1-2. Ano ang natabo samtang nagalakat pakadto sa Emaus ang duha ka disipulo ni Jesus?

 NISAN 16, 33 C.E. sadto. Nasubuan kag nahadlukan ang mga disipulo ni Jesus. Halin sa Jerusalem, naglakat ang duha sa ila pakadto sa Emaus. Isa ini ka baryo nga mga 11 ka kilometro ang kalayuon halin sa Jerusalem. Naluyahan ining duha ka disipulo bangod ginpatay si Jesus. Nasubuan sila kay nagalaum sila nga may himuon ang Mesias para sa mga Judiyo. Pero, may natabo nga wala nila ginapaabot.

² May nagpalapit sa ila nga isa ka lalaki nga indi nila kilala, kag nag-upod sia sa ila paglakat. Ginsugid nila sa lalaki nga nasubuan gid sila sa natabo kay Jesus. Dayon may ginsiling sa ila ang lalaki, kag napalig-on gid sila sa sini. “Sugod sa ginsulat ni Moises kag sang tanan nga mga Manalagna,” ginpaathag sang lalaki kon ngaa dapat mag-antos kag mapatay ang Mesias. Pag-abot sang tatlo ka lalaki sa Emaus, narealisar sang duha ka disipulo nga ang lalaki nga kaupod nila amo gali si Jesus nga ginbanhaw na sang Dios. Sigurado gid nga grabe ang ila kalipay bangod buhi ang Mesias.​—Luc. 24:​13-35.

3-4. Ano ang natabo sa mga disipulo ni Jesus, kag ano ang matun-an naton sa sini nga artikulo? (Binuhatan 1:3)

³ Sa katapusan nga 40 ka adlaw ni Jesus sa duta, madamo nga beses sia nga nagpakita sa iya mga disipulo. (Basaha ang Binuhatan 1:3.) Sadto nga tion, ginpalig-on ni Jesus ang iya mga disipulo nga nasubuan kag nahadlukan. Gani, nangin malipayon sila kag nangin  maisog sila sa pagbantala kag pagtudlo sang maayong balita sang Ginharian. a

⁴ Kon tun-an naton ang mga ginhimo ni Jesus sadto nga tion, makabenepisyo gid kita. Sa sini nga artikulo, tun-an naton (1) kon paano ginpalig-on ni Jesus ang iya mga disipulo, (2) kon paano niya sila ginbuligan nga mahangpan sing maayo ang Kasulatan, kag (3) kon paano niya sila ginhanas para sa dugang nga mga responsibilidad. Dayon, tun-an naton kon paano naton mailog ang halimbawa ni Jesus.

PALIG-UNON NATON ANG IBAN

5. Ngaa kinahanglan sang mga disipulo ni Jesus ang pagpalig-on?

⁵ Kinahanglan sang mga disipulo ni Jesus ang pagpalig-on. Ngaa? Ginbiyaan sang pila sa ila ang ila mga balay, pamilya, kag negosyo para mag-upod kay Jesus. (Mat. 19:27) Ginsikway naman ang iban sa ila bangod nangin mga disipulo sila ni Jesus. (Juan 9:22) Ginhimo nila ini nga mga sakripisyo bangod nagapati sila nga si Jesus amo ang ginpromisa nga Mesias. (Mat. 16:16) Pero sang ginpatay si Jesus, nasubuan gid sila kay abi nila indi na matuman ang ila ginalauman.

6. Ano ang ginhimo ni Jesus pagkatapos sia ginbanhaw?

⁶ Nahangpan ni Jesus nga normal lang nga masubuan ang iya mga disipulo sang napatay sia. Kag kabalo sia nga wala ini nagapahangop nga kulang ang ila pagtuo. Gani sang adlaw mismo nga ginbanhaw sia, ginpalig-on niya dayon ang iya mga abyan. Halimbawa, nagpakita si Jesus kay Maria Magdalena samtang nagahibi si Maria sa lulubngan ni Jesus. (Juan 20:​11, 16) Nagpakita man sia sa duha ka disipulo nga ginsambit sa umpisa sini nga artikulo. Kag nagpakita man sia kay apostol Pedro. (Luc. 24:34) Ano ang matun-an naton sa halimbawa ni Jesus? Binagbinagon naton ang natabo sang nagpakita sia kay Maria Magdalena.

7. Suno sa Juan 20:​11-16, ano ang nakita ni Jesus nga ginahimo ni Maria, kag ano ang ginhimo ni Jesus para sa iya? (Tan-awa man ang piktyur.)

⁷ Basaha ang Juan 20:​11-16. Sang Nisan 16, aga pa nga nagkadto sa lulubngan ni Jesus ang pila ka babayi nga matutom sa iya. (Luc. 24: 1, 10) Ang isa sa ila amo si Maria Magdalena. Pag-abot ni Maria sa lulubngan, wala ini sing unod. Gani nagdalagan sia pakadto kay Pedro kag kay Juan para isugid ini sa ila. Nagdalagan dayon si Pedro kag si Juan pakadto sa lulubngan, kag nagasunod sa ila si Maria. Sang nakita nila nga wala sa lulubngan ang bangkay ni Jesus, nagpauli dayon si Pedro kag si Juan. Pero, nagpabilin si Maria sa lulubngan kag naghibi sia didto. Wala sia kabalo nga ara gali didto si Jesus nga nagatan-aw sa iya. Nakita ni Jesus nga nagahibi si Maria, gani nagpakita sia kay Maria para palig-unon sia. Simple lang ang iya ginhimo, pero napalig-on gid sa sini si Maria. Gin-istorya niya si Maria kag ginhatagan niya sia sang importante nga asaynment. Dapat isugid ni Maria sa mga kauturan ni Jesus nga ginbanhaw na sia.​—Juan 20:​17, 18.

8. Paano naton mailog si Jesus?

⁸ Paano naton mailog si Jesus? Kon kabalo kita nga may problema ang aton mga kauturan, ilugon naton si Jesus. Intiendihon naton ang ila ginabatyag, kag palig-unon naton sila nga padayon nga mag-alagad kay Jehova. Binagbinaga ang eksperiensia sang isa ka sister nga si Jocelyn. Napatay ang iya manghod nga babayi sa isa ka aksidente. Nagsiling sia, “Grabe ang akon kasubo sa sulod sang madamo nga binulan.” Pero gin-agda sia sang isa ka mag-asawa sa ila balay, ginpamatian nila sia sing maayo, kag ginsilingan nila sia nga palangga sia ni Jehova. Nagsiling si Jocelyn: “Pamatyag ko ara ako sa dagat, madulom ang palibot, kag daw malumos na ako sa dalagku nga mga balod. Pero gingamit sila ni Jehova para luwason ako. Ginbuligan nila ako nga mangin mabakod liwat kag padayon nga mag-alagad kay Jehova.” Mapalig-on man naton ang iban kon pamatian naton sila sing maayo samtang ginasugid nila ang ila ginabatyag, kag kon ipabatyag naton sa ila paagi sa aton mga ginasiling nga nahangpan naton sila. Kon himuon naton ini, mapabakod naton sila sa ila pag-alagad sa Dios.​—Roma 12:15.

BULIGAN NATON ANG IBAN NGA MAHANGPAN ANG PULONG SANG DIOS

9. Ano ang narealisar ni Jesus parte sa iya mga disipulo, kag paano sila ginbuligan ni Jesus?

⁹ Ginbaton sang mga disipulo ni Jesus ang Pulong sang Dios, kag ginpanikasugan gid nila nga iaplikar ini sa ila kabuhi. (Juan 17:6) Pero indi nila maintiendihan kon ngaa dapat mapatay si Jesus bilang isa ka kriminal. Kabalo si Jesus nga may pagtuo ang iya mga disipulo kag palangga nila si Jehova. Pero, narealisar ni Jesus nga dapat nila mahangpan sing maayo ang Kasulatan. (Luc. 9:​44, 45; Juan 20:9) Gani ginbuligan niya sila nga mahangpan ini sing maayo. Binagbinagon naton kon paano niya ini ginhimo sang nagpakita sia sa duha ka disipulo nga nagalakat pakadto sa Emaus.

10. Ano ang ginhimo ni Jesus para marealisar sang iya mga disipulo nga sia ang Mesias? (Lucas 24:​18-27)

¹⁰ Basaha ang Lucas 24:​18-27. Talupangda nga wala dayon ginsugid ni Jesus sa duha ka disipulo kon sin-o gid sia. Sa baylo, may mga ginpamangkot sia sa ila. Ngaa? Posible nga gusto niya nga ipabutyag nila kon ano ang ara sa ila hunahuna kag tagipusuon. Kag amo gid sini ang ginhimo nila. Ginsilingan nila sia nga abi nila hilwayon ni Jesus ang Israel sa pagpigos sang mga Romano. Pagkatapos nila mapabutyag ang ila ginabatyag, gingamit ni Jesus ang Kasulatan para buligan sila nga mahangpan nga natuman sadto nga tion ang madamo nga tagna. b Pagkagab-i, ginpaathag niya sa iban pa nga mga disipulo ang kahulugan sang sini nga mga tagna. (Luc. 24:​33-48) Ano ang matun-an naton sa sini nga kasaysayan?

11-12. (a) Ano ang matun-an naton sa paagi ni Jesus sa pagtudlo sang mga kamatuoran sa Biblia? (Tan-awa man ang mga piktyur.) (b) Paano ginbuligan si Nortey sang naga-Bible study sa iya?

¹¹ Paano naton mailog si Jesus? Una, kon may gina-Bible study kita, pamangkuton naton sila sang mga pamangkot nga makabulig sa ila nga ipabutyag kon ano ang ara sa ila hunahuna kag tagipusuon.  (Hulu. 20:5) Kon mahangpan na naton ang ila ginabatyag, tudluan dayon naton sila kon paano nila makita ang mga teksto nga maaplikar nila sa ila sitwasyon. Punggan naton ang aton kaugalingon sa pagsiling sa ila kon ano ang dapat nila himuon. Sa baylo, buligan naton sila nga mahangpan ang mga prinsipio sa Biblia kag kon paano nila ini maaplikar. Binagbinaga ang eksperiensia sang isa ka brother sa Ghana nga si Nortey.

¹² Nag-Bible study si Nortey sang 16 anyos sia. Pero sang ulihi, ginpamatukan sia sang iya pamilya. Ano ang nakabulig sa iya nga indi mag-untat sa pag-study? Ginpaathag na sadto sang naga-Bible study sa iya ang Mateo kapitulo 10 nga nagapakita nga hingabuton gid ang matuod nga mga Cristiano. “Gani sang ginhingabot ako,” siling ni Nortey, “nakumbinsi ako nga kamatuoran ang akon ginatun-an.” Ginpaathag man sang naga-Bible study sa iya ang Mateo 10:16 nga nagapalig-on sa aton nga mangin mainandamon. Dayon gin-istoryahan nila nga makabulig ini kay Nortey nga mangin matinahuron sa pagpaathag sa iya pamilya parte sa iya mga ginapatihan. Pagkatapos mabawtismuhan si Nortey, gusto niya magpayunir. Pero, gusto sang iya amay nga mag-eskwela sia sa unibersidad. Wala ginsilingan si Nortey sang naga-Bible study sa iya kon ano ang dapat niya himuon. Sa baylo, may mga ginpamangkot sia kay Nortey para mabal-an niya kon ano ang ginahunahuna ni Nortey. Dayon ginbuligan niya si Nortey nga makita ang mga prinsipio sa Biblia nga maaplikar niya sa iya sitwasyon. Ano ang resulta? Nagdesisyon si Nortey nga magpayunir. Pero, ginpalayas sia sang iya amay sa ila balay. Ano ang ginsiling ni Nortey parte sa mga natabo sa iya? Nagsiling sia, “Kumbinsido ako nga husto ang akon desisyon.” Kon buligan man naton ang iban nga mahangpan sing maayo ang mga prinsipio sa Biblia, magabakod ang ila pagtuo para padayon sila nga mag-alagad kay Jehova.​—Efe. 3:​16-19.

HANASA ANG MGA BROTHER NGA MANGIN “MGA DULOT NGA MGA LALAKI”

13. Ano ang ginhimo ni Jesus para masigurado niya nga magapadayon ang pagbantala nga hilikuton kon magbalik na sia sa langit? (Efeso 4:8)

¹³ Sang ari si Jesus sa duta, ginhimo gid niya ang ginpahimo sa iya sang iya Amay. (Juan 17:4) Pero wala ginhunahuna ni Jesus nga sia lang ang makahimo sang ginasugo ni Jehova. Gani sa sulod sang tatlo ka tuig kag tunga nga pagministeryo ni Jesus, ginhanas man niya ang iban sa sini nga hilikuton. Antes magbalik si Jesus sa langit, ginhatagan niya sang responsibilidad ang iya mga disipulo. Dapat nila atipanon ang hamili nga katawhan ni  Jehova, kag dapat nila pangunahan ang pagbantala kag pagtudlo sang maayong balita. Posible nga wala pa mag-30 anyos ang pila ka disipulo nga nagpanguna sa sini nga hilikuton. (Basaha ang Efeso 4:8.) Mainunungon kay Jesus ini nga mga lalaki kag nagpangabudlay sila upod sa iya. Gani, ginhanas niya sila para mangin “mga dulot [sila] nga mga lalaki.” Paano gingamit ni Jesus ang iya katapusan nga 40 ka adlaw sa duta para hanason sila?

14. Ano ang gintudlo ni Jesus sa iya mga disipulo sa iya katapusan nga 40 ka adlaw sa duta? (Tan-awa man ang piktyur.)

¹⁴ Prangka pero mahigugmaon nga ginlaygayan ni Jesus ang iya mga disipulo. Halimbawa, natalupangdan niya nga nagaduhaduha ang pila sa ila, gani ginlaygayan niya sila. (Luc. 24:​25-27; Juan 20:27) Ginsilingan man niya sila nga dapat mas magpokus sila sa kon paano nila atipanon ang katawhan ni Jehova imbes nga sa ila mga negosyo. (Juan 21:15) Ginpahanumdom niya sa ila nga indi nila dapat pag-ikumparar ang ila mga pribilehiyo sa pag-alagad kay Jehova. (Juan 21:​20-22) Gintadlong man niya ang sala nga pagpati sang iban parte sa Ginharian, kag ginbuligan niya sila nga magpokus sa pagbantala sang maayong balita. (Binu. 1:​6-8) Ano ang matun-an sang mga gulang kay Jesus?

15-16. (a) Paano mailog sang mga gulang si Jesus? Ipaathag. (b) Paano nakabenepisyo si Patrick sa ginlaygay sa iya?

¹⁵ Paano mailog sang mga gulang si Jesus? Dapat nila hanason ang mga brother, lakip na ang mga pamatan-on, para mangin kalipikado sila sa dugang nga mga responsibilidad. c Nahangpan sang mga gulang nga madamo pa sang dapat matun-an ang ila mga ginahanas. Gani dapat nila sila hanason sa mahigugmaon nga paagi. Dapat matun-an sang pamatan-on nga mga brother nga mangin mapainubuson, masaligan, kag mangin handa sa pag-alagad sa iban.​—1 Tim. 3:1; 2 Tim. 2:2; 1 Ped. 5: 5.

¹⁶ Binagbinaga kon paano nakabenepisyo sa laygay ang isa ka brother nga si Patrick. Sang pamatan-on pa sia, medyo masakit sia maghambal kag indi maayo ang pagtratar niya sa iban lakip na sa mga sister. Nakita sang isa ka gulang nga dapat may himuon nga pagbag-o si Patrick. Gani prangka  pero mahigugmaon niya sia nga ginlaygayan. “Nagapasalamat gid ako sa ginhimo niya,” siling ni Patrick. “Sang una, nagaluya ang akon buot kon makabaton ang iban nga mga brother sang mga pribilehiyo nga gusto ko. Pero nakabulig gid sa akon ang ginlaygay sang gulang. Narealisar ko nga imbes nga magpokus sa mga pribilehiyo sa kongregasyon, dapat ako mangin mapainubuson kag dapat ko palanggaon ang mga kauturan.” Ano ang resulta? Gintangdo si Patrick bilang isa ka gulang sang 23 anyos sia.​—Hulu. 27: 9.

17. Paano ginpakita ni Jesus nga may salig sia sa iya mga disipulo?

¹⁷ Ginhatagan ni Jesus ang iya mga disipulo sang responsibilidad nga ibantala ang maayong balita. Magluwas sa sini, dapat man nila tudluan ang mga tawo parte sa Kasulatan. (Mat. 28:20) Posible nahunahuna sang mga disipulo nga indi nila masarangan nga himuon ang asaynment nga ginhatag sa ila ni Jesus. Pero, sigurado si Jesus nga masarangan nila ini. May salig sia sa ila, gani ginsilingan niya sila: “Subong nga ginpadala ako sang Amay, ginapadala ko man kamo.”​—Juan 20:21.

18. Paano mailog sang mga gulang si Jesus?

¹⁸ Paano mailog sang mga gulang si Jesus? Ginahanas sang eksperiensiado nga mga gulang ang iban paagi sa paghatag sa ila sang pila ka responsibilidad. (Fil. 2:​19-22) Halimbawa, puede pabuligon sang mga gulang ang mga pamatan-on sa pagpaninlo kag pagmentinar sang Kingdom Hall. Pagkatapos mahatagan sang mga gulang ang mga brother sang asaynment, dapat nila sila hanason kon paano ini himuon. Dapat ipakita sang mga gulang nga may salig sila sa mga brother nga himuon nila ang ila asaynment. Ang isa ka bag-o nga gulang nga si Matthew nagsiling nga nagapasalamat gid sia sa eksperiensiado nga mga gulang. Ginhanas nila sia kon paano himuon ang mga asaynment sa kongregasyon kag ginpakita nila nga may salig sila sa iya. Nagsiling sia: “Kon wala ko nahimo sing maayo ang akon asaynment, ginabuligan nila ako nga makita kon ano ang dapat ko himuon sa sunod para mahimo ko ini sing maayo.” d

19. Ano ang dapat panikasugan naton nga himuon?

¹⁹ Gingamit ni Jesus ang iya katapusan nga 40 ka adlaw sa duta para palig-unon, tudluan, kag hanason ang iban. Kabay pa nga panikasugan naton nga sundon sing maayo ang iya halimbawa. (1 Ped. 2:21) Makasalig kita nga buligan niya kita nga mahimo ini. Kay man, nagpromisa sia sa aton: “Kaupod ninyo ako sa tanan nga tion tubtob sa hingapusan sang sistema sang mga butang.”​—Mat. 28:20.