1. Ano nga paglaum ang ginhatag sa aton ni Jehova?

 GINHATAGAN kita ni Jehova sang dalayawon nga paglaum nga mabuhi sing wala sing katapusan. May paglaum ang iban nga mabuhi sing wala sing katapusan sa langit bilang imortal nga mga espiritu. (1 Cor. 15:50, 53) Pero ang kalabanan may paglaum nga mabuhi sing wala sing katapusan sa duta nga perpekto na kag malipayon. (Bug. 21:3, 4) Sa langit man ukon sa duta ang aton paglaum nga mabuhi sing wala sing katapusan, hamili gid ini sa aton.

2. Sa ano nabase ang aton paglaum, kag ngaa masiling naton ini?

² Sa Biblia, ang tinaga nga “paglaum” nagakahulugan sing “pagpaabot nga may matabo nga maayo.” Sigurado kita nga matabo gid ang aton paglaum sa palaabuton bangod halin ini kay Jehova. (Roma 15:13) Kabalo kita kon ano ang iya ginpromisa, kag kabalo kita nga pirme niya ginatuman ang iya mga promisa. (Num. 23:19) Kumbinsido kita nga gusto gid tumanon ni Jehova ang tanan nga ginsiling niya nga himuon niya, kag may gahom sia nga tumanon ini. Gani ang aton paglaum indi isa ka damgo ukon imahinasyon lang, kundi nabase ini sa ebidensia kag sa kamatuoran.

3. Ano ang binagbinagon naton sa sini nga artikulo? (Salmo 71:5)

³ Palangga kita sang aton Amay sa langit, kag gusto niya nga magsalig kita sa iya. (Basaha ang Salmo 71:5.) Kon nagasalig kita kay Jehova kag mabakod ang aton pagsalig nga matuman gid ang aton paglaum, mabatas naton ang mga pagtilaw kag mangin maisog kita kag malipayon ano man ang matabo sa palaabuton. Binagbinagon naton kon paano kita ginaamligan sang aton paglaum. Pero binagbinagon anay naton kon ngaa ginkumparar sa angkla kag sa helmet ang paglaum. Dayon binagbinagon naton kon paano naton mapabakod ang aton pagsalig nga matuman gid ang aton paglaum.

4. Ngaa daw pareho sa angkla ang aton paglaum? (Hebreo 6:19)

⁴ Sa sulat ni apostol Pablo para sa mga Hebreo, ginkumparar niya sa angkla ang aton paglaum. (Basaha ang Hebreo 6:19.) Pirme nagasakay  si Pablo sa barko, gani kabalo sia nga ginagamit ang angkla para indi maanod ang barko. Isa ka bes, pasahero sia sa isa ka barko sang may nagwaswas nga mabaskog nga unos. Nakita niya nga ginhulog sang mga tripulante ang mga angkla para indi maanod ang barko kag indi magsangyad sa mga bato. (Binu. 27:29, 39-41) Pareho sa angkla nga nagabulig para indi maanod ang barko, ginapabakod kita sang aton paglaum para indi kita mapahilayo kay Jehova kon may problema kita. Ginabuligan kita sang aton paglaum nga mangin kalmado bisan pa daw bagyo ang aton problema bangod kumbinsido kita nga mangin maayo ang aton kahimtangan. Tandaan naton nga nagpaandam si Jesus nga pagahingabuton kita. (Juan 15:20) Gani kon pamalandungan naton ang ginpromisa ni Jehova nga padya niya sa aton sa palaabuton, buligan kita sini nga padayon nga mag-alagad sa iya.

5. Kabalo si Jesus nga mapatay sia, pero paano sia napabakod sang iya paglaum?

⁵ Kabalo si Jesus nga makaeksperiensia sia sang masakit nga kamatayon, pero nangin matutom sia bangod sang iya paglaum. Sang Pentecostes 33 C.E., ginkutlo ni apostol Pedro ang tagna sa libro sang Salmo parte sa pagsalig ni Jesus kag sa nabatyagan niya nga kalinong. Kanami sang ginsiling sini nga tagna: “Magakabuhi ako nga may paglaum; bangod indi mo ako pagpabay-an sa Lulubngan, kag indi ka magtugot nga madunot ang lawas sang imo mainunungon nga alagad. . . . Pun-on mo ako sing kasadya sa imo atubangan.” (Binu. 2:25-28; Sal. 16:8-11) Kabalo si Jesus nga mapatay sia, pero napabakod sia sang iya paglaum nga banhawon sia sang Dios kag nalipay sia nga makaupod niya liwat ang iya Amay sa langit.—Heb. 12:2, 3.

6. Ano ang ginsiling sang isa ka brother parte sa paglaum?

⁶ Ang aton paglaum nakabulig sa madamo naton nga kauturan nga makabatas. Binagbinaga ang eksperiensia sang matutom nga brother nga si Leonard Chinn nga taga-England. Sa tion sang Bug-os Kalibutan nga Inaway I, ginpriso sia bangod nangindi sia nga magsoldado. Ginbartolina sia sing duha ka bulan. Dayon ginpaobra sia sang mabug-at nga mga obra. Amo ini ang ginsulat niya sang ulihi: “Bangod sang akon mga naeksperiensiahan, narealisar ko nga importante ang paglaum para makabatas kita. Madamo ang puede magpabakod sang aton pagsalig nga matuman gid ang aton paglaum kag magpalig-on sa aton nga magbatas. Ara ang halimbawa ni Jesus, sang mga apostoles, kag sang mga manalagna. Ara man ang dalayawon nga mga promisa sang Biblia.” Nabuligan si Leonard sang paglaum kag daw nangin pareho ini sa angkla. Puede man ini mangin angkla para sa aton.

7. Paano nagabakod ang aton pagsalig nga matuman gid ang aton paglaum kon may mga pagtilaw? (Roma 5:3-5; Santiago 1:12)

⁷ Kon nabatas naton ang mga pagtilaw sa bulig ni Jehova, nagabulig ini sa aton nga marealisar nga nalipay sia sa aton. Bangod sini, nagabakod ang aton pagsalig nga matuman gid ang aton paglaum. (Basaha ang Roma 5:3-5; Santiago 1:12.) Gani mas mabakod ini subong kon ikumparar sa tion nga ginbaton naton ang maayong balita. Kon may mga pagtilaw, gusto ni Satanas nga maluyahan kita. Pero sa bulig ni Jehova, masarangan naton ang tanan nga pagtilaw.

8. Ngaa daw pareho sa helmet ang aton paglaum? (1 Tesalonica 5:8)

⁸ Ginakumparar man sang Biblia sa helmet ang aton paglaum. (Basaha ang 1 Tesalonica 5:8.) Nagasuksok sang helmet ang isa ka soldado para maamligan ang iya ulo sa mga pagsalakay sang iya mga kaaway. Dapat man naton amligan ang aton panghunahuna sa mga pagsalakay ni Satanas. Madamo sia sang ginagamit para sulayon kita kag higkuan ang aton panghunahuna. Pareho sa helmet nga nagaamlig sa ulo sang soldado, ginaamligan man sang aton paglaum ang aton panghunahuna para padayon kita nga mangin matutom kay Jehova.

9. Ano ang resulta kon wala sing paglaum ang mga tawo?

 ⁹ Ang aton paglaum nga mabuhi sing wala sing katapusan makabulig sa aton nga makahimo sing maayo nga mga desisyon. Pero kon pabay-an naton nga magluya ang aton pagsalig nga matuman ang aton paglaum kag magpokus kita sa aton sala nga mga handum, posible nga malipatan naton ini nga paglaum. Binagbinaga ang natabo sa pila ka Cristiano sa Corinto sang una. Nadula ang ila pagtuo sa importante nga promisa sang Dios nga amo ang paglaum sang pagkabanhaw. (1 Cor. 15:12) Nagsulat si Pablo nga ang mga tawo nga wala nagapati sa pagkabanhaw nagapokus lang sa kon paano nila mapaayawan ang ila mga handum. (1 Cor. 15:32) Madamo nga tawo nga wala nagapati sa paglaum nga ginapromisa sang Dios ang nagapokus lang sa kon ano ang makahatag sa ila sang kalipay subong. Pero lain kita sa ila kay nagasalig kita nga matuman gid ang ginpromisa sang Dios sa palaabuton. Daw pareho sa helmet ang aton paglaum kay ginaamligan sini ang aton panghunahuna kag ginabuligan kita sini nga malikawan nga magpagusto sa aton kabuhi, nga makaguba sa aton kaangtanan kay Jehova.—1 Cor. 15:33, 34.

10. Paano kita ginaamligan sang paglaum para indi naton pagpatihan ang mga kabutigan?

¹⁰ Ginaamligan man kita sang aton paglaum para indi naton paghunahunaon nga wala sing pulos ang aton mga pagpanikasog nga malipay sa aton si Jehova. Halimbawa, posible nagahunahuna ang iban: ‘Indi gid ako malakip sa mga mabuhi sing wala sing katapusan kay indi ako nagakadapat hatagan sini. Indi ko gid masarangan nga tumanon ang mga kasuguan sang Dios.’ Dumduma nga daw pareho man sa sini ang ginhambal sang indi matuod nga abyan ni Job nga si Elifaz. Nagsiling si Elifaz: “Mahimo bala mangin putli ang mamalatyon nga tawo?” Nagsiling man sia parte sa Dios: “Wala gani sia sing pagsalig sa iya mga balaan, kag bisan ang langit indi matinlo sa iya panulok.” (Job 15:14, 15) Grabe gid ini nga mga kabutigan! Tandai nga si Satanas ang may gusto nga amo sini ang hunahunaon mo. Kabalo sia nga kon pirme mo ini hunahunaon, madulaan ka sang paglaum. Gani sikwaya ini nga mga kabutigan kag magpokus sa mga promisa ni Jehova. Indi gid magduhaduha nga gusto niya nga mabuhi ka sing wala sing katapusan kag buligan ka niya nga mabaton ini nga padya.—1 Tim. 2:3, 4.

11. Ngaa dapat kita mangin mapinasensiahon samtang ginahulat naton nga matuman ang aton paglaum?

¹¹ May mga tion nga nagaluya ang aton pagsalig nga matuman ang aton paglaum. Posible nga matak-an kita sa paghulat kon san-o tumanon sang Dios ang iya mga promisa. Pero wala sing ginsuguran kag katapusan si Jehova. Gani ang malawig nga tion para sa aton, malip-ot lang sa iya. (2 Ped. 3:8, 9) Tumanon niya ang iya mga promisa sa pinakamaayo nga paagi, pero posible nga indi sa tion nga ginapaabot naton. Samtang mapinasensiahon naton nga ginahulat ang tion nga tumanon na sang Dios ang iya mga promisa, ano ang makabulig sa aton para padayon nga mangin mabakod ang aton pagsalig nga matuman gid ang aton paglaum?—Sant. 5:7, 8.

12. Suno sa Hebreo 11:1, 6, ano ang kaangtanan sang paglaum kag sang pagtuo?

¹² Padayon nga mangin mabakod ang aton pagsalig nga matuman gid ang aton paglaum kon magpabilin kita nga suod kay Jehova, nga amo ang magatuman sini. Para may paglaum kita, dapat may pagtuo kita nga nagaluntad si Jehova kag “nagapadya [sia] sa mga hanuot nga nagapangita sa iya.” (Basaha ang Hebreo 11:1, 6.) Kon nagatuo gid kita nga nagaluntad si Jehova, magabakod ang aton pagsalig nga tumanon gid niya ang tanan niya nga promisa. Binagbinagon naton ang pila ka paagi para mapabakod naton ang aton kaangtanan kay Jehova nga nagapabakod man sa aton pagsalig nga matuman gid ang aton paglaum.

13. Paano kita mangin suod sa Dios?

¹³ Mangamuyo kay Jehova, kag basaha ang iya  Pulong. Bisan pa indi naton makita si Jehova, puede kita mangin suod sa iya. Puede naton sia maistorya paagi sa pagpangamuyo sa iya, kag nagasalig kita nga pamatian niya kita. (Jer. 29:11, 12) Puede naman naton pamatian ang Dios paagi sa pagbasa sang iya Pulong kag pagpamalandong sa sini. Kon ginabasa naton ang mga ginhimo ni Jehova para buligan ang iya matutom nga mga alagad sang una, mas nagabakod ang aton pagsalig nga matuman gid ang aton paglaum. Ang tanan nga nasulat sa Pulong sang Dios “ginsulat sa pagtudlo sa aton. Nagahatag ini sa aton sing paglaum bangod ining Kasulatan nagabulig sa aton sa pagbatas kag nagapabakod sa aton.”—Roma 15:4.

14. Ngaa dapat naton pamalandungan ang mga ginhimo ni Jehova para sa iban?

¹⁴ Pamalandungi kon paano gintuman ni Jehova ang iya mga promisa. Binagbinaga ang ginhimo sang Dios para kanday Abraham kag Sara. Indi na sila makabata kay tigulang na sila. Pero nagpromisa ang Dios nga makabata sila. (Gen. 18:10) Ano ang reaksion ni Abraham sa sini? Ang Biblia nagasiling: “Nagtuo [sia] nga mangin amay sia sang madamo nga pungsod.” (Roma 4:18) Bisan pa wala kabalo si Abraham kon paano tumanon ni Jehova ang Iya promisa, sigurado sia nga tumanon gid Niya ini. Gintuman gid Niya ang Iya promisa sa sining matutom nga tawo. (Roma 4:19-21) Ang mga kasaysayan nga pareho sini nagatudlo sa aton nga makasalig kita nga pirme ginatuman ni Jehova ang iya mga promisa bisan pa pamatyag naton daw imposible ini.

15. Ngaa dapat naton pamalandungan ang mga ginhimo sang Dios para sa aton?

¹⁵ Binagbinaga ang mga ginhimo ni Jehova para sa imo. Hunahunaa kon paano ka nakabenepisyo sa mga promisa sa Pulong sang Dios nga natuman na. Halimbawa, nagpromisa si Jesus nga ihatag sang iya Amay ang imo mga kinahanglan para mabuhi. (Mat. 6:32, 33) Ginpasalig man ni Jesus nga kon mangayo ka sang balaan nga espiritu, ihatag ini sa imo ni Jehova. (Luc. 11:13) Gintuman gid ni  Jehova ini nga mga promisa. Posible gid nga may madumduman ka pa nga iban pa nga mga promisa nga gintuman niya para sa imo. Halimbawa, nagapromisa sia nga patawaron ka niya, paumpawan ka niya, kag ihatag niya ang imo mga kinahanglan para magpabilin ka nga suod sa iya. (Mat. 6:14; 24:45; 2 Cor. 1:3) Kon pamalandungan mo ang mga nahimo na sang Dios para sa imo, magabakod ang imo pagsalig nga tumanon gid niya ang imo paglaum sa palaabuton.

16. Ngaa hamili gid nga regalo ang paglaum?

¹⁶ Hamili gid nga regalo sang Dios ang aton paglaum nga mabuhi sing wala sing katapusan. Ginapaabot naton ang isa ka matahom nga palaabuton kag sigurado kita nga matabo gid ini. Ini nga paglaum daw pareho sa angkla kay ginapabakod kita sini para mabatas naton ang mga pagtilaw, masarangan ang mga paghingabot, kag indi mahadlok bisan sa kamatayon. Daw pareho ini sa helmet kay ginaamligan sini ang aton panghunahuna para masikway naton ang sala kag mahimo naton ang husto. Ang aton paglaum nga nabase sa Biblia nagabulig sa aton nga mangin suod pa gid sa Dios kag nagapamatuod ini nga palangga gid niya kita. Kon padayon naton nga pabakuron ang aton pagsalig nga matuman gid ang aton paglaum, daku gid ang mabulig sini sa aton.

17. Ngaa puede kita magkasadya bangod sa aton paglaum?

¹⁷ Sa sulat ni apostol Pablo para sa mga taga-Roma, ginpalig-on niya sila nga ‘magkasadya sila tungod sa ila paglaum.’ (Roma 12:12) Nagkasadya si Pablo bangod sigurado sia nga kon magpabilin sia nga matutom, mabuhi sia sing wala sing katapusan sa langit. Puede man kita magkasadya sa aton paglaum bangod sigurado kita nga tumanon ni Jehova ang iya mga promisa. Ang salmista nagsulat, “malipayon ang tawo . . . nga ang iya paglaum yara kay Jehova nga iya Dios, . . . ang Isa nga pirme matutom.”—Sal. 146:5, 6.