulig ini sa aton nga indi magbiya sa aton Dios kag sa iya organisasyon.—Basaha ang Salmo 31:13, 14.
4. Ano ang binagbinagon naton sa sini nga artikulo?
4 Sa sini nga artikulo, binagbinagon naton ang tatlo ka kabudlayan nga posible himuon sa aton sang mga indi Saksi. Ang kada isa sini posible makaguba sang aton pagsalig kay Jehova kag sa iya organisasyon. Paano ini nga mga kabudlayan posible mangin rason para mag-untat kita sa pag-alagad kay Jehova? Kag ano ang himuon naton para indi kita madaug ni Satanas?
KON MAY MGA PROBLEMA KITA
5. Paano ang mga problema makaguba sang aton pagsalig kay Jehova kag sa iya organisasyon?
5 May mga tion nga makaeksperiensia kita sang mga problema. Halimbawa, posible pamatukan kita sang aton pamilya ukon madulaan kita sang obra. Paano ini nga mga problema makaguba sang aton pagsalig sa organisasyon ni Jehova kag mangin rason nga mag-untat kita sa pag-alagad sa iya? Kon may mga problema kita nga madugay na naton nga ginabatas, posible madulaan kita sang paglaum kag masubuan. Ginahingalitan ini ni Satanas kay gusto niya nga hunahunaon naton nga indi kita palangga ni Jehova. Gusto sang Yawa nga basulon naton si Jehova ukon ang Iya organisasyon sa aton mga problema. Amo ini ang natabo sa pila ka Israelinhon sa Egipto. Sang primero, nagapati sila nga gintangdo ni Jehova si Moises kag si Aaron para luwason sila sa ila pagkaulipon. (Ex. 4:29-31) Pero sang ginpabudlayan pa gid sila sang Paraon, ginbasol nila si Moises kag si Aaron sa ila mga problema. Ginsilingan nila si Moises kag si Aaron: “Bangod sa inyo naakig sa amon ang Paraon kag ang iya mga alagad. Kamo ang nagbutang sing espada sa ila kamot agod patyon kami.” (Ex. 5:19-21) Indi gid maayo ang ila ginhimo kay ginbasol nila ang matutom nga mga alagad sang Dios. Kon may mga problema ka kag madugay mo na ini nga ginabatas, ano ang himuon mo para padayon ka nga magsalig kay Jehova kag sa iya organisasyon?
6. Ano ang matun-an naton kay manalagna Habacuc kon paano naton mabatas ang aton mga problema? (Habacuc 3:17-19)
6 Isugid kay Jehova sa pangamuyo ang tanan mo nga ginabatyag, kag magpabulig sa iya. Madamo nga problema ang naeksperiensiahan ni manalagna Habacuc. May tion nga ginhunahuna niya nga wala nagaulikid si Jehova sa iya. Gani ginsugid niya kay Jehova sa pangamuyo ang tanan niya nga ginabatyag. Nagsiling sia: “O Jehova, tubtob san-o ako manawag sa imo, agod pamatian mo ako? . . . Ngaa ginapabay-an mo lang ang pagpamigos?” (Hab. 1:2, 3) Ginsabat ni Jehova ang sinsero nga pangamuyo sang iya matutom nga alagad. (Hab. 2:2, 3) Ginpamalandungan ni Habacuc kon paano ginluwas ni Jehova ang iya katawhan, gani nangin malipayon sia liwat. Nagsalig sia nga nagaulikid si Jehova sa iya kag buligan niya sia nga mabatas ang bisan ano nga kabudlayan. (Basaha ang Habacuc 3:17-19.) Ano ang matun-an naton? Kon may mga problema ka, mangamuyo kay Jehova kag isugid sa iya kon ano gid ang imo ginabatyag. Dayon, magpabulig sa iya. Makasalig ka nga buligan ka gid ni Jehova nga mabatas ang imo mga problema. Kag sa kada tion nga ginabuligan ka ni Jehova, magabakod pa gid ang imo pagtuo sa iya.
7. Ano ang gusto sang isa ka paryente ni Shirley nga matabo, kag ano ang nakabulig kay Shirley para indi sia mag-untat sa pag-alagad kay Jehova?
7 Padayon nga himua ang mga hilikuton nga nagapasuod sa imo kay Jehova. Amo ini ang nakabulig kay Shirley nga isa ka sister sa Papua New Guinea sang may mga problema sia. b Pigado ang pamilya ni Shirley amo nga kon kaisa indi bastante ang ila pagkaon. Gusto sang isa niya ka paryente nga maguba ang iya pagsalig kay Jehova. Nagsiling ang iya paryente: “Siling mo ginabuligan ka sang balaan nga espiritu sang Dios, pero daw wala man. Pigado man gihapon ang inyo pamilya. Ginausikan mo lang ang imo oras sa pagbantala.” Nagsiling si Shirley: “Naghunahuna ako: ‘Nagaulikid gid bala ang Dios sa amon?’ Nangamuyo ako dayon kay Jehova kag ginsugid ko sa iya ang tanan ko nga ginahunahuna. Wala ako nag-untat sa pagbasa sing Biblia kag sang aton mga publikasyon, kag nagpadayon ako sa pagbantala kag pag-attend sa mga miting.” Sang ulihi, narealisar ni Shirley nga nagaulikid si Jehova sa ila pamilya. Wala nagakagutman ang ila pamilya, kag malipayon sila. Si Shirley nagsiling: “Ginsabat gid ni Jehova ang akon mga pangamuyo.” (1 Tim. 6:6-8) Kon padayon mo nga himuon ang mga hilikuton nga nagapasuod sa imo kay Jehova, makabulig ini sa imo nga indi magduhaduha kag indi mag-untat sa pag-alagad kay Jehova bisan ano man ang imo mga problema.
KON GINAHINGABOT ANG NAGAPANGUNA NGA MGA BROTHER
8. Ano ang posible matabo sa nagapanguna nga mga brother sa organisasyon ni Jehova?
8 Sa mga balita kag social network, nagapalapta ang aton mga kaaway sing kabutigan kag indi matuod nga impormasyon parte sa nagapanguna nga mga brother sa organisasyon ni Jehova. (Sal. 31:13) Ang pila ka brother gindakop kag ginkasuhan nga daw mga kriminal. Sang unang siglo, gindakop si apostol Pablo kag gin-akusahan sia nga wala sing basihan. Ano ang reaksion sang mga Cristiano sa sini?
9. Ano ang reaksion sang pila ka Cristiano sang ginpriso si apostol Pablo?
9 Sang ginpriso si apostol Pablo sa Roma, wala na sia ginsuportahan sang pila ka Cristiano sadto. (2 Tim. 1:8, 15) Ngaa? Nahuya bala sila kay para sa mga tawo isa ka kriminal si Pablo? (2 Tim. 2:8, 9) Ukon nahadlok bala sila kay basi sila naman ang hingabuton? Bisan ano man ang ila rason, sigurado nga nasubuan gid si Pablo. Madamo sia sing ginbatas nga mga kabudlayan kag ginrisgo pa gani niya ang iya kabuhi para sa ila. (Binu. 20:18-21; 2 Cor. 1:8) Indi gid naton dapat pagsundon ang ginhimo sang mga utod nga nagbiya kay Pablo sang kinahanglan niya ang bulig. Ano ang dapat naton dumdumon kon ginahingabot ang nagapanguna nga mga brother?
10. Ano ang dapat naton dumdumon kon ginahingabot ang nagapanguna nga mga brother, kag ngaa?
10 Dapat naton dumdumon kon ngaa ginahingabot kita kag kon sin-o gid ang nagahingabot sa aton. Ang 2 Timoteo 3:12 nagsiling: “Ang tanan nga luyag magkabuhi nga may diosnon nga debosyon may kaangtanan kay Cristo Jesus pagahingabuton man.” Gani indi na kita makibot nga ang nagapanguna nga mga brother amo gid ang ginahingabot ni Satanas. Gusto niya nga mag-untat sila sa pag-alagad kay Jehova kag pahugon kita.—1 Ped. 5:8.
Sang ginpriso si Pablo, maisog sia nga ginbuligan ni Onesiforo sa iya mga kinahanglanon. Subong, ginabuligan man sang mga kauturan ang ila mga utod nga napriso, kag amo ini ang ginapakita sang piktyur (Tan-awa ang parapo 11-12)
11. Ano ang matun-an naton kay Onesiforo? (2 Timoteo 1:16-18)
11 Padayon nga buligi ang imo mga kauturan kag unungi sila. (Basaha ang 2 Timoteo 1:16-18.) Sang ginpriso si Pablo, lain gid ang nangin reaksion ni Onesiforo nga isa ka Cristiano sang unang siglo. ‘Wala niya ginkahuya ang mga kadena sang pagkabilanggo ni Pablo.’ Sa baylo, ginrisgo ni Onesiforo ang iya kabuhi para pangitaon si Pablo. Kag sang nakita na niya sia, ginbuligan niya si Pablo sa iya mga kinahanglanon. Ano ang matun-an naton? Indi kita dapat mahadlok sa pagbulig sa aton mga kauturan nga ginahingabot. Dapat naton himuon ang aton bug-os nga masarangan para buligan sila. (Hulu. 17:17) Dapat mabatyagan nila nga palangga naton sila kag nagaulikid kita sa ila.
12. Ano ang matun-an naton sa aton mga kauturan sa Russia?
12 Maayo gid nga halimbawa ang mga kauturan sa Russia sa pagbulig sa ila pinalangga nga mga utod nga ginpriso. Sang gina-hearing ang kaso sang pila ka utod, madamo nga kauturan ang nagkadto sa korte para suportahan sila. Ano ang matun-an naton? Indi kita dapat mahadlok kon ang nagapanguna nga mga brother ginapakalain, gindakop, ukon ginahingabot. Dapat naton sila ipangamuyo, buligan ang mga miembro sang ila pamilya, kag hunahunaon naton sing maayo kon ano pa ang mabulig naton sa ila.—Binu. 12:5; 2 Cor. 1:10, 11.
KON GINAPAKALAIN KITA
13. Paano ang pagpakalain makaguba sang aton pagsalig kay Jehova kag sa iya organisasyon?
13 Posible nga pakalainon kita sang aton indi Saksi nga mga paryente, kaupod sa trabaho, ukon sa eskwelahan bangod nagabantala kita ukon bangod ginasunod naton ang mga kasuguan ni Jehova. (1 Ped. 4:4) Posible magsiling sila: “Nanamian ako sa imo, pero grabe ka estrikto sang inyo relihion kag daw ka dinumaan na.” Posible nga pakalainon naman kita sang iban bangod sa aton pagtratar sa mga na-disfellowship. Posible magsiling sila, “Abi ko mahigugmaon ka nga tawo.” Kon silingan kita sini, posible nga maghunahuna kita kon bala makatarunganon gid man ang mga kasuguan ni Jehova. Basi maghunahuna kita: ‘Makatarunganon bala ang ginapahimo ni Jehova sa akon? Tama bala ka estrikto sang iya organisasyon?’ Kon amo sini ang imo ginahunahuna, ano ang makabulig sa imo para padayon ka nga mangin matutom kay Jehova kag sa iya organisasyon?
Sang ginpakalain si Job sang iya indi matuod nga mga abyan, wala ginpatihan ni Job ang ila kabutigan. Sa baylo, handa si Job nga padayon nga mangin matutom kay Jehova (Tan-awa ang parapo 14)
14. Ano ang himuon naton kon pakalainon kita sang iban bangod ginatuman naton ang mga kasuguan ni Jehova? (Salmo 119:50-52)
14 Padayon nga tumana ang mga kasuguan ni Jehova. Ginpakalain si Job bangod gintuman niya ang mga kasuguan ni Jehova, pero padayon niya ini nga gintuman. Ginsilingan pa sia gani sang isa niya ka indi matuod nga abyan nga bisan pa tumanon ni Job ang mga kasuguan sang Dios ukon indi, wala kuno labot sa sini ang Dios. (Job 4:17, 18; 22:3) Pero wala nagpati si Job sa sini nga kabutigan. Para sa iya, insakto gid ang mga kasuguan sang Dios parte sa husto kag sala, kag gusto niya nga tumanon ini pirme. Wala sia nagpaapekto sa ginsiling sang iban, kundi padayon sia nga nangin matutom sa Dios. (Job 27:5, 6) Ano ang matun-an naton? Dapat naton padayon nga tumanon ang mga kasuguan ni Jehova bisan pa pakalainon kita sang iban. Hunahunaa sing maayo ang imo kabuhi. Sigurado nga madamo nga beses mo na nga naeksperiensiahan ang maayo nga resulta sang pagsunod sa mga kasuguan ni Jehova. Gani padayon nga sakdaga ang organisasyon nga nagatuman sa sini nga mga kasuguan. Makabulig ini sa imo nga indi mag-untat sa pag-alagad kay Jehova bisan ano pa nga pagpakalain ang himuon sang iban sa imo.—Basaha ang Salmo 119:50-52.
15. Ngaa ginpakalain si Brizit?
15 Binagbinaga ang eksperiensia ni Brizit nga isa ka sister sa India. Ginpakalain sia sang iya pamilya bangod sa iya pagtuo. Nabawtismuhan sia sang 1997. Wala madugay pagkatapos sini, nadulaan sing obra ang iya indi Saksi nga bana. Gani nagdesisyon ang iya bana nga masaylo sila nga mag-asawa upod sa ila mga bata nga babayi sa mga ginikanan sang iya bana nga nagaistar sa iban nga siudad. Pero indi lang amo sini ang problema ni Brizit. Bangod wala sing obra ang iya bana, nag-obra si Brizit sing full-time para masuportahan ang ila pamilya. Magluwas sina, mga 350 ka kilometro ang kalayuon sang pinakamalapit nga kongregasyon sa ila lugar. Nasubuan gid sia kay ginpamatukan sia sang pamilya sang iya bana. Grabe gid ang pagpamatok kay Brizit amo nga nagsaylo liwat ang ila pamilya. Dayon, wala gid niya ginapaabot nga mapatay ang iya bana. Sang ulihi, napatay ang 12 anyos niya nga bata nga babayi bangod sa kanser. Naglalain pa gid si Brizit kay sia ang ginabasol sang iya mga paryente sa mga natabo. Nagsiling sila nga wala kuno ini kuntani natabo kon wala sia nangin Saksi ni Jehova. Pero padayon sia nga nagsalig kay Jehova kag sa iya organisasyon.
16. Paano ginpakamaayo si Brizit bangod padayon sia nga nagsalig kay Jehova kag sa iya organisasyon?
16 Bangod malayo ang ginaistaran ni Brizit sa kongregasyon, ginpalig-on sia sang manugtatap sang sirkito nga magbantala sia sa ila lugar kag maghiwat sia sing mga miting sa iya balay. Nabudlayan gid sia sang primero. Pero ginsunod niya ang ginsiling sang manugtatap sang sirkito. Nagbantala sia sang maayong balita sa iban, naghiwat sia sing mga miting sa iya balay, kag regular sila nga naga-family worship sang iya mga bata nga babayi. Ano ang resulta? Madamo sing Bible study si Brizit kag madamo sa ila ang nabawtismuhan. Nangin regular payunir sia sang 2005. Bangod nagsalig sia kay Jehova kag sa iya organisasyon, ginpakamaayo gid ni Jehova si Brizit. Matutom nga nagaalagad kay Jehova ang iya mga bata nga babayi, kag may duha na subong ka kongregasyon sa ila lugar. Para kay Brizit, nabatas niya ang iya mga problema kag ang pagpakalain sang iya pamilya bangod ginbuligan sia ni Jehova.
PADAYON NGA MANGIN MATUTOM KAY JEHOVA KAG SA IYA ORGANISASYON
17. Ano ang dapat naton himuon?
17 Ginapapati kita ni Satanas nga ginapabay-an kita ni Jehova kon may mga problema kita kag mabudlayan pa gid kita kon magpabilin kita sa organisasyon ni Jehova. Gusto ni Satanas nga mahadlok kita kon ang nagapanguna nga mga brother ginapakalain, ginahingabot, ukon ginpriso. Kag ginaguba ni Satanas ang aton pagsalig sa mga kasuguan ni Jehova kag sa Iya organisasyon paagi sa pagpakalain sa aton. Pero, wala kita nagapaapekto sa sini kay kabalo kita nga ginagamit ini sang Yawa para mag-untat kita sa pag-alagad. (2 Cor. 2:11) Dapat gid naton isikway ang mga kabutigan ni Satanas kag dapat padayon kita nga mangin matutom kay Jehova kag sa Iya organisasyon. Tandai nga indi gid kita pagbiyaan ni Jehova. (Sal. 28:7) Gani, indi gid kita dapat mag-untat sa pag-alagad kay Jehova.—Roma 8:35-39.
18. Ano ang binagbinagon naton sa masunod nga artikulo?
18 Sa sini nga artikulo, ginbinagbinag naton ang mga kabudlayan nga posible himuon sa aton sang mga indi Saksi. Pero posible man maguba ang aton pagsalig kay Jehova bangod sa nagakatabo sa sulod sang kongregasyon. Ano ang himuon naton kon matabo ini? Binagbinagon naton ini sa masunod nga artikulo.
AMBAHANON 118 “Dugangi ang Amon Pagtuo”
a Para makabatas kita kag mangin matutom sa sining katapusan nga mga adlaw, dapat padayon kita nga magsalig kay Jehova kag sa iya organisasyon. Pero ginatinguhaan sang Yawa nga gub-on ini nga pagsalig. Binagbinagon sa sini nga artikulo ang tatlo ka butang nga ginahimo sang Yawa, kag kon ano ang himuon naton para padayon kita nga mangin matutom kay Jehova kag sa Iya organisasyon.
b Gin-islan ang pila ka ngalan.