1-2. Ano ang nalakip sa “maayo nga buhat” nga ginahimo sang isa ka gulang?

 KON isa ikaw ka ministeryal nga alagad, posible gid nga napauswag mo na ang mga kinaiya nga dapat ipakita sang isa ka gulang. Gusto mo bala himuon ang “maayo nga buhat” nga ginahimo sang mga gulang?​—1 Tim. 3:1.

² Ano ang mga ginahimo sang isa ka gulang? Ginapangunahan niya ang pagbantala, mapisan niya nga gina-shepherding kag ginatudluan ang mga kauturan, kag ginapalig-on niya ang kongregasyon paagi sa iya mga ginasiling kag halimbawa. Amo ini ang rason kon ngaa ginatawag sang Biblia ang mapisan nga mga gulang bilang “mga dulot nga mga lalaki.”​—Efe. 4:8.

3. Paano mangin isa ka gulang ang isa ka brother? (1 Timoteo 3:​1-7; Tito 1:​5-9)

³ Paano ka mangin isa ka gulang? Indi ini pareho sa pag-aplay sa isa ka obra. Sa kalibutan, kon may mga ikasarang ka nga kinahanglan sa isa ka obra, ihatag sa imo ini nga obra. Pero, kon gusto mo mangin isa ka gulang, indi bastante nga kabalo ka lang magbantala kag magtudlo sa iban. Dapat mapakita mo man ang mga kinaiya nga ginsambit sa 1 Timoteo 3:​1-7 kag sa Tito 1:​5-9. (Basaha.) Binagbinagon sa sini nga artikulo ang pila sa sini nga mga kinaiya. Binagbinagon naton kon ano ang himuon sang isa ka brother para mangin maayo ang iya reputasyon, kon paano sia mangin isa ka maayo nga ulo sang pamilya, kag kon ano ang makabulig sa iya para mangin malipayon sia sa pag-alagad sa kongregasyon.

 PANIKASUGI NGA MANGIN MAAYO ANG IMO REPUTASYON

4. Ano ang buot silingon sang ekspresyon nga “indi salawayon”?

⁴ Para mangin isa ikaw ka gulang, dapat ‘indi ka salawayon.’ Buot silingon, dapat maayo ang imo reputasyon sa kongregasyon kag wala sing may isumbong sa imo nga nagahimo ka sing malain. Dapat nga ‘maayo man ang imo reputasyon sa mga tawo nga indi bahin sang kongregasyon.’ Posible pakalainon sang mga indi Saksi ang imo mga ginapatihan, pero dapat kumbinsido sila nga honest ka nga tawo kag dapat wala sila sing isaway sa imo paggawi. (Dan. 6:​4, 5) Pamangkuta ang imo kaugalingon, ‘Maayo bala ang akon reputasyon sa mga kauturan kag sa mga indi Saksi?’

5. Paano mo mapakita nga ‘mahigugmaon ka sa maayo’?

⁵ Kon ‘mahigugmaon ka sa maayo,’ ginapangita mo ang maayo nga mga kinaiya sang iban kag ginadayaw mo sila sa ila manami nga mga kinaiya. Nalipay ka man nga maghimo sing maayo para sa iban, kag handa ka nga himuon ang mga butang nga indi ka obligado nga himuon. (1 Tes. 2:8) Ngaa importante nga “mahigugmaon sa maayo” ang mga gulang? Bangod madamo nga tion ang ila ginagamit para sa pag-shepherding sa mga kauturan kag para sa pag-asikaso sa ila mga asaynment. (1 Ped. 5:​1-3) Pero bisan pa kinahanglan nila magsakripisyo, gamay lang ini kon ikumparar sa kalipay nga ila ginabatyag sa pag-alagad sa iban.​—Binu. 20:35.

6. Paano mo mapakita nga “maabiabihon” ka? (Hebreo 13:​2, 16; tan-awa man ang piktyur.)

⁶ Mapakita mo nga “maabiabihon” ka kon nagahimo ka sing maayo para sa iban, lakip na sa mga indi suod sa imo. (1 Ped. 4:9) Ang isa ka diksionaryo sa Biblia nagsiling nga ang maabiabihon nga tawo nagapakita sing kaayo bisan sa mga indi niya kilala kag nalipay sia nga agdahon sila sa iya balay. Pamangkuta ang imo kaugalingon, ‘Ano ang akon reputasyon kon parte sa pag-abiabi sa mga bisita?’ (Basaha ang Hebreo 13:​2, 16.) Ang maabiabihon nga tawo nagapakita sing kaayo sa tanan nga klase sang bisita. Nagapakita sia sing kaayo sa mga imol, sa mga speaker halin sa iban nga kongregasyon, kag sa mga nagapangabudlay para palig-unon ang mga kauturan, pareho sang mga circuit overseer.​—Gen. 18:​2-8; Hulu. 3:27; Luc. 14:​13, 14; Binu. 16:15; Roma 12:13.

7. Paano mapakita sang isa ka gulang nga ‘indi sia mahigugmaon sa kuarta’?

⁷ “Indi mahigugmaon sa kuarta.” Buot silingon sini nga wala ka nagapokus sa materyal nga mga  butang. Manggaranon ka man ukon pigado, ginauna mo gid ang pag-alagad kay Jehova. (Mat. 6:33) Ginagamit mo ang imo tion, kusog, kag mga pagkabutang sa pagsimba kay Jehova, sa pag-atipan sa imo pamilya, kag sa pag-alagad sa kongregasyon. (Mat. 6:24; 1 Juan 2:​15-17) Pamangkuta ang imo kaugalingon: ‘Daw ano kaimportante sa akon ang kuarta? Kon may ara na ako sang mga butang nga kinahanglan ko gid, kontento na bala ako sa sini? Ukon basi gusto ko nga mas madamo kuntani ako sang kuarta kag mga pagkabutang?’—1 Tim. 6:​6, 17-19.

8. Paano mo mapakita nga may ‘pagpugong ka sa kaugalingon’?

⁸ Kon may ‘pagpugong ka sa kaugalingon,’ balanse ka sa tanan nga bahin sang imo kabuhi. Halimbawa, wala ka nagapatama sa pagkaon ukon sa pag-inom, maugdang ang estilo sang imo pamayo kag buhok, kag maayo ang ginapili mo nga mga kalingawan. Wala mo ginasunod ang indi nagakaigo nga paagi sang pagkabuhi sang mga tawo sa kalibutan. (Luc. 21:34; Sant. 4:4) Nagapabilin ka nga kalmado bisan pa nga ginapakalain ka sang iban. ‘Indi ka palahubog,’ kag wala ka sing reputasyon nga grabe ka paimnon. Pamangkuta ang imo kaugalingon, ‘Makita bala sa akon paagi sang pagkabuhi nga may pagpugong ako sa kaugalingon?’

9. Paano mo mapakita nga ‘maligdong ang imo hunahuna’ kag “mahim-ong” ka?

⁹ Kon ‘maligdong ang imo hunahuna,’ ginabinagbinag mo sing maayo kon ano nga mga prinsipio sa Biblia ang maaplikar mo sa isa ka sitwasyon. Gani, makahimo ka sang maayo nga mga desisyon. Wala ka nagapadasudaso sa paghimo sang desisyon nga nabase sa indi kompleto nga impormasyon. Sa baylo, ginasigurado mo nga kompleto ang impormasyon nga kinahanglan mo. (Hulu. 18:13) Paagi sa sini, makita sa imo ginahimo nga mga desisyon ang panghunahuna ni Jehova. Kon “mahim-ong” ka, organisado ka kag temprano ka pa nagaabot. Masaligan ka man kag ginasunod mo ang mga instruksion. Kon panikasugan mo nga ipakita ang mga kinaiya nga ginbinagbinag naton, mangin maayo ang imo reputasyon. Binagbinagon naman naton ang mga kinaiya nga dapat ipakita sang isa ka gulang para mangin maayo sia nga ulo sang pamilya.

PANIKASUGI NGA MANGIN ISA KA MAAYO NGA ULO SANG PAMILYA

10. Paano mapakita sang isa ka lalaki nga ‘ginadumalahan niya sing maayo ang iya panimalay’?

¹⁰ Kon may asawa ka kag gusto mo mangin isa ka gulang, dapat maayo man ang reputasyon sang imo pamilya. Gani, dapat ‘ginadumalahan mo sing maayo ang imo panimalay.’ Ginapahangop sini nga dapat isa ikaw ka mahigugmaon kag responsable nga ulo sang pamilya. Mapakita mo ini paagi sa pagpanguna sa imo pamilya sa tanan naton nga hilikuton sa pagsimba kay Jehova. Ngaa importante gid ini? Talupangda ang ginsiling ni apostol Pablo: “Kon ang isa ka lalaki indi makahibalo magdumala sang iya panimalay, paano niya maatipan ang kongregasyon sang Dios?”—1 Tim. 3:5.

11-12. Kon gusto sang isa ka brother nga mangin isa ka gulang, ngaa importante nga binagbinagon ang paggawi sang iya kabataan? (Tan-awa man ang piktyur.)

¹¹ Kon isa ikaw ka amay, dapat nga ‘serioso gid nga nagapasakop ang imo mga anak’ nga menor de edad. Gani, dapat mo sila tudluan kag hanason sa mahigugmaon nga paagi. Siempre, pareho sa tanan nga kabataan, nanamian man sila maghampang. Pero dapat mo sila hanason nga mangin matinumanon, matinahuron, kag mabuot. Dapat buligan mo man ang imo kabataan sa bug-os mo nga masarangan. Buligi sila para mangin maayo ang ila kaangtanan kay Jehova, para maaplikar nila ang mga prinsipio sa Biblia, kag para mag-uswag sila kag magpabawtismo.

¹² “May tumuluo nga mga anak nga wala ginasumbong nga mapinatuyangon ukon rebelyuso.” Kon nakahimo sang serioso nga sala ang bata sang isa ka gintangdo nga brother, paano sini maapektuhan ang iya pribilehiyo? Kon bawtismado ang iya bata ukon nagauswag padulong sa bawtismo kag ara sa iya poder ang iya bata, dapat binagbinagon sang mga gulang kon bala kalipikado pa sia sa iya pribilehiyo. Kon wala niya ginahanas kag ginadisiplina  ang iya bata, posible gid nga indi sia kalipikado nga mangin isa ka gulang.​—Tan-awa ang Oktubre 15, 1996, nga Ang Lalantawan, p. 21, par. 6-7.

MAGBULIG SA KONGREGASYON

13. Paano mo mapakita nga “makatarunganon” ka kag “indi puguso”?

¹³ Makabulig gid sa kongregasyon ang mga brother nga may maayo nga mga kinaiya. Kon “makatarunganon” ang isa ka tawo, ginapanikasugan niya nga indi madula ang paghidait kag nagabulig sia para mag-ayuhay liwat ang kaangtanan sang iban. Kon gusto mo mapakita nga makatarunganon ka, pamatii ang ginasiling sang iban kag panikasugi nga intiendihon ang ila ginabatyag. Halimbawa, ibutang ta nga isa ikaw ka gulang kag nagmiting kamo nga mga gulang. Kon wala sing may nalapas nga kasuguan ukon prinsipio sa Biblia ang desisyon nga gin-ugyunan sang kalabanan nga mga gulang, handa ka bala nga suportahan ini? Ang ekspresyon nga “indi puguso” nagakahulugan nga wala mo ginainsister nga himuon ang isa ka butang suno gid sa imo gusto. Sa baylo, kabalo ka nga importante gid nga mabal-an mo man ang opinyon sang iban. (Gen. 13:​8, 9; Hulu. 15:22) ‘Indi ka palaaway’ ukon ‘indi ka madali maakig.’ Ginapahangop sini nga indi ka palakumod ukon palabais. Sa baylo, ginarespeto mo ang iban kag ginapakitaan mo sila sang kaayo. Kon mahidaiton ka, ginapanikasugan mo nga magpakighidait sa iban bisan pa nga grabe ang tension sa isa ka sitwasyon. (Sant. 3:​17, 18) Kon kalmado ka lang maghambal, makabulig ini para magkalma man ang iban lakip na ang mga nagapamatok sa imo.​—Huk. 8:​1-3; Hulu. 20:3; 25:15; Mat. 5:​23, 24.

14. Ano ang buot silingon sang mga ekspresyon nga “indi bag-uhan nga tumuluo” kag “mainunungon”?

¹⁴ Para mangin gulang ang isa ka brother, dapat ‘indi sia bag-uhan nga tumuluo.’ Indi buot silingon sini nga dapat madamo nga tinuig ka na nga nabawtismuhan. Pero, kinahanglan ang tion para mangin hamtong ka nga Cristiano. Antes ka matangdo nga gulang, dapat mo ipakita nga mapainubuson ka kag handa ka nga mag-alagad kay Jehova pareho kay Jesus. Handa ka nga maghulat sing mapinasensiahon kon san-o ka hatagan ni Jehova sing dugang nga mga pribilehiyo. (Mat.  20:23; Fil. 2:​5-8) Mapakita mo nga “mainunungon” ka paagi sa pagpabilin nga matutom kay Jehova, paagi sa pagtuman sa iya matarong nga mga kasuguan, kag paagi sa pagsunod sa mga instruksion sang iya organisasyon.​—1 Tim. 4:15.

15. Kinahanglan bala nga maayo gid magpamulongpulong ang isa ka gulang? Ipaathag.

¹⁵ Maathag nga ginasiling sang Biblia nga dapat “kalipikado sa pagpanudlo” ang mga manugtatap. Buot silingon bala sini nga kinahanglan maayo ka gid magpamulongpulong? Indi amo sina ang buot silingon sini. Madamo nga mga gulang nga kon parte sa pagpamulongpulong, masiling naton nga indi sila ang pinakamaayo. Pero maayo gid sila magbantala kag magtudlo sa iban, kag maayo sila mag-shepherding sa mga kauturan. (Ipaanggid ang 1 Corinto 12:​28, 29 kag Efeso 4:11.) Gani bisan pa indi kinahanglan nga maayo ka gid magpamulongpulong, dapat padayon mo nga pauswagon ang imo ikasarang sa pagtudlo sa iban. Paano mo ini mahimo?

16. Ano ang himuon mo para mapauswag mo pa gid ang imo ikasarang sa pagtudlo sa iban? (Tan-awa man ang piktyur.)

¹⁶ “Nagapanguyapot sing malig-on sa matutom nga pulong.” Para mapauswag mo pa gid ang imo ikasarang sa pagtudlo sa iban, siguraduha nga nabase pirme sa Pulong sang Dios ang imo mga ginatudlo kag ginalaygay. Para mahimo mo ini, dapat mo tun-an sing maayo ang Biblia kag ang aton mga publikasyon. (Hulu. 15:28; 16:23) Samtang nagatuon ka, binagbinaga sing maayo kon paano ginapaathag sang aton mga publikasyon ang mga teksto sa Biblia para maaplikar mo ini dayon. Kag kon nagatudlo ka sa iban, panikasugi nga lab-uta ang ila tagipusuon. Mapauswag mo man ang imo ikasarang sa pagtudlo sa iban kon mangayo ka sing bulig sa eksperiensiado nga mga gulang, kag kon iaplikar mo ang ila mga panugda. (1 Tim. 5:17) Dapat may ikasarang ang mga gulang sa ‘pagpalig-on’ sa ila mga kauturan. Pero kon kaisa, dapat man nila laygayan ukon ‘sabdungon’ ang ila mga kauturan. Kon nagapalig-on ukon nagasabdong ang mga gulang, dapat nila ini pirme himuon sing mainayuhon. Kon mahigugmaon ka kag kon ibase mo sa Pulong sang Dios ang imo mga ginatudlo, mapauswag mo pa gid ang imo ikasarang sa pagtudlo sa iban bangod ginailog mo ang Daku nga Manunudlo nga si Jesus.​—Mat. 11:​28-30; 2 Tim. 2:24.

 PADAYON NGA MAGPANIKASOG PARA MAG-USWAG KA PA GID

17. (a) Ano ang dapat himuon sang mga ministeryal para padayon ang ila pag-uswag? (b) Ano ang dapat dumdumon sang mga gulang kon ginabinagbinag nila ang kalipikasyon sang mga brother nga gusto nila irekomendar? (Tan-awa ang kahon nga “ Mangin Makatarunganon Kon Ginabinagbinag Ninyo ang Kalipikasyon sang Isa ka Brother.”)

¹⁷ Pagkatapos naton mabinagbinag ang mga kinaiya nga dapat ipakita sang mga gulang, posible mahunahuna sang pila ka ministeryal nga indi gid nila masarangan nga mangin gulang. Pero dapat mo dumdumon nga wala nagsiling si Jehova ukon ang iya organisasyon nga dapat mo ipakita sing perpekto ini nga mga kinaiya. (1 Ped. 2:21) Kag ang gamhanan nga espiritu ni Jehova amo ang nagabulig sa imo nga mapakita ini nga mga kinaiya. (Fil. 2:13) May espesipiko bala nga kinaiya nga gusto mo pauswagon? Ipangamuyo ini kay Jehova. I-research ini nga kinaiya, kag mangayo sing panugda sa mga gulang kon paano mo ini pauswagon.

18. Ano ang dapat himuon sang tanan nga ministeryal?

¹⁸ Kabay pa nga padayon nga ipakita sang tanan nga brother, lakip na sang mga gulang, ang mga kinaiya nga ginbinagbinag sa sini nga artikulo. (Fil. 3:16) Isa ka bala ka ministeryal subong? Padayon nga magpanikasog para mag-uswag ka pa gid. Pangabaya si Jehova nga hanason ka para mas magamit ka niya kag sang kongregasyon. (Isa. 64:8) Kabay pa nga pakamaayuhon ni Jehova ang ginahimo mo nga mga pagpanikasog para mangin isa ikaw ka gulang.