1. Ano dapat ang padayon nga himuon sang bawtismado nga mga Cristiano?

NABAWTISMUHAN ka na bala? Sang ginbawtismuhan ka, ginpabalo mo sa iban nga nagatuo ka kay Jehova kag handa ka nga mag-alagad sa iya bilang bahin sang iya organisasyon. * Pero dapat padayon mo nga pabakuron ang imo pagtuo kay Jehova. Dapat pabakuron mo man ang imo pagsalig nga ginahimo gid sang organisasyon ni Jehova ang ginapahimo niya sa sini.

2-3. Ano ang matun-an naton kon binagbinagon naton kon paano ginatuytuyan ni Jehova ang iya organisasyon subong? Maghatag sing halimbawa.

² Kon binagbinagon naton kon paano ginatuytuyan ni Jehova ang iya organisasyon subong, matun-an naton ang iya mga kinaiya, ang iya katuyuan, kag ang iya mga ginapatuman. Gani binagbinagon naton ang tatlo ka kinaiya ni Jehova nga makita sa iya organisasyon.

³ Una, “ang Dios wala sing ginapasulabi.” (Binu. 10:34) Bangod sang gugma ni Jehova, ginhatag niya ang iya Anak bilang “gawad para sa tanan.” (1 Tim. 2:6; Juan 3:16) Ginagamit ni Jehova ang iya katawhan para ibantala ang maayong balita sa tanan nga gusto mamati sa sini. Paagi sa sini, ginabuligan niya ang madamo nga tawo nga makabenepisyo sa gawad para maluwas sila. Ikaduha, gusto ni Jehova nga organisado ang tanan kag may paghidait. (1 Cor. 14:33, 40) Gani mapaabot naton nga organisado ang iya mga sumilimba kag nagaalagad sila sa iya nga may paghidait. Ikatlo, si Jehova ang “Daku nga Instruktor.” (Isa. 30:20, 21) Gani nagapanikasog gid ang iya organisasyon nga itudlo ang iya Pulong sa kongregasyon kag sa  iban pa nga mga tawo. Paano ginpakita sang Cristianong kongregasyon sang una ining tatlo ka kinaiya ni Jehova? Paano ini ginapakita sang iya katawhan subong? Kag paano ka mabuligan sang balaan nga espiritu sa imo pag-alagad kay Jehova bilang bahin sang iya organisasyon subong?

4. Suno sa Binuhatan 1:8, ano ang ginsugo ni Jesus sa iya mga sumulunod, kag paano niya sila buligan?

⁴ Sang unang siglo. Ang mensahe nga ginbantala ni Jesus naghatag sing paglaum sa tanan nga katawhan. (Luc. 4:43) Ginsugo ni Jesus ang iya mga sumulunod nga padayunon nila ang hilikuton nga iya ginsugdan, kag magbantala sila “tubtob sa pinakamalayo nga bahin sang duta.” (Basaha ang Binuhatan 1:8.) Indi nila ini mahimo kon sa ila lang ikasarang. Gani kinahanglan nila ang balaan nga espiritu nga amo “ang manugbulig” nga ginpromisa ni Jesus sa ila.—Juan 14:26; Zac. 4:6.

5-6. Paano ginbuligan sang balaan nga espiritu ang mga sumulunod ni Jesus?

⁵ Nabaton sang mga sumulunod ni Jesus ang balaan nga espiritu sang Pentecostes 33 C.E. Paagi sa bulig sini nga espiritu, nagbantala sila dayon. Kag sa malip-ot lang nga tion, linibo ang nagbaton sang maayong balita. (Binu. 2:41; 4:4) Wala sila nahadlok kag wala sila nag-untat sa pagbantala bisan pa ginhingabot sila. Sa baylo, nagpangabay sila sa Dios nga buligan sila. Nangamuyo sila: “Tuguti ang imo mga ulipon nga padayon nga ibantala ang imo pulong nga may daku nga kaisog.” Dayon napuno sila sing balaan nga espiritu kag padayon nila nga ‘ginbantala ang pulong sang Dios nga may kaisog.’—Binu. 4:18-20, 29, 31.

⁶ Nakaeksperiensia man sang iban pa nga kabudlayan ang mga disipulo ni Jesus. Halimbawa, diutay lang ang Kasulatan sadto. Wala sila sang mga libro nga nagapaathag sang Kasulatan pareho sang mga ginagamit naton subong. Kag dapat nila bantalaan ang mga tawo nga lainlain ang lenguahe. Bisan pa sini nga mga kabudlayan, nahimo sining mapisan nga mga disipulo ang daw imposible himuon. Pagligad lang sang mga 30 ka tuig, nabantala nila ang maayong balita “sa tanan nga tinuga sa idalom sang langit.”—Col. 1:6, 23.

7. Sobra 100 ka tuig ang nagligad, paano nabal-an sang mga alagad ni Jehova kon ano ang iya ginapatuman sa ila, kag ano ang ila ginhimo?

⁷ Sa aton tion subong. Padayon nga ginatuytuyan kag ginapabakod ni Jehova ang iya katawhan. Ang panguna nga ginagamit niya para tuytuyan sila amo ang Biblia. Gintuytuyan sang balaan nga espiritu ang pagsulat sa sini. Mabasa naton sa sini ang parte sa pagministeryo ni Jesus, kag ang parte sa ginsugo niya sa iya mga sumulunod nga dapat nila padayunon ang ginsugdan niya nga hilikuton. (Mat. 28:19, 20) Madugay na nga ginasambit sini nga magasin ang parte sa sini nga hilikuton. Halimbawa, sang Hulyo 1881, nagsiling ini: “Wala kita ginpili ni Jehova para padunggan kita sang mga tawo ukon para mangin manggaranon kita, kundi para gamiton ang tanan naton nga ginapanag-iyahan para ibantala ang maayong balita.” Ang bukleta nga To Whom the Work Is Entrusted sang 1919 nagsiling: “Madamo gid kita sang dapat himuon, pero hilikuton ini sang Ginuo, gani hatagan niya kita sang kusog para mahimo naton ini.” Pareho sang mga Cristiano sang una, nangin maisog man ang mga kauturan kag ginhimo nila ang ila bug-os nga masarangan bangod nagasalig sila nga buligan sila sang balaan nga espiritu sa ila pagbantala sa tanan nga sahi sang tawo. Nagasalig man kita nga buligan kita sang balaan nga espiritu subong.

8-9. Ano nga mga paagi sang pagbantala ang ginagamit sang organisasyon ni Jehova?

⁸ Ginagamit sang organisasyon ni Jehova ang pinakamaayo nga mga gamit para ibantala ang maayong balita. Nalakip sa sini nga mga gamit ang mga publikasyon nga ginaimprinta, ang “Photo-Drama of Creation,” ang radyo pono, de-trompa nga salakyan, mga programa sa estasyon sa radyo, kag sa sining karon lang, ang kompyuter kag Internet. Naga-translate man ang organisasyon sang Dios sa pinakamadamo nga lenguahe sa kasaysayan sang katawhan. Ngaa? Para mabatian  sang tanan nga sahi sang tawo ang maayong balita sa ila namat-an nga lenguahe. Wala gid sing ginapasulabi si Jehova kay gintagna niya nga ang maayong balita ibantala “sa tagsa ka pungsod kag tribo kag hambal kag katawhan.” (Bug. 14:6, 7) Gusto niya nga mabatian sang tanan ang mensahe sang Ginharian.

⁹ Paano naman mabantalaan ang mga tawo nga nagaistar sa mga bilding nga may mga guardia? Naggamit ang organisasyon ni Jehova sang sarisari nga paagi sa pagpanaksi sa publiko nga mga lugar. Halimbawa, sang 2001, gin-aprobahan sang Nagadumala nga Hubon ang mga kauturan sa France sa paggamit sang cart ukon sang iban pa nga paagi sang pag-display sang aton mga literatura. Sang ulihi, ginsunod man ini sang mga kauturan sa iban nga lugar. Maayo gid ang resulta sini. Sang 2011, ginsugdan ang bag-o nga paagi sang pagpanaksi sa United States. Ginhimo ini sa isa ka lugar sa New York City nga madamo gid sing tawo. Sa sulod sang isa ka tuig, 102,129 ka libro kag 68,911 ka magasin ang napanagtag. Kag 4,701 ka tawo ang nangabay sang pagtuon sang Biblia! Ginapakita sini nga nagabulig gid ang balaan nga espiritu sa sini nga paagi sang pagpanaksi. Gani gin-aprobahan sang Nagadumala nga Hubon ang paggamit sang cart kag sang iban pa nga paagi sang pag-display sang mga literatura sa bilog nga kalibutan.

10. Ano ang puede naton himuon para mag-uswag kita sa aton pagbantala kag pagtudlo sa iban?

¹⁰ Ang puede mo himuon. Sa aton mga miting, ginahanas kita ni Jehova kon paano magbantala. Dapat naton ini iaplikar. Regular nga magbantala upod sa inyo grupo sa pag-alagad. Mabuligan ka sang mga kauturan sa inyo grupo nga mag-uswag sa imo pagbantala kag pagtudlo sa iban, kag mapalig-on ka sang ila maayo nga halimbawa. Padayon nga magbantala bisan pa may mga kabudlayan. Suno sa teksto nga ginbasihan sini nga artikulo, ginahimo naton ang kabubut-on sang Dios, indi paagi sa aton ikasarang, kundi paagi sa bulig sang balaan nga espiritu. (Zac. 4:6) Kay man, hilikuton ini nga ginapahimo sa aton sang Dios.

11. Paano nagbuligay ang nagadumala nga hubon sang unang siglo para mangin organisado pirme ang katawhan sang Dios?

¹¹ Sang unang siglo. Para mangin organisado pirme kag may paghidait ang katawhan sang Dios,  nagbuligay ang nagadumala nga hubon sa Jerusalem. (Binu. 2:42) Halimbawa, sang mga 49 C.E., lainlain ang opinyon sang madamo nga Cristiano parte sa kon bala dapat gid magpatuli ang isa ka tawo para makaalagad sia kay Jehova. Gani ginbinagbinag ini sang nagadumala nga hubon kag nagpatuytoy sila sa balaan nga espiritu. Kon indi masolbar ini nga problema, maapektuhan gid ang pagbantala sang mga kauturan. Mga Judiyo ang mga apostoles kag ang mga gulang, pero wala sila magpaimpluwensia sa tradisyon sang mga Judiyo ukon sa mga nagainsister nga sundon gid ini nga tradisyon. Sa baylo, ginbinagbinag nila ang Pulong sang Dios kag nagpatuytoy sila sa balaan nga espiritu. (Binu. 15:1, 2, 5-20, 28) Ano ang resulta? Ginpakamaayo ni Jehova ang ila desisyon, wala nadula ang paghidait kag paghiusa sa kongregasyon, kag padayon nga ginbantala ang maayong balita.—Binu. 15:30, 31; 16:4, 5.

12. Ngaa masiling naton nga organisado kag may paghidait ang organisasyon ni Jehova subong?

¹² Sa aton tion subong. Ginabuligan sang organisasyon ni Jehova ang iya katawhan para mangin organisado sila pirme kag may paghidait. Halimbawa, sang 1895, ang Nobiembre 15 nga Zion’s Watch Tower and Herald of Christ’s Presence may artikulo nga “Nagakaigo kag Suno sa Kahimusan,” nga ginbase sa 1 Corinto 14:40. Ang artikulo nagsiling: “Madamo sing ginsulat ang mga apostoles sa mga kongregasyon sang una parte sa pagsunod sa kahimusan . . . Importante gid nga sundon sing maayo ang mga ‘butang nga ginsulat sadto sa pagtudlo sa aton.’” (Roma 15:4) Pareho sang mga Cristiano sang una, ginahimo man sang organisasyon ni Jehova subong ang bug-os sini nga masarangan para mangin organisado pirme kag may paghidait ang mga kongregasyon. Halimbawa, kon matambong ka sa iban nga kongregasyon ukon bisan sa iban nga pungsod, kabalo ka kon ano nga artikulo ang pagabinagbinagon sa Pagtinuon sa Ang Lalantawan kag kon paano ini pagatun-an. Mabatyagan mo gid dayon nga daw ara ka lang sa inyo kongregasyon. Nahiusa gid kita, kag ang espiritu sang Dios lang ang makahimo sini!—Sof. 3:9.

13. Kon pamalandungan naton ang Santiago 3:17, ano ang mga dapat naton ipamangkot sa aton kaugalingon?

¹³ Ang puede mo himuon. Gusto ni Jehova nga ang iya katawhan “nagapakighidait sa isa kag isa, kag nagatinguha nga tipigan ang paghiusa nga nabaton [nila] paagi sa balaan nga espiritu.” (Efe. 4:1-3) Gani pamangkuta ang imo kaugalingon: ‘Nagabulig bala ako para may paghiusa kag paghidait  sa kongregasyon? Ginatuman ko bala ang mga nagapanguna? Kon may responsibilidad ako sa kongregasyon, masaligan bala ako? Temprano pa bala ako nagaabot kag gusto ko gid bala magbulig sa iban?’ (Basaha ang Santiago 3:17.) Kon matalupangdan mo nga may dapat ka pauswagon, mangamuyo nga hatagan ka sang balaan nga espiritu. Kon magpatuytoy ka sa sini para mabag-o mo ang imo personalidad kag mga paggawi, mas palanggaon ka kag pabaloran sang mga kauturan.

14. Suno sa Colosas 1:9, 10, ano ang dapat matun-an sang katawhan ni Jehova sang unang siglo, kag paano niya ini gintudlo sa ila?

¹⁴ Sang unang siglo. Nalipay gid si Jehova nga tudluan ang iya katawhan. (Sal. 32:8) Gusto niya nga makilala nila sia, palanggaon nila sia, kag magkabuhi sila sing wala sing katapusan. Indi nila ini mahimo kon indi niya sila pagtudluan. (Juan 17:3) Gingamit ni Jehova ang Cristianong kongregasyon sang unang siglo para tudluan ang iya katawhan. (Basaha ang Colosas 1:9, 10.) Ginbuligan man sang balaan nga espiritu ang mga disipulo. Amo ini ang “manugbulig” nga ginpromisa ni Jesus. (Juan 14:16) Ginbuligan sini ang mga disipulo nga mahangpan ang Pulong sang Dios kag madumduman ang mga ginsiling kag ginhimo ni Jesus. Madamo sa ila mga nadumduman ang ginsulat sang ulihi sa mga Ebanghelyo. Ang natun-an sang mga Cristiano sang una nagpabakod sang ila pagtuo kag sang ila gugma sa Dios, sa iya Anak, kag sa isa kag isa.

15. Ano ang makita mo nga mga pamatuod nga ginatuman ni Jehova ang ginpromisa niya sa Isaias 2:2, 3?

¹⁵ Sa aton tion subong. Gintagna ni Jehova nga “sa ulihi nga bahin sang mga adlaw,” ang mga tawo sa tanan nga pungsod magakadto sa iya “bukid,” buot silingon, magaupod sila sa iya matuod nga mga sumilimba para matudluan sila. (Basaha ang Isaias 2:2, 3.) Makita naton nga nagakatuman ini nga tagna subong. Mas labaw gid ang matuod nga pagsimba sangsa tanan nga butig nga pagsimba. Kag madamo gid sang ginatudlo si Jehova sa iya katawhan parte sa Biblia! (Isa. 25:6) Ginagamit  niya “ang matutom kag mainandamon nga ulipon” para tudluan kita kag ginahimo nila ini sa madamo nga paagi. (Mat. 24:45) Halimbawa, makabasa kita sang mga artikulo, makapamati kita sang mga pamulongpulong, kag makalantaw kita sang mga animation kag mga video. Pareho sang ginsiling sang abyan ni Job nga si Elihu, makasiling man kita: “Sin-o ang manunudlo kaangay sa [Dios]?”—Job 36:22.

16. Ano ang puede mo himuon para makabenepisyo ka sa mga ginatudlo ni Jehova?

¹⁶ Ang puede mo himuon. Buligan ka sang balaan nga espiritu nga maaplikar ang imo nabasa kag natun-an sa Pulong sang Dios. Ipangamuyo ang pareho sa ginpangabay sang salmista: “Tudlui ako sang imo dalanon, O Jehova. Magalakat ako suno sa imo kamatuoran. Bug-usa ang akon tagipusuon sa pagkahadlok sa imo ngalan.” (Sal. 86:11) Gani padayon nga magbasa kag magtuon sang Biblia kag sang iban pa nga mga publikasyon nga ginaaman sang organisasyon ni Jehova. Himuon mo ini indi para magdamo ang imo nabal-an. Himuon mo ini kay gusto mo nga mangin kumbinsido ka pa gid sa kamatuoran kag iaplikar ini sa imo kabuhi. Buligan ka sang espiritu ni Jehova para mahimo mo ini. Gusto mo man nga palig-unon ang imo mga kauturan. (Heb. 10:24, 25) Ngaa? Bangod isa lang kamo ka pamilya. Mangamuyo nga buligan ka sang espiritu sang Dios nga magkomento sing tinagipusuon sa mga miting, kag buligan ka nga mahimo mo ang imo bug-os nga masarangan kon may bahin ka. Kon himuon mo ini, ginapakita mo kay Jehova kag sa iya Anak nga palangga mo ang ila hamili nga “mga karnero.”—Juan 21:15-17.

17. Paano mo mapakita nga matutom mo nga ginasuportahan ang organisasyon ni Jehova?

¹⁷ Sa indi madugay, ang organisasyon nga ginatuytuyan sang espiritu sang Dios amo na lang ang mabilin nga organisasyon sa duta. Gani suportahi ang organisasyon ni Jehova. Pareho sa Dios nga wala sing ginapasulabi, ipakita man nga palangga mo ang tanan nga tawo paagi sa pagbantala sang maayong balita sa tanan nga maistorya mo. Magbulig sa paghiusa sang kongregasyon bangod gusto ni Jehova nga organisado ang tanan kag may paghidait. Kag pamatii ang imo Daku nga Instruktor paagi sa pagpabalor sa tanan nga ginatudlo niya sa aton. Gani kon laglagon na ang kalibutan ni Satanas, indi ka mahadlukan. Sa baylo, mangin maisog ka pareho sang tanan nga matutom nga nagaalagad kay Jehova bilang bahin sang iya organisasyon.