1. Ngaa si Jehova lang ang dapat naton simbahon?

SI Jehova lang ang dapat naton simbahon bangod sia ang nagtuga sa aton kag naghatag sa aton sang kabuhi. (Bug. 4:11) Pero dapat kita maghalong. Bisan pa ginahigugma naton kag ginatahod si Jehova, may mga butang nga puede mangin importante gid sa aton kag maapektuhan sini ang aton pagsimba sa iya. Dapat naton mahangpan kon paano ini matabo. Pero binagbinagon anay naton ang buot silingon kon si Jehova lang ang ginasimba naton.

2. Suno sa Exodo 34:14, ano ang dapat naton himuon kon ginahigugma gid naton si Jehova?

² Suno sa Biblia, kon ginahigugma gid naton si Jehova, sia lang ang dapat naton simbahon. Indi naton dapat tugutan ang bisan sin-o ukon ang bisan ano nga mag-agaw sang aton gugma sa iya.—Basaha ang Exodo 34:14.

3. Ngaa may basihan gid ang aton gugma kay Jehova?

³ May basihan gid ang aton gugma kay Jehova. Ngaa? Ginahigugma naton sia bangod sang mga natun-an naton parte sa iya. Ginadayaw naton ang iya matahom nga mga kinaiya. Kabalo kita kon ano ang gusto kag indi gusto ni Jehova, kag ginailog naton sia. Nahangpan naton ang iya katuyuan para sa aton kag nagakabuhi kita suno sa iya mga talaksan. Nalipay gid kita kay ginhatagan niya kita sang kahigayunan nga mangin iya abyan. (Sal. 25:14) Bangod sang tanan nga natun-an naton parte sa aton Manunuga, nangin suod pa gid kita sa iya.—Sant. 4:8.

4. (a) Ano ang ginagamit sang Yawa para indi mangin bug-os ang aton gugma kay Jehova? (b) Ano ang binagbinagon naton sa sini nga artikulo?

 ⁴ Kontrolado sang Yawa ang kalibutan subong, kag ginagamit niya ini para mangin mas importante sa aton ang mga gusto naton kag para mabudlayan kita nga batuan ang aton malain nga mga handum. (Efe. 2:1-3; 1 Juan 5:19) Gusto niya nga higugmaon man naton ang iban nga butang para indi mangin bug-os ang aton gugma kay Jehova. Binagbinagon naton ang iya duha ka paagi. Una, ginatinguhaan niya nga higugmaon naton ang kuarta, kag ikaduha, ginaimpluwensiahan niya kita nga pilion ang indi maayo nga kalingawan.

5. Ngaa dapat kita maghalong nga indi magtubo sa aton tagipusuon ang gugma sa kuarta?

⁵ Gusto naton tanan nga may bastante kita nga pagkaon, mga bayo nga isuksok, kag maayo nga puluy-an. Pero dapat kita maghalong nga indi magtubo sa aton tagipusuon ang gugma sa kuarta. Madamo sa kalibutan ang “mahigugmaon sa kuarta” kag sa mga butang nga mabakal sang kuarta. (2 Tim. 3:2) Kabalo si Jesus nga puede magtubo sa tagipusuon sang iya mga sumulunod ini nga gugma. Nagsiling si Jesus: “Wala sing tawo nga makapaulipon sa duha ka agalon, kay dumtan niya ang isa kag higugmaon ang isa, ukon unungan niya ang isa kag tamayon ang isa. Indi kamo makapaulipon sing dungan sa Dios kag sa Manggad.” (Mat. 6:24) Ang isa nga nagasimba kay Jehova kag nagagamit man sang daku gid nga tion kag kusog para magmanggaranon daw pareho lang nga nagaalagad sa duha ka agalon. Indi lang si Jehova ang iya ginasimba.

6. Ano ang matun-an naton sa ginsiling ni Jesus sa kongregasyon sa Laodicea?

⁶ Sang malapit na matapos ang unang siglo C.E., ang mga Cristiano sa kongregasyon sa siudad sang Laodicea nagpabugal: “Manggaranon ako kag nakatipon sang manggad kag wala na nagakinahanglan sang bisan ano.” Pero  para kay Jehova kag kay Jesus, “makaluluoy [sila], imol, bulag, kag hubo.” Ginlaygayan sila ni Jesus, indi bangod manggaranon sila, kundi bangod ginhigugma gid nila ang manggad amo nga naguba na ang ila kaangtanan kay Jehova. (Bug. 3:14-17) Kon matalupangdan naton nga nagatubo na sa aton tagipusuon ang gugma sa kuarta, dapat naton gilayon tadlungon ang aton panghunahuna. (1 Tim. 6:7, 8) Kay kon indi, posible nga higugmaon man naton ang iban pa nga butang kag indi na pagbatunon ni Jehova ang aton pagsimba. ‘Ginapatuman niya nga sia lang ang dapat simbahon.’ (Deut. 4:24) Paano matabo nga mangin importante gid sa aton kabuhi ang kuarta?

7-9. Ano ang natun-an mo sa eksperiensia ni David nga isa ka gulang?

⁷ Binagbinaga ang eksperiensia ni David nga isa ka gulang sa United States. Empleyado sia sa isa ka kompanya, kag mapisan gid sia magtrabaho. Nakabaton sia sing promosyon kag ginkilala sia nga isa sa pinakamaayo sa iya trabaho sa bilog nga pungsod. “Abi ko sadto, pamatuod ini nga ginapakamaayo ako ni Jehova,” siling ni David. Pero pagpakamaayo gid bala ini ni Jehova?

⁸ Natalupangdan ni David nga may indi maayo nga epekto ang iya trabaho sa iya kaangtanan kay Jehova. “Ginapamensar ko gihapon ang mga problema sa akon trabaho bisan pa ara ako sa mga miting sang kongregasyon kag sa ministeryo,” siling niya. “Madamo ako sing kuarta, pero mas na-stress ako, kag may mga problema na kami sang akon asawa.”

⁹ Narealisar ni David nga dapat sia magdesisyon kon ano ang pinakaimportante sa iya. “Nagdesisyon gid ako nga maghimo sing pagbag-o,” siling niya. Gusto niya nga bag-uhon ang iya iskedyul sa trabaho, kag ginsugid niya sa iya boss ang iya plano. Ano ang natabo? Ginpahalin si David sa iya trabaho! Ano ang iya ginhimo?  “Pagkadason gid nga adlaw, nag-aplay ako bilang auxiliary payunir sa sulod sang madamo nga bulan,” siling niya. Nagtrabaho sila sang iya asawa paagi sa pagpaninlo sa mga bilding para suportahan ang ila mga kinahanglanon. Sang ulihi, nagregular payunir sia, kag dayon nagpayunir man ang iya asawa. Ginpili sini nga mag-asawa ang trabaho nga ginapakanubo sang madamo nga tawo, pero indi ini ang pinakaimportante sa ila. Bisan pa 10 porsiento na lang sang ginakita nila sang una ang sueldo nila subong, iguigo lang ini para sa ila mga gasto kada bulan. Gusto nila nga unahon si Jehova, kag naeksperiensiahan nila nga ginaatipan gid niya ang mga nagahimo sini.—Mat. 6:31-33.

10. Paano naton mabantayan ang aton tagipusuon?

¹⁰ Manggaranon man kita ukon pigado, dapat naton bantayan ang aton tagipusuon. Paano mo ini mahimo? Indi paghigugmaa ang manggad. Kag indi pagtuguti nga mangin mas importante ang imo trabaho sangsa imo pag-alagad kay Jehova. Paano mo mabal-an kon amo na sini ang imo ginabatyag? Puede ka mamangkot: ‘Pirme ko bala ginapamensar ang akon trabaho bisan pa ara ako sa mga miting ukon sa ministeryo? Pirme ko bala ginakabalak-an kon may bastante ako nga kuarta sa palaabuton? Ang kuarta kag materyal nga mga pagkabutang bala ang ginahalinan sang problema namon nga mag-asawa? Handa bala ako magtrabaho sang ginapakanubo sang iban para mas madamo ako sang tion sa pag-alagad kay Jehova?’ (1 Tim. 6:9-12) Kon ginapamalandungan naton ini nga mga pamangkot, dumdumon naton nga palangga kita ni Jehova kag nagapromisa sia sa mga nagahigugma gid sa iya: “Indi ko gid kamo pagbayaan, kag indi ko gid kamo pagpabay-an.” Amo ini ang rason kon ngaa nagsiling si apostol Pablo: “Dapat nga ang inyo pagkabuhi hilway sa gugma sa kuarta.”—Heb. 13:5, 6.

11. Ano ang epekto sa isa ka tawo sang kalingawan nga iya ginapili?

¹¹ Gusto ni Jehova nga malipay kita, kag makahatag sang kalipay ang kalingawan. Ang Pulong sang Dios nagsiling nga “ang pinakamaayo nga mahimo sang tawo amo nga magkaon sia kag mag-inom kag magkalipay sa iya ginpangabudlayan.” (Man. 2:24) Pero ang kalabanan nga kalingawan sa kalibutan may malain nga epekto sa aton. Bangod sini nga mga kalingawan, mahimo batunon na sang madamo nga tawo ang ginapakamalaut sang Pulong sang Dios kag manamian na sila sa sini.

12. Suno sa 1 Corinto 10:21, 22, ngaa dapat naton pilion sing maayo ang aton kalingawan?

¹² Gusto naton nga si Jehova lang ang aton  ginasimba, gani indi kita puede magkaon sa “lamesa ni Jehova” kag sa amo man nga tion sa “lamesa sang mga demonyo.” (Basaha ang 1 Corinto 10:21, 22.) Kon ang duha ka tawo mag-upod sa pagkaon, mahimo sini ipakita nga mag-abyanay sila. Kon pilion naton ang kalingawan nga nagapakita sang kasingki, espiritismo, imoralidad, ukon iban pa nga malain nga mga handum kag panimuot, daw pareho lang nga kaupod naton nga nagakaon ang mga kaaway sang Dios sang pagkaon nga ila ginpreparar. Magahalit ini sa aton kag magaguba man sang aton kaangtanan kay Jehova.

13-14. Suno sa Santiago 1:14, 15, ngaa dapat kita maghalong sa kalingawan nga ginapili naton? Maghatag sing halimbawa.

¹³ Ngaa mapaanggid naton sa pagkaon ang kalingawan? Antes kita magkaon, puede naton pilion ang aton kaunon. Pero kon matulon na naton ang pagkaon, ang mga sustansia sini mangin bahin sang aton lawas sa ulihi. Makapaayo pa gid sang aton lawas ang maayo nga pagkaon; pero magabalatian kita bangod sang indi masustansia nga pagkaon. Mahimo nga indi naton makita gilayon ang epekto sini, pero makita gid ini sa ulihi.

¹⁴ Puede man naton pilion ang aton kalingawan. Pero ang kalingawan nga ginpili naton may epekto sa aton ginahunahuna kag ginabatyag. Ang maayo nga kalingawan makapapagsik sa aton; pero ang indi maayo nga kalingawan magahalit sa aton. (Basaha ang Santiago 1:14, 15.) Mahimo nga indi naton makita gilayon ang epekto sang malain nga kalingawan, pero makita gid ini sa ulihi. Gani ginapaandaman kita sang Biblia: “Indi pagdayai ang inyo kaugalingon: Ang Dios indi ninyo madaya. Kay kon ano ang ginasab-ug sang tawo, ini man ang iya anihon; kay ang nagasab-ug para sa iya unod magaani sang pagkamadinulunton gikan sa iya unod.” (Gal. 6:7, 8) Dapat gid naton likawan ang tanan nga kalingawan nga nagatudlo sang mga butang nga ginadumtan ni Jehova!—Sal. 97:10.

15. Ano nga regalo ang ginhatag ni Jehova para malipay kita?

¹⁵ Madamo sa katawhan ni Jehova ang nanamian maglantaw sa JW Broadcasting^®, ang aton estasyon sa TV paagi sa Internet. Ang utod nga si Marilyn nagsiling: “Bangod sang JW Broadcasting, nangin mas malipayon ako. Maayo tanan ang malantaw ko sa sini. Kon masubuan ako ukon maluyahan sang buot, makalantaw ako sang isa ka makapalig-on nga pamulongpulong ukon programa sa Morning Worship. Bangod sini, nagasuod pa gid ako kay Jehova kag sa iya organisasyon. Ginbag-o gid sang JW Broadcasting ang akon kabuhi.” Ginaapresyar mo bala ini nga regalo halin kay Jehova? Kada bulan, may bag-o nga mga programa sa JW Broadcasting. Madamo ka man sang malantaw nga mga video kag mapamatian nga mga programa kag makapalig-on nga mga ambahanon sa tion nga gusto mo.

16-17. Ngaa dapat kita maghalong sa kalawigon sang tion nga ginagamit naton sa kalingawan, kag paano naton ini makontrol?

¹⁶ Dapat kita maghalong indi lamang sa kon ano nga kalingawan ang ginapili naton kundi sa kalawigon man sang tion nga ginagamit naton sa sini. Kay kon indi, basi mas malawig na ang tion nga ginagamit naton sa kalingawan sangsa pag-alagad kay Jehova. Madamo ang nabudlayan sa pagkontrol sa kalawigon sang tion nga ginagamit nila sa kalingawan. Si Abigail nga 18 anyos nagsiling: “Sa tapos sang masako nga adlaw, makarelaks ako paagi sa paglantaw sang TV. Pero kon indi ako maghalong, inoras ako nga makalantaw sang TV.” Ang pamatan-on nga si Samuel nagsiling: “Kon kaisa, kadamo sang malantaw ko nga malip-ot nga mga video sa Internet. Sa umpisa, isa lang ang ginalantaw ko, kag indi ko mamulalungan nga tatlo ukon apat ka oras na gali ako nga nagalantaw.”

 ¹⁷ Paano mo makontrol ang kalawigon sang tion nga ginagamit mo sa kalingawan? Una, dapat mo hibaluon kon ano gid kalawig nga tion ang ginagamit mo sa sini. Tilawi nga ilista kon pila ka oras ang magamit mo sa isa ka semana. Isulat sa kalendaryo kon pila ka oras ka nga nagalantaw sang TV, naga-Internet, kag nagahampang sa imo gadyet. Kon sa banta mo sobra na ang tion nga ginagamit mo, maghimo sing iskedyul. Unaha ang mas importante nga mga hilikuton, dayon hatagi sing tion ang kalingawan. Dayon, ipangamuyo kay Jehova nga buligan ka nga sundon ang imo iskedyul. Paagi sa sini, may tion ka gid kag kusog para sa imo pagtuon sa Biblia, pangpamilya nga pagsimba, pagtambong sa mga miting, kag pag-alagad kay Jehova paagi sa pagbantala kag pagtudlo sa iban. Mahimo nga malipay ka man sa tion nga gingamit mo sa kalingawan kay gin-una mo si Jehova.

18-19. Paano naton mapamatud-an nga si Jehova lang ang aton ginasimba?

¹⁸ Sa tapos ginsulat ni apostol Pedro ang parte sa katapusan sang kalibutan ni Satanas kag parte sa bag-o nga kalibutan, nagsiling sia: “Mga hinigugma, sanglit ginahulat ninyo ining mga butang, himua ninyo ang inyo bug-os nga masarangan agod sa katapusan masapwan niya kamo nga matinlo, wala sing depekto, kag may maayo nga kaangtanan sa iya.” (2 Ped. 3:14) Kon ginatuman naton ini nga laygay kag ginahimo naton ang aton bug-os nga masarangan nga magkabuhi kag simbahon si Jehova sa paagi nga gusto niya, ginapamatud-an naton nga sia lang ang aton ginasimba.

¹⁹ Padayon nga magatinguha si Satanas kag ang iya kalibutan nga sulayon kita para unahon naton ang iban nga butang sangsa kay Jehova. (Luc. 4:13) Pero indi naton dapat tugutan ang bisan sin-o ukon ang bisan ano nga mag-agaw sang aton gugma kay Jehova. Determinado kita nga ihatag kay Jehova ang para gid lang sa iya, kag sia lang ang dapat naton simbahon!