Ano ang Puede Mo Himuon Para Mangin Regular ang Imo Pagtuon?
NABUDLAYAN ka bala nga himuon nga regular ang imo pagtuon kada semana, ukon may mga tion bala nga natak-an ka magtuon? Posible gid nga nabatyagan naton ini kon kaisa. Pero hunahunaa ang pila ka hilikuton nga ginahimo naton sing regular pareho sang pagpaligo. Kinahanglan ini sang tion kag pagpanikasog. Pero, sigurado gid nga naganami ang aton pamatyag pagkatapos naton maligo. Makaparepresko man ang pagtuon sang Biblia ukon ang ‘pagpaninlo sa tubig, nga amo ang pulong sang Dios.’ (Efe. 5:26) Binagbinaga ining pila ka panugda nga makabulig sa imo:
Maghimo sang iskedyul. Nalakip sa “mas importante nga mga butang” nga dapat naton himuon ang personal nga pagtuon sang Biblia. (Fil. 1:10) Para indi ka malipat sa imo iskedyul, isulat ini sa papel kag ipatapik ini sa lugar nga makita mo dayon. Puede ka man magpa-alarm sa imo gadyet nga magapahanumdom sang imo iskedyul sang pagtuon.
Himua ang imo pagtuon sa oras kag sa paagi nga nagakabagay sa imo sitwasyon. Kon parte sa pagtuon, ano ang mas mahapos para sa imo? Halimbawa, mas mahapos bala para sa imo nga magpokus kon magtuon ka sing isa ka oras? Ukon mas mahapos bala para sa imo nga magtuon sa malip-ot lang nga tion pero himuon ini sing pila ka beses kada semana? Ikaw ang nakabalo kon ano ang pinakamaayo para sa imo. Gani himua ang imo iskedyul suno sa imo masarangan. Kon daw wala ka gana magtuon kon iskedyul mo na sa pagtuon, panikasugi nga magtuon bisan pulo lang ka minuto. Mas maayo nga magtuon ka sa sulod sang pulo ka minuto sangsa indi ka na gid magtuon. Kag posible nga manamian ka na magtuon pagkatapos sang pulo ka minuto.—Fil. 2:13.
Abanse nga magpili sang topiko. Kon sa tion sang imo pagtuon ka pa lang mapili sang topiko nga gusto mo tun-an, wala mo ‘ginagamit sing maayo ang imo tion.’ (Efe. 5:16) Testingi nga isulat ang mga topiko nga gusto mo tun-an. Kon may mapensaran ka nga pamangkot, isulat ini dayon. Kag sa kada tapos mo tuon, puede mo dugangan ang imo listahan sang mga topiko.
Mangin flexible. Panikasugi nga mangin flexible sa tion nga ginagamit mo sa imo pagtuon ukon sa topiko nga gusto mo tun-an. Ang pinakaimportante indi ang kon san-o ka nagatuon, daw ano kalawig ka nagatuon, ukon ano ang imo ginatun-an, kundi regular ka nga nagatuon kada semana.
Makabenepisyo gid kita kon regular kita nga nagatuon kada semana. Mangin suod pa gid kita kay Jehova, makahimo kita sang maayo nga mga desisyon, kag mangin malig-on kita.—Jos. 1:8.
