Base man sa sini nga kasugtanan, gintukod ang bag-o nga organisasyon nga gintawag League of Nations. Ang tuyo sini nga organisasyon amo nga “palig-unon ang tanan nga pungsod nga magbuligay para may paghidait kag kalig-unan sa bilog nga kalibutan.” Madamo nga relihion sang Cristiandad ang nagsuporta sa League of Nations. Ang Federal Council of the Churches of Christ in America nagsiling nga “isa ini ka pulitikal nga organisasyon nga nagarepresentar sa Ginharian sang Dios sa duta.” Ang Federal Council of the Churches nagsuporta sa League of Nations paagi sa pagpadala sing mga representante sa Paris Peace Conference. Ang isa ka representante nagsiling nga ini nga komperensia “amo ang panugod sang isa ka bag-o nga panag-on sa kasaysayan sang kalibutan.”

Nagsugod na ang bag-o nga panag-on, pero indi ang mga tawo nga nagpakigbahin sa komperensia ang nagpahanabo sini. Sang 1919, nagsugod ang bag-o nga panag-on sa pagbantala nga hilikuton sang ginpabaskog ni Jehova ang iya katawhan nga mangin mapisan pa gid sa pagbantala. Pero antes ini matabo, dapat anay magbag-o ang kahimtangan sang mga Estudyante sang Biblia.

Ang tuigan nga eleksion para magpili sang mga direktor sang Watch Tower Bible and Tract Society nakaiskedyul nga himuon sa Sabado, Enero 4, 1919. Ang nagapanguna sadto sa hilikuton sang katawhan ni Jehova amo si Joseph F. Rutherford. Pero napriso sia kag ang pito pa ka utod sa Atlanta, Georgia, U.S.A., sing indi makatarunganon. Magadesisyon ang mga kauturan kon bala ang mga direktor nga napriso dapat pilion liwat ukon buslan na sila.

Sa prisuhan, nabalaka si Brother Rutherford sa posible nga matabo sa organisasyon. Kabalo sia nga gusto sang iban nga utod nga magpili sang bag-o nga presidente. Gani naghimo sia sing sulat para sa mga magatipon kag ginrekomendar niya si Evander J. Coward bilang presidente. Nagsiling si Rutherford nga si Coward isa ka utod nga “kalmado,” “mainandamon,” kag “mainunungon sa  Ginuo.” Pero gusto sang madamo nga utod nga himuon na lang ang eleksion pagligad sang anom ka bulan. Nagsugot ang mga abogado sang napriso nga mga utod. Samtang nagahambalanay sila kon ano ang himuon, naakig ang pila ka utod.

Dayon, may natabo nga nagpakalma sa sitwasyon, nga ginsugid sang ulihi ni Richard H. Barber. Isa ka utod ang nagsiling: “Indi ako abogado kag indi ako eksperto sa kasuguan, pero kabalo ako kon ano ang buot silingon sang pagkamainunungon. Gusto sang Dios nga mangin mainunungon kita. Mapakita naton nga mainunungon kita sa Dios kon padayunon naton ang eleksion kag pilion liwat si Brother Rutherford bilang presidente.”—Sal. 18:25.

Ang isa sa napriso nga mga utod, si A. H. Macmillan, nagsiling nga nadumduman niya nga sang madason nga adlaw, nanuktok si Brother Rutherford sa dingding sa ulot nila nga duha kag gindaho sa iya ang isa ka sulat. Ginpadala ini sang mga utod kay Brother Rutherford kag parte ini sa resulta sang eleksion. Nahangpan gilayon ni Macmillan ang mensahe sa sulat. Ginpili liwat ang tanan nga direktor kag nagpabilin nga mga opisyal sanday Joseph Rutherford kag William Van Amburgh. Gani si Brother Rutherford gihapon ang presidente.

Samtang napriso ang walo ka utod, ginpangabay sang mga Estudyante sang Biblia ang mga tawo nga magpirma sa isa ka petisyon para paguaon ang mga utod sa prisuhan. Sobra 700,000 ka tawo ang napapirma sining maisog nga mga kauturan. Sang Mierkoles, Marso 26, 1919, antes pa mahatag ang petisyon, ginpagua na sa prisuhan si Brother Rutherford kag ang iban pa nga mga utod nga nagapanguna sa hilikuton.

Pagpauli ni Brother Rutherford, nagpamulongpulong sia sa mga nag-abiabi sa iya. Nagsiling sia: “Nagapati gid ako nga bangod sang naeksperiensiahan naton tanan, nangin handa kita sa mas mabudlay nga kahimtangan. . . . Ang panguna nga katuyuan sang inyo pagpanikasog indi para paguaon ang inyo mga utod sa prisuhan. . . . Ang katuyuan sang inyo pagpanikasog amo nga para madayaw si Jehova, kag ginpakamaayo gid ang mga naghimo sini.”

Ang mga natabo sang ginbista ang aton mga utod mahimo nga nagapamatuod nga kontrolado ni Jehova ang sitwasyon. Sang Mayo 14, 1919, nagdesisyon ang court of appeals: “Ang mga akusado sa sini nga kaso may kinamatarong nga hatagan sang . . . makatarunganon nga pagbista, pero wala ini mahatag sa ila, gani ginbag-o ang desisyon sang korte.” Maayo ini nga desisyon. Ngaa? Ginsentensiahan ang mga utod bangod sang serioso nga mga krimen. Kon ginbuy-an lang sila paagi sa pardon ukon ginpalip-ot lang ang sentensia sa ila, may rekord sila gihapon nga nakahimo sila sing krimen. Pero bangod ginbag-o ang desisyon kag wala na sing iban pa nga akusasyon sa ila, matinlo na ang ila rekord. Gani kalipikado gihapon si Judge Rutherford nga depensahan ang katawhan ni Jehova sa Supreme Court sang United States, kag ginhimo niya ini sing madamo nga beses pagkatapos sia mapagua sa prisuhan.

“Indi kami magapahimunong lang kag wala sang pagahimuon samtang nagahulat nga dalhon kami sang Ginuo sa langit,” siling ni Brother Macmillan. “Nahangpan namon nga dapat namon hibaluon kon ano gid ang gusto sang Ginuo nga himuon namon.”

Pero indi mapadayon sang mga kauturan sa ulong talatapan ang hilikuton nga madugay na nila nga ginahimo. Ngaa? Sang ginpriso ang mga utod, ginguba ang tanan nga printing plate nga gingamit sa pag-imprinta sang mga publikasyon. Makapaluya ini, kag naghunahuna ang pila ka kauturan nga basi natapos na ang pagbantala.

May gusto pa ayhan mamati sa mensahe sang Ginharian nga ginabantala sang mga Estudyante sang Biblia? Para masabat ini nga pamangkot, naghanda si Brother Rutherford sang isa ka pamulongpulong. Dayon pagaagdahon ang tanan nga tawo para sa sini. “Kon wala sing magkadto para mamati sa sini,” siling ni Brother Macmillan, “buot silingon natapos na ang pagbantala.”

Gani sang Domingo, Mayo 4, 1919, nagpamulongpulong si Brother Rutherford sa Los Angeles, California, bisan pa may malala sia nga balatian. May tig-ulo ini nga “The Hope for Distressed Humanity” (Ang Paglaum Para sa Nagaantos nga Katawhan). Mga 3,500 ang nagpamati sa sini nga pamulongpulong, kag may ginatos pa nga nagkadto pero wala na sing lugar para makapamati sila. Sang madason nga adlaw, may 1,500 pa nga nagpamati. Nasabat gid ang pamangkot sang mga kauturan kay gusto gid sang mga tawo nga magpamati!

Ang masunod nga ginhimo sang mga kauturan may daku nga impluwensia sa kon paano nagabantala ang mga Saksi ni Jehova asta subong.

Ginpahibalo sa Agosto 1, 1919, nga The Watch Tower nga may hiwaton nga kombension sa Septiembre  sa Cedar Point, Ohio. “Gusto gid sang tanan nga makatambong sa sini,” siling ni Clarence B. Beaty, isa ka pamatan-on nga Estudyante sang Biblia nga taga-Missouri. Sobra 6,000 ka kauturan ang nagtambong, kag labaw gid ini sa ila ginpaabot. Nangin makalilipay pa gid ini nga kombension kay sobra 200 ang nabawtismuhan sa Lake Erie.

Sang Septiembre 5, 1919, sa ikalima nga adlaw sang kombension, ginpahibalo ni Brother Rutherford sa iya pamulongpulong nga “Address to Co-laborers” ang isa ka bag-o nga magasin nga The Golden Age. * “Isugid [sini] ang importante nga mga balita kag ipaathag sini base sa Kasulatan kon ngaa nagakatabo ining talalupangdon nga mga hitabo.”

Ginpalig-on ang tanan nga Estudyante sang Biblia nga maisog nga magbantala kag gamiton ining bag-o nga magasin. Ang sulat nga nagapaathag kon paano organisahon ini nga pagbantala nagsiling: “Dapat tandaan sang kada isa nga bawtismado nga isa ka daku nga pribilehiyo ang pag-alagad, kag dapat niya himuon ang iya bug-os nga masarangan sa pagbantala sa kalibutan.” Madamo gid ang nagbaton sa sini nga pangagda nga magbantala! Pag-abot sang Disiembre, nakakuha sing sobra 50,000 ka suskripsion sa bag-o nga magasin ang mapisan nga mga manugbantala sang Ginharian.

Sa ulihi nga bahin sang 1919, naorganisar liwat kag napabaskog ang katawhan ni Jehova. Natuman man ang pila ka importante nga mga tagna sa katapusan nga mga adlaw. Natapos na ang pagtilaw kag pagtinlo sa katawhan sang Dios nga gintagna sa Malaquias 3:1-4. Nahilway na sa “Babilonia nga Daku” ang katawhan ni Jehova, kag gintangdo na ni Jesus ang “matutom kag mainandamon nga ulipon.” * (Bug. 18:2, 4; Mat. 24:45) Handa na ang mga Estudyante sang Biblia sa hilikuton nga ipahimo sa ila ni Jehova.