1, 2. (a) Ano nga hilikuton ang mas importante kay Jesus, kag ngaa? (b) Ano ang dapat naton himuon para mangin madinalag-on kita nga “masigkamanugpangabudlay sang Dios”?

SI Jesucristo isa ka panday kag manunudlo. (Mar. 6:3; Juan 13:13) Eksperto gid sia sa sini. Bilang isa ka panday, nangin sagad sia sa iya mga gamit kag sa paghimo sang mga pagkabutang nga human sa kahoy. Kag bilang manunudlo sang maayong balita, gingamit niya sing maayo ang iya ihibalo sa Kasulatan para buligan ang ordinaryo nga mga tawo nga mahangpan ang kamatuoran sa Pulong sang Dios. (Mat. 7:28; Luc. 24:32, 45) Sang 30 anyos si Jesus, gin-untatan niya ang hilikuton bilang panday bangod kabalo sia nga mas importante ang hilikuton sang manunudlo. Nagsiling sia nga ang pagbantala sang maayong balita sang Ginharian sang Dios ang isa ka rason kon ngaa ginpadala sia sang Dios sa duta. (Mat. 20:28; Luc. 3:23; 4:43) Gin-una ni Jesus ang pagministeryo, kag gusto niya nga amo man sini ang himuon sang iban.—Mat. 9:35-38.

² Ang kalabanan sa aton indi man mga panday, pero tanan kita mga manunudlo sang maayong balita. Importante gid ini nga hilikuton bangod hilikuton ini sang Dios. Ang matuod, ginatawag kita nga “mga masigkamanugpangabudlay sang Dios.” (1 Cor. 3:9; 2 Cor. 6:4) Kumbinsido kita nga “ang [pulong ni Jehova] kamatuoran.” (Sal. 119:159, 160) Gani dapat naton siguraduhon nga “ginagamit [naton] sing husto ang pulong sang kamatuoran” sa aton ministeryo. (Basaha ang 2 Timoteo 2:15.) Bangod sini, dapat naton hanason sing maayo ang aton ikasarang sa paggamit sang Biblia, nga amo ang aton panguna  nga gamit sa pagtudlo sang kamatuoran parte kay Jehova, kay Jesus, kag sa Ginharian. Para mangin madinalag-on kita sa aton ministeryo, dapat mangin pamilyar man kita sa iban pa nga mga gamit nga gin-aman sang organisasyon ni Jehova. Makita naton ang mga ini sa aton Mga Gamit sa Pagpanudlo.

3. Bangod malip-ot na lang ang nabilin nga tion nga makapanaksi kita, ano dapat ang aton panguna nga tulumuron, kag paano ang Binuhatan 13:48 makabulig sa aton nga himuon ini?

³ Mahimo ginapamensar mo kon ngaa gintawag ini nga Mga Gamit sa Pagpanudlo kag indi Mga Gamit sa Pagbantala. Ang “pagbantala” nagakahulugan sing pagsugid sang mensahe; pero ang “pagpanudlo” nagakahulugan sing pagpatudok sini nga mensahe sa hunahuna kag tagipusuon sang tawo para maaplikar niya ang iya natun-an. Bangod malip-ot na lang ang nabilin nga tion nga makapanaksi kita, dapat ang aton panguna nga tulumuron amo ang pagsugod sang pagtuon sa Biblia sa iban kag pagtudlo sa ila sang kamatuoran. Buot silingon, dapat magpanikasog gid kita nga pangitaon ang mga “may husto nga panimuot sa pagtigayon sing kabuhi nga wala sing katapusan” kag buligan sila nga mangin tumuluo.—Basaha ang Binuhatan 13:44-48.

4. Ano ang kinaiya sang mga tawo nga “may husto nga panimuot sa pagtigayon sing kabuhi nga wala sing katapusan,” kag paano naton sila makita?

⁴ Paano naton mahibaluan kon sin-o ang “may husto nga panimuot sa pagtigayon sing kabuhi nga wala sing katapusan”? Pareho sang unang siglo, ang paagi lang para makita ini nga mga tawo amo ang pagbantala. Gani, dapat naton himuon ang ginsugo ni Jesus: “Bisan diin nga siudad ukon baryo kamo magsulod, pangitaa ninyo ang tawo nga takus.” (Mat. 10:11) Wala naton ginapaabot nga mangin interesado sa maayong balita ang mga tawo nga indi sinsero, bugalon, ukon nagabalewala sa kamatuoran. Ginapangita naton ang mga tawo nga sinsero, mapainubuson, kag gusto gid makatuon sang kamatuoran. Ang aton pagpangita mapaanggid naton sa ginhimo ni Jesus sang nagapamanday sia. Antes sia maghimo sang muebles, puertahan, gota, ukon iban pa, mahimo nagapangita sia anay sang kahoy nga nagakabagay sa iya himuon. Dayon kuhaon niya ang iya mga gamit, kag umpisahan niya ang pag-obra nga ginagamit ang iya ikasarang. Amo man sini ang dapat naton himuon para mabuligan naton ang mga interesado nga mangin disipulo.—Mat. 28:19, 20.

5. Ano ang dapat naton himuon sa mga gamit nga ara sa aton Mga Gamit sa Pagpanudlo? Iilustrar. (Tan-awa ang mga piktyur sa umpisa sini nga artikulo.)

⁵ Ang kada gamit may espesipiko nga katuyuan. Halimbawa, binagbinaga ang mga gamit ni Jesus sa pagpamanday. * May gamit sia para sa pagtakus, pagmarka, pag-utod, pagbuho, pagkorte, pag-eskuala, pagtunton, kag pagsugpon sang kahoy. Sing kaanggid, ang kada gamit nga ara sa aton Mga Gamit sa Pagpanudlo may espesipiko nga katuyuan. Gani tun-an naton kon paano naton ini gamiton sing maayo.

6, 7. (a) Paano mo ginagamit ang contact card? (b) Ano ang duha ka katuyuan sang imbitasyon para sa mga miting sang kongregasyon?

⁶ Contact Card. Gamay lang ini nga gamit pero epektibo ini sa pagpakilala sa aton sa mga tawo kag pagsugid sa ila sang aton website. Kon makadtuan nila ang aton website, makatuon sila sing dugang pa parte sa aton kag makapangabay pa gani sila sing pagtuon sa Biblia. Sobra na 400,000 ang nagpangabay sing pagtuon sa Biblia paagi sa jw.org, kag ginatos pa gid kada adlaw ang nagadugang sa sini! Mahimo ka magdala pirme sing mga contact card para ihatag sa mga tawo nga maistorya mo sa imo adlaw-adlaw nga mga hilikuton.

⁷ Imbitasyon. Duha ang katuyuan sang aton imbitasyon para sa mga miting sang kongregasyon. Nagasiling ini: “Ginaagda ka nga tun-an ang Biblia upod sa mga Saksi ni Jehova.” Dayon  puede kapili ang mga tawo kon bala matuon sila paagi “sa amon mga miting” “ukon upod sa isa ka Saksi.” Gani, magluwas nga ginapakilala kita sini sa mga tawo, ginaagda man sini ang mga “mahunahunaon sa ila espirituwal nga kinahanglanon” nga tun-an ang Biblia upod sa aton. (Mat. 5:3) Bisan pa indi gusto sang mga tawo nga magtuon sa Biblia, puede gid gihapon sila makatambong sa aton mga miting. Kon magtambong sila, makita nila kon daw ano kadamo ang mahimo nila matun-an sa Biblia.

8. Ngaa importante nga makatambong ang mga tawo sa aton mga miting bisan makaisa lang? Maghatag sing halimbawa.

⁸ Importante gid nga padayon naton nga imbitahon ang mga tawo nga magtambong sa aton mga miting bisan makaisa lang. Ngaa? Kon makatambong sila, makita nila ang aton daku nga kinatuhayan bangod nagatudlo kita sang kamatuoran halin sa Biblia kag ginabuligan naton ang mga tawo nga makilala ang Dios, pero ang butig nga mga relihion wala. (Isa. 65:13) Amo ini ang natalupangdan sang mag-asawa nga sanday Ray kag Linda nga taga-Estados Unidos mga pila ka tuig na ang nagligad. Narealisar nila nga kinahanglan nila magsimba. Nagapati sila nga may Dios kag gusto nila nga makilala sia, gani isaisa nila nga ginkadtuan ang tanan nga simbahan sa ila siudad. Madamo sing relihion kag mga sekta sa ila lugar. Gani nagdesisyon sila nga antes sila mag-entra sa isa ka relihion, dapat makita nila sa sini ang duha ka kondisyon. Una, dapat may matun-an sila sa ila mabatian sa simbahan, kag ikaduha, dapat ang pamayo sang mga miembro sini nagakaigo para sa mga tawo nga nagaalagad sa Dios. Pagligad sang pila ka tuig, nakadtuan nila ang tanan nga simbahan sa ila lugar, pero napaslawan gid sila. Wala gid sila sing natun-an, kag indi nagakaigo ang pamayo sang mga nagasimba. Paghalin nila sa katapusan nga simbahan sa ila listahan, nagdiretso si Linda sa iya trabaho samtang nagpauli naman si Ray. Naagyan ni Ray ang Kingdom Hall kag namensar sia, ‘Ano abi kon mahapit anay ako kag mamati?’ Diri niya nabatyagan ang pinakamaayo nga eksperiensia sa tanan niya nga nakadtuan nga simbahan. Maabiabihon kag mainabyanon ang tanan sa Kingdom Hall, kag nagakaigo gid ang ila pamayo. Nagpungko si Ray sa atubangan kag nanamian gid sia sa iya mga natun-an! Nagapahanumdom ini sa aton sang ginsambit ni apostol Pablo parte sa tawo nga mahimo magtambong sa miting sa una nga tion kag magasiling: “Ang Dios yara gid sa inyo.” (1 Cor. 14:23-25) Pagkatapos sini, padayon si Ray nga nagtambong kada Domingo; kag gintambungan man niya ang miting kon midweek. Sang ulihi, nagtambong man si Linda. Bisan pa setentahon na sila, nagtuon sila sa Biblia kag nabawtismuhan.

9, 10. (a) Ngaa mahapos gamiton ang mga tract? (b) Ipaathag kon paano gamiton ang tract nga Ano ang Ginharian sang Dios?

⁹ Tract. May walo kita ka tract nga mahapos gamiton kag epektibo gid para makasugod sa pag-istorya. Sugod sang 2013, mga lima ka bilyon na sini ang naimprinta! Pareho ang pormat sang tanan nga tract. Gani kon mabal-an mo kon paano gamiton ang isa sini, mahapos mo na gamiton ang iban pa nga tract. Paano mo magamit ang tract para makasugod sa pag-istorya?

¹⁰ Ibutang ta nga gamiton mo ang tract nga Ano ang Ginharian sang Dios? Ipakita sa tawo ang una nga pahina sang tract kag pamangkuta sia: “Napamensaran mo na bala kon ano ang Ginharian sang Dios? Sa banta mo, ini bala . . . ?” Dayon papilia sia sa tatlo ka posible nga sabat. Sa baylo nga hambalon sia nga husto ukon sala ang iya sabat, ipakita ang seksion sa sulod nga “Ang Ginasiling sang Biblia,” kag basaha ang Daniel 2:44 kag Isaias 9:6. Kon posible, padayuna ang inyo pag-istoryahanay. Sa katapusan, ipatalupangod ang seksion sa likod nga “Binagbinaga,” nga may pamangkot: “Ano ang kahimtangan sang kabuhi kon maggahom na sa aton ang Ginharian sang Dios?” Sabton mo ini sa inyo masunod nga pag-istorya. Pagkitaay ninyo liwat, puede mo binagbinagon sa iya ang leksion 7 sang brosyur nga Maayong Balita  Halin sa Dios!, nga isa sa aton mga gamit para makasugod sang pagtuon sa Biblia.

11. Para sa ano naton dapat gamiton ang aton mga magasin, pero ano anay ang dapat naton hibaluon?

¹¹ Magasin. Ang Lalantawan kag Magmata! amo ang pinakamadamo nga ginaimprinta kag gina-translate nga mga magasin sa bilog nga kalibutan! Bangod sarisari nga tawo sa madamo nga pungsod ang nagabasa sini nga mga magasin, ang mga topiko sini makapainteres sa mga tawo bisan diin. Dapat naton ini gamiton para mangin interesado ang mga tawo sa mga topiko nga importante gid subong. Pero dapat anay naton hibaluon kon para kay sin-o ginhimo ang kada magasin.

12. (a) Para kay sin-o ginhimo ang Magmata!, kag ano ang katuyuan sini? (b) Ano ang imo maayo nga mga eksperiensia sang gingamit mo ini nga magasin?

¹² Ginhimo ang Magmata! para sa mga tawo nga diutay lang ukon wala sing nahibaluan sa Biblia. Mahimo wala sila sing nahibaluan parte sa mga ginapatihan sang mga Cristiano, wala sila sing salig sa relihion, ukon wala sila kabalo nga makabulig ang Biblia sa ila. Ang panguna nga katuyuan sang Magmata! amo ang paghatag sing ebidensia nga matuod gid nga may Dios. (Roma 1:20; Heb. 11:6) Katuyuan man sini nga buligan ang mga bumalasa nga magpati nga ang Biblia “pulong [gid] sang Dios.” (1 Tes. 2:13) Ang tatlo ka topiko para sa 2018 amo ini: “Ang Dalan sang Kalipay,” “12 ka Sekreto Para Magmadinalag-on ang Pamilya,” kag “Bulig sa mga Nagalalaw.”

13. (a) Para kay sin-o ginhimo ang publiko nga edisyon sang Ang Lalantawan? (b) Ano ang imo maayo nga mga eksperiensia sang gingamit mo ini nga magasin?

¹³ Ang panguna nga katuyuan sang publiko nga edisyon sang Ang Lalantawan amo ang pagpaathag sang mga panudlo sa Biblia sa mga tawo nga nagapabalor sang ila kaangtanan sa Dios kag sa iya Pulong. Mahimo may nahibaluan sila sa Biblia, pero wala nila ini mahangpan sing bug-os. (Roma 10:2; 1 Tim. 2:3, 4) Ang tatlo ka topiko para sa 2018 nagasabat sang sini nga mga pamangkot: “Mapuslanon Pa Bala ang Biblia Subong?,” “Ano ang Matabo sa Palaabuton?,” kag “Nagaulikid Bala ang Dios sa Imo?”

14. (a) Ano ang katuyuan sang apat ka video nga ara sa aton Mga Gamit sa Pagpanudlo? (b) Ano ang imo maayo nga mga eksperiensia sang ginpalantaw mo ini nga mga video?

¹⁴ Video. Sang panahon ni Jesus, manomano ang mga gamit sang panday. Pero subong, may de-kuryente na nga mga lagari, barina, sander ukon pangpahining, kag iban pa. Sing kaanggid, magluwas sa aton naimprinta nga mga publikasyon, may ara na kita subong manami nga mga video nga mapalantaw sa mga tawo. Apat sa sini ang ara sa aton mga gamit sa pagpanudlo. Ini amo ang: Ngaa Dapat Tun-an ang Biblia?, Paano Ginahimo ang Pagtuon sa Biblia?, Ano ang Ginahimo sa Kingdom Hall?, kag Sin-o ang mga Saksi ni Jehova? Ang mga video nga malip-ot pa sa duha ka minuto epektibo gid sa una nga pag-istoryahanay. Ang malawig nga mga video mahimo gamiton sa ginabalikan nga mga interesado kag sa mga tawo nga may tion nga mag-istorya. Ining dalayawon nga mga gamit makapalig-on sa mga tawo nga magtuon sa Biblia kag magtambong sa aton mga miting.

15. Magsaysay sing eksperiensia parte sa epekto sa mga tawo sang nalantaw nila ang isa naton ka video sa ila lenguahe.

¹⁵ Binagbinaga ini nga eksperiensia. Naistorya sang sister ang isa ka babayi nga nagsaylo halin sa Micronesia nga Yapese ang lenguahe. Ginpalantaw sa iya sang sister ang video nga Ngaa Dapat Tun-an ang Biblia? sa iya lenguahe. Pag-umpisa sang video, ang babayi nagsiling: “Amon ’na lenguahe. Grabe ba! Daw taga-didto gid sa amon ang tono sang nagahambal. Kabalo gid sia sang amon lenguahe!” Pagkatapos sini, nagsiling sia nga basahon niya kag lantawon ang tanan nga makita niya sa iya lenguahe sa jw.org. (Ipaanggid ang Binuhatan 2:8, 11.) Binagbinaga ining isa pa ka eksperiensia. Isa ka  sister sa Estados Unidos ang nagpadala sa iya hinablos nga nagaistar sa iban nga pungsod sing link sang sini man nga video sa iya lenguahe. Ginlantaw niya ini kag nag-e-mail sia sa iya tiya: “Interesado ako sa ginsiling sang video nga isa ka malauton ang nagakontrol sang kalibutan. Nangabay ako nga tudluan ako sang Biblia.” Ang iya hinablos nagaistar sa pungsod nga ginadumilian ang aton hilikuton!

16. Ipaathag ang espesipiko nga katuyuan sang kada brosyur: (a) Pamatii ang Dios Agod Magkabuhi Ka sing Walay Katapusan. (b) Maayong Balita Halin sa Dios! (c) Sin-o ang Nagahimo sang Kabubut-on ni Jehova Subong?

¹⁶ Brosyur. Paano mo itudlo ang kamatuoran sa tawo nga indi masyado kabalo magbasa ukon wala sing literatura sa iya lenguahe? May gamit kita para sa sini, ang brosyur nga Pamatii ang Dios Agod Magkabuhi Ka sing Walay Katapusan. * Ang isa ka maayo gid nga gamit para makasugod sang pagtuon sa Biblia amo ang brosyur nga Maayong Balita Halin sa Dios! Mahimo mo ipakita sa tawo ang 14 ka topiko sa likod sang brosyur kag pamangkuta sia kon diin sa sini ang interesado sia nga mabal-an. Dayon umpisahi ang pagtuon sa leksion nga iya ginpili. Natilawan mo na bala ini nga paagi sa imo mga ginaduaw liwat? Ang ikatlo nga brosyur sa aton mga gamit amo ang Sin-o ang Nagahimo sang Kabubut-on ni Jehova Subong? Ginhimo ini para buligan ang mga nagatuon sa Biblia nga mabal-an ang parte sa aton organisasyon. Para matun-an mo kon paano ini gamiton sa kada pagtuon sa Biblia, basaha ang Marso 2017 nga isyu sang Ang Aton Cristianong Pagkabuhi kag Pagministeryo—Workbook Para sa Miting.

17. (a) Ano ang espesipiko nga katuyuan sang kada libro nga ginagamit sa pagtuon? (b) Ano ang dapat nga padayon nga himuon sang mga bag-uhan bisan pa bawtismado na sila, kag ngaa?

¹⁷ Libro. Kon nakasugod ka sang pagtuon sa Biblia paagi sa brosyur, mahimo mo isaylo ang pagtuon sa libro nga Ano Gid ang Ginatudlo sang Biblia? Depende sa imo kon san-o mo ini isaylo. Ini nga gamit makabulig sa mga tawo nga madugangan ang ila nahibaluan parte sa panguna nga mga panudlo sa Biblia. Kon natapos na sang nagatuon sa Biblia ang libro kag nagauswag sia, padayuna ang pagtuon sa libro nga Magpabilin Kamo sa Gugma sang Dios. * Tudluan sia sini kon paano iaplikar ang mga prinsipio sa Biblia sa iya kabuhi. Tandai nga bisan bawtismado na sia, dapat padayunon sang bag-o nga disipulo ang iya pagtuon asta matapos niya ining duha ka libro. Makabulig ini sa iya nga mangin malig-on kag makapanindugan sa kamatuoran.—Basaha ang Colosas 2:6, 7.

18. (a) Bilang manunudlo sang kamatuoran, ano ang ginapalig-on sa aton sang 1 Timoteo 4:16 nga dapat naton himuon, kag ano ang resulta sini? (b) Ano ang tulumuron naton sa paggamit sang aton Mga Gamit sa Pagpanudlo?

¹⁸ Bilang mga Saksi ni Jehova, gintugyan sa aton ang “mensahe sang kamatuoran sang maayong balita” nga makabulig sa mga tawo nga matigayon ang kabuhi nga wala sing katapusan. (Col. 1:5; basaha ang 1 Timoteo 4:16.) Bangod sini, gin-amanan kita sang Mga Gamit sa Pagpanudlo nga makabulig gid sa aton. (Tan-awa ang “ Mga Gamit sa Pagpanudlo.”) Kabay pa nga gamiton naton ini sing maayo. Ang kada manugbantala mahimo magdesisyon kon ano nga gamit ang iya gamiton kag kon san-o niya ini gamiton. Pero indi lang pagpanagtag sang literatura ang aton tulumuron; kag wala man naton ginahatag ang aton mga literatura sa mga indi interesado sa aton mensahe. Tulumuron naton nga himuon nga disipulo ang mga tawo nga sinsero, mapainubuson, kag gusto gid makatuon sang kamatuoran. Sila ang mga tawo nga “may husto nga panimuot sa pagtigayon sing kabuhi nga wala sing katapusan.”—Binu. 13:48; Mat. 28:19, 20.