1. Ngaa nagapalibog ang madamo nga tawo?

LINIBO ka relihion ang nagasiling nga mga Cristiano sila kag ginabaton kuno sang Dios ang ila paagi sang pagsimba. Gani nagapalibog ang madamo nga tawo, “May isa bala ka relihion nga amo gid ang matuod, ukon ginabaton bala sang Dios ang tanan nga relihion?” Kumbinsido gid bala kita nga kita nga mga Saksi ni Jehova amo ang nagatudlo sang kamatuoran, kag ang aton paagi sang pagsimba amo ang ginabaton ni Jehova? Ano ang aton mga pamatuod? Binagbinagon naton ini.

2. Suno sa 1 Tesalonica 1:5, ngaa kumbinsido si apostol Pablo nga ang iya ginapatihan amo ang kamatuoran?

² Kumbinsido gid si apostol Pablo nga ang iya ginapatihan amo ang kamatuoran. (Basaha ang 1 Tesalonica 1:5.) Nalipay sia sang natun-an niya ang kamatuoran, pero indi amo ini ang rason kon ngaa nakumbinsi sia. Gintun-an sing maayo ni Pablo ang Pulong sang Dios. Nagpati sia nga “ang pagsulat sa bug-os nga Kasulatan gintuytuyan sang Dios.” (2 Tim. 3:16) Ano ang iya natun-an? Nakita ni Pablo sa Kasulatan ang maathag nga pamatuod nga si Jesus amo ang ginpromisa nga Mesias. Ginbalewala sang mga lider sang relihion sang mga Judiyo ini nga pamatuod. Nagsiling sila nga ginatudluan nila ang mga tawo sang kamatuoran parte sa Dios, pero ginahimo nila ang mga butang nga ginapakamalaut sang Dios. (Tito 1:16) Indi pareho sa ila si Pablo. Wala sia nagsiling nga magapili lang sia sang gusto niya patihan sa Pulong sang Dios. Handa sia nga itudlo kag iaplikar ang “bug-os nga katuyuan sang Dios.”—Binu. 20:27, footnote.

3. Para makumbinsi kita nga ang aton ginapatihan amo ang kamatuoran, dapat bala nga masabat gid ang tanan naton nga pamangkot? (Tan-awa man ang kahon nga “ Mas Madamo ang Binuhatan kag Katuyuan ni Jehova Sangsa Sarang Naton Masugid.”)

 ³ Nagasiling ang iban nga kon matuod ang isa ka relihion, dapat masabat sini ang tanan nga pamangkot, bisan ang mga pamangkot parte sa mga topiko nga wala sa Biblia. Posible bala ini? Binagbinaga ang halimbawa ni Pablo. Ginpalig-on niya ang iya mga kauturan nga ‘pat-uron nila ang tanan nga butang,’ pero nagsiling man sia nga madamo pa ang wala niya mahangpan. (1 Tes. 5:21) Nagsulat sia nga ‘ang aton ihibalo indi pa bug-os,’ kag “malubog ang makita naton sa metal nga espiho.” (1 Cor. 13:9, 12) May ara wala sing nahangpan si Pablo, kag amo man kita. Pero nahangpan ni Pablo ang panguna nga mga kamatuoran parte kay Jehova. Bastante na ini para makumbinsi sia nga ang iya ginapatihan amo ang kamatuoran.

4. Ano ang isa ka paagi para makumbinsi gid kita nga ang aton ginapatihan amo ang kamatuoran, kag ano ang binagbinagon naton parte sa matuod nga mga Cristiano?

⁴ Ang isa ka paagi para makumbinsi gid kita nga ang aton ginapatihan amo ang kamatuoran amo ang pagkumparar sang paagi sang pagsimba ni Jesus kag sang paagi sang pagsimba sang mga Saksi ni Jehova subong. Sa sini nga artikulo, matun-an naton nga ang matuod nga mga Cristiano (1) wala nagasimba sa mga diosdios, (2) ginapadunggan nila ang ngalan ni Jehova, (3) ginapabaloran nila ang kamatuoran, kag (4) palangga gid nila ang isa kag isa.

5. Ano ang matun-an naton kay Jesus parte sa husto nga paagi sang pagsimba sa Dios, kag paano naton iaplikar ang iya gintudlo?

⁵ Bangod palangga gid ni Jesus si Jehova, si Jehova lang ang iya ginsimba sang ara sia sa langit kag sang ari sia sa duta. (Luc. 4:8) Gintudluan niya ang iya mga disipulo nga si Jehova lang  ang dapat nila simbahon. Wala naggamit si Jesus ukon ang iya matutom nga mga disipulo sing mga imahen para sa ila pagsimba. Bangod ang Dios isa ka Espiritu, wala sing bisan sin-o nga makahimo sang imahen sang Dios kag magsiling nga amo ini ang iya hitsura. (Isa. 46:5) Kamusta naman ang paghimo sang mga imahen sang ginatawag sang mga tawo nga mga santos kag ang pagpangamuyo sa ila? Sa Napulo ka Sugo ni Jehova, amo ini ang ikaduha: “Indi kamo maghimo sing tinigib nga imahen ukon sing bisan ano nga nagarepresentar sang butang nga yara sa langit ukon sa duta . . . Indi kamo magyaub sa ila.” (Ex. 20:4, 5) Para sa mga tawo nga nagapanikasog nga batunon sang Dios ang ila pagsimba, nahangpan nila nga indi gusto sang Dios nga magsimba kita sa mga diosdios.

6. Sin-o ang ginasunod sang mga Saksi ni Jehova sa ila paagi sang pagsimba subong?

⁶ Ang mga historian nagsiling nga ang Dios lang ang ginasimba sang mga Cristiano sang una. Halimbawa, ang libro nga History of the Christian Church nagasiling nga “magalalain gid” ang mga Cristiano sang una kon silingan sila nga magbutang sang mga imahen sa mga lugar nga ginatipunan nila para magsimba. Subong, ginasunod sang mga Saksi ni Jehova ang ginhimo sang mga Cristiano sang unang siglo. Wala kita nagapangamuyo sa imahen sang mga “santos” ukon sa mga anghel, kag wala gani kita nagapangamuyo kay Jesus. Kag wala kita nagasaludo sa bandera sang aton pungsod ukon nagahimo sang bisan ano nga nagapakita nga nagasimba kita sa sini. Bisan pa piliton kita sang iban nga himuon ini, handa gid kita nga tumanon ang ginsiling ni Jesus: “Si Jehova nga imo Dios ang dapat mo simbahon.”—Mat. 4:10.

7. Ano ang kinalain sang mga Saksi ni Jehova sa iban nga relihion?

⁷ Subong, madamo nga tawo ang nanamian mamati sa bantog nga mga lider sang relihion. Grabe gid ang pagdayaw sang mga tawo sa ila nga daw ginasimba na nila sila. Madamo nga tawo ang nagakadto sa ila mga simbahan, nagabakal sang ila mga libro, kag nagahatag sa ila sang madamo nga kuarta ukon sa mga organisasyon nga ila ginasuportahan. Ginapatihan sang pila ka tawo ang tanan nila nga ginasiling. Bilib gid sila sa sini nga mga lider. Grabe gid ang ila kalipay kon makita nila sila nga daw pamatyag nila nakita nila si Jesus. Pero indi tawo ang ginasunod sang mga nagasimba kay Jehova. Ginarespeto naton ang mga nagapanguna sa aton, pero ginasunod naton ang ginsiling ni Jesus: “Kamo tanan mag-ulutod.” (Mat. 23:8-10) Wala naton ginaidolo ang mga tawo pareho sang mga lider sang relihion ukon mga pulitiko. Wala man naton ginasuportahan ang ila personal nga mga ambisyon ukon kawsa. Sa baylo, nagapabilin kita nga neutral kag indi bahin sang kalibutan. Gani lain gid kita sa madamo nga relihion nga nagasiling nga mga Cristiano kuno sila.—Juan 18:36.

8. Ngaa masiling naton nga gusto gid ni Jehova nga himayaon naton ang iya ngalan kag ipakilala ini sa tanan?

⁸ Isa ka bes, nangamuyo si Jesus: “Amay, himayaa ang imo ngalan.” Ginsabat ini ni Jehova paagi sa matunog nga tingog halin sa langit, nga nagapromisa nga himayaon niya ang iya ngalan. (Juan 12:28) Sa pagministeryo ni Jesus, ginhimaya niya ang ngalan sang iya Amay. (Juan 17:26) Gani para sa matuod nga mga Cristiano, isa gid ka pribilehiyo nga gamiton ang ngalan sang Dios kag ipakilala ini sa iban.

9. Paano ginpakita sang mga Cristiano sang unang siglo nga ginapadunggan nila ang ngalan sang Dios?

⁹ Sang unang siglo C.E., wala madugay pagkatapos maporma ang Cristianong kongregasyon, ‘ginbaton ni Jehova ang mga indi Judiyo agod makapili sia halin sa ila sang katawhan nga tawgon sa iya ngalan.’ (Binu. 15:14) Nalipay gid ini nga mga Cristiano nga gamiton ang ngalan sang Dios kag ipakilala ini sa iban. Gingamit nila ang  ngalan sang Dios sa ila pagbantala kag sang ginsulat nila ang mga libro sa Biblia. * Paagi sa sini, ginpakita nila nga sila lang ang katawhan nga nagpakilala sang ngalan sang Dios.—Binu. 2:14, 21.

10. Ano ang mga ebidensia nga nagapamatuod nga ang mga Saksi ni Jehova amo lang ang katawhan nga nagapakilala sang ngalan ni Jehova?

¹⁰ Ang mga Saksi ni Jehova bala amo lang ang katawhan nga nagapakilala sang ngalan ni Jehova? Binagbinaga ang mga ebidensia. Subong, ginatinguhaan gid sang madamo nga lider sang relihion nga taguon sa mga tawo ang personal nga ngalan sang Dios. Ginkuha nila ang ngalan sang Dios sa mga translation sang ila mga Biblia, kag may pila pa gani nga nagdumili sa paggamit sang ngalan sang Dios sa ila mga simbahan. * Maathag nga ang mga Saksi ni Jehova amo lang ang katawhan nga nagapabalor kag nagapadungog sa ngalan ni Jehova. Ginapanikasugan gid naton nga ipakilala sa madamo nga tawo ang ngalan sang Dios, kag wala gid sang iban nga relihion nga makalabaw sa aton ginahimo. Ginatawag kita nga mga Saksi ni Jehova, kag ginahimo naton ang aton bug-os nga masarangan base sa kahulugan sini nga ngalan. (Isa. 43:10-12) Nakahimo na kita sang sobra 240 ka milyon ka kopya sang New World Translation of the Holy Scriptures. Mabasa sa sini nga Biblia ang ngalan ni Jehova sa mga teksto nga gindula ini nga ngalan ukon gin-islan sang iban nga mga translator. Kag  nagahimo kita sang mga publikasyon nga nabase sa Biblia nga nagapakilala sang ngalan ni Jehova sa sobra 1,000 ka lenguahe.

11. Paano ginpakita sang mga Cristiano sang una nga ginapabaloran nila ang kamatuoran?

¹¹ Ginpabaloran ni Jesus ang kamatuoran, ukon ang kamatuoran parte sa Dios kag sa Iya mga katuyuan. Makita sa mga ginhimo ni Jesus nga nagapati sia sa sini nga kamatuoran, kag ginsugid man niya ini sa iban. (Juan 18:37) Ginapabaloran man sang matuod nga mga sumulunod ni Jesus ang kamatuoran. (Juan 4:23, 24) Gintawag pa gani ni apostol Pedro nga “dalanon sang kamatuoran” ang relihion sang mga Cristiano. (2 Ped. 2:2) Bangod ginapabaloran gid sang mga Cristiano sang una ang kamatuoran, ginsikway nila ang mga panudlo sang mga relihion, ang mga tradisyon, kag ang mga opinyon nga wala nabase sa kamatuoran. (Col. 2:8) Subong, ginapanikasugan man sang matuod nga mga Cristiano nga ‘padayon nga maglakat sa kamatuoran.’ Paano? Ginasigurado nila nga nabase sa Pulong ni Jehova ang tanan nila nga ginapatihan kag ginahimo.—3 Juan 3, 4.

12. Kon marealisar sang Nagadumala nga Hubon nga may dapat bag-uhon sa aton paghangop, ano ang ila ginahimo, kag ngaa?

¹² Wala nagasiling ang mga Saksi ni Jehova nga naintiendihan nila ang tanan nga nasulat sa Biblia. May mga tion nga sala ang paathag nila sang panudlo sa Biblia, ukon indi husto ang ginhatag nila nga panuytoy sa organisasyon. Indi kita dapat matingala sa sini. Suno sa Biblia, nagaathag ang paghangop sang katawhan ni Jehova sa kamatuoran samtang nagaligad ang tion. (Col. 1:9, 10) Amat-amat nga ginapahayag ni Jehova ang kamatuoran, gani dapat handa kita nga maghulat kag mangin mapinasensiahon asta nga mahangpan naton sing maayo ang kamatuoran. (Hulu. 4:18) Kon marealisar sang Nagadumala nga Hubon nga may dapat bag-uhon sa aton paghangop ukon sa panuytoy sang organisasyon, nagahimo sila dayon sang mga pagbag-o. Madamo nga relihion ang nagahimo sang mga pagbag-o kay ginapasundan nila ang ila mga miembro ukon gusto nila nga makilala sila sa kalibutan. Pero nagahimo sang mga pagbag-o ang mga Saksi ni Jehova kay gusto naton nga mangin suod pa gid kita sa Dios, kag masunod naton ang paagi sang pagsimba ni Jesus. (Sant. 4:4) Nagahimo kita sang mga pagbag-o bangod mas nahangpan naton ang Biblia, indi bangod sa opinyon sang madamo nga tawo. Ginapabaloran gid naton ang kamatuoran!—1 Tes. 2:3, 4.

13. Ano ang pinakaimportante nga kinaiya sang matuod nga mga Cristiano, kag paano ini ginapakita sang mga Saksi ni Jehova subong?

¹³ Nakilala ang mga Cristiano sang una sa ila madamo nga maayo nga mga kinaiya. Pero ang pinakaimportante sa sini amo ang ila gugma. Si Jesus nagsiling: “Paagi sini mahibaluan sang tanan nga mga disipulo ko kamo, kon nagahigugmaanay kamo.” (Juan 13:34, 35) Subong, nahiusa ang mga Saksi ni Jehova sa bilog nga kalibutan kag palangga gid nila ang isa kag isa. Lain gid kita sa iban nga relihion kay daw pamilya ang pagkabig naton sa isa kag isa bisan pa lainlain ang aton pungsod kag kultura. Makita gid naton ang matuod nga gugma sa aton mga miting, asembleya, kag kombension. Bangod sini, mas kumbinsido pa gid kita nga ginabaton ni Jehova ang aton pagsimba.

14. Suno sa Colosas 3:12-14, ano ang isa ka importante nga paagi nga mapakita naton nga palangga gid naton ang isa kag isa?

¹⁴ Ginapalig-on kita sang Biblia nga ‘maghigugmaanay sing tudok.’ (1 Ped. 4:8) Mapakita naton ini nga gugma kon magpinatawaray kita kag kon batason naton ang mga kakulangan sang isa kag isa. Ginapanikasugan man naton nga mangin maalwan kag maabiabihon sa tanan nga kauturan sa kongregasyon, bisan pa sa mga nagpalain sang  aton buot. (Basaha ang Colosas 3:12-14.) Kon ginapakita naton ini nga gugma, ginapamatud-an naton nga matuod kita nga mga Cristiano.

15. Ano pa ang ginsunod naton sa paagi sang pagsimba sang mga Cristiano sang unang siglo?

¹⁵ May mga ginsunod pa gid kita sa paagi sang pagsimba sang mga Cristiano sang unang siglo. Halimbawa, naorganisar kita pareho sa ila. May ara man kita nagalakbay nga mga manugtatap, mga gulang, kag mga ministeryal nga alagad. (Fil. 1:1; Tito 1:5) Kag pareho sa ila, ginatuman gid naton ang mga kasuguan ni Jehova parte sa sex kag pag-asawahay, ginatamod naton nga sagrado ang dugo, kag ginaamligan naton ang kongregasyon sa mga nagahimo sang sala nga wala nagahinulsol.—Binu. 15:28, 29; 1 Cor. 5:11-13; 6:9, 10; Heb. 13:4.

16. Ano ang matun-an naton sa ginasiling sang Efeso 4:4-6?

¹⁶ Nagsiling si Jesus nga madamo ang magapangangkon nga mga disipulo niya sila, pero indi matuod nga disipulo ang pila sa ila. (Mat. 7:21-23) Nagpaandam man ang Biblia nga sa katapusan nga mga adlaw, madamo ang “daw diosnon kon tulukon.” (2 Tim. 3:1, 5) Pero maathag nga ginasiling sang Biblia nga may ‘isa lang ka pagtuo’ nga ginabaton ang Dios.—Basaha ang Efeso 4:4-6.

17. Sin-o subong ang nagasunod kay Jesus kag nagapakita sang isa ka matuod nga pagtuo?

¹⁷ Ano nga relihion ang nagapakita sining isa ka matuod nga pagtuo subong? Gin-usisa na naton ang mga ebidensia. Ginbinagbinag naton ang paagi sang pagsimba nga gintudlo ni Jesus, kag ang ginhimo sang mga Cristiano sang unang siglo. Maathag nga ang mga Saksi ni Jehova lang ang nagapakita sini. Isa gid ka daku nga pribilehiyo nga mangin katawhan ni Jehova, kag mabal-an ang kamatuoran parte kay Jehova kag sa iya mga katuyuan. Gani pabakuron pa gid naton ang aton pagsalig nga ang aton ginapatihan amo ang kamatuoran.