Paul: Sang Nobiembre 1985, nagbiyahe kami paagi sa eroplano pakadto sa amon pinakauna nga asaynment bilang mga misyonero sa Liberia, West Africa. Excited gid kami sadto nga tion. Pero naghapit anay ang eroplano sa Senegal. Dayon ginsilingan ako ni Anne, “Sulusobra na lang isa ka oras kag makaabot na kita sa Liberia.” Pero may gin-announce sa airport: “Ang tanan nga pasahero nga pakadto sa Liberia dapat manaug sa eroplano. Kanselado ang mga biyahe pakadto sa Liberia bangod may kudeta didto subong.” Gani nagtener anay kami sing pulo ka adlaw sa ginaistaran sang mga misyonero sa Senegal. Sadto nga tion, mabatian namon sa mga balita nga madamo nga tawo ang ginpamatay sa Liberia, kag ginatiro ang mga wala nagatuman sa curfew sang gobierno.

Anne: Ginakulbaan kami sa delikado nga mga sitwasyon, gani nagahalong gid kami. Ang matuod, halin sang bata pa ako, ginatawag ako sang mga tawo nga Nene Nerbiosa. Kay man, ginanerbios ako bisan magtabok lang sa dalan. Pero gusto gid namon magkadto sa Liberia bisan pa nga delikado didto.

Paul: Natawo kami ni Anne sa katundan sang England. Walo ka kilometro lang ang kalayuon sang amon lugar sa ila lugar. Pirme kami ginapalig-on sang akon mga ginikanan kag sang nanay ni Anne nga magpayunir, gani nagpayunir kami dayon pagkatapos namon high school. Ginsuportahan gid nila ang amon handum nga mag-alagad sing bug-os tion. Sang nag-19 anyos ako, ginpatawag ako sa Bethel. Sang ulihi, nagpakasal kami ni Anne sang 1982, kag magkaupod kami nga nag-alagad sa Bethel.

Anne: Nanamian kami sa Bethel. Pero, handum gid namon nga mag-alagad sa lugar nga nagakinahanglan sang dugang nga manugbantala. Nakaupod namon sa Bethel ang mga misyonero sang una, gani nagbaskog pa gid ang amon handum nga mangin misyonero man. Sa sulod sang tatlo ka tuig, ginapangamuyo namon kada gab-i ang amon handum nga mangin misyonero. Sang 1985, nalipay gid kami sang nakabaton kami sang imbitasyon nga mag-eskwela sa ika-79 nga klase sang Gilead. Paggradweyt namon, gin-asayn kami sa Liberia, West Africa.

Paul: Sang may biyahe na liwat pakadto sa Liberia, nagsakay kami dayon sa pinakauna nga flight pakadto didto. Ginakulbaan ang mga tawo sa ila sitwasyon kag may ginapatuman gihapon nga curfew. Bisan gani maglupok lang ang tambutso sang isa ka salakyan, nagasiniyagit na dayon ang mga tawo kag nagadinalagan. Para makapabilin kami nga kalmado, ginabasa namon nga magkaupod ang libro sang Salmo kada gab-i. Bisan pa mabudlay ang  sitwasyon, nanamian gid kami sa amon asaynment. Nagabantala si Anne adlaw-adlaw, kag nagaalagad ako sa Bethel upod kay John Charuk. a Madamo gid ako sing natun-an sa iya bangod madugay na sia sa Liberia, kag kabalo gid sia sang kahimtangan sang mga kauturan.

Anne: Ngaa nanamian gid kami dayon sa amon asaynment sa Liberia? Bangod sa aton mga kauturan. Ginpabatyag nila sa amon nga palangga gid nila kami, kag matutom sila sa ila pag-alagad. Nangin suod gid kami sa ila kag daw pamilya na namon sila. Napalig-on gid kami sa ila mga laygay. Kanami gid mag-preaching didto. Maugot pa gani ang mga tawo kon indi kami makapadugay istorya sa ila. Bisan sa mga dalan, may makita kami nga mga tawo nga nagaistoryahanay parte sa Biblia. Kag puede lang kami makaentra sa ila. Madamo gid kami sing Bible study, kag nabudlayan kami sa pag-iskedyul sang tion para ma-studyhan sila tanan. Pero nanamian kami sa sini nga problema.

Paul: Medyo nagkalma ang sitwasyon sa Liberia sa sulod sang apat ka tuig. Pero sang 1989, gulpi lang nagbag-o ang sitwasyon sang nag-umpisa ang inaway sa Liberia. Sang Hulyo 2, 1990, nasakop sang mga rebelde ang lugar sa palibot sang Bethel. Sa sulod sang tatlo ka bulan, wala gid kami sing may nakontak sa gua sang pungsod, lakip na ang amon pamilya kag ang world headquarters. Grabe kagamo sang sitwasyon, maiwat ang pagkaon, kag madamo nga babayi ang ginlugos. Bilog nga pungsod ang naapektuhan sini nga inaway, kag nagdugay ini sing 14 ka tuig.

Anne: Nagailinaway kag nagapinatyanay ang mga miembro sang pila ka tribo. Madamo sa sini nga mga rebelde ang ara sa mga dalan, kag may dala sila nga mga armas. Lain sa iban ang ila mga bayo, kag ginasulod nila ang mga balay kag ginakuha nila ang tanan nga gusto nila. Pamatyag sang iban daw nagaihaw lang sila sang mga manok kon makapatay sila sang mga tawo. Nagatinumpok lang ang mga bangkay sa mga checkpoint, kag malapit lang sa Bethel ang iban sa sini. May napatay man nga matutom nga mga Saksi, lakip na ang duha naton ka pinalangga nga mga misyonero.

Bangod nagapinatyanay ang pila ka tribo, ginrisgo sang mga Saksi ang ila kabuhi paagi sa pagtago sa aton mga kauturan nga miembro sang sini nga mga tribo. Gintago man sang mga misyonero kag sang mga Bethelite ang mga kauturan. May pila ka Saksi nga nagpalagyo sa Bethel. May pila nga nagtulog sa first floor, kag may pila nga nagtulog sa second floor sa mga kuarto sang mga Bethelite. Upod namon sa amon kuarto ang isa ka pamilya nga may pito ka miembro.

Paul: Kada adlaw, may mga rebelde nga gusto magsulod sa Bethel para tan-awon kon may ginatago kami nga mga tawo. Kada matabo ini, duha sa amon ang nagakadto sa gate sang Bethel para istoryahon sila, kag may duha nga nagapuesto sa bintana nga nagatan-aw sa amon. Ginatan-aw sang mga ara sa bintana kon diin ginabutang sang mga ara sa gate ang ila mga kamot. Kon ara ini  sa ila atubangan, ginapahangop sini nga indi delikado ang sitwasyon. Pero kon ibutang nila ang ila mga kamot sa ila likod, ginapahangop sini nga gusto gid magsulod sang mga rebelde. Gani, dapat taguon dayon sang duha nga nagapuesto sa bintana ang amon mga abyan.

Anne: Pagligad sang madamo nga semana, nakasulod gid sa Bethel ang isa ka grupo sang akig nga mga rebelde. Gani nagpanago ako kag ang isa pa ka sister sa banyo kag gin-lock ko ini. May kabinet kami sa banyo nga may sekreto nga palanaguan, kag insaktuhan lang gid ang kadakuon sini para sa sister. Pero ginsundan ako sang mga rebelde kag may dala sila nga mga armas. Akig gid sila kag ginapilit nila nga buksan ang puertahan sang banyo. Pero ginpunggan sila ni Paul kag ginsilingan niya sila nga ginagamit ko ang banyo. Sang ginsira ko ang sekreto nga palanaguan nga ginpanaguan sang sister, medyo magahod ini. Kag nadugayan ako sa pagplastar liwat sang mga unod sang kabinet. Sigurado ako nga nagasuspetsa ang mga rebelde kon ano ang ginahimo ko, gani nagpalangurog ang bilog ko nga lawas sa kakulba. Kinahanglan ko magkalma antes ko buksan ang puertahan. Gani nangamuyo ako kay Jehova nga buligan niya ako. Sang ginbuksan ko ang puertahan, kalmado na ako. Gintiklod ako sang isa ka akig nga rebelde kag nagdiretso sia sa kabinet. Ginbuksan niya ini kag gin-ukay niya ang unod sini. Daw indi sia makapati nga wala gid sia sing nakita nga iban nga tawo. Dayon ginkadtuan niya kag sang iya grupo ang iban pa nga mga kuarto kag ang kuarto sa atop. Kag wala man sila sing nakita didto.

Paul: Kulang ang amon pagkaon sa sulod sang madamo nga binulan. May mga tion nga wala kami sing pagkaon para sa pamahaw, pero ginapabakod kami sang morning worship sa Bethel. Daw pareho ini sa pamahaw nga nagahatag sa amon sing kusog para sa bilog nga adlaw.

Kabalo kami nga kon magua kami sa Bethel para mangita sing pagkaon ukon tubig, indi namon maproteksionan ang mga nagapanago sa Bethel kag posible gid nga patyon sila. Pero, tayming gid kon maghatag si Jehova sang amon mga kinahanglanon. Nahunahuna pa gani namon nga daw nagahimo sia sang milagro. Gin-atipan gid kami ni Jehova kag ginbuligan niya kami nga mangin kalmado.

Samtang nagadulom ang sitwasyon sang pungsod, nagasanag naman ang kapawa sang kamatuoran. Madamo nga kauturan ang kinahanglan magpalagyo sing madamo nga beses, pero wala gid nagluya ang ila pagtuo kag kalmado lang sila bisan sa mabudlay nga mga sitwasyon. Ang pila sa ila nagsiling nga ang ila mga naeksperiensiahan sa tion sang inaway “naghanas sa ila para sa dakung kapipit-an.” Maisog gid ang mga gulang kag ang pamatan-on nga mga brother sa pagbulig sa mga kauturan. Nagbuligay ang mga kauturan nga nagpalagyo sa iban nga mga lugar, kag nagbantala sila sa sini nga mga lugar. Nagamiting sila sa simple nga mga Kingdom Hall nga ginhimo nila gamit ang mga materyales nga makita nila sa kagulangan. Sa tion sang kabudlayan, nakabulig gid sa mga kauturan ang mga miting kag ang ila pagbantala sa iban. Sang nagpanagtag kami sang mga kinahanglanon sang mga kauturan, madamo sa ila ang nangayo sang bag nga pang-preaching imbes nga mga bayo. Napalig-on gid kami sa ila. Madamo nga tawo ang gusto mamati sang maayong balita bangod sang ila mga naeksperiensiahan sa tion sang inaway. Nakita nila nga lain gid  kita nga mga Saksi kay nagapalanggaanay kita kag malipayon gihapon kita bisan sa mabudlay nga mga sitwasyon. Daw kapawa sa madulom nga lugar ang mga kauturan. (Mat. 5:​14-16) Bangod mapisan gid magbantala ang mga kauturan, nangin Saksi ang pila ka bayolente nga mga rebelde.

Paul: May mga tion nga kinahanglan namon maggua sa Liberia. Lima ka beses kami nga naggua. Ang tatlo ka beses, nakabalik man kami dayon. Pero ang duha ka beses, naglawig ini sing isa ka tuig. May ginsiling ang isa ka misyonero nga sister nga nagapaathag sang amon ginbatyag sadto nga tion. Nagsiling sia: “Gintudluan kita sa Gilead nga dapat naton palanggaon ang aton mga kauturan kag ang aton mga asaynment sing bug-os tagipusuon, kag ginhimo gid naton ini. Gani kon biyaan naton ang aton mga kauturan sa tion sang kabudlayan, pamatyag naton daw ginakumos ang aton dughan.” Pero nalipay man kami kay makabulig kami gihapon sa hilikuton sa Liberia kay malapit lang ang mga pungsod nga ginkadtuan namon.

Anne: Sang Mayo 1996, apat sa amon ang nagsakay sa salakyan nga ginapanag-iyahan sang Bethel, kag dala namon ang importante nga mga dokumento parte sa hilikuton sa Liberia. Makadto tani kami sa isa ka safe nga lugar nga 16 ka kilometro ang kalayuon. Pero, ginsalakay ang amon lugar. Ginpalupok sang akig nga mga rebelde ang ila mga armas, ginpadulog nila ang amon salakyan, ginpagua nila kami nga tatlo, kag gindala nila ang salakyan nga ara pa si Paul sa sulod. Naurungan kami nga tatlo. Sang ulihi, nakita namon si Paul nga nagalakat pakadto sa amon kag may nagatulo nga dugo sa iya agtang. Abi namon gintiro sia. Pero, narealisar namon nga indi kuntani sia makalakat kon gintiro gid man sia. Ginsumbag gali sia sang isa ka rebelde sang ginpagua sia sa salakyan. Maayo lang kay gamay lang ang iya pilas.

May nakita kami nga isa ka salakyan sang mga soldado nga puno sang nakulbaan nga mga tawo. Nagdesisyon kami nga magkabit sa sini nga salakyan bisan pa daw wala na kami sing mauyatan. Grabe kadasig sang pagpadalagan sang drayber, gani daw mahulog kami sa salakyan. Ginasinggitan namon sia nga magdulog, pero wala gid sia nagdulog bangod sa iya kakulba. Daw indi kami makapati nga wala kami nahulog. Pero pag-abot namon sa amon destinasyon, nagapalang-alay ang amon mga kamot kag nagapalangurog kami sa kakulba.

Paul: Nagtinulukay kami kag daw indi kami makapati nga buhi pa kami. Grabe kahigko sa amon kag gisigisi na ang amon mga bayo. Nagtulog kami sa tupad sang isa ka helicopter nga madamo na sing igo sang bala kag daw mawasak na. Pagkasunod nga adlaw, masakay kami sa sini nga helicopter pakadto sa Sierra Leone. Nalipay gid kami kay buhi pa kami, pero nabalaka gid kami sa aton mga kauturan sa Liberia.

Anne: Pag-abot namon sa Bethel sa Freetown, Sierra Leone, gin-atipan kami sing maayo sang mga kauturan. Pero, may mga tion nga gulpi ko lang madumduman ang malain nga mga natabo sa Liberia. Kon adlaw, ginakulbaan ako kay basi may malain nga matabo. Indi ako makapamensar sing maayo, kag pamatyag ko daw nagadamgo lang ako. Kon gab-i, gulpi lang ako mabugtaw nga nagapalangyami kag nagakurog sa kakulba. Nabudlayan man ako magginhawa. Ginauyatan ako dayon ni Paul kag nagapangamuyo sia. Nagakanta man kami sang aton mga ambahanon asta nga magkalma ako. Pamatyag ko daw nagbuang na ako kag indi ko na masarangan mag-alagad bilang isa ka misyonero.

Indi ko gid malipatan ang masunod nga natabo. Sadto mismo nga semana, nakabaton kami sang duha ka magasin. Ang isa amo ang Hunyo 8, 1996 nga Magmata! Mabasa sa sini ang isa ka artikulo nga “Paglandas sa Pagsalasala.” Nakabulig ini sa akon nga mahangpan kon ano ang nagakatabo sa akon. Ang ikaduha nga magasin amo ang Mayo 15, 1996 nga Ang Lalantawan. Mabasa sa sini ang isa ka artikulo nga “Diin Nila Ginakuha ang Ila Kusog?” Makita sa Ang Lalantawan ang piktyur sang isa ka alibangbang nga halos wala na ang isa sa apat ka pakpak sini. Ginpaathag sini nga artikulo nga bisan pa amo sini ang kahimtangan sang alibangbang, padayon ini nga nagakaon kag nagalupad. Sing kaanggid, bisan pa naluyahan kita bangod sa indi maayo nga mga natabo sa aton kabuhi, buligan kita sang espiritu ni Jehova para padayon naton nga mabuligan ang iban. Suno gid sa tion ang paghatag ni Jehova sini nga mga artikulo para pabakuron ako. (Mat. 24:45) Nangita ako sang iban pa nga mga artikulo nga pareho man sa sini kag gintingob ko ini sa isa ka folder. Nakabulig gid ini sa akon. Pagligad sang tion, naghaganhagan na ang ginabatyag ko nga kakulba.

Paul: May mga tion nga kinahanglan namon maggua sa Liberia. Pero sa kada tion nga makabalik kami, grabe gid ang amon kalipay. Sang hingapusan sang 2004, halos 20 ka tuig na kami sa amon asaynment. Natapos na  sadto ang inaway sa Liberia, kag may mga konstruksion nga ginaplano sa branch office. Pero, gulpi lang nga ginpangabay kami nga batunon ang isa ka bag-o nga asaynment.

Mabudlay gid ini para sa amon. Suod gid kami sa mga kauturan, kag indi namon gusto nga biyaan sila. Pero nakita namon kon paano kami ginpakamaayo ni Jehova sang ginbiyaan namon ang amon mga pamilya para mag-eskwela sa Gilead. Gani, ginbaton namon ang amon bag-o nga asaynment sa Ghana nga malapit lang sa Liberia.

Anne: Daw indi mauntat ang amon paghibi paghalin namon sa Liberia. Nakibot gid kami sa ginsiling sa amon sang isa ka tigulang nga brother nga si Frank: “Kalimti na ninyo kami.” Dayon ginpaathag niya kon ano ang buot niya silingon. Nagsiling sia: “Kabalo kami nga indi gid ninyo kami pagkalimtan, pero dapat ninyo palanggaon sing bug-os tagipusuon ang inyo bag-o nga asaynment. Halin ina kay Jehova, gani palanggaa ninyo ang aton mga kauturan didto.” Diutay lang ang nakakilala sa amon sa Ghana kag wala gid kami sing nabal-an parte sa sini nga pungsod, pero napalig-on kami sa iya ginsiling nga mangita sang bag-o nga mga abyan didto.

Paul: Kadasig lang namon natun-an nga palanggaon ang aton mga kauturan sa Ghana kag daw nangin pamilya namon sila. Kadamo gid sang mga Saksi didto. Madamo gid kami sing natun-an sa ila pagkamainunungon kag mabakod nga pagtuo. Pagkatapos namon mag-alagad sa Ghana sing 13 ka tuig, nakabaton naman kami sang bag-o nga asaynment. Ginpangabay kami nga mag-alagad sa branch office sa East Africa nga ara sa Kenya. Nahidlaw gid kami sa amon mga abyan sa Ghana kag sa Liberia, pero nalipay man kami kay may bag-o naman kami nga mga abyan sa Kenya. Kag pareho sa Ghana kag sa Liberia, daku man ang hilikuton sa Kenya.

Anne: Grabe ang akon kulba sa sulod sang madamo nga tinuig. Kon makaeksperiensia kita sang delikado kag mabudlay nga mga sitwasyon, posible magmasakit kita ukon ma-trauma. Wala nagsiling si Jehova nga magahimo sia sang milagro para proteksionan kita sa sini nga mga butang. Kon makabati gani ako sang lupok sang armas, pamatyag ko daw masuka ako kag nagapalaminhod ang akon mga kamot. Pero natun-an ko nga gamiton ang tanan nga ginaaman ni Jehova para pabakuron kita, lakip na ang bulig sang aton mga kauturan. Kag natun-an ko nga kon padayon naton nga ginahimo ang aton mga hilikuton sa pag-alagad, buligan kita ni Jehova nga makapabilin sa aton asaynment.

Paul: Kon kaisa, ginapamangkot kami sang iban, “Ano ang nanamian ninyo sa inyo asaynment?” Kanami sang mga pungsod nga nakadtuan namon, pero gulpi lang nagabag-o ang sitwasyon sa isa ka pungsod kag may mga tion nga delikado ang sitwasyon. Ti, ano gid ang nanamian namon sa kada pungsod? Ang aton pinalangga nga mga kauturan nga daw nangin pamilya na namon. Bisan pa lainlain ang aton gindak-an kag kultura, palangga naton tanan si Jehova. Abi namon ginpadala kami sa amon mga asaynment para palig-unon ang mga kauturan, pero ang matuod, sila ang nagpalig-on sa amon.

Sa kada tion nga nagasaylo kami, makita namon ang milagro nga ginahimo ni Jehova sa aton tion subong nga amo ang aton paghiliutod sa bilog nga kalibutan. Basta bahin kita sang isa ka kongregasyon, may pamilya kita bisan diin kag mabatyagan naton nga ginaamligan kita. Sigurado kita nga kon padayon kita nga magsalig kay Jehova, pabakuron niya kita bisan ano man ang matabo.​—Fil. 4:13.