1. Ano ang pinakamaayo nga desisyon nga mahimo naton?

SA MASAMI, ang mga desisyon sang mga ginikanan may epekto sa ila kabataan asta magdaku sila. Kon indi maayo ang ila desisyon, puede ini magresulta sa mga problema sa ila kabataan. Pero kon maayo ang ila mga desisyon, mabuligan nila ang ila kabataan nga mangin malipayon. Pero dapat man maghimo sang maayo nga mga desisyon ang kabataan. Kag ang pinakamaayo nga desisyon nga mahimo naton amo ang pag-alagad kay Jehova nga aton mahigugmaon nga Amay sa langit.—Sal. 73:28.

2. Ano nga maayo nga mga desisyon ang ginhimo ni Jesus kag sang iya mga ginikanan?

² Gusto gid sang mga ginikanan ni Jesus nga mag-alagad kay Jehova ang ila kabataan, kag ginpakita nila sa ila mga desisyon nga amo ini ang pinakaimportante sa ila kabuhi. (Luc. 2:40, 41, 52) Maayo man nga mga desisyon ang ginhimo ni Jesus kag nakabulig ini sa iya nga himuon ang ginsugo ni Jehova. (Mat. 4:1-10) Si Jesus nangin isa ka maayo, matutom, kag maisog nga tawo. Kon isa ikaw ka ginikanan nga nagaalagad kay Jehova, malipay ka gid kon mailog sang imo anak si Jesus kag ipabugal mo gid sia.

3. Ano nga mga pamangkot ang sabton naton sa sini nga artikulo?

³ Sa sini nga artikulo, sabton naton ini nga mga pamangkot: Ano nga maayo nga mga desisyon ang ginhimo ni Jehova para kay Jesus? Ano ang matun-an sang mga ginikanan sa ginhimo nga mga desisyon ni Jose kag ni Maria? Kag ano ang matun-an sang mga pamatan-on sa ginhimo nga mga desisyon ni Jesus?

4. Ano nga importante nga desisyon ang ginhimo ni Jehova para sa iya Anak?

⁴ Maayo gid nga mga ginikanan ang ginpili ni Jehova para kay Jesus. (Mat. 1:18-23; Luc. 1:26-38) May mga ginsiling si Maria nga ginrekord  sa Biblia. Ginapakita sang iya mga ginsiling nga palangga gid niya si Jehova kag ginapabaloran niya ang Iya Pulong. (Luc. 1:46-55) Kag ang pagsunod ni Jose sa sugo ni Jehova nagapakita nga palangga niya si Jehova kag gusto niya nga malipay Sia.—Mat. 1:24.

5-6. Ano ang gintugutan ni Jehova nga maeksperiensiahan sang iya Anak?

⁵ Talupangda nga indi manggaranon nga mga ginikanan ang ginpili ni Jehova para kay Jesus. Ang ginhalad ni Jose kag ni Maria pagkatapos mabun-ag si Jesus nagapakita nga imol sila. (Luc. 2:24) Isa ka panday si Jose, kag mahimo nga may gamay sia nga ulubrahan sa tupad sang iya balay sa Nazaret. Daku ang ila pamilya kay indi magnubo sa pito ang ila kabataan, gani simple lang ang ila kabuhi.—Mat. 13:55, 56.

⁶ Gin-amligan ni Jehova si Jesus sa pila ka delikado nga sitwasyon, pero gintugutan Niya nga maeksperiensiahan sang Iya Anak ang mga kabudlayan. (Mat. 2:13-15) Halimbawa, may mga paryente si Jesus nga wala nagtuo sa iya. Mahimo nga nasubuan gid si Jesus kay may mga miembro sang ila pamilya nga wala dayon nagpati nga sia ang Mesias. (Mar. 3:21; Juan 7:5) Isa pa, mahimo nga pamatan-on pa lang si Jesus sang napatay si Jose, gani mabudlay gid ini para sa iya. Kag bangod si Jesus ang kamagulangan, sia na ang magadumala sa palangabuhian sang ila pamilya. (Mar. 6:3) Nangin responsable gid si Jesus kay gin-atipan niya ang ila pamilya. Mahimo gid nga mapisan sia nga nagaobra para mahatag niya ang ila mga kinahanglanon. Gani nakabatyag man sia sang kakapoy pagkatapos sang bilog nga adlaw nga pag-obra.

7. (a) Ano nga mga pamangkot ang makabulig sa mga mag-asawa nga may kabataan? (b) Paano makabulig ang Hulubaton 2:1-6 para mahanas sang mga ginikanan ang ila kabataan?

⁷ Ang mag-asawa nga nagaplano nga magbata dapat mamangkot sa ila kaugalingon: ‘Mapainubuson bala kami? Palangga bala namon si Jehova kag ginapabaloran bala namon ang iya Pulong? Nagakabagay bala kami nga pilion ni Jehova nga mag-atipan sang isa ka bata nga hamili sa iya?’ (Sal. 127:3, 4) Kon isa ikaw ka ginikanan, pamangkuta ang imo kaugalingon: ‘Ginatudluan ko bala ang akon kabataan nga mangin mapisan sa pag-obra?’ (Man. 3:12, 13) ‘Ginapanikasugan ko gid bala nga amligan ang akon kabataan sa malain nga mga impluwensia sa kalibutan ni Satanas nga makahalit sa ila?’ (Hulu. 22:3) Imposible nga maamligan mo ang imo kabataan sa tanan nga problema nga maeksperiensiahan nila. Pero may mahimo ka para mangin handa sila sa mga  problema. Bangod palangga mo sila, padayon sila nga tudlui nga magsalig sa mga laygay sang Pulong sang Dios. (Basaha ang Hulubaton 2:1-6.) Halimbawa, kon may paryente kamo nga nag-untat sa pag-alagad kay Jehova, gamita ang Pulong sang Dios para mahangpan sang imo kabataan nga mas importante si Jehova kag dapat kita mangin matutom sa Iya. (Sal. 31:23) Kag kon mapatyan kamo sang pinalangga, ipakita sa imo kabataan ang mga teksto sa Biblia nga makapahaganhagan sang ila kasubo kag makapaumpaw sa ila.—2 Cor. 1:3, 4; 2 Tim. 3:16.

8. Ano ang ginsugo sang Deuteronomio 6:6, 7 nga gintuman ni Jose kag ni Maria?

⁸ Nahamuot gid ang Dios kay Jesus. Ginapakita sini nga maayo gid ang pagpadaku ni Jose kag ni Maria kay Jesus. Nahimo nila ini bangod gintuman nila ang ginsugo ni Jehova sa mga ginikanan. (Basaha ang Deuteronomio 6:6, 7.) Palangga gid ni Jose kag ni Maria si Jehova, kag prioridad nila nga palig-unon ang ila kabataan nga palanggaon man Sia.

9. Ano nga importante nga mga desisyon ang ginhimo ni Jose kag ni Maria?

⁹ Nagdesisyon si Jose kag si Maria nga regular nila nga simbahon si Jehova bilang pamilya. Sigurado gid nga nagakadto sila sa sinagoga sa Nazaret kada semana, kag sa Jerusalem kada tuig para sa Paskua. (Luc. 2:41; 4:16) Mahimo nga kon nagapakadto sila sa Jerusalem, ginatudluan nila si Jesus kag ang iya mga utod parte sa mga natabo sa katawhan ni Jehova sang una. Posible man nga nagahapit sila sa mga lugar nga ginsambit sa Kasulatan. Sang nagdamo na ang ila kabataan, mahimo nga indi man mahapos kay Jose kag kay Maria nga himuon nga regular ang ila pagsimba kay Jehova. Pero ginhimo gid nila ini, kag ginpakamaayo gid sila. Bangod gin-una nila ang pagsimba kay Jehova, nangin suod kay Jehova ang ila pamilya.

10. Ano ang matun-an sang mga ginikanan sa ginhimo ni Jose kag ni Maria?

¹⁰ Ano ang matun-an sang mga ginikanan nga nagaalagad sa Dios sa ginhimo ni Jose kag ni Maria? Ang pinakaimportante gid amo nga dapat makita sang inyo kabataan nga palangga gid ninyo si Jehova. Mahimo ninyo ini paagi sa inyo ginasiling kag ginahimo. Ang pinakamanami nga regalo nga mahatag ninyo sa ila amo ang buligan sila nga palanggaon si Jehova. Kag ang isa sa pinakaimportante nga leksion nga matudlo ninyo sa ila amo ang pagbulig sa ila nga mangin regular sa ila pagtuon sang Biblia, pagpangamuyo, pagtambong sa mga  miting, kag pagbantala. (1 Tim. 6:6) Dapat man ninyo ihatag ang ila materyal nga mga kinahanglanon. (1 Tim. 5:8) Pero tandai nga indi sila mabuligan sang ila kuarta kag mga pagkabutang nga makalampuwas sa katapusan sining daan nga sistema. Ang ila suod nga kaangtanan kay Jehova amo ang makabulig sa ila nga makaistar sa bag-ong kalibutan sang Dios. *—Ezeq. 7:19; 1 Tim. 4:8.

11. (a) Paano makabulig sa mga ginikanan ang 1 Timoteo 6:17-19 para makahimo sila sang maayo nga mga desisyon para sa ila kabataan? (b) Ano ang puede ninyo himuon bilang pamilya, kag ano ang maayo nga resulta sini? (Tan-awa ang kahon nga “ Ano ang mga Puede Ninyo Himuon?”)

¹¹ Nalipay gid kita nga makita ang madamo nga ginikanan nga nagahimo sang maayo nga mga desisyon para mangin suod kay Jehova ang ila pamilya! Regular sila nga magkaupod nga nagasimba. Nagatambong sila sa mga miting sang kongregasyon kag sa mga kombension. Kag nagabantala sila sang maayong balita. Ang pila ka pamilya nakabantala pa gani sa mga teritoryo nga talagsa lang mabantalaan. Ang iban nga pamilya naga-tour sa Bethel ukon nagabulig sa konstruksion sang mga pasilidad nga ginagamit sang organisasyon ni Jehova. Kinahanglan maggasto sing kuarta para mahimo ini, kag posible nga indi man ini mahapos. Pero pakamaayuhon gid sila ni Jehova. (Basaha ang 1 Timoteo 6:17-19.) Pagdaku sang kabataan, masami nga padayon nila nga ginahimo ang mga maayo nga natun-an nila sa ila mga ginikanan. Nalipay gid sila nga nagdaku sila sa pamilya nga ginauna ang pagsimba kay Jehova! *—Hulu. 10:22.

12. Ano ang dapat himuon ni Jesus sang daku na sia?

¹² Pirme maayo nga mga desisyon ang ginahimo sang Amay ni Jesus sa langit, kag nakahimo man sang maayo nga mga desisyon ang iya mga ginikanan sa duta. Pero sang daku na si Jesus, dapat man sia maghimo sang mga desisyon. (Gal. 6:5) Pareho sa aton tanan, may kahilwayan man sia sa pagdesisyon kon ano ang gusto niya himuon. Puede niya unahon ang iya kaugalingon nga kaayuhan. Pero wala niya ini ginhimo kay ginpabaloran niya ang iya maayo nga kaangtanan kay Jehova. (Juan 8:29) Paano makabulig sa mga pamatan-on ang iya halimbawa?

13. Ano ang ginhimo ni Jesus sang bata pa sia?

¹³ Sang bata pa si Jesus, pirme gid niya ginatuman ang iya mga ginikanan. Wala niya ginhunahuna nga indi sila pagpatihon kay mas madamo ang nabal-an niya sangsa ila. Sa baylo, “padayon sia nga nagpasakop sa ila.” (Luc. 2:51) May mga responsibilidad si Jesus bilang kamagulangan nga anak. Sigurado gid nga ginhimo niya ini sa bug-os niya nga masarangan. Gintudluan sia ni Jose kon paano magpamanday, kag gintun-an gid niya ini sing maayo para makabulig sia sa ila pamilya.

14. Ngaa masiling naton nga gintun-an gid ni Jesus sing maayo ang Pulong sang Dios?

¹⁴ Mahimo gid nga gin-istorya sang mga ginikanan ni Jesus sa iya ang parte sa iya pagkabun-ag nga isa ka milagro. Mahimo nga gin-istorya man  nila ang ginsiling sang mga mensahero sang Dios parte sa iya. (Luc. 2:8-19, 25-38) Pero magluwas sa mga gin-istorya sa iya, gintun-an man ni Jesus ang Kasulatan. Ngaa masiling naton nga gintun-an gid ni Jesus sing maayo ang Pulong sang Dios? Kay bisan bata pa sia, ang mga manunudlo “nahayanghag gid sa iya paghangop kag sa iya mga sabat.” (Luc. 2:46, 47) Kag bisan pa 12 anyos lang sia, kumbinsido sia nga si Jehova ang iya Amay bangod sang iya pagtuon sang Kasulatan.—Luc. 2:42, 43, 49.

15. Paano ginpakita ni Jesus nga gusto niya himuon ang kabubut-on ni Jehova?

¹⁵ Sang mabal-an ni Jesus ang gusto ni Jehova nga himuon niya, nagdesisyon sia nga himuon ang kabubut-on ni Jehova. (Juan 6:38) Kabalo sia nga dumtan sia sang madamo nga tawo. Mahimo gid nga indi niya gusto nga maeksperiensiahan ini, pero gintuman niya gihapon si Jehova. Sang ginbawtismuhan si Jesus sang 29 C.E., ang pinakaimportante sa iya kabuhi amo ang paghimo sang ginasugo ni Jehova sa iya. (Heb. 10:5-7) Kag bisan pa nga nagatagumatayon si Jesus sa usok sang pag-antos, padayon niya nga ginhimo ang kabubut-on sang iya Amay.—Juan 19:30.

16. Ano ang matun-an sang kabataan kay Jesus?

¹⁶ Tumana ang imo mga ginikanan. Pareho kay Jose kag kay Maria, indi man perpekto ang imo mga ginikanan. Pero ginhatagan ni Jehova sang responsibilidad ang imo mga ginikanan nga amligan ka, hanason, kag tudluan. Kon pamatian mo ang ila mga laygay kag tahuron mo sila, ‘magauswag ka.’—Efe. 6:1-4.

17. Suno sa Josue 24:15, ano nga desisyon ang dapat himuon sang mga pamatan-on?

¹⁷ Magdesisyon kon sin-o ang imo alagdon. Dapat mo pamatud-an sa imo kaugalingon kon sin-o gid si Jehova, kon ano ang iya kabubut-on, kag kon paano mo ini mahimo sa imo kabuhi. (Roma 12:2) Mapalig-on ka sini nga himuon ang pinakaimportante nga desisyon sa imo kabuhi, nga amo ang pag-alagad kay Jehova. (Basaha ang Josue 24:15; Man. 12:1) Kon regular mo nga basahon kag tun-an ang Biblia, padayon nga magabakod ang imo gugma kag pagtuo kay Jehova.

18. Ano nga desisyon ang dapat himuon sang mga pamatan-on, kag ano ang mangin resulta sini?

¹⁸ Himua ang kabubut-on ni Jehova nga pinakaimportante sa imo kabuhi. Gusto ka pasaligon sang kalibutan ni Satanas nga mangin malipayon ka kon gamiton mo ang imo mga ikasarang para sa imo kaayuhan. Pero kabalo kita nga ang mga gusto gid magmanggaranon nagabuno sang ila kaugalingon sang “madamo nga kasakit.” (1 Tim.  6:9, 10) Kon pamatian mo si Jehova kag himuon mo ang iya kabubut-on nga pinakaimportante sa imo kabuhi, mangin “maalamon” ka kag mangin malipayon ang imo kabuhi.—Jos. 1:8.

19. Ano ang dapat tandaan sang mga ginikanan?

¹⁹ Mga ginikanan, himua ninyo ang bug-os ninyo nga masarangan para buligan ang inyo kabataan nga mag-alagad kay Jehova. Magsalig sa iya, kag buligan niya kamo nga maghimo sang maayo nga mga desisyon. (Hulu. 3:5, 6) Tandai nga mapalig-on ninyo ang inyo kabataan paagi sa inyo ginasiling, pero mas mapalig-on ninyo sila paagi sa inyo ginahimo. Gani maghimo sang mga desisyon nga makabulig sa inyo kabataan nga kahamut-an sila ni Jehova.

20. Ano nga mga pagpakamaayo ang mabaton sang mga pamatan-on kon alagdon nila si Jehova?

²⁰ Mga pamatan-on, buligan kamo sang inyo mga ginikanan nga maghimo sang maayo nga mga desisyon. Pero dapat kamo mismo ang maghimo sang maayo nga mga desisyon para mapahalipay ninyo ang Dios. Gani iluga ninyo si Jesus kag alagda ninyo ang inyo mahigugmaon nga Amay sa langit. Kon himuon ninyo ini, may direksion kag indi makatalaka ang inyo kabuhi subong, kag mangin malipayon gid kamo. (1 Tim. 4:16) Kag sa palaabuton, maeksperiensiahan ninyo ang pinakamaayo kag pinakamalipayon nga kabuhi!