1-2. Ano ang isa ka maayo gid nga paagi sa pagbasa kag pagtuon sang Biblia? Maghatag sing halimbawa.

 IBUTANG ta nga gusto mo baklon ang isa ka balay. Ano ang himuon mo antes mo ini baklon? Tan-awon mo lang bala ang piktyur sang atubang sang balay? Indi. Sigurado gid nga kadtuan mo ini. Dayon libuton mo ang sulod kag gua sang balay, kag tan-awon mo ang tanan nga kuarto kag bahin sini. Basi tan-awon mo pa gani ang plano sini nga balay para makita mo kon paano ini ginpatindog. Sigurado gid nga usisaon mo ang tanan nga detalye parte sa isa ka balay nga gusto mo baklon.

² Daw pareho man sa sini ang dapat naton himuon kon nagabasa kita kag nagatuon sang Biblia. Ang isa ka manunulat nagsiling nga ang Biblia daw pareho sa “isa ka daku kag mataas nga bilding nga may madalom nga pundasyon.” Ti, ano ang himuon naton para mangin pamilyar gid kita sa nasulat sa Biblia? Kon padali mo lang ini nga basahon, posible nga simple lang nga mga kamatuoran ang imo matun-an ukon ang ginatawag nga “nahauna nga mga butang sang sagrado nga mga kapahayagan sang Dios.” (Heb. 5:12) Gani, pareho sa himuon naton kon gusto naton baklon ang isa ka balay, dapat naton usisaon ang Biblia ukon tun-an ini sing maayo. Ang isa ka maayo gid nga paagi sa pagtuon sang Biblia amo ang paghibalo kon paano ang isa ka impormasyon konektado sa iban pa nga mga impormasyon. Panikasugi nga hangpa kon ano ang imo mga ginapatihan kag kon ngaa ginapatihan mo ini.

3. Ano ang ginsiling ni apostol Pablo sa iya mga kauturan nga dapat nila himuon, kag ngaa? (Efeso 3:14-19)

³ Para mahangpan naton sing bug-os ang Pulong sang Dios, dapat naton tun-an ang madalom nga mga kamatuoran sa Biblia. Ginsilingan ni apostol Pablo ang iya mga kauturan nga dapat nila tun-an sing maayo ang Pulong sang Dios para ‘mahangpan nila sing  bug-os kon ano ang kasangkaron, kalabaon, kataason, kag kadalumon sang kamatuoran.’ Kon himuon nila ini, ‘manggamot kag matukod’ ang ila pagtuo. (Basaha ang Efeso 3:14-19.) Dapat man naton ini himuon. Gani binagbinagon naton kon paano naton tun-an sing maayo ang Pulong sang Dios para mahangpan naton ini sing bug-os.

4. Ano ang puede naton himuon para mangin suod pa gid kita kay Jehova? Maghatag sing halimbawa.

⁴ Bilang mga Cristiano, indi kita kontento nga simple lang nga mga kamatuoran sa Biblia ang aton nahangpan. Paagi sa bulig sang espiritu sang Dios, gusto naton tun-an “bisan pa ang madalom nga mga butang sang Dios.” (1 Cor. 2:9, 10) Sa imo personal nga pagtuon, puede mo tun-an sing maayo ang mga topiko nga magapasuod pa gid sa imo kay Jehova. Halimbawa, puede mo i-research kon paano niya ginpakita sa iya mga alagad sang una nga palangga niya sila. Makabulig ini para makumbinsi ka pa gid nga palangga ka man niya. Puede mo man tun-an ang parte sa paagi sang pagsimba nga ginpatuman ni Jehova sa mga Israelinhon sang una, kag dayon ikumparar mo ini sa paagi sang pagsimba nga ginapatuman niya sa aton subong. Puede mo man tun-an sing maayo kon paano natuman ang mga tagna parte kay Jesus.

5. Ano nga topiko ang gusto mo i-research sa imo personal nga pagtuon?

⁵ May pila nga naga-research gid sing maayo kon nagatuon sila sang Biblia. Sang ginpamangkot sila kon ano nga madalom nga mga butang sa Pulong sang Dios ang gusto nila tun-an, madamo sila sing ginsambit. Makita sa kahon nga “ Mga Topiko Para sa Personal nga Pagtuon” ang pila sa sini. Sa bulig sang Giya sa Pagtuon Para sa mga Saksi ni Jehova, manamian ka gid sa pagtuon parte sa sini nga mga topiko. Kon tun-an mo sing maayo ang Biblia, magabakod ang imo pagtuo kag “makita mo ang ihibalo tuhoy sa Dios.” (Hulu. 2:4, 5) Binagbinagon naton ang pila ka madalom nga mga kamatuoran sa Biblia nga puede naton tun-an sing maayo.

6. (a) Ano ang kinalain sang plano kag sang katuyuan? (b) Ngaa masiling naton nga “dayon” ang katuyuan ni Jehova para sa mga tawo kag sa duta? (Efeso 3:11)

⁶ Binagbinaga ang ginasiling sang Biblia parte sa katuyuan sang Dios. May kinalain ang plano  kag ang katuyuan. Kon magsiling kita nga plano, daw pareho ini sa pagpili sang ruta nga gusto naton agyan para makalab-ot kita sa lugar nga gusto naton kadtuan. Pero kon may nagbalabag sa ginpili naton nga ruta, posible nga indi kita makalab-ot sa aton destinasyon. Kon magsiling naman kita nga katuyuan, wala kita nagapili sang ruta kundi nagapokus kita sa lugar nga gusto naton kadtuan. Gani kon may nagbalabag sa dalan nga aton ginaagyan, nagapangita kita sang iban nga dalan kay gusto gid naton nga makalab-ot kita sa aton destinasyon. Nagapasalamat gid kita kay Jehova kay amat-amat niya nga ginpahayag ang iya “dayon nga katuyuan” sa Biblia. (Efe. 3:11) “Ginhimo ni Jehova ang tanan nga butang para matuman ang iya katuyuan,” gani pirme gid sia nagamadinalag-on. (Hulu. 16:4) Masiling naton nga “dayon” ang katuyuan ni Jehova para sa mga tawo kag sa duta bangod magapadayon asta sa wala sing katapusan ang mga resulta sang iya mga ginahimo. Ano ang katuyuan ni Jehova, kag paano niya gin-adjust ang iya paagi para matuman ini?

7. Sang nagrebelde ang una nga mga tawo, paano gin-adjust ni Jehova ang iya paagi sa pagtuman sang iya katuyuan? (Mateo 25:34)

⁷ Ginsugid sang Dios sa una nga mga tawo kon ano ang iya katuyuan para sa ila. Dapat sila ‘magpanganak kag magdamo, pun-on nila ang duta kag dumalahan ini, kag gamhan nila ang tanan nga buhi nga mga sapat sa duta.’ (Gen. 1:28) Sang nagrebelde sanday Adan kag Eva, wala ginbag-o ni Jehova ang iya katuyuan bisan pa nga nangin makasasala ang tanan nga tawo. Pero gin-adjust niya ang iya paagi sa pagtuman sang iya katuyuan. Nagdesisyon dayon si Jehova nga magahimo sia sang Ginharian sa langit nga amo ang magatuman sang iya orihinal nga katuyuan para sa mga tawo kag sa duta. (Basaha ang Mateo 25:34.) Sa gintalana nga tion ni Jehova, ginpadala niya sa duta ang iya panganay nga Anak para tudluan ang mga tawo parte sa Ginharian kag para ihatag ang iya kabuhi para luwason kita sa sala kag kamatayon. Dayon ginbanhaw ni Jehova si Jesus para mangin Hari sang Ginharian sang Dios sa langit. Pero magluwas sa sini, madamo pa kita sang puede pamalandungan parte sa katuyuan sang Dios.

8. (a) Ano ang tema sang Biblia? (b) Suno sa Efeso 1:8-11, ano gid ang katuyuan ni Jehova? (Tan-awa ang piktyur sa kober.)

⁸ Amo ini ang panguna nga tema sang Biblia: Mabindikar ang ngalan ni Jehova samtang ginatuman niya ang iya katuyuan para sa duta, kag gamiton niya ang iya Ginharian nga ginagamhan sang Cristo para matuman ini. Indi pagbag-uhon ni Jehova ang iya katuyuan. Ang matuod, nagpromisa sia nga matuman gid ini. (Isa. 46:10, 11, footnote; Heb. 6:17, 18) Sa ulihi, mangin paraiso ang duta kag ‘magakabuhi diri sing wala sing katubtuban’ ang perpekto kag matarong nga mga kaliwat nanday Adan kag Eva. (Sal. 22:26) Pero indi lang amo sini ang himuon ni Jehova. Ano gid bala ang katuyuan ni Jehova? Pahanabuon niya nga mahiusa ang tanan niya nga alagad sa langit kag sa duta. Paagi sa sini, magapasakop ang tanan sa iya paggahom kag mangin mainunungon sila sa iya. (Basaha ang Efeso 1:8-11.) Indi bala nga dalayawon gid ang paagi ni Jehova sa pagtuman niya sang iya katuyuan?

9. Paagi sa pagbasa sang Biblia, daw ano ka abanse ang nabal-an naton nga matabo sa palaabuton?

⁹ Binagbinaga ang gintagna ni Jehova sa hardin sang Eden nga mabasa sa Genesis 3:15. b Parte ini sa mga hitabo nga magatuman sang iya katuyuan. Pero, linibo ka tuig pa ang magaligad antes matabo ini nga mga hitabo. Nalakip sa sini ang paghatag kay Abraham sang kaliwat nga pagahalinan sang mangin Cristo sa ulihi. (Gen. 22:15-18) Dayon, sang 33 C.E., natuman ang tagna nga pilasan si Jesus sa iya tikod. (Binu. 3:13-15) Ang katapusan  nga hitabo sa sini nga tagna amo ang pagdugmok sa ulo ni Satanas, kag matabo ini pagkatapos pa sang sobra 1,000 ka tuig. (Bug. 20:7-10) Kag madamo pa gid sing ginasugid ang Biblia parte sa pagkontrahanay sang kalibutan ni Satanas kag sang organisasyon ni Jehova, kag kon ano ang matabo samtang nagahilapit na ini matapos.

10. (a) Ano nga mga hitabo ang malapit na lang gid matabo? (b) Paano naton mahanda ang aton hunahuna kag tagipusuon? (Tan-awa ang footnote.)

¹⁰ Hunahunaa ining tumalagsahon nga mga hitabo nga gintagna sang Biblia. Una, magasiling ang mga pungsod nga may ara na “paghidait kag kalig-unan!” (1 Tes. 5:2, 3) Kag kon salakayon na sang mga pungsod ang tanan nga butig nga relihion, magaumpisa “gilayon” ang dakung kapipit-an. (Bug. 17:16) Pagkatapos sini, posible nga may makatilingala nga himuon “ang Anak sang tawo nga nagakari sa mga panganod sang langit nga may gahom kag daku nga himaya.” (Mat. 24:30) Painpainon ni Jesus ang mga karnero kag mga kanding ukon hukman niya ang mga tawo. (Mat. 25:31-33, 46) Pero, may himuon man si Satanas. Bangod grabe gid ang iya kaakig, sugyuton niya ang naghimbon nga mga pungsod nga ginatawag sang Biblia nga Gog sa duta sang Magog nga salakayon ang katawhan ni Jehova. (Ezeq. 38:2, 10, 11) Sa tion sang dakung kapipit-an, dalhon sa langit ang nabilin nga mga hinaplas para mag-upod sa Cristo kag sa iya kasuldadusan sa langit. Magapakig-away sila sa inaway sa Armageddon nga amo ang katapusan sang dakung kapipit-an. c (Mat. 24:31; Bug. 16:14, 16) Dayon magaumpisa ang Isa ka Libo ka Tuig nga Paggahom sang Cristo sa duta.​—Bug. 20:6.

11. Ano ang posible nga mabatyagan mo kon nagakabuhi ka na sing wala sing katapusan? (Tan-awa man ang piktyur.)

¹¹ Hunahunaa naman kon ano ang matabo pagkatapos sang 1,000 ka tuig. Ang Biblia nagasiling nga “ginbutang [sang aton Manunuga sa aton] tagipusuon ang wala sing katubtuban.” (Man. 3:11) Hunahunaa kon ano ang buot silingon sini para sa imo kag sa imo kaangtanan kay Jehova. Pamalandungi ining ginsiling sa pahina 319 sang libro nga Mangin Suod kay Jehova: “Sa tapos magkabuhi sing ginatos, linibo, minilyon, kag binilyon pa gani ka tuig, mas madamo ang matun-an naton kay Jehova nga Dios sangsa karon. Apang  batyagon gihapon naton nga may di-maisip pa nga makatilingala nga mga butang nga matun-an naton. . . . Indi mahanduraw ang pagkabugana kag pagkananuhaytuhay sang dayon nga kabuhi​—kag ang dugang pa nga pagkasuod kay Jehova pirme nga mangin ang labing makapaladya nga bahin sini.” Pero samtang wala pa ini, ano pa ang puede naton usisaon sing maayo sa Pulong sang Dios samtang ginatun-an naton ini?

12. Ano ang himuon naton para mahatagan kita sang ideya parte sa langit? Maghatag sing halimbawa.

¹² Ginahatagan kita sang ideya sang Pulong sang Dios parte sa presensia ni Jehova “sa kahitaasan.” (Isa. 33:5) Ginasugid sang Biblia ang dalayawon nga mga butang parte kay Jehova kag parte sa langitnon nga bahin sang iya organisasyon. (Isa. 6:1-4; Dan. 7:9, 10; Bug. 4:1-6) Halimbawa, mabasa naton sa Biblia ang parte sa makahalawhaw nga mga butang nga nakita ni Ezequiel. Nagsiling ini nga sang ‘nagbukas ang langit, nakakita sia sing mga palanan-awon halin sa Dios.’​—Ezeq. 1:1.

13. Base sa Hebreo 4:14-16, ngaa nagapasalamat ka gid sa ginahimo ni Jesus sa langit para sa aton?

¹³ Hunahunaa man kon ano ang ginahimo ni Jesus sa langit bilang aton Hari kag maluluy-on nga Mataas nga Saserdote. Paagi kay Jesus, makapalapit kita sa Dios sa Iya “trono sang wala tupong nga kaayo.” Gani makapangamuyo kita sa iya nga kaluy-an kita kag buligan ‘sa tion nga kinahanglan gid’ naton ini. (Basaha ang Hebreo 4:14-16.) Kabay pa nga pamalandungan naton kada adlaw ang ginhimo ni Jehova kag ni Jesus para sa aton, kag kon paano nila kita ginabuligan subong. Palangga nila kita, gani dapat kita mangin mapisan sa aton pag-alagad kag pagsimba kay Jehova.​—2 Cor. 5:14, 15.

14. Ano ang isa sa pinakamaayo nga paagi para mapakita naton kay Jehova kag kay Jesus nga nagapasalamat gid kita sa ila? (Tan-awa man ang mga piktyur.)

¹⁴ Paano naton mapakita sa aton Dios kag sa iya Anak nga nagapasalamat gid kita sa ila? Ang  isa sa pinakamaayo nga paagi amo ang pagbulig sa iban nga mangin Saksi ni Jehova kag mangin disipulo ni Jesus. (Mat. 28:19, 20) Ginhimo ini ni apostol Pablo bangod nagapasalamat gid sia sa Dios kag sa Cristo. Kabalo sia nga kabubut-on ni Jehova nga “ang tanan nga sahi sang tawo maluwas kag makadangat sa sibu nga ihibalo tuhoy sa kamatuoran.” (1 Tim. 2:3, 4) Nagpanikasog gid sia sa iya pagbantala para madamo nga tawo ang iya mabuligan nga ‘maluwas sa bisan ano man nga paagi.’​—1 Cor. 9:22, 23.

15. Suno sa Salmo 1:2, ano ang himuon naton para mangin malipayon kita?

¹⁵ Suno sa nagsulat sang pinakauna nga salmo, ang malipayon kag madinalag-on nga tawo amo ang tawo nga ‘nagakalipay sa kasuguan ni Jehova’ kag ‘nagapamalandong sa Iya kasuguan adlaw kag gab-i.’ (Sal. 1:1-3; footnote) May ginsiling ang isa ka translator sang Biblia nga si Joseph Rotherham parte sa sini nga teksto. Sa iya libro nga Studies in the Psalms, nagsiling sia nga dapat “manamian gid ang isa ka tawo sa paggiya sang Dios para pangitaon niya ini, tun-an, kag hatagan sing tion para mahunahuna niya ini sing maayo.” Nagsiling man sia nga “kon natapos ang isa ka adlaw nga wala nakabasa sang Biblia ang isa ka tawo, kanugon gid sang sina nga adlaw.” Kon tinguhaan mo nga usisaon ang madamo kag dalayawon nga mga impormasyon sa Biblia kag kon hibaluon mo ang koneksion sini nga mga impormasyon sa kada isa, manamian ka gid sa pagtuon sini. Mangin malipayon ka gid kon panikasugan mo nga tun-an sing maayo ang Pulong sang Dios.

16. Ano ang binagbinagon naton sa masunod nga artikulo?

¹⁶ Indi mabudlay hangpon ang dalayawon nga mga kamatuoran nga ginatudlo sa aton ni Jehova paagi sa iya Pulong. Sa masunod nga artikulo, binagbinagon naton ang isa ka madalom nga kamatuoran. Parte ini sa daku nga espirituwal nga templo ni Jehova nga ginlaragway ni Pablo sa iya sulat para sa Hebreo nga mga Cristiano. Kabay pa nga manamian ka sa pagtuon parte sa sini nga topiko.