1. Ano ang aton “espirituwal nga kinahanglanon,” kag ngaa nagadepende sa sini ang aton kalipay?

 ANG matuod nga kalipay indi isa ka temporaryo lang nga balatyagon. Puede ini mabatyagan sang isa ka tawo sa bilog niya nga kabuhi. Ngaa masiling naton ini? Amo ini ang ginsiling ni Jesus sa iya Sermon sa Bukid: “Malipayon ang mga mahunahunaon sa ila espirituwal nga kinahanglanon.” (Mat. 5:3) Kabalo si Jesus nga gintuga ang mga tawo nga may mabaskog nga handum nga makilala kag simbahon ang ila Manunuga, nga si Jehova nga Dios. Amo ini ang aton “espirituwal nga kinahanglanon.” Kag bangod si Jehova isa ka “malipayon nga Dios,” puede man mangin malipayon ang mga nagasimba sa iya.—1 Tim. 1:11.

2-3. (a) Suno kay Jesus, sin-o pa ang puede mangin malipayon? (b) Ano ang binagbinagon naton sa sini nga artikulo, kag ngaa dapat naton ini binagbinagon?

² Para sa iban, mangin malipayon lang sila kon wala sila sang problema. Matuod bala ini? Indi. Sa sermon ni Jesus, may ginsiling sia nga daw makatilingala. Nagsiling sia nga puede mangin malipayon “ang mga nagalalaw.” Posible nagalalaw sila bangod ginakonsiensia sila sa ila mga sala ukon bangod may mabudlay sila nga mga problema. Nagsiling man si Jesus nga puede mangin malipayon “ang mga ginahingabot tungod sa pagkamatarong” ukon ang mga “ginapakahuy-an” bangod mga disipulo sila sang Cristo. (Mat. 5:4, 10, 11) Pero paano kita mangin matuod nga malipayon kon amo sini ang aton sitwasyon?

³ Ginatudluan kita ni Jesus nga indi kinahanglan nga mangin maayo gid ang sitwasyon sang aton kabuhi para mangin malipayon kita, kundi dapat kita magpanikasog para sa aton espirituwal nga kinahanglanon kag para mangin suod kita sa Dios. (Sant. 4:8) Paano naton ini mahimo? Sa sini nga artikulo, binagbinagon naton ang tatlo nga dapat naton himuon para mangin matuod kita nga malipayon.

4. Ano ang una nga dapat naton himuon para mangin matuod kita nga malipayon? (Salmo 1:1-3)

⁴ UNA NGA DAPAT HIMUON: Para mangin matuod nga malipayon, dapat naton basahon kag tun-an ang Pulong sang Dios. Suno kay Jesus, ang Pulong sang Dios daw pareho sa pagkaon. Para mabuhi ang mga tawo kag mga sapat, kinahanglan nila magkaon. Pero ang mga tawo lang ang may ikasarang nga basahon ang Pulong sang Dios, kag dapat nila ini himuon. Amo ini ang rason kon ngaa nagsiling si Jesus: “Ang tawo indi sa tinapay lamang mabuhi kundi sa tagsa ka pulong nga nagagua sa baba ni Jehova.” (Mat. 4:4) Gani, indi naton dapat pagpaligaron ang isa ka adlaw nga wala naton mabasa ang hamili nga Pulong sang Dios, ang Biblia. Ang salmista nagsiling: ‘Malipayon ang tawo nga nagakalipay sa kasuguan ni Jehova kag nagabasa sini sa mahinay nga tingog adlaw kag gab-i.’—Basaha ang Salmo 1:1-3.

5-6. (a) Ano ang natun-an naton sa Biblia? (b) Paano makabulig sa aton ang pagbasa sang Biblia?

⁵ Bangod palangga kita ni Jehova, ginpakita niya sa aton sa Biblia kon ano ang dapat naton himuon para mangin malipayon kita. Natun-an naton kon ano ang iya katuyuan para sa aton. Natun-an naton kon paano kita mangin suod sa iya kag kon ano ang dapat naton himuon para patawaron niya kita. Kag natun-an naton ang parte sa iya ginpromisa nga dalayawon nga paglaum sa palaabuton. (Jer. 29:11) Nalipay gid kita sa sini nga mga kamatuoran nga natun-an naton sa Biblia.

⁶ Kabalo kita nga madamo kita sang mabasa sa Biblia nga epektibo nga mga laygay para sa aton pagkabuhi. Kon sundon naton ini nga mga laygay, mangin malipayon kita. Kon naluyahan ka  sang buot bangod sang mga problema, dugangi ang imo tion nga ginagamit sa pagbasa sang Pulong ni Jehova kag sa pagpamalandong sa sini. Nagsiling si Jesus: “Malipayon ang mga nagapamati sa pulong sang Dios kag nagatuman sini.”—Luc. 11:28.

7. Kon nagabasa ka sang Pulong sang Dios, ano ang himuon mo para makabenepisyo ka gid sa sini?

⁷ Samtang ginabasa mo ang Pulong sang Dios, indi magdali. Binagbinaga ini nga ilustrasyon. Ibutang ta nga may nagluto sang imo paborito nga pagkaon. Pero bangod nagadali ka ukon bangod madamo ka sing ginapamensar, daw wala mo na ginausap ang pagkaon kag daw ginatulon mo lang ini dayon. Pagkatapos mo kaon, narealisar mo nga kuntani naghinayhinay ka sa pagkaon kay daw wala mo nasaboran kon daw ano ini kanamit. Posible man ini matabo kon nagabasa kita sang Biblia. Kon nagadali kita magbasa, indi naton marealisar kon daw ano kanami ang mensahe sini. Gani indi magdali sa pagbasa sang Pulong sang Dios. Sa baylo, imadyina ang mga eksena, imadyina ang emosyon sang mga karakter, kag pamalandungi ini. Kon himuon mo ini, mangin mas malipayon ka.

8. Paano ginatuman sang “matutom kag mainandamon nga ulipon” ang responsibilidad sini? (Tan-awa man ang footnote.)

⁸ Gintangdo ni Jesus “ang matutom kag mainandamon nga ulipon” para hatagan kita sang espirituwal nga pagkaon sa nagakaigo nga tion, kag masiling naton nga bugana gid kita sa sini nga pagkaon. b (Mat. 24:45) Ang Biblia amo ang panguna nga ginagamit sang matutom nga ulipon sa tanan nga espirituwal nga pagkaon nga ginahatag nila sa aton. (1 Tes. 2:13) Gani paagi sa sini nga espirituwal nga pagkaon, ginabuligan kita nga mabal-an ang panghunahuna ni Jehova nga ginpahayag niya sa Biblia. Amo ini ang rason kon ngaa ginabasa naton ang Lalantawan kag Magmata! nga mga magasin kag ang mga artikulo sa jw.org. Ginahandaan naton ang mga miting sang kongregasyon kon midweek kag kon Sabado ukon Domingo. Kag ginatan-aw naton ang programa sa JW Broadcasting^® kada bulan. Kon pirme naton ginabasa kag ginatun-an ang Biblia, buligan kita sini nga mahimo ang ikaduha nga dapat naton himuon para mangin matuod kita nga malipayon.

9. Ano ang ikaduha nga dapat naton himuon para mangin matuod kita nga malipayon?

⁹ IKADUHA NGA DAPAT HIMUON: Para mangin matuod nga malipayon, dapat naton tumanon ang mga kasuguan ni Jehova. Ang salmista nagsulat: “Malipayon ang nagakahadlok kay Jehova, nga nagalakat sa Iya mga dalanon.” (Sal. 128:1) Ang pagkahadlok kay Jehova nagakahulugan nga tudok gid ang aton pagtahod sa iya gani wala naton ginahimo ang bisan ano nga makapaakig sa iya. (Hulu. 16:6) Sa baylo, ginahimo naton ang aton bug-os nga masarangan nga sundon ang mga kasuguan sang Dios parte sa husto kag sala nga mabasa sa Biblia. (2 Cor. 7:1) Kon himuon naton ang mga butang nga ginahigugma ni Jehova kag sikwayon naton ang mga butang nga ginadumtan niya, mangin malipayon kita.—Sal. 37:27; 97:10; Roma 12:9.

10. Suno sa Roma 12:2, ano ang dapat naton himuon?

¹⁰ Basaha ang Roma 12:2. Posible nga kabalo ang isa ka tawo nga may awtoridad si Jehova sa pagsiling kon ano ang husto kag sala, pero dapat man tumanon sini nga tawo ang mga kasuguan sang Dios. Halimbawa, posible nga kabalo ang isa ka tawo nga may kinamatarong ang gobierno nga magpatuman sang speed limit sa mga dalan. Pero posible nga indi niya gusto nga tumanon ini. Gani sobra sa ginapatuman nga speed limit ang pagpadalagan niya sang iya salakyan. Kon nagapati gid kita nga ang pagtuman sa mga kasuguan  ni Jehova amo ang pinakamaayo nga himuon, dapat makita ini sa aton mga ginahimo. (Hulu. 12:28) Nagapati gid sa sini si David, gani nagsiling sia kay Jehova: “Ginpakita mo sa akon ang banas sang kabuhi. Sa imo atubangan may tuman nga kasadya; sa imo tuo nga kamot wala sing katapusan ang kalipay.”—Sal. 16:11.

11-12. (a) Kon may problema kita ukon nagaluya ang aton buot, sa ano kita dapat maghalong? (b) Paano makabulig ang Filipos 4:8 kon nagapili kita sang kalingawan?

¹¹ Kon may problema kita ukon nagaluya ang aton buot, posible mahunahuna naton nga mas maayo kuntani kon may iban kita nga ginahimo para malingaw kita kag malipatan naton ang aton problema. Normal lang nga mahunahuna naton ina, pero dapat kita maghalong para indi naton mahimo ang mga butang nga ginadumtan ni Jehova.—Efe. 5:10-12, 15-17.

¹² Sa sulat ni apostol Pablo sa mga taga-Filipos, ginpalig-on niya ang iya mga kauturan nga padayon nila nga hunahunaon ang mga butang nga “matarong, matinlo, hiligugmaon, [kag] maayo.” (Basaha ang Filipos 4:8.) Bisan pa indi parte sa kalingawan ang ginapatuhuyan ni Pablo, dapat naton ini gamiton nga giya sa pagpili sang aton kalingawan. Tilawi nga busli sang tinaga nga “kanta,” “pelikula,” “nobela,” ukon “video game” ang tinaga nga “butang” sa sini nga teksto. Kon himuon mo ini, mahangpan mo kon ano ang puede kag kon ano ang indi puede sa pagtamod sang Dios. Gusto naton nga tumanon ang matarong nga mga kasuguan ni Jehova. (Sal. 119:1-3) Kon himuon naton ini, mangin matinlo ang aton konsiensia. Dayon mahimo na naton ang ikatlo nga dapat naton himuon para mangin matuod kita nga malipayon.—Binu. 23:1.

13. Ano ang ikatlo nga dapat naton himuon para mangin matuod kita nga malipayon? (Juan 4:23, 24)

¹³ IKATLO NGA DAPAT HIMUON: Siguraduha nga ginauna mo ang pagsimba kay Jehova. Dapat naton simbahon si Jehova kay sia ang nagtuga sa aton. (Bug. 4:11; 14:6, 7) Gani, dapat naton unahon ang pagsimba sa iya “sa espiritu kag kamatuoran,” nga amo ang paagi sang pagsimba nga ginapatuman niya. (Basaha ang Juan 4:23, 24.) Gusto naton nga giyahan kita sang balaan nga espiritu sang Dios sa aton pagsimba para sigurado kita nga nabase ini sa mga kamatuoran nga mabasa sa iya Pulong. Dapat naton unahon ang aton pagsimba sa iya bisan pa nagaistar kita sa pungsod nga ginadumilian ang aton hilikuton. Subong, sobra 100 sa aton mga kauturan ang napriso bangod lang mga Saksi ni Jehova sila. c Pero malipayon nila nga ginahimo ang ila bug-os nga masarangan sa pagpangamuyo, pagtuon, kag pagsugid sa iban parte sa Dios kag sa iya Ginharian. Kon ginapakahuy-an kita ukon ginahingabot, nalipay kita kay kabalo kita nga ginabuligan kita ni Jehova kag padyaan niya kita.—Sant. 1:12; 1 Ped. 4:14.

14. Ano ang naeksperiensiahan sang isa ka pamatan-on nga brother sa Tajikistan, kag ngaa?

¹⁴ Mabudlay gid ang kahimtangan sang pila naton ka kauturan, pero nabatyagan nila ang matuod nga kalipay bangod ginhimo nila ang tatlo ka butang nga ginbinagbinag naton. Amo ini ang naeksperiensiahan sang 19 anyos nga brother nga si Jovidon Bobojonov nga taga-Tajikistan sang nangindi sia nga magsoldado. Sang Oktubre 4, 2019, gindakop sia sa ila balay, ginpriso sia sing pila ka bulan, kag daw kriminal ang pagtratar sa iya. Ginreport sang mga media sa madamo nga pungsod ang indi maayo nga ginhimo sa iya. Suno sa mga report, ginkastigo sia para piliton sia nga magpanumpa sang oath of allegiance sang mga soldado kag para magsuksok sang ila uniporme. Pagkatapos sini, ginsentensiahan sia  nga guilty kag ginpriso sia. Nakagua lang sia sa prisuhan sang ginhatagan sia sing pardon sang presidente sang pungsod. Bisan pa sa sining tanan nga kabudlayan, padayon nga nangin matutom si Jovidon kag wala nadula ang iya kalipay. Paano niya ini nahimo? Paagi sa paghunahuna pirme sang iya espirituwal nga kinahanglanon.

15. Sang napriso si Jovidon, paano sia nakabasa kag nakatuon sang Pulong sang Dios?

¹⁵ Sang napriso si Jovidon, padayon sia nga nagabasa kag nagatuon sang Pulong sang Dios bisan pa wala sia sang Biblia ukon sang aton mga publikasyon. Paano? Kon ginadul-ungan sia sang mga kauturan sing pagkaon, ginasulat nila sa mga grocery bag ang mga teksto nga ara sa bukleta nga Pag-usisa sa Kasulatan Adlaw-adlaw. Gani, mabasa niya ang Biblia kag mapamalandungan ini kada adlaw. Sang makagua sia sa prisuhan, amo ini ang ginlaygay niya sa mga wala pa nakaagi sang grabe nga mga pagtilaw: “Importante gid nga gamiton ninyo sing bug-os ang inyo kahilwayan sa pagtuon sing dugang pa parte kay Jehova paagi sa pagbasa sang iya Pulong kag sang aton mga publikasyon.”

16. Sa ano nagpokus si Jovidon?

¹⁶ Gintuman sang aton utod nga si Jovidon ang mga kasuguan ni Jehova. Wala sia nagpokus sa sala nga mga handum kag wala sia naghimo sing malain. Sa baylo, nagpokus sia kay Jehova kag sa mga ginapabaloran Niya. Nagadayaw gid  sia sa mga tinuga sang Dios. Kada bugtaw niya kon aga, mabatian niya ang huni sang mga pispis nga nagakanta. Kon gab-i naman, ginatan-aw niya ang bulan kag ang mga bituon. Nagsiling sia: “Regalo ini halin kay Jehova nga nagapalipay kag nagapabakod sa akon.” Kon ginapasalamatan naton ang tanan nga pisikal nga butang kag espirituwal nga pagkaon nga ginahatag ni Jehova, mangin malipayon kita. Kag kon malipayon kita, mapalig-on kita sini nga magbatas.

17. Suno sa 1 Pedro 1:6, 7, ano ang maeksperiensiahan sang isa ka utod kon daw pareho kay Jovidon ang iya sitwasyon?

¹⁷ Gin-una man ni Jovidon ang pagsimba kay Jehova. Kabalo sia nga importante gid nga mangin matutom sia sa matuod nga Dios. Nagsiling si Jesus: “Si Jehova nga imo Dios ang dapat mo simbahon, kag sia lamang ang hatagan mo sing sagrado nga pag-alagad.” (Luc. 4:8) Gusto sang mga kumander sang militar kag sang mga soldado nga talikdan ni Jovidon ang iya relihion. Pero hugot sia nga nagapangamuyo kay Jehova adlaw kag gab-i nga buligan sia nga makabatas kag magpabilin nga matutom. Bisan pa sang indi maayo nga pagtratar kay Jovidon, wala gid sia nagkompromiso. May rason gid nga malipay si Jovidon. Ngaa? Antes sia gindakop, ginkastigo, kag ginpriso, wala pa natilawan ang iya pagtuo. Pero subong nga natilawan na ang iya pagtuo, mas nagbakod pa gid ini.—Basaha ang 1 Pedro 1:6, 7.

18. Ano ang himuon naton para indi madula ang aton kalipay?

¹⁸ Kabalo si Jehova kon ano ang aton kinahanglan para mangin matuod kita nga malipayon. Kon panikasugan mo ang tatlo nga dapat mo himuon para mangin matuod ka nga malipayon, indi madula ang imo kalipay bisan pa sa mabudlay nga mga kahimtangan. Dayon makasiling ka man: “Malipayon ang katawhan nga ang ila Dios amo si Jehova!”—Sal. 144:15.