1. Ano ang ginabatyag ni Jehova sa iya mga alagad?

 KABALO si Jehova sang tanan naton nga ginabatyag. Kabalo sia kon nalipay kita ukon nasubuan. (Sal. 37:18) Kon ginahimo naton ang aton bug-os nga masarangan sa aton pag-alagad sa iya bisan pa na-depress kita ukon na-trauma, nalipay gid sia sa aton. Kag gusto gid niya kita buligan kag paumpawan.

2. Ano ang ginahimo ni Jehova para sa mga buong sing tagipusuon, kag ano ang dapat naton himuon para makabenepisyo kita sa iya bulig?

² Ang Salmo 147:3 nagasiling nga ‘ginabugkusan ni Jehova ang mga pilas’ sang mga buong sing tagipusuon. Ginalaragway sini nga teksto kon paano ginabuligan ni Jehova ang mga na-depress ukon na-trauma. Ano ang dapat naton himuon para makabenepisyo kita sa bulig ni Jehova? Binagbinaga ini nga ilustrasyon. Kon may pilas ang isa ka tawo, makabulig gid ang isa ka eksperto nga doktor para mag-ayo sia. Pero para mag-ayo sia, kinahanglan niya sundon ang mga instruksion sang doktor. Sa sini nga artikulo, binagbinagon naton ang mga laygay ni Jehova nga mabasa sa Biblia para sa mga na-depress ukon na-trauma. Binagbinagon man naton kon paano naton maaplikar ang iya mahigugmaon nga mga laygay.

GINAPASALIG NI JEHOVA NGA IMPORTANTE KITA SA IYA

3. Ngaa nagabatyag ang iban nga wala sila sing pulos?

³ Makapasubo nga madamo nga tawo ang wala nagapalangga sa ila isigkatawo kag ginahimuan nila sing malain ang iban. Bangod sini, nagabatyag ang iban nga wala sila sing pulos. Ang isa ka sister nga si Helen a nagsiling: “Halin sang bata ako, wala ko nabatyagan ang pagpalangga sa sulod sang amon pamilya. Bayolente ang akon amay kag pirme niya kami ginahambalan nga wala kami  sing pulos.” Pareho kay Helen, posible nga ginhimuan ka man sing malain, pirme ka ginainsulto, ukon pirme ka ginahambalan nga wala ka sing pulos. Bangod sini, posible nabudlayan ka nga magpati nga may nagapalangga sa imo.

4. Suno sa Salmo 34:​18, ano ang ginapasalig sa aton ni Jehova?

⁴ Bisan pa ginhimuan ka sing malain sang iban, makasalig ka nga palangga ka ni Jehova kag importante ka sa iya. Ang matuod, “malapit [sia] sa mga nagaantos.” (Basaha ang Salmo 34:18.) Kon “nalisdan” ka, dumduma nga nakita ni Jehova ang imo maayo nga mga kinaiya kag ginbuyok ka niya. (Juan 6:44) Handa sia pirme sa pagbulig sa imo bangod palangga ka gid niya.

5. Ano ang matun-an naton sa pagtratar ni Jesus sa mga tawo nga ginpakanubo sang iban?

⁵ Kon binagbinagon naton ang halimbawa ni Jesus, may matun-an kita parte sa balatyagon ni Jehova. Sang ari si Jesus sa duta, ginpakitaan niya sang kaayo ang mga tawo nga ginpakanubo sang iban. (Mat. 9:​9-12) Isa ka bes, gusto gid sang isa ka babayi nga mag-ayo sia sa iya malala nga balatian, gani gintandog niya ang bayo ni Jesus. Sang ginhimo niya ini, ginpaumpawan sia ni Jesus kag gindayaw ni Jesus ang iya pagtuo. (Mar. 5:​25-34) Perpekto nga gin-ilog ni Jesus ang personalidad sang iya Amay. (Juan 14:9) Gani makasalig ka nga importante ka kay Jehova kag nakita niya ang imo maayo nga mga kinaiya, lakip na ang imo pagtuo kag gugma sa iya.

6. Ano ang puede mo himuon kon nagabatyag ka nga wala ka sing pulos?

⁶ Ano ang puede mo himuon kon nagabatyag ka nga wala ka sing pulos? Basaha ang mga teksto sa Biblia nga nagapasalig sa imo nga importante ka kay Jehova, kag pamalandungi ini. b (Sal. 94:19) Indi mo dapat pag-ikumparar ang imo kaugalingon sa iban, kag indi ka dapat magpokus sa indi mo masarangan nga himuon. Kabalo si Jehova kon ano lang ang imo  masarangan. (Sal. 103:​13, 14) Kon ginhimuan ka sing malain sang iban sang una, indi pagbasula ang imo kaugalingon. Dumduma nga indi ang mga biktima ang manabat kay Jehova kundi ang mga nagahimo sing malain. (1 Ped. 3:12) Binagbinaga si Sandra nga ginhimuan sing malain sang bata pa sia. Nagsiling sia, “Pirme ako nagapangamuyo kay Jehova nga buligan niya ako nga tan-awon ang akon kaugalingon pareho sa pagtan-aw niya sa akon.”

7. Paano naton magamit sa aton pag-alagad kay Jehova ang aton mga eksperiensia sang una?

⁷ Indi gid magduhaduha nga puede ka gamiton ni Jehova para buligan ang iban. Ginhatagan ka niya sang kadungganan nga mangin masigkamanugpangabudlay niya sa pagbantala nga hilikuton. (1 Cor. 3:9) Kon may indi ka maayo nga mga eksperiensia sang una, posible gid nga mahangpan mo ang ginabatyag sang iban nga ginhimuan man sing malain. Gani, mabuligan mo sila. Binagbinaga si Helen nga ginsambit kaina. Ginbuligan sia ni Jehova kag sang mga kauturan, gani ginabuligan man niya subong ang iban. Nagsiling sia: “Sang una, nagabatyag ako nga wala ako sing pulos. Pero ginpabatyag sa akon ni Jehova nga palangga niya ako, kag ginagamit niya ako para buligan ang iban.” Subong, malipayon nga nagaalagad si Helen bilang isa ka regular payunir.

GUSTO NI JEHOVA NGA MAGPATI KITA NGA GINAPATAWAD NIYA KITA

8. Ano ang ginapasalig sa aton ni Jehova sa Isaias 1:18?

⁸ May pila ka alagad si Jehova nga ginakonsiensia gihapon bangod sa mga sala nga nahimo nila sang una. Posible nga nahimo nila ini nga mga sala antes ukon pagkatapos sila nabawtismuhan. Pero indi pagkalimti nga palangga gid kita ni Jehova kag gin-aman niya ang gawad para mapatawad ang aton mga sala. Regalo ini ni Jehova, kag gusto niya nga batunon naton ini. Ginapasalig sa aton ni Jehova nga kon ‘natadlong na naton ang aton kaangtanan’ c sa iya, napatawad na niya kita sing bug-os. (Basaha ang Isaias 1:18.) Mahigugmaon gid si Jehova kay ginakalimtan niya ang aton mga sala sang una. Pero, wala gid niya ginakalimtan ang aton maayo nga mga ginhimo.​—Sal. 103:​9, 12; Heb. 6:10.

9. Ngaa indi naton dapat pagpamensaron pirme ang aton mga sala sang una?

⁹ Kon ginakonsiensia ka gihapon bangod sa imo mga sala sang una, himua ang imo bug-os nga masarangan nga magpokus sa imo mga ginahimo subong kag sa mga himuon mo sa palaabuton. Binagbinaga ang halimbawa ni apostol Pablo. Nasubuan gid sia kay mapintas niya nga ginhingabot sadto ang mga Cristiano, pero kabalo sia nga ginpatawad na sia ni Jehova. (1 Tim. 1:​12-15) Ti, pirme bala ginapamensar ni Pablo ang iya mga sala sang una? Sigurado gid nga wala niya ini ginhimo. Bilang isa ka Fariseo, madamo man sang hinimuan si Pablo. Pero, wala man niya ini pirme ginapamensar. (Fil. 3:​4-8, 13-15) Sa baylo, nangin mapisan si Pablo sa iya pagministeryo kag nagpokus sia sa palaabuton. Pareho kay Pablo, indi mo na mabag-o ang nagligad. Pero may mahimo ka subong para madayaw mo si Jehova kag para malipay sia sa imo. Kag puede mo hunahunaon ang dalayawon nga palaabuton nga ginpromisa niya sa imo.

10. Kon may ginhimo kita sang una nga nakasakit sa iban, ano ang puede naton himuon?

¹⁰ Kon may ginhimo ka sang una nga nakasakit sa iban, posible nga nasubuan ka gid. Ano ang puede mo himuon? Himua ang imo bug-os nga masarangan para makay-o ang halit nga resulta sang imo ginhimo, kag sinsero nga mangayo sing pasaylo sa ila. (2 Cor. 7:11) Pangabaya si Jehova nga buligan niya ang mga naapektuhan sang imo  ginhimo. Buligan ka ni Jehova kag buligan man niya sila para indi kamo mag-untat sa pag-alagad sa iya kag para mangin malinong ang inyo hunahuna.

11. Ano ang matun-an naton sa halimbawa ni manalagna Jonas? (Tan-awa man ang piktyur.)

¹¹ Panikasugi nga makatuon sa imo mga sala sang una, kag mangin handa nga magpagamit kay Jehova sa bisan ano nga asaynment. Binagbinaga ang halimbawa ni manalagna Jonas. Sang ginsugo sia sang Dios nga magkadto sa Ninive nga ara sa sidlangan, wala sia nagkadto didto. Sa baylo, nagkadto sia sa Tarsis nga ara sa katundan. Gani gindisiplina ni Jehova si Jonas, kag nakatuon sia sa iya sala. (Jon. 1:​1-4, 15-17; 2:​7-10) Padayon nga gingamit ni Jehova si Jonas bilang Iya manalagna. Ginsugo sia liwat ni Jehova nga magkadto sa Ninive, kag nagtuman dayon si Jonas. Bisan pa nasubuan si Jonas sa iya sala sang una, ginbaton niya ang asaynment nga ginhatag ni Jehova.​—Jon. 3:​1-3.

GINAPAUMPAWAN KITA NI JEHOVA PAAGI SA IYA BALAAN NGA ESPIRITU

12. Kon na-trauma kita bangod sa indi maayo nga natabo sa aton kabuhi, paano kita hatagan ni Jehova sang malinong nga hunahuna? (Filipos 4:​6, 7)

¹² Kon na-trauma kita bangod sa indi maayo nga natabo sa aton kabuhi, ginapaumpawan kita ni Jehova paagi sa iya balaan nga espiritu. Binagbinaga ang eksperiensia ni Ron kag ni Carol. Kasubo gid sang natabo sa ila kabuhi kay naghikog ang ila anak nga lalaki. Nagsiling sila: “Madamo na nga pagtilaw ang amon naeksperiensiahan, pero amo ini ang pinakamabudlay. Madamo nga gab-i nga indi kami makatulog, gani nagapangamuyo kami kay Jehova. Mabatyagan namon dayon ang paghidait nga ginsambit sa Filipos 4:​6, 7.” (Basaha.) Kon na-trauma ka bangod sa indi maayo nga natabo sa imo kabuhi, isugid kay Jehova ang tanan mo nga ginabatyag. Puede ka makapangamuyo sa iya sa tanan nga tion bisan pa daw ano ini kalawig. (Sal. 86:3; 88:1) Pangayua pirme kay Jehova ang iya balaan nga espiritu kay handa gid sia pirme nga magbulig sa imo.​—Luc. 11:​9-13.

13. Paano kita mabuligan sang balaan nga espiritu para padayon kita nga makaalagad sing matutom kay Jehova? (Efeso 3:16)

¹³ Daw wala ka na bala sang kusog nga himuon ang bisan ano bangod sa mabudlay nga pagtilaw nga imo ginabatas? Mahatagan ka sang balaan nga espiritu sang kusog para padayon mo nga maalagad sing matutom si Jehova. (Basaha ang Efeso 3:16.) Binagbinaga ang eksperiensia sang isa ka sister nga si Flora. Nagaalagad sia kag ang iya bana bilang mga misyonero sang ginluiban sia sang iya bana, kag nagdiborsio sila. Nagsiling sia: “Nasubuan gid ako sa pagluib sang akon bana, kag amo lang ini pirme ang akon ginapamensar. Nangamuyo ako kay Jehova nga buligan ako sang iya balaan nga espiritu para padayon ako nga makaalagad sa iya. Sang primero, abi ko indi ko masarangan ini nga pagtilaw. Pero ginpaumpawan ako ni Jehova, kag ginbuligan niya ako nga makabatas.” Nabatyagan ni Flora nga ginbuligan sia ni Jehova nga mas magsalig pa gid sa iya, kag kumbinsido sia nga buligan sia ni Jehova sa tanan nga pagtilaw nga maeksperiensiahan niya. Nagsiling pa si Flora: “Nangin matuod gid sa akon ang ginasiling sang Salmo 119:32: ‘Maukod ko nga sundon ang dalanon sang imo mga sugo kay ginhatagan mo ini sing duog sa akon tagipusuon.’”

14. Ano ang himuon naton para buligan kita sang balaan nga espiritu sang Dios?

¹⁴ Pagkatapos mo magpangayo kay Jehova sang iya balaan nga espiritu, ano dayon ang himuon mo? Himua ang mga hilikuton nga makabulig sa imo nga mabaton ang iya balaan nga espiritu. Nalakip sa sini ang pag-attend sa mga miting kag ang pagbantala sa iban. Basaha ang Pulong ni Jehova adlaw-adlaw para mailog mo ang iya panghunahuna. (Fil. 4:​8, 9) Binagbinaga ang mga karakter sa Biblia nga nakaeksperiensia  sang mga pagtilaw, kag pamalandungi kon paano sila ginbuligan ni Jehova. Naeksperiensiahan ni Sandra, nga ginsambit kaina, ang sunodsunod nga mabudlay nga mga problema. Nagsiling sia: “Napalig-on gid ako sa kasaysayan ni Jose. Bisan pa nakaeksperiensia sia sang mga pagtilaw kag ginhimuan sia sing malain, wala gid nagluya ang iya kaangtanan kay Jehova.”​—Gen. 39:​21-23.

GINAPAUMPAWAN KITA NI JEHOVA PAAGI SA ATON MGA KAUTURAN

15. Sin-o ang makahatag sa aton sang paumpaw, kag paano nila ini ginahimo? (Tan-awa man ang piktyur.)

¹⁵ Kon nagaantos kita, ‘makahatag sa aton sing daku nga lugpay’ ang aton mga kauturan. (Col. 4:11) Isa sila sa mga paagi ni Jehova para ipakita sa aton nga palangga niya kita. Mapaumpawan nila kita paagi sa pagpamati sa aton, ukon paagi sa paghatag sa aton sang tion para updan kita. Posible nga palig-unon nila kita paagi sa pag-share sa aton sang isa ka teksto, ukon paagi sa pagpangamuyo upod sa aton. d (Roma 15:4) May mga tion nga posible ipahanumdom sa aton sang isa ka utod ang panghunahuna ni Jehova nga makabulig sa aton nga mangin kalmado. Mabuligan man kita sang aton mga kauturan sa iban pa nga paagi, pareho sang paghatag sa aton sang pagkaon para paumpawan kita.

16. Ano ang posible dapat naton himuon para mabuligan kita sang iban?

¹⁶ Para mabuligan kita sang iban, posible nga  dapat kita magpangayo sang bulig sa ila. Palangga kita sang aton mga kauturan, kag gusto nila kita buligan. (Hulu. 17:17) Pero posible nga wala sila kabalo kon ano ang aton ginabatyag ukon kinahanglan. (Hulu. 14:10) Kon na-depress ka ukon na-trauma, isugid sa imo hamtong nga mga abyan ang imo ginabatyag. Pabal-a sila kon ano ang imo kinahanglan. Puede mo palapitan ang isa ukon duha ka gulang nga komportable ka nga istoryahon. Natalupangdan sang pila ka sister nga makapaumpaw ang pag-istorya sa hamtong nga mga sister.

17. Ano ang posible nga mga rason kon ngaa indi naton gusto nga palig-unon kita sang iban, pero ano ang dapat naton himuon?

¹⁷ Panikasugi nga indi pag-ipain ang imo kaugalingon sa iban. Kon na-depress ka ukon na-trauma, posible nga daw gusto mo nga mag-isahanon lang. May mga tion nga posible indi maintiendihan sang mga kauturan ang imo ginabatyag, ukon posible may masiling sila nga makasakit sa imo balatyagon. (Sant. 3:2) Bangod sa sini nga mga rason, posible nga indi naton gusto nga palig-unon kita sang iban. Pero, indi ka dapat magpalayo sa mga kauturan. Puede sila gamiton ni Jehova para palig-unon ka. Ang isa ka gulang nga si Gavin nga may depresyon nagsiling: “Indi ko gusto mag-istorya ukon magpakig-upod sa akon mga abyan.” Pero ginpakigbatuan ni Gavin ang iya ginabatyag, kag naganami ang iya pamatyag kon kaupod niya ang mga kauturan. Ang isa ka sister nga si Amy nagsiling: “Bangod sang akon mga naeksperiensiahan sang una, nabudlayan ako magsalig sa mga tawo. Pero natun-an ko nga palanggaon ang akon mga kauturan kag magsalig sa ila pareho kay Jehova. Kabalo ako nga nalipay sa sini si Jehova, gani nalipay man ako.”

MAPAUMPAWAN KITA SANG MGA PROMISA NI JEHOVA

18. Ano ang mapaabot naton sa palaabuton, kag ano ang puede naton himuon subong?

¹⁸ Sa indi na lang gid madugay, dulaon ni Jehova ang tanan nga rason sang aton pag-antos sa pisikal kag emosyonal. (Bug. 21:​3, 4) Sa sina nga tion, indi ‘magpabilin sa aton tagipusuon’ ang masakit nga mga eksperiensia sa aton kabuhi. (Isa. 65:17) Pero natun-an naton nga may ginahimo si Jehova para sa aton subong. Amo ini ang ‘pagbugkos sa aton mga pilas.’ Madamo sang ginaaman si Jehova para paumpawan kita kag palig-unon. Gani, batuna ang iya bulig. Indi gid magduhaduha nga ‘nagaulikid sia sa imo.’—1 Ped. 5:7.