Nahuman sang mga Bethelite ang WBBR nga estasyon sang radyo sa Staten Island, New York City, sa sulod sang sobra isa ka tuig. Pagkatapos nila mahawanan ang lugar, nagpatindog sila sang isa ka daku nga balay para sa mga boluntaryo. Nagpatindog man sila sang isa pa ka bilding para sa mga gamit sa pag-broadcast. Sang natapos ini tanan, ginhanda nila ang mga gamit nga kinahanglan nila para maka-broadcast sila sa radyo. Pero indi ini mahapos.

Binudlayan ang mga brother sa pagtakod sang antena sang estasyon nga 91 ka metro ang kalabaon. Kay man, kinahanglan ini ibitay sa duha ka poste nga 61 ka metro ang kataason. Pero bangod nagsalig ang mga brother kay Jehova, natakod gid man nila ini sang ulihi. Isa si Calvin Prosser sa mga nagbulig sa pagtakod sini. Nagsiling sia, “Kon natakod namon dayon ang antena, posible nga nahunahuna namon nga nasarangan namon ini bangod sa amon kaugalingon nga ikasarang.” Gani, gindayaw nila si Jehova. Pero, may isa pa sila ka problema.

Bag-o nga teknolohiya sadto nga tion ang pag-broadcast sa radyo, gani indi mahapos mangita sang mga gamit para sa sini. Pero nakakita ang mga brother sang isa ka 500 watts nga transmitter nga ginhimo sang isa ka tawo nga malapit sa ila lugar. Imbes nga magbakal sang bag-o nga microphone, gingamit nila ang microphone halin sa isa ka ordinaryo nga telepono. Isa ka gab-i sang Pebrero, nagdesisyon ang mga brother nga testingan nila nga mag-broadcast. Nagkanta ang mga brother sang mga ambahanon sang Ginharian bilang ila programa sa radyo. Isa si Ernest Lowe sa mga nagkanta, kag naham-ot sia sa natabo sadto nga tion.  Samtang nagakanta sila, gintawgan sila ni Judge Rutherford b nga ara sa Brooklyn nga mga 25 ka kilometro ang kalayuon. Nabatian niya sa iya radyo ang pagkanta sang mga brother.

“Untati ninyo ang inyo pagkanta,” siling ni Brother Rutherford. “Daw nagasiyagit kamo.” Nahuya ang mga brother, gani gin-untat nila dayon ang programa. Pero bangod sadto, nabal-an sang mga brother nga handa na sila sa pag-broadcast.

Sang Pebrero 24, 1924, nagsugod sa pag-broadcast sa pinakauna nga tion ang WBBR. Nagsiling si Brother Rutherford nga gamiton ang estasyon sang radyo para “sa mga hilikuton sang ginharian sang Mesias.” Nagsiling sia nga ang katuyuan sang estasyon amo ang “pagbulig sa tanan nga tawo nga mahangpan ang Biblia kag ang kahulugan sang mga nagakatabo sa aton tion subong.”

Nangin madinalag-on gid ang una nga pag-broadcast sang WBBR. Sa sulod sang 33 ka tuig, gingamit ini nga estasyon para i-broadcast ang mga programa sang katawhan ni Jehova.

Sang Hulyo 1924, naghiwat sang isa ka kombension ang mga Estudyante sang Biblia sa Columbus, Ohio. Halin sa lainlain nga bahin sang kalibutan ang nag-attend sa sini. May mga nagpamulongpulong sang Arabic, English, French, German, Greek, Hungarian, Italian, Lithuanian, Polish, Russian, mga lenguahe sa Scandinavia, kag Ukrainian. Gin-broadcast sa radyo ang pila sa sini nga mga pamulongpulong, kag ginpangabay sang mga brother ang Ohio State Journal nga mag-publish sang artikulo parte sa kombension adlaw-adlaw.

Sang Huebes, Hulyo 24, sobra 5,000 ka kauturan ang nagbantala sa siudad nga ginhiwatan sang kombension. Halos 30,000 ka libro ang ila natanyag kag nasugdan ang linibo ka Bible study. Suno sa The Watch Tower, ini nga adlaw amo “ang pinakamanami nga bahin sang kombension.”

Sang Biernes, Hulyo 25, ginbasa ni Brother Rutherford ang isa ka dokumento nga maisog nga nagabuyagyag sa mga lider sang relihion. Dapat mabal-an sang mga tawo nga gamiton sang Dios ang iya Ginharian para pakamaayuhon ang bug-os nga katawhan. Pero nagsiling si Brother Rutherford nga ginapunggan sang mga lider sang pulitika, relihion, kag mga negosyo ang mga tawo nga matun-an ini nga kamatuoran. Nagsiling man sia nga sala ang ginapatihan sang sini nga mga lider nga ang League  of Nations amo ang gamiton sang Dios para maggahom sa duta. Kinahanglan sang mga Estudyante sang Biblia nga mangin maisog para mabantala nila sa mga tawo ini nga kamatuoran.

Sang ulihi, ang isa ka artikulo sang The Watch Tower nagsiling nga ang kombension sa Columbus nagpabakod gid sang pagtuo sang mga kauturan. Nagpalig-on ini sa ila nga magbantala bisan pa may mga pagpamatok. Si Leo Claus nga isa sa mga nag-attend sa sini nga kombension nagsiling: “Pagkatapos sang asembleya, excited kami nga isugid sa iban ang mensahe nga nagabuyagyag [sa mga lider sang relihion].”

Sang Oktubre, ginsugdan sang mga Estudyante sang Biblia ang pagpanagtag sang minilyon ka kopya sang tract nga Ecclesiastics Indicted. Nalakip sa sini nga tract ang mensahe nga ginbasa ni Brother Rutherford. Nagpanagtag si Frank Johnson sang sini nga tract sa isa ka gamay nga banwa sang Cleveland, Oklahoma. Temprano pa sia nakatapos sa pagpanagtag sa gin-asayn sa iya nga teritoryo, gani kinahanglan niya maghulat sing 20 minutos antes sia balikan sang iya mga kaupod. Pero dapat sia manago bangod ginapangita sia sang mga tawo nga naakig sa iya pagbantala sa ila banwa. Gani nagpanago si Brother Johnson sa sulod sang isa ka simbahan. Bangod wala sang tawo sa simbahan, ginbutangan niya sang mga tract ang kada pulungkuan lakip na ang Biblia sang pastor. Dayon, dalidali sia nga naggua sa simbahan. Kag bangod may nabilin pa sia nga tion antes sia balikan, ginkadtuan niya ang duha pa ka simbahan para bilinan man sang mga tract.

Dayon, dalidali nga nagbalik si Frank sa lugar kon diin sia sugaton sang iya mga kaupod. Nagpanago sia sa likod sang isa ka gasolinahan, gani wala sia nakita sang akig nga mga tawo nga nagapangita sa iya. Sang nakalabay na sa gasolinahan ang salakyan sang sini nga mga tawo, nag-abot dayon ang mga kaupod ni Frank nga halin man sa ila pagbantala. Dalidali sila dayon nga naglakat.

“Samtang nagabiyahe kami,” siling sang isa ka brother, “nalabyan namon ang tatlo ka simbahan. Sa kada simbahan, mga 50 ka tawo ang ara sa gua sini. Ginabasa sang iban ang tract, kag ginapakita naman ini sang iban sa ila pastor. Tayming lang gid ang paghalin namon. Nagapasalamat gid kami kay Jehova nga aton Dios bangod gin-amligan niya kami nga indi madakpan sa amon pagbantala.”

Nangin maisog man sa pagbantala ang mga Estudyante sang Biblia nga ara sa iban nga mga pungsod. Sa naaminhan sang France, nagbantala si Józef Krett sa mga taga-Poland nga nagaobra sa minahan. Nakaiskedyul sia nga magpamulongpulong nga may tema nga “The Resurrection of the Dead Soon.” Sang nagpanagtag ang mga kauturan sang mga imbitasyon sa mga tawo, ginpaandaman sang pari ang mga tawo nga indi sila dapat mag-attend sa pamulongpulong. Pero kabaliskaran ang natabo. Kay man, sobra 5,000 ka tawo ang nag-attend sa pamulongpulong, lakip na ang pari. Ginhambalan ni Brother Krett ang pari nga pangapinan ang iya mga ginapatihan, pero nangindi ang pari. Pagkatapos sang pamulongpulong ni Brother Krett, naubos niya tanyag sa mga tawo ang tanan niya nga literatura bangod gusto gid nila magtuon parte sa Pulong sang Dios.​—Amos 8:11.

Sa Africa, nagkadto si Claude Brown sa Gold Coast, nga ginatawag subong nga Ghana, para magbantala didto. Madamo nga tawo sa sini nga pungsod ang nakatuon sang kamatuoran paagi sa iya mga pamulongpulong kag mga publikasyon nga natanyag niya didto. Naka-attend si John Blankson, nga nagaeskwela para mangin isa ka pharmacist, sa isa ka pamulongpulong ni Brother Brown. Narealisar dayon ni John nga amo ini ang kamatuoran.  “Nalipay gid ako sang natun-an ko ang kamatuoran,” siling ni John, “kag ginsugid ko ini sa iban sa amon eskwelahan.”

Natun-an ni John nga wala ginatudlo sang Biblia ang parte sa Trinidad. Gani isa ka adlaw, nagkadto sia sa isa ka simbahan para pamangkuton ang pari parte sa sini. Naakig ang pari sa iya kag ginsinggitan sia: “Indi ka Cristiano. Iya ka sang Yawa. Gua!”

Sang nakapauli na si John, ginsulatan niya ang pari kag ginpangabay niya sia nga makitaay sila sa pangpubliko nga lugar. Gusto niya nga ipaathag sang pari ang iya pagpati parte sa Trinidad. Pero, ginpakadto sia sang pari sa opisina sang isa niya ka maestro sa eskwelahan. Ginpamangkot sia sang maestro kon nagsulat gid man sia sa pari.

“Huo Sir,” sabat ni John.

Nagsiling ang iya maestro nga sulatan niya ang pari para mangayo sing pasaylo. Gani, ginsulatan ni John ang pari. Amo ini ang ginsulat niya:

“Sir, ginhambalan ako sang akon maestro nga mangayo sing pasaylo sa imo paagi sa sulat. Handa ako nga mangayo sing pasaylo basta akuon mo nga sala ang imo mga ginatudlo.”

Indi makapati ang maestro sa ginsulat ni John, gani ginpamangkot niya sia, “Blankson, sigurado ka nga amo ’ni ang gusto mo isulat?”

“Huo, Sir. Kag amo lang ’na ang gusto ko isulat.”

“Puede ka gid pahalinon sa sini nga eskwelahan kon padayon mo nga pakalainon ang pari nga ginasuportahan sang gobierno.”

“Pero ibutang ta Sir nga may ara kami sang wala naintiendihan sa imo ginatudlo, indi bala nga puede kami makapamangkot sa imo?”

“Huo, puede gid.”

“Amo man ’na Sir ang natabo. May ginatudlo ang pari sa amon parte sa Biblia, kag namangkot ako sa iya. Kon indi niya masabat ang akon pamangkot, ngaa kinahanglan ko magsulat sa iya para mangayo sing pasaylo?”

Wala ginpahalin sa eskwelahan si Blankson, kag wala sia ginpasulat sa pari para mangayo sing pasaylo.

Parte sa mga hilikuton sadto nga tuig, ang The Watch Tower nagsiling: “Masiling man naton ang ginsiling ni David: ‘Hatagan mo ako sing kusog sa pagpakig-away.’ (Salmo 18:39) Makapalig-on gid ini nga tuig kay nakita naton kon paano kita ginbuligan sang Ginuo sa aton mga hilikuton . . . Ang iya matutom nga mga alagad . . . malipayon nga nagabantala sang maayong balita.”

Sang ulihi nga bahin sang tuig, nagplano ang mga brother nga maghimo sang isa pa ka estasyon sang radyo. Ginhimo nila ini nga estasyon sa Chicago, kag gintawag ini nga WORD. Naggamit ang mga brother sang 5,000 watts nga transmitter para mabatian sang mga tawo ang mensahe sang Ginharian bisan sa malayo nga mga lugar pareho sang Canada sa aminhan.

Sang 1925, ginbuligan ni Jehova ang mga Estudyante sang Biblia nga maintiendihan ang bag-o nga mga paghangop parte sa kapitulo 12 sang Bugna. Bangod sining bag-o nga mga paghangop, nag-untat ang iban sa pag-alagad kay Jehova. Pero madamo ang nalipay nga maintiendihan pa gid ang mga natabo sa langit kag kon ano ang epekto sini sa katawhan sang Dios diri sa duta.