1. Ngaa nalipay kita nga mga Saksi kita ni Jehova, kag ngaa isa gid ini ka kadungganan?

NALIPAY gid kita nga mga Saksi kita ni Jehova, kag isa gid ini ka kadungganan. Mga katawhan kita ni Jehova, kag ginapamatud-an naton ini paagi sa pagbantala kag pagtudlo sa iban parte sa iya. Nalipay kita kon nabuligan naton ang “may husto nga panimuot sa pagtigayon sing kabuhi nga wala sing katapusan” nga mangin alagad ni Jehova. (Binu. 13:48) Pareho sa ginbatyag ni Jesus ang nabatyagan naton. “Napuno sia sang kalipay kag balaan nga espiritu” sang ginsugid sa iya sang iya mga disipulo ang maayo nga resulta sang ila pagbantala.—Luc. 10:1, 17, 21.

2. Paano naton mapakita nga importante gid sa aton ang pagbantala?

² Importante gid sa aton ang pagbantala. Ginpalig-on ni apostol Pablo si Timoteo: “Hatagi sang dalayon nga igtalupangod ang imo kaugalingon kag ang imo panudlo.” Nagsiling pa si Pablo: “Sa paghimo sini maluwas mo ang imo kaugalingon kag ang mga nagapamati sa imo.” (1 Tim. 4:16) Gani nagaluwas sang kabuhi ang aton pagbantala. Ginahatagan naton sang dalayon nga igtalupangod ang aton kaugalingon bangod mga sakop kita sang Ginharian sang Dios. Ginatinguhaan naton nga makahatag sang kadayawan kay Jehova ang tanan naton nga ginahimo, kag ginaaplikar naton sa aton kabuhi ang maayong balita nga aton ginabantala. (Fil. 1:27) Ginahatagan naton sang ‘dalayon nga igtalupangod ang aton panudlo’ paagi sa paghanda sang maayo kag paagi sa pagpangabay sang bulig ni Jehova antes kita magbantala.

3. Ano ang posible nga reaksion sang mga tawo sa mensahe sang Ginharian nga aton ginabantala? Maghatag sing halimbawa.

³ Bisan pa ginahimo naton ang aton bug-os nga masarangan sa pagbantala, posible nga madamo gihapon nga tawo sa aton teritoryo ang indi interesado sa maayong balita sang Ginharian. Binagbinaga ang eksperiensia ni Brother Georg Lindal, nga nagaisahanon  nga nagbantala sa bilog nga Iceland halin sang 1929 asta sang 1947. Nakapanagtag sia sang linibo ka publikasyon, pero wala gid sing bisan isa nga nangin Saksi. Nagsulat sia: “Ang iban daw nagapamatok sa kamatuoran, apang ang kalabanan indi gid interesado.” Sang ulihi, nag-abot ang mga misyonero nga naggradwar sa Gilead School. Wala man sila sing nakita nga interesado bisan pa sa tinuig nila nga pagbantala. Sang ulihi, pagligad sang siam ka tuig, may pila ka taga-Iceland nga nagdedikar kay Jehova kag nagpabawtismo. *

4. Ano ang posible nga mabatyagan naton kon indi interesado sa maayong balita ang aton ginabantalaan?

⁴ Nasubuan kita kon indi interesado ang mga tawo nga magtuon sang Biblia. Posible nga nabatyagan man naton ang ginbatyag ni Pablo. ‘Daku gid ang iya kasubo kag kasakit’ bangod wala nagtuo ang kalabanan nga Judiyo nga si Jesus amo ang ginpromisa nga Mesias. (Roma 9:1-3) Ano abi kon ginahimo mo man ang imo bug-os nga masarangan kag pirme mo ginapangamuyo ang imo Bible study, pero wala sia nagauswag kag dapat mo untaton ang inyo pagtuon? Ukon ano abi kon wala sing may nagpabawtismo sa imo gina-Bible study? Husto bala nga basulon mo ang imo kaugalingon, ukon hunahunaon nga wala ginpakamaayo ni Jehova ang imo pagbantala? Sa sini nga artikulo, sabton naton ang duha ka pamangkot: (1) Ano ang ginabasihan para masiling naton nga madinalag-on kita sa aton pagbantala? (2) Ngaa indi kita dapat matingala sa reaksion sang mga tawo?

5. Ngaa may mga tion nga indi matabo ang ginalauman naton nga resulta sa aton pag-alagad kay Jehova?

⁵ Amo ini ang ginasiling sang Biblia parte sa tawo nga nagahimo sang kabubut-on sang Dios: “Ang tanan nga ginahimo niya magamadinalag-on.” (Sal. 1:3) Pero indi buot silingon sini nga ang ginalauman naton nga resulta sa aton pag-alagad kay Jehova amo gid ang matabo. Ngaa? Kay man, “puno sing kagamo” ang aton kabuhi bangod indi kita tanan perpekto. (Job 14:1) May mga nagapamatok man sa aton, kag may mga tion kon kaisa nga mapauntat nila ang aton pagbantala. (1 Cor. 16:9; 1 Tes. 2:18) Gani ano ang ginabasihan ni Jehova para masiling niya nga madinalag-on kita sa aton pagbantala? Binagbinagon naton ang pila ka prinsipio sa Biblia nga makabulig sa aton nga masabat ini nga pamangkot.

6. Ano ang ginabasihan ni Jehova para masiling niya nga madinalag-on kita sa aton pagbantala?

⁶ Ginatan-aw ni Jehova ang aton mga pagpanikasog kag pagbatas. Para kay Jehova, madinalag-on kita sa aton pagbantala kon mapisan naton ini nga ginahimo bisan pa indi luyag mamati sang mga tawo sa aton, kag ginahimo naton ini bangod palangga naton sia. Si Pablo nagsulat: “Ang Dios matarong kag indi niya pagkalimtan ang inyo binuhatan kag ang gugma nga ginpakita ninyo para sa iya ngalan paagi sa pag-alagad kag sa padayon nga pag-alagad sa mga balaan.” (Heb. 6:10) Gani bisan pa wala sing may nagpabawtismo sa aton gina-Bible study, ginadumdom ni Jehova ang aton mga pagpanikasog kag ang aton gugma.  Nagsiling si Pablo sa mga taga-Corinto: “Ang inyo pagpangabudlay sa Ginuo indi wala sing pulos.” Matuod man ini sa ginhimo mo nga pagpangabudlay bisan pa indi ang ginalauman mo nga resulta ang natabo.—1 Cor. 15:58.

7. Ano ang matun-an naton sa ginsiling ni apostol Pablo parte sa iya pagministeryo?

⁷ Maayo gid nga misyonero si apostol Pablo, kag nakabulig sia nga maporma ang bag-o nga mga kongregasyon sa madamo nga siudad. Pero sang ginkuestyon sang pila ka tawo ang iya kalipikasyon bilang ministro sang Cristo, wala niya ginsambit kon pila ang iya nabuligan nga mangin Cristiano. Sa baylo, nagsiling si Pablo: “Mas madamo ako sing nahimo sangsa ila.” (2 Cor. 11:23) Pareho kay Pablo, dapat naton dumdumon nga ang pinakaimportante kay Jehova amo ang aton mga pagpanikasog kag pagbatas.

8. Ano ang dapat naton dumdumon parte sa aton pagbantala?

⁸ Nalipay si Jehova kon nagabantala kita. Ginsugo ni Jesus ang 70 niya ka disipulo nga ibantala ang mensahe sang Ginharian. Pagkatapos sang ila pagbantala, ‘nagbalik sila nga malipayon.’ Ngaa? Nagsiling sila: “Ginuo, paagi sa paggamit sang imo ngalan, bisan ang mga demonyo nagtuman sa amon.” Pero ginsilingan sila ni Jesus: “Indi kamo magkalipay bangod gintuman kamo sang mga espiritu, kundi magkalipay kamo bangod ang inyo ngalan nasulat na sa langit.” (Luc. 10:17-20) Kabalo si Jesus nga indi sa tanan nga tion may amo sini ka dalayawon nga resulta ang ila pagbantala. Wala kita kabalo kon pila sa mga ginbantalaan sang mga disipulo ni Jesus ang nangin Cristiano. Nalipay gid ang mga disipulo bangod ginpamatian sila sang mga tawo. Pero dapat nila mahangpan nga indi lang amo ini ang rason kon ngaa dapat sila malipay. Dapat nila dumdumon nga nalipay si Jehova sa ila mga pagpanikasog, kag amo ini ang pinakaimportante nga rason.

9. Suno sa Galacia 6:7-9, ano ang mangin resulta kon nagabatas kita sa aton pagbantala?

⁹ Kon nagabatas kita sa aton pagbantala, mabaton naton ang kabuhi nga wala sing katapusan. Kon ginahimo naton ang aton bug-os nga masarangan sa pagbantala kag pagtudlo sa iban, ‘nagasab-ug man kita para sa espiritu’ kay nagapagiya kita sa balaan nga espiritu sang Dios. Kon indi kita “magpangampo” ukon “paglapyuon,” nagapromisa si Jehova nga hatagan niya kita sang kabuhi nga wala sing katapusan bisan wala sing may nabawtismuhan sa aton gina-Bible study.—Basaha ang Galacia 6:7-9.

10. Ngaa lainlain ang reaksion sang mga tawo sa aton pagbantala?

¹⁰ Nagadepende sa tagipusuon sang tawo kon bala batunon niya ang kamatuoran ukon indi. Ginpaathag ini ni Jesus sa iya ilustrasyon parte sa isa ka manugsab-ug nga nagsab-ug sang binhi sa lainlain nga klase sang duta, kag ang binhi nga ginsab-ug sa maayo nga duta amo lang ang nagpamunga. (Luc. 8:5-8) Nagsiling si Jesus nga ang lainlain nga klase sang duta amo ang mga tawo nga lainlain ang reaksion sa “pulong sang Dios” depende sa ila tagipusuon. (Luc. 8:11-15) Pareho sa manugsab-ug, wala kita sing kontrol sa reaksion sang mga tawo sa aton pagbantala kay nagadepende ini sa ila tagipusuon. Ang aton responsibilidad amo ang padayon nga pagsab-ug sang maayo nga binhi nga amo ang mensahe sang Ginharian. Si apostol Pablo nagsiling nga “ang kada tawo magabaton sing padya suno sa iya binuhatan,” indi suno sa resulta sang iya binuhatan.—1 Cor. 3:8.

11. Para kay Jehova, ngaa isa ka madinalag-on nga “manugbantala sang pagkamatarong” si Noe? (Tan-awa ang piktyur sa kober.)

¹¹ Madamo nga alagad ni Jehova ang wala ginpamatian sang ila ginbantalaan. Halimbawa, si Noe “isa ka manugbantala sang pagkamatarong,” kag posible nga nagbantala sia sing mga 40 ukon 50 ka tuig. (2 Ped. 2:5) Posible gid nga naglaum sia nga kuntani may mamati sa iya pagbantala, pero wala sing ginsiling si Jehova parte sa mangin  reaksion sang mga tawo. Sa baylo, sang ginsugo sang Dios si Noe nga maghimo sang arka, nagsiling sia: “Magsulod ka sa arka, upod ang imo mga anak, ang imo asawa, kag ang mga asawa sang imo mga anak.” (Gen. 6:18) Kag sang ginsiling sa iya sang Dios kon ano kadaku ang arka, mahimo narealisar ni Noe nga diutay lang ang magapamati sa iya kay indi kaigo ang madamo nga tawo sa arka. (Gen. 6:15) Pero wala gid sing bisan isa nga namati kay Noe. (Gen. 7:7) Para kay Jehova, wala bala nagmadinalag-on si Noe sa iya pagbantala? Indi amo sina ang iya pagtan-aw. Para kay Jehova, madinalag-on si Noe kay matutom niya nga gintuman ang ginpahimo sa iya.—Gen. 6:22.

12. Paano nangin malipayon si manalagna Jeremias sa iya pagbantala bisan pa wala sing may namati sa iya kag ginpamatukan sia?

¹² Nagbantala man si manalagna Jeremias sing sobra 40 ka tuig bisan pa wala sing may namati sa iya kag ginpamatukan sia. Nagluya gid ang iya buot bangod ‘gin-insulto sia kag ginyaguta’ sang mga nagapamatok sa iya, kag nahunahuna niya nga mauntat na lang sa pagbantala. (Jer. 20:8, 9) Pero wala nag-untat si Jeremias. Ano ang nakabulig sa iya nga magpadayon kag mangin malipayon sa pagbantala? Nagpokus sia sa duha ka importante nga kamatuoran. Una, ang mensahe sang Dios nga ginsugid ni Jeremias sa katawhan naghatag sa ila sang “palaabuton kag paglaum.” (Jer. 29:11) Ikaduha, gintawag si Jeremias sa ngalan ni Jehova, ukon ginpili sia ni Jehova nga magsugid sang Iya mensahe sa katawhan. (Jer. 15:16) Nagahatag man sang paglaum sa katawhan ang ginasugid naton nga mensahe sa ila, kag ginatawag man kita sa ngalan ni Jehova bilang iya mga Saksi. Kon magpokus kita sa sining duha ka importante nga kamatuoran, padayon kita nga mangin malipayon ano man ang reaksion sang mga tawo sa aton pagbantala.

13. Ano ang matun-an naton sa ilustrasyon ni Jesus sa Marcos 4:26-29?

¹³ Amat-amat ang pag-uswag sang Bible study. Gintudlo ini ni Jesus sa iya ilustrasyon parte sa isa ka tawo nga nagsab-ug sang binhi kag dayon nagtulog. (Basaha ang Marcos 4:26-29.) Pagkatapos masab-ug ang binhi, amat-amat ang pagtubo sini, kag wala sing kontrol ang nagsab-ug sa kadasigon sang pagtubo sang binhi. Mahimo nga kinahanglan mo man maghulat sing malawig nga tion antes mo makita nga ginaaplikar sang imo Bible study ang iya mga natun-an. Indi mapadasig sang mangunguma ang pagtubo sang iya tanom sa kadasigon nga gusto niya, gani indi man naton mapadasig ang pag-uswag sang aton Bible study sa kadasigon nga gusto naton. Gani indi kita dapat maluyahan sang buot ukon indi kita dapat mag-untat kon pamatyag naton medyo madugay ang pag-uswag sang aton Bible study. Pareho sa isa ka mangunguma, dapat kita mangin mapinasensiahon sa aton Bible study.—Sant. 5:7, 8.

14. Ano nga halimbawa ang nagapakita nga posible kinahanglan ang malawig nga tion antes may mamati sa aton pagbantala?

¹⁴ Sa pila ka lugar, kinahanglan ang tinuig nga pagbantala antes may mabawtismuhan. Binagbinaga ang eksperiensia sang mag-utod nga sanday Gladys kag Ruby Allen. Sang 1959, gin-asayn sila nga mga regular payunir sa isa ka banwa sa probinsia sang Quebec sa Canada. * Pero wala nagapakig-istorya ang mga tawo sa mga Saksi bangod nahadlok sila sa himuon ukon isiling sang ila mga kaingod kag sang mga pari. Si Gladys nagsiling: “Nagpamalaybalay kami sing otso oras kada adlaw sa sulod sang duha ka tuig nga wala gid sing bisan isa nga nag-atubang sa amon! Nagapalapit lamang ang mga tawo sa ila ganhaan agod maglingling, nian ginatakop dayon ang venetian blinds. Apang wala kami mangampo.” Sang ulihi, may mga tawo nga nagpamati na sa mga Saksi. Subong, may tatlo na ka kongregasyon sa sini nga banwa.—Isa. 60:22.

15. Ano ang ginatudlo sa aton sang 1 Corinto 3:6, 7 parte sa pagbulig sa iban nga mangin disipulo?

 ¹⁵ Para mangin disipulo ang isa ka tawo, kinahanglan magbuligay ang tanan. Makabulig ang tanan nga kauturan sa kongregasyon para magpabawtismo ang isa ka Bible study. (Basaha ang 1 Corinto 3:6, 7.) Halimbawa, ginhatagan sang isa ka utod sing tract ukon magasin ang isa ka interesado. Pero indi niya mabalikan ang interesado sa oras nga gusto sang interesado, gani ginpangabay niya ang isa pa ka utod nga amo ang magbalik sa iya. Dayon, naumpisahan sining isa pa ka utod ang pag-Bible study sa sini nga interesado. Lainlain nga mga utod ang ginaupod niya sa ila pag-Bible study, kag napalig-on gid ang Bible study sa sini nga mga utod. Ang kada utod nga makilala niya makabulig gid sa iya para magbakod ang iya pagtuo. Gani malipay gid ang tanan nga nagpanikasog sa pagbulig sa Bible study kon magpabawtismo na sia.—Juan 4:35-38.

16. Ngaa puede ka gihapon mangin malipayon sa imo pagbantala bisan pa nagamasakit ka ukon maluya ka na?

¹⁶ Ano abi kon limitado na lang ang imo mahimo sa pagbantala kag pagtudlo sa iban sang maayong balita bangod nagamasakit ka ukon maluya ka na? Puede ka gihapon mangin malipayon sa imo masarangan nga himuon. Binagbinaga ang eksperiensia ni Hari David kag sang iya mga tinawo sang ginluwas nila ang ila mga pamilya kag ginbawi nila ang mga ginkuha sang mga Amaleknon. Kinapoy gid ang 200 sa iya mga tinawo, gani nagpabilin na lang sila para bantayan ang ila mga dala. Napierde ni David kag sang iya mga tinawo ang mga Amaleknon, kag ginpanguha nila ang mga kasapatan kag pagkabutang sang ila mga kaaway. Dayon nagmando si David nga tungaon ini sang mga nagpakig-away kag sang mga nagpabilin. (1 Sam. 30:21-25) Pareho man sa sini ang aton pagbantala kag pagtudlo sa iban nga ginahimo sa bilog nga kalibutan. Posible nga limitado na lang ang imo mahimo sa pagbantala kag pagtudlo sa iban. Pero kon ginahimo mo ang imo bug-os nga masarangan, may rason ka gihapon nga mangin malipayon sa kada tion nga may interesado nga gusto magpa-Bible study kag magdesisyon nga magpabawtismo.

17. Ngaa nagapasalamat kita kay Jehova?

¹⁷ Nagapasalamat kita kay Jehova kay palangga niya kita kag ginapabaloran niya ang aton pag-alagad sa iya. Kabalo sia nga indi naton mapilit ang mga tawo nga magpamati sa aton ukon magsimba sa iya. Pero nakita niya ang aton mga pagpanikasog kag ang aton maayo nga mga motibo, gani ginapadyaan niya kita. Ginatudluan man niya kita kon paano kita mangin malipayon sa paghimo sang aton bug-os nga masarangan sa pagbantala. (Juan 14:12) Makasalig kita nga nalipay gid ang Dios kon indi kita mag-untat sa aton pagbantala.