TULUN-AN NGA ARTIKULO 41
Padayon nga Mangin Matutom sa “Dakung Kapipit-an”
“Higugmaa ninyo si Jehova, tanan kamo nga mainunungon sa iya! Ginaamligan ni Jehova ang mga matutom.”—SAL. 31:23.
AMBAHANON 129 Padayon Kita nga Magbatas
ANG BINAGBINAGON SA SINI NGA ARTIKULO *
1-2. (a) Ano ang malapit na nga ipahibalo sang mga lider sang kalibutan? (b) Ano nga mga pamangkot ang dapat masabat?
IMADYINA nga bag-o lang ginpahibalo sang mga lider sang kalibutan nga may ara na “paghidait kag kalig-unan.” Mahimo nga ipabugal nila nga malinong na gid ang kalibutan. Gusto nila nga hunahunaon naton nga masolbar nila ang tanan nga problema sa kalibutan. Pero indi gid nila mapunggan ang masunod nga matabo! Ngaa? Gintagna sang Biblia nga “magaabot gilayon ang hinali nga kalaglagan sa ila, . . . kag indi gid sila makapalagyo.”—1 Tes. 5:3.
2 Dapat masabat ining importante nga mga pamangkot: Ano ang matabo sa “dakung kapipit-an”? Ano ang gusto ni Jehova nga himuon naton kon mag-abot na ini? Kag paano kita magahanda subong para padayon kita nga mangin matutom sa dakung kapipit-an?—Mat. 24:21.
ANO ANG MATABO SA “DAKUNG KAPIPIT-AN”?
3. Suno sa Bugna 17:5, 15-18, paano laglagon sang Dios ang “Babilonia nga Daku”?
3 Basaha ang Bugna 17:5, 15-18. Laglagon ang “Babilonia nga Daku”! Indi ini mapunggan sang mga lider sang kalibutan. Ngaa? Bangod “[ibutang] sang Dios sa ila tagipusuon ang paghimo sang iya hunahuna.” Ano ini nga hunahuna? Ang paglaglag sa tanan nga butig nga relihion, lakip ang Cristiandad. * Ibutang sang Dios ang iya hunahuna sa tagipusuon sang “napulo ka sungay” sang “mabangis nga sapat nga eskarlata ang kolor.” Ang napulo ka sungay nagarepresentar sa tanan nga gobierno nga nagasuportar sa “mabangis nga sapat,” nga amo ang United Nations. (Bug. 17:3, 11-13; 18:8) Kon salakayon sini nga mga gobierno ang butig nga relihion, sinyales ini nga magasugod na ang dakung kapipit-an. Mangin hinali kag makahaladlok ini nga hitabo sa bilog nga kalibutan.
4. (a) Ano ang mahimo nga isiling sang mga lider sang kalibutan kon ngaa ginsalakay nila ang butig nga relihion? (b) Ano ang posible nga himuon sang mga miembro anay sini nga mga relihion?
4 Wala kita kabalo sang eksakto gid nga isiling sang mga lider sang kalibutan kon ngaa ginsalakay nila ang Babilonia nga Daku. Mahimo nga isiling nila nga ang mga relihion amo ang kabangdanan kon ngaa wala sing paghidait kag pirme ini nagapasilabot sa pulitika. Ukon mahimo nga isiling nila nga ang mga relihion nagtipon sing tuman kadamo nga manggad kag propiedad. (Bug. 18:3, 7) Mahimo gid nga indi pagalaglagon sang mga gobierno ang tanan nga miembro sang butig nga relihion. Sa baylo, dulaon nila sing bug-os ang mga relihion. Kon malaglag na ini nga mga relihion, marealisar sang mga miembro anay sini nga indi matuman sang mga lider sang relihion ang ila ginpromisa. Gani posible nga ipanghiwala sang mga tawo nga miembro anay sila sini nga mga relihion.
5. Ano ang ginpromisa ni Jehova parte sa dakung kapipit-an, kag ngaa?
5 Wala ginasiling sang Biblia kon daw ano kalawig ang paglaglag sa Babilonia nga Daku, pero kabalo kita nga madasig lang ini nga matabo. (Bug. 18:10, 21) Ginpromisa ni Jehova nga “palip-uton niya ang mga adlaw” sang kapipit-an para maluwas ang iya “mga pinili” kag indi madula ang matuod nga relihion. (Mar. 13:19, 20) Ano ang gusto ni Jehova nga himuon naton kon magsugod na ang dakung kapipit-an asta mag-abot ang inaway sa Armageddon?
PADAYON NGA MAG-ALAGAD KAY JEHOVA
6. Para indi kita mangin bahin sang butig nga relihion, ano pa ang dapat naton himuon?
6 Ginbinagbinag sa nagligad nga artikulo nga gusto ni Jehova nga ang mga nagasimba sa iya indi na mangin bahin sang Babilonia nga Daku. Pero may dapat pa kita himuon. Dapat magpabilin kita sa matuod nga relihion kag determinado nga mag-alagad kay Jehova. Binagbinaga ang duha ka paagi nga mahimo naton ini.
Indi gid naton dapat pagpabay-an ang aton pagtilipon, bisan sa mabudlay nga kahimtangan (Tan-awa ang parapo 7) *
7. (a) Paano naton matuman ang matarong nga mga talaksan ni Jehova sa moral? (b) Suno sa Hebreo 10:24, 25, ngaa dapat kita magtipon sing tingob, kag ngaa importante gid ini subong?
7 Una, dapat gid naton tumanon ang matarong nga mga talaksan ni Jehova sa moral. Wala gid kita nalipay sa imoral nga paggawi sang kalibutan. Halimbawa, wala gid kita nagaugyon sa bisan ano nga klase sang seksuwal nga imoralidad, pati na ang pagpakasal sang pareho nga lalaki ukon pareho nga babayi kag ang iban pa nga homoseksuwal nga paggawi. (Mat. 19:4, 5; Roma 1:26, 27) Ikaduha, dapat kita padayon nga magsimba kaupod sang aton mga kauturan. Ginahimo naton ini kon diin puede kita magtipon, sa aton Kingdom Hall, sa balay sang aton mga kauturan, ukon sa tago nga lugar. Ano man ang matabo, indi kita magauntat sa pagkadto sa aton mga miting para magsimba. Ang matuod, dapat kita magtipon sing tingob “labi na gid samtang nakita [naton] nga malapit na ang adlaw.”—Basaha ang Hebreo 10:24, 25.
8. Ngaa mahimo nga bag-o na ang isugid naton nga mensahe sa palaabuton?
8 Sa dakung kapipit-an, mahimo nga bag-o na ang isugid naton nga mensahe. Subong, ginabantala naton ang maayong balita sang Ginharian kag ginatudluan naton ang mga tawo para mangin disipulo sila. Pero kon mag-abot ini nga tion, mahimo nga ibantala naton ang isa ka mensahe nga masakit pamatian nga daw pareho sang pag-ulan sang dalagku nga yelo. (Bug. 16:21) Mahimo nga ibantala naton nga malapit na gid laglagon ang kalibutan ni Satanas. Sa ulihi, mabal-an naton kon ano gid ang aton mensahe kag kon paano naton ini isugid. Gamiton ayhan naton ang mga pamaagi nga gingamit naton sing sobra na isa ka gatos ka tuig sa pagbantala kag pagtudlo, ukon may iban naman kita nga pamaagi? Wala kita kabalo. Ano man ang pamaagi naton, mangin pribilehiyo naton nga ibantala sing maisugon ang mensahe sang paghukom ni Jehova!—Ezeq. 2:3-5.
9. Ano ang mangin reaksion sang mga pungsod sa aton mensahe, pero sa ano kita makasigurado?
9 Bangod sang aton mensahe, mahimo gid nga maakig ang mga pungsod kag tinguhaan nila nga pauntaton kita sa pagbantala. Dapat gid kita magsalig nga buligan kita ni Jehova pareho sang ginahimo naton subong samtang nagabantala kita. Makasigurado kita nga hatagan kita sang aton Dios sing kusog para matuman naton ang iya kabubut-on.—Miq. 3:8.
MANGIN HANDA KON SALAKAYON ANG KATAWHAN SANG DIOS
10. Suno sa tagna sa Lucas 21:25-28, ano ang mangin reaksion sang kalabanan nga tawo sa matabo sa dakung kapipit-an?
10 Basaha ang Lucas 21:25-28. Sa dakung kapipit-an, makibot gid ang mga tawo kon makita nila nga isaisa nga malaglag ang tanan nga ginasaligan nila anay. “Malisang” sila kag mabalaka nga basi mapatay sila sa pinakamalain nga tion sa kasaysayan sang tawo. (Sof. 1:14, 15) Mahimo nga magabudlay man ang kahimtangan sang katawhan ni Jehova. Bangod indi kita bahin sang kalibutan, mahimo nga mag-antos kita sang pila ka problema. Mahimo nga makulangan kita sang pila naton ka kinahanglanon.
11. (a) Kon malaglag na ang butig nga relihion, ngaa matalupangdan gid ang mga Saksi ni Jehova? (b) Ngaa indi kita dapat mahadlok sa dakung kapipit-an?
11 Ang mga tawo nga miembro anay sang mga relihion nga nalaglag na mahimo nga maakig gid kay ara pa ang relihion sang mga Saksi ni Jehova. Sigurado gid nga ipahibalo nila sa iban ang ila kaakig, halimbawa paagi sa Internet. Dumtan kita sang mga pungsod kag sang ila manuggahom nga si Satanas bangod ang aton relihion lang ang wala malaglag. Wala matuman ang gusto nila nga dulaon ang tanan nga relihion sa kalibutan. Gani matalupangdan gid nila kita. Magahimbon ang mga pungsod para mangin ang Gog sang Magog. * Salakayon nila ang katawhan ni Jehova sa bug-os nila nga masarangan. (Ezeq. 38:2, 14-16) Mahimo nga mabalaka kita sa posible nga matabo sa dakung kapipit-an kay wala kita kabalo sang eksakto nga matabo. Pero sigurado kita nga indi kita dapat mahadlok sa dakung kapipit-an. Magahatag si Jehova sang mga instruksion nga magaluwas sa aton. (Sal. 34:19) ‘Magatindog kita kag ihangad naton ang aton ulo’ bangod kabalo kita nga “malapit na ang pagtubos” sa aton. *
12. Paano kita ginabuligan sang “matutom kag mainandamon nga ulipon” nga maghanda para sa matabo sa palaabuton?
12 Ginabuligan kita sang “matutom kag mainandamon nga ulipon” nga maghanda para padayon kita nga mangin matutom sa dakung kapipit-an. (Mat. 24:45) Ginahimo nila ini sa madamo nga paagi. Ang isa ka halimbawa amo ang mga programa sa aton mga kombension sang 2016-2018. Ang mga pamulongpulong sa sini nga mga kombension nagpalig-on sa aton nga pabakuron ang mga kinaiya nga kinahanglan naton kay malapit na ang adlaw ni Jehova. Binagbinagon naton liwat ini nga mga kinaiya.
PABAKURA ANG IMO PAGKAMAINUNUNGON, PAGBATAS, KAG KAISOG
Maghanda na subong para maluwas sa “dakung kapipit-an” (Tan-awa ang parapo 13-16) *
13. Paano naton mapabakod ang aton pagkamainunungon kay Jehova, kag ngaa dapat naton ini himuon subong?
13 Pagkamainunungon: Ang tema sang programa sa kombension sang 2016 amo ang “Magpabilin nga Mainunungon kay Jehova!” Gintudluan kita sini nga programa nga kon mabakod ang aton kaangtanan kay Jehova, mangin mainunungon kita sa iya. Ginpahanumdom sa aton nga magasuod kita kay Jehova paagi sa tinagipusuon nga pagpangamuyo kag mapisan nga pagtuon sa iya Pulong. Kon himuon naton ini, masarangan naton bisan ang pinakamabudlay nga mga problema. Bangod malapit na gid ang dakung kapipit-an, mapaabot naton nga pagatilawan pa gid ang aton pagkamainunungon sa Dios kag sa iya Ginharian. Mahimo nga padayon kita nga yagutaon sang mga tawo. (2 Ped. 3:3, 4) Matabo ini bangod wala naton ginasuportahan ang bisan ano nga bahin sang kalibutan ni Satanas. Dapat naton pabakuron ang aton pagkamainunungon subong, para padayon kita nga mangin mainunungon sa dakung kapipit-an.
14. (a) Ano ang matabo nga pagbag-o sa magapanguna sa katawhan sang Dios sa duta? (b) Ngaa dapat kita mangin mainunungon?
14 Sa dakung kapipit-an, may matabo nga pagbag-o sa magapanguna sa katawhan sang Dios sa duta. Ang tanan nga hinaplas nga ari pa sa duta pagatipunon sa langit para magpakig-away sa Armageddon. (Mat. 24:31; Bug. 2:26, 27) Buot silingon nga indi na naton makaupod sa duta ang Nagadumala nga Hubon. Pero mangin organisado gihapon ang daku nga kadam-an. Magapanguna ang kalipikado nga mga utod nga bahin sang iban nga mga karnero. Dapat naton ipakita nga mainunungon kita paagi sa pagsuportar sa sini nga mga utod kag pagsunod sa direksion nga nabaton nila halin sa Dios. Dapat naton sundon ang ila direksion kon gusto naton maluwas!
15. Paano naton mapabakod ang aton pagbatas, kag ngaa dapat naton ini himuon subong?
15 Pagbatas: Ang tema sang programa sa kombension sang 2017 amo ang “Indi Mangampo!” Ginbuligan kita sini nga programa nga pabakuron ang aton ikasarang sa pagbatas sa mga pagtilaw. Natun-an naton nga wala ini nagadepende sa maayo nga kahimtangan. Mapabakod naton ang aton pagbatas paagi sa pagsalig kay Jehova. (Roma 12:12) Indi gid naton pagkalimtan ang promisa ni Jesus: “Ang nagabatas tubtob sa katapusan maluwas.” (Mat. 24:13, footnote) Nagakahulugan ini nga dapat kita padayon nga mangin matutom bisan ano pa nga kabudlayan ang maatubang naton. Kon batason naton ang tanan nga pagtilaw subong, magabakod pa gid ang aton pagtuo antes magsugod ang dakung kapipit-an.
16. Sa ano nagadepende ang aton kaisog, kag paano naton ini mapabakod subong?
16 Kaisog: Ang tema sang programa sa kombension sang 2018 amo ang “Magpakaisog!” Ginpahanumdom sini nga programa nga wala nagadepende sa aton mga ikasarang ang aton kaisog. Para mangin matuod kita nga maisog, dapat kita magsalig kay Jehova. Paano naton mapabakod ang aton pagsalig sa iya? Mapabakod naton ini paagi sa pagbasa sang Pulong ni Jehova kada adlaw kag sa pagpamalandong kon paano niya ginluwas ang iya katawhan sang una. (Sal. 68:20; 2 Ped. 2:9) Kon salakayon kita sang mga pungsod sa dakung kapipit-an, dapat kita mangin maisog kag magsalig pa gid kay Jehova. (Sal. 112:7, 8; Heb. 13:6) Kon magsalig kita kay Jehova subong, mangin maisog gid kita kon magsalakay si Gog. *
MAGLAUM NGA MALUWAS KA
Malapit na magpakig-away si Jesus kag ang iya kasuldadusan sa langit para laglagon ang mga kaaway sang Dios sa Armageddon! (Tan-awa ang parapo 17)
17. Ngaa indi kita dapat mahadlok sa Armageddon? (Tan-awa ang piktyur sa kober.)
17 Ginsambit sa nagligad nga artikulo nga nagakabuhi kita sa katapusan nga mga adlaw. Pero nagalaum man kita nga maluwas sa dakung kapipit-an. Ang inaway sa Armageddon amo ang pinakaulihi nga bahin sang katapusan sini nga sistema. Pero indi kita dapat mahadlok sa sini. Ngaa? Bangod inaway ini sang Dios. (Hulu. 1:33; Ezeq. 38:18-20; Zac. 14:3) Manduan ni Jehova si Jesucristo nga manguna sa pagpakig-away. Magaupod sa iya ang ginbanhaw nga mga hinaplas kag ang madamo nga anghel. Magapakig-away sila kay Satanas, sa iya mga demonyo, kag sa ila kasuldadusan sa duta.—Dan. 12:1; Bug. 6:2; 17:14.
18. (a) Ano ang ginpromisa ni Jehova? (b) Suno sa Bugna 7:9, 13-17, ngaa makasalig ka sa imo paglaum sa palaabuton?
18 Nagpromisa si Jehova: “Wala sing ginhimo nga hinganiban nga magmadinalag-on batok sa imo.” (Isa. 54:17) “Ang daku nga kadam-an” sang matutom nga mga nagasimba kay Jehova buhi nga ‘magagua halin sa dakung kapipit-an’! Padayon sila nga magaalagad sa iya. (Basaha ang Bugna 7:9, 13-17.) Nagahatag ang Biblia sang madamo nga rason nga makasalig kita nga maluwas kita sa palaabuton! Kabalo kita nga “ginaamligan ni Jehova ang mga matutom.” (Sal. 31:23) Malipay gid ang tanan nga nagapalangga kag nagadayaw kay Jehova kon mabindikar na niya ang iya balaan nga ngalan.—Ezeq. 38:23.
19. Ano ang aton makalilipay nga paglaum nga malapit na matuman?
19 Hunahunaa ang mabasa naton sa 2 Timoteo 3:2-5 kon halimbawa ilaragway sini ang mga tawo sa bag-o nga kalibutan nga indi na maimpluwensiahan ni Satanas. (Tan-awa ang kahon nga “ Ang mga Tawo sa Palaabuton.”) Amo ini ang paglaragway ni Brother George Gangas, * nga miembro anay sang Nagadumala nga Hubon: “Ang kalibutan mangin matahom na nga lugar kay ang tanan nagasimba na kay Jehova! Sa indi madugay, mabuhi ka na sa bag-o nga sistema. Magakabuhi ka samtang nagakabuhi si Jehova. Mabuhi na kita sing wala sing katapusan.” Makalilipay gid ini nga paglaum!
AMBAHANON 122 Mangin Malig-on kag Mapag-on!
^ par. 5 Kabalo kita nga malapit na maeksperiensiahan sang tanan nga tawo ang “dakung kapipit-an.” Ano ang matabo sa mga alagad ni Jehova? Ano ang gusto ni Jehova nga himuon naton? Ano nga mga kinaiya ang dapat naton pabakuron subong para padayon kita nga mangin matutom? Binagbinagon naton ini sa sini nga artikulo.
^ par. 3 DUGANG NGA PAATHAG: Ang Cristiandad amo ang mga relihion nga nagasiling nga mga Cristiano sila pero wala nila ginatudluan ang mga tawo nga simbahon si Jehova suno sa iya mga talaksan.
^ par. 11 DUGANG NGA PAATHAG: Ang Gog sang Magog (ukon Gog) amo ang paghimbon sang mga pungsod nga magasalakay sa mga nagasimba kay Jehova sa dakung kapipit-an.
^ par. 11 Para sa dugang nga impormasyon parte sa matabo antes sang inaway sa Armageddon, tan-awa ang kapitulo 21 sang libro nga Nagagahom ang Ginharian sang Dios! Parte sa pagsalakay sang Gog sang Magog kag kon paano amligan ni Jehova ang iya katawhan sa Armageddon, tan-awa ang kapitulo 17 kag 18 sang libro nga Putli nga Pagsimba kay Jehova—Napasag-uli Na!
^ par. 16 Ang programa sa kombension sa 2019 nga may tema nga “Ang Gugma Wala sing Katapusan!” nagapasalig sa aton nga makapabilin kita nga luwas sa katalagman bangod sang gugma kag proteksion ni Jehova.—1 Cor. 13:8.
^ par. 19 Tan-awa ang artikulo nga “Ang Iya Binuhatan Nagasunod sa Iya” sa Disiembre 1, 1994, nga Ang Lalantawan.
