1. Ano ang puede himuon ni Jehova para matuman ang iya katuyuan?

PUEDE himuon ni Jehova ang bisan ano nga kinahanglan para matuman ang iya katuyuan. Halimbawa, ginpakita niya nga puede sia mangin Manunudlo, Manuglugpay, kag Ebanghelisador. Pila lang ini sa madamo nga puede niya himuon. (Isa. 48:17; 2 Cor. 7:6; Gal. 3:8) Pero masami niya nga ginagamit ang mga tawo para matuman ang iya katuyuan. (Mat. 24:14; 28:19, 20; 2 Cor. 1:3, 4) Puede man kita hatagan ni Jehova sang kaalam kag kusog nga kinahanglan naton para matuman ang iya kabubut-on. Tanan ini nalakip sa kahulugan sang ngalan ni Jehova, suno sa pila ka eksperto sa Biblia.

2. (a) Ngaa mahimo kita magduhaduha kon kaisa nga ginagamit kita ni Jehova? (b) Ano ang binagbinagon naton sa sini nga artikulo?

² Gusto naton tanan nga mangin mapuslanon kita kay Jehova, pero nagaduhaduha ang iban nga ginagamit sila ni Jehova. Ngaa? Para sa ila, indi na nila mahimo ang gusto nila bangod sang ila edad, kahimtangan, ukon ikasarang. Ginahunahuna naman sang iban nga bastante na ang ila ginahimo kag indi na kinahanglan nga pauswagon pa nila ini. Sa sini nga artikulo, binagbinagon naton kon paano ginahatag ni Jehova ang kinahanglan naton para matuman ang iya katuyuan. Binagbinagon man naton ang mga kasaysayan sa Biblia kon paano ginhatagan ni Jehova sang handum kag kusog ang iya mga alagad nga lalaki kag babayi. Dayon, binagbinagon naton kon paano naton mahatagan si Jehova sang kahigayunan nga gamiton kita.

3. Paano kita mahatagan ni Jehova sang handum pareho sang ginpromisa niya sa Filipos 2:13?

³ Basaha ang Filipos 2:13. * Mahatagan kita ni Jehova sang handum. Paano? Halimbawa, mahimo nga may nabal-an kita nga dapat buligan sa aton kongregasyon. Ukon basi ginbasa sang mga gulang ang isa ka sulat halin sa sanga talatapan nga may bululigan sa iban nga kongregasyon. Mahimo kita mamangkot, ‘Paano ayhan ako makabulig?’ Ukon basi gin-agda kita nga batunon ang isa ka mabudlay nga asaynment, pero nagapalibog kita kon matungdan naton ini sing maayo. Ukon sang ginbasa naton ang isa ka teksto sa Biblia, mahimo nga nagpamensar kita, ‘Paano ko magamit ini nga teksto para mabuligan ang iban?’ Indi gid kita pagpiliton ni Jehova nga himuon ang bisan ano. Pero kon makita ni Jehova nga nagapamensar kita kon ano ang mahimo naton, mabuligan niya kita nga panikasugan nga himuon ang ginpamensar naton.

4. Paano kita mahatagan ni Jehova sang kusog?

⁴ Mahatagan man kita ni Jehova sang kusog. (Isa. 40:29) Paano? Ginahatagan niya kita sang iya balaan nga espiritu para mapauswag naton ang aton mga ikasarang. (Ex. 35:30-35) Ginagamit ni Jehova ang iya organisasyon para tudluan kita kon paano himuon ang aton mga asaynment. Kon indi ka sigurado kon paano himuon ang isa ka asaynment, magpangayo sing bulig. Puede mo man pangabayon bisan ano nga oras ang aton maalwan nga Amay sa langit nga hatagan ka sang “gahom nga labaw sa kinaandan.” (2 Cor. 4:7; Luc. 11:13) Madamo sing halimbawa sa Biblia kon paano ginhatagan ni Jehova sang handum kag kusog ang mga lalaki kag mga babayi sang una. Samtang ginabinagbinag naton ang pila sa sini nga mga kasaysayan, hunahunaa kon paano ka mabuligan ni Jehova nga himuon ang pareho sa ila ginhimo.

5. Ano ang matun-an naton parte sa kon san-o gingamit ni Jehova si Moises sa pagluwas sa Iya katawhan?

⁵ Ginbuligan ni Jehova si Moises para maluwas niya ang mga Israelinhon. Pero san-o sia gingamit ni Jehova? Pagkatapos bala nga “gintudluan si Moises sing tanan nga kaalam sang mga Egiptohanon” kag abi niya handa na sia? (Binu. 7:22-25) Indi. Gingamit sia ni Jehova pagkatapos Niya sia mabuligan nga mangin mapainubuson kag malulo. (Binu. 7:30, 34-36) Ginhatagan ni Jehova si Moises sang kaisog sa paghambal sa pinakagamhanan nga manuggahom sa Egipto. (Ex. 9:13-19) Ano ang matun-an naton parte sa kon san-o gingamit ni Jehova si Moises? Ginagamit ni Jehova ang mga nagailog sa iya mga kinaiya kag ang mga nagasalig sa iya nga hatagan sila sang kusog.—Fil. 4:13.

6. Ano ang matun-an naton parte sa kon paano gingamit ni Jehova si Barzilai para buligan si Hari David?

⁶ Pagligad sang madamo nga tinuig, gingamit ni Jehova si Barzilai para buligan si Hari David. Si David kag ang katawhan “gingutom kag ginkapoy kag gin-uhaw” sang nagpalagyo sila sa iya anak nga si Absalom. Tigulang na si Barzilai, pero ginrisgo niya ang iya kabuhi upod sa iban pa para mahatag ang mga kinahanglanon ni David kag sang katawhan. Wala ginhunahuna ni Barzilai nga indi na sia magamit ni Jehova kay tigulang na sia. Sa baylo, maalwan niya nga gingamit ang ara sa iya para buligan ang mga alagad sang Dios. (2 Sam. 17:27-29) Ano ang matun-an naton sa sini? Ano man ang aton edad, puede kita gamiton ni Jehova para buligan ang aton mga kauturan, sa aton lugar ukon sa iban nga pungsod, kag mahatag ang ila mga kinahanglanon. (Hulu. 3:27, 28; 19:17) Mahimo  nga indi kita direkta nga makabulig sa ila, pero makaamot kita sa aton bug-os kalibutan nga hilikuton para makatipon sang kuarta nga makabulig sa ila sa tion kag sa lugar nga kinahanglan ini.—2 Cor. 8:14, 15; 9:11.

7. Paano gingamit ni Jehova si Simeon, kag ngaa makapalig-on ini sa aton?

⁷ Nagpromisa si Jehova kay Simeon, nga isa ka matutom nga tigulang sa Jerusalem, nga makita niya ang Mesias antes sia mapatay. Napalig-on gid si Simeon sa sini nga promisa, kay madugay na niya nga ginahulat ang Mesias. Ginpadyaan sia ni Jehova bangod sang iya pagtuo kag pagbatas. Isa ka adlaw, nagsulod sia sa templo “paagi sa pagtuytoy sang espiritu.” Nakita niya didto ang bata nga si Jesus, kag gingamit sia ni Jehova sa pagtagna parte sini nga bata nga amo ang mangin Cristo sa ulihi. (Luc. 2:25-35) Nagpasalamat si Simeon sa sini nga pribilehiyo bisan pa posible nga napatay sia antes ginsugdan ni Jesus ang iya ministeryo sa duta. Madamo pa nga pagpakamaayo ang mabaton niya sa palaabuton! Sa bag-o nga kalibutan, makita niya ang pagpakamaayo sa tanan nga pamilya sa duta paagi sa paggahom ni Jesus. (Gen. 22:18) Nagapasalamat man kita sa pribilehiyo nga ginahatag ni Jehova sa aton sa pag-alagad sa iya.

8. Paano kita mahimo gamiton ni Jehova pareho sa ginhimo niya kay Bernabe?

⁸ Sang unang siglo C.E., handa nga nagpagamit kay Jehova ang maalwan nga tawo nga si Jose. (Binu. 4:36, 37) Gintawag sia sang mga apostoles nga Bernabe, buot silingon “Anak sang Lugpay,” ayhan bangod maayo gid sia maglugpay sa iban. Halimbawa, sang nangin Cristiano si Saulo, madamo nga kauturan ang nahadlok sa iya kay ginhingabot niya sang una ang mga kongregasyon. Pero ginbuligan ni Bernabe si Saulo, kag mahimo nga ginpasalamatan gid ni Saulo ang ginpakita niya nga kaayo. (Binu. 9:21, 26-28) Sang ulihi, dapat palig-unon sang mga gulang sa Jerusalem ang mga kauturan sa Antioquia sa Siria. Sin-o ang ginpakadto nila sa sining malayo nga lugar? Si Bernabe! Husto gid ang ila ginpili. “Ginpalig-on [ni Bernabe] sila tanan nga magpabilin nga matutom sa Ginuo upod ang malig-on nga tagipusuon.” (Binu. 11:22-24) Subong, buligan man kita ni Jehova para malugpayan naton ang aton mga kauturan. Halimbawa, mahimo niya kita gamiton para lugpayan ang mga napatyan sang ila pinalangga. Ukon mahimo niya kita palig-unon nga bisitahon ukon tawgan ang nagamasakit ukon na-depress para pabakuron sila. Hatagan mo bala si Jehova sang kahigayunan nga gamiton ka pareho sa ginhimo niya kay Bernabe?—1 Tes. 5:14.

9. Paano ginbuligan ni Jehova ang brother nga si Vasily nga mangin maayo nga gulang, kag ano ang matun-an naton sa sini?

⁹ Ginbuligan ni Jehova ang brother nga si Vasily nga mangin maayo nga gulang. Gintangdo nga gulang si Vasily sang 26 anyos sia, pero pamatyag niya kulang pa ang iya eksperiensia para makabulig sia sa mga kauturan, ilabi na sa mga may problema. Pero ginhanas sia sang madugay na nga mga gulang kag paagi sa Kingdom Ministry School. Ginpanikasugan gid ni Vasily nga mag-uswag. Halimbawa, ginlista niya ang mga masarangan niya himuon. Isaisa niya ini nga ginhimo, gani amat-amat nga nagdugang ang iya kompiansa. Nagsiling sia: “Ang ginakahadlukan ko nga himuon sang una amo na ang nagahatag sa akon sang kalipay subong. Nalipay gid ako kon makakita ako sang eksakto nga teksto, paagi sa bulig ni Jehova, para malugpayan ang isa ka utod sa kongregasyon.” Mga utod nga lalaki, kon ilugon ninyo si Vasily kag handa man kamo nga gamiton ni Jehova, buligan niya kamo nga masarangan ang dugang nga responsibilidad sa kongregasyon.

10. Ano ang ginhimo ni Abigail, kag ano ang matun-an mo sa iya?

¹⁰ Ginhingabot ni Hari Saul si David kag ang iya mga tinawo, gani kinahanglan nila ang bulig. Nangayo sing diutay nga pagkaon ang mga tinawo ni David sa manggaranon nga Israelinhon nga si Nabal. Para sa ila, makapangayo sila kay Nabal kay ginaamligan nila ang iya mga karnero sa kamingawan. Pero indi gid gusto ni Nabal nga maghatag sa ila. Naakig gid si David kag gusto niya patyon si Nabal kag ang tanan nga lalaki sa iya panimalay. (1 Sam. 25:3-13, 22) Pero ang matahom nga asawa ni Nabal nga si Abigail maalam gid kag nahangpan niya ang sitwasyon. Nangisog sia nga magkadto kay David kag nagluhod sa iya tiilan, kag ginpangabay niya si David nga indi magpakasala paagi sa pagpatay kay Nabal kag sa iya mga tinawo. Mataktikanhon niya nga ginpalig-on si David nga magsalig kay Jehova. Ang mapainubuson nga ginsiling ni Abigail kag ang iya maalamon nga ginhimo nagpabag-o sang panghunahuna ni David. Narealisar ni David nga si Jehova ang nagpadala kay Abigail. (1 Sam. 25:23-28, 32-34) Bangod sang mga kinaiya ni Abigail, gingamit sia ni Jehova. Puede man gamiton ni Jehova ang mga utod nga babayi nga mataktikanhon kag may paghangop para palig-unon ang ila pamilya kag ang mga kauturan sa kongregasyon.—Hulu. 24:3; Tito 2:3-5.

11. Ano ang ginhimo sang mga anak nga babayi ni Sallum, kag sin-o ang nagailog sa ila subong?

¹¹ Pagligad sang madamo nga tinuig, gingamit ni Jehova ang mga anak nga babayi ni Sallum sa pagbulig sa pagkay-o sa pader sang Jerusalem. (Neh. 2:20; 3:12) Bisan pa isa ka prinsipe si Sallum, handa nga himuon sang iya mga anak nga babayi ining mabudlay kag delikado nga trabaho. (Neh. 4:15-18) Indi gid pareho sa ila ang mga dungganon sa Tekoa nga “wala magpasakop” para magbulig! (Neh. 3:5) Imadyina ang kalipay sang mga anak nga babayi ni Sallum sang nahuman ang pader sa sulod lang sang 52 ka adlaw! (Neh. 6:15) Subong, handa kag nalipay sa pagbulig ang mga utod nga babayi sa pagtukod kag pagmentinar sang mga pasilidad nga gindedikar kay Jehova. Kinahanglan gid ang ila ikasarang, kapagsik, kag katutom para magmadinalag-on ining pinasahi nga paagi sang pag-alagad sa Dios.

12. Paano kita mahimo nga gamiton ni Jehova pareho sa ginhimo niya kay Tabita?

¹² Ginpalig-on ni Jehova si Tabita, gani “madamo sia sing maayo nga binuhatan kag mabinuligon sia sa mga imol,” ilabi na sa mga balo nga babayi. (Binu. 9:36) Bangod maalwan gid sia kag mainayuhon, madamo ang nasubuan sang napatay sia. Pero nalipay gid sila sang ginbanhaw sia ni apostol Pedro. (Binu. 9:39-41) Ano ang matun-an naton kay Tabita? Pamatan-on man kita ukon tigulang, lalaki man ukon babayi, tanan kita puede makabulig sa aton mga kauturan.—Heb. 13:16.

13. Paano gingamit ni Jehova ang mahuluy-on nga utod nga si Ruth, kag ano ang ginsiling niya?

¹³ Gusto ni Ruth mangin misyonero, pero mahuluy-on gid sia. Sang bata pa sia, kadasig sa iya managtag sang mga tract sa mga balay. “Gusto ko gid ini himuon,” siling niya. Pero nabudlayan gid sia mag-istorya sa mga tawo sa mga balay parte sa Ginharian sang Dios. Bisan pa mahuluy-on si Ruth, nagregular payunir sia sang 18 anyos sia. Sang 1946, nag-eskwela sia sa Watchtower Bible School of Gilead kag nag-alagad sia sa Hawaii kag sa Japan sang ulihi. Gingamit sia ni Jehova para mabantala ang maayong balita sa sini nga mga lugar. Pagligad sang halos 80 ka tuig nga pagbantala, nagsiling si Ruth: “Ginpalig-on ako pirme ni Jehova. Paagi sa iya bulig, nadaug ko ang  akon pagkamahuluy-on. Nagapati gid ako nga puede gamiton ni Jehova ang bisan sin-o nga nagasalig sa iya.”

14. Suno sa Colosas 1:29, ano ang dapat naton himuon kon gusto naton nga gamiton kita ni Jehova?

¹⁴ Halin sang una asta subong, ginagamit ni Jehova ang iya mga alagad sa madamo nga paagi. Ano ang himuon ni Jehova para matuman mo ang iya kabubut-on? Depende gid ini kon handa ka sa pagpanikasog. (Basaha ang Colosas 1:29.) Kon handa ka nga gamiton ni Jehova, puede ka niya himuon nga mangin isa ka mapisan nga manugbantala, maayo nga manunudlo, makapalig-on nga manuglugpay, eksperto nga trabahador, masaligan nga abyan, ukon iban pa nga kinahanglan niya para matuman ang iya kabubut-on.

15. Suno sa 1 Timoteo 4:12, 15, ano ang dapat ipangabay sang mga pamatan-on nga lalaki kay Jehova?

¹⁵ Kamusta kamo nga mga pamatan-on nga lalaki nga malapit na mangin adulto? Kinahanglan ang madamo nga lalaki nga mapisan sa pagbulig sa kongregasyon bilang mga ministeryal nga alagad. Sa madamo nga kongregasyon, mas madamo ang mga gulang sangsa mga ministeryal nga alagad. Gusto bala ninyo nga mga pamatan-on ang dugang nga mga responsibilidad sa kongregasyon? May pila ka brother nga nagasiling, “Kontento na ako nga mangin manugbantala.” Kon amo sini ang ginabatyag mo, pangabaya si Jehova nga buligan ka nga panikasugan nga mangin kalipikado nga ministeryal nga alagad kag hatagan ka sang kusog nga himuon ang bug-os mo nga masarangan sa pag-alagad sa iya. (Man. 12:1) Kinahanglan namon ang inyo bulig!—Basaha ang 1 Timoteo 4:12, 15.

16. Ano ang dapat naton ipangabay kay Jehova, kag ngaa?

¹⁶ Puede himuon ni Jehova ang bisan ano para matuman mo ang iya kabubut-on. Gani pangabaya sia nga hatagan ka sang handum nga himuon ang iya kabubut-on kag sang kusog nga kinahanglan mo. Pamatan-on ka man ukon tigulang na, gamita ang imo tion, kusog, kag iban pa nga ginapanag-iyahan para padunggan si Jehova subong. (Man. 9:10) Kon hatagan ka sang kahigayunan nga dugangan ang imo pag-alagad kay Jehova, indi magpadalidali sa pagpangindi kay ginahunahuna mo nga indi mo ini masarangan. Pribilehiyo gid naton tanan nga himuon ang aton bug-os nga masarangan para padunggan ang aton mahigugmaon nga Amay!