1. Ano ang pila sa mga regalo nga ginhatag ni Jesus sa aton?

 WALA sing tawo nga mas maalwan pa sangsa kay Jesus. Sang ari sia sa duta, ginbuligan niya ang iban paagi sa paghimo sang mga milagro. (Luc. 9:​12-17) Ang pinakadalayawon sa tanan niya nga regalo amo ang paghatag niya sang iya kabuhi para sa aton. (Juan 15:13) Sang ginbanhaw sia, padayon nga ginpakita ni Jesus ang iya kaalwan. Suno sa iya ginpromisa, nagpangabay sia kay Jehova nga hatagan kita sang balaan nga espiritu para tudluan kita kag lugpayan. (Juan 14:​16, 17, footnote; 16:13) Kag paagi sa aton mga miting sa kongregasyon, padayon kita nga ginahatagan ni Jesus sang aton mga kinahanglanon para matudluan naton ang mga tawo sa bilog nga kalibutan parte sa Biblia.​—Mat. 28:​18-20.

2. Sin-o ang nalakip sa “mga dulot nga mga lalaki” nga ginsambit sa Efeso 4:​7, 8?

² Binagbinaga ang isa pa ka regalo ni Jesus sa aton. Nagsulat si apostol Pablo nga sang nagsaka si Jesus sa langit, “naghatag sia sing mga dulot nga mga lalaki.” (Basaha ang Efeso 4:​7, 8.) Ginpaathag ni Pablo nga ginhatag ni Jesus ini nga mga dulot para buligan ang kongregasyon. (Efe. 1:​22, 23; 4:​11-13) Subong, nalakip sa “mga dulot nga mga lalaki” ang mga ministeryal nga alagad, mga gulang sa kongregasyon, kag mga circuit overseer. a Siempre, indi perpekto ini nga mga lalaki, gani makahimo sila sang mga sala. (Sant. 3:2) Pero ginagamit sila sang aton Ginuo nga si Jesucristo para buligan kita, kag regalo niya sila sa aton.

3. Paano naton tanan masuportahan ang hilikuton sang “mga dulot nga mga lalaki”? Maghatag sing ilustrasyon.

³ Ginhatagan ni Jesus ining “mga dulot nga mga lalaki” sang importante  nga hilikuton nga amo ang pabakuron ang kongregasyon. (Efe. 4:12) Pero makabulig kita tanan para mahimo nila ining importante nga responsibilidad. Binagbinaga ini nga ilustrasyon: Ibutang ta nga may ginapatindog nga Kingdom Hall. May iban nga sila gid ang nagaobra sa konstruksion sang Kingdom Hall. Pero nagabulig man ang iban sa sini nga hilikuton paagi sa pagluto sang pagkaon, pagsugat kag pagdul-ong, kag iban pa. Sing kaanggid, puede kita tanan makabulig sa mga ministeryal, mga gulang, kag mga circuit overseer paagi sa aton ginasiling kag ginahimo. Binagbinagon naton kon paano kita nagabenepisyo sa ila mga pagpangabudlay. Binagbinagon man naton kon paano naton mapakita ang aton apresasyon sa ila, kag ang aton apresasyon kay Jesus nga naghatag sa aton sining “mga dulot nga mga lalaki.”

ANG MGA MINISTERYAL “NAGABULIG SA NAGAKINAHANGLAN”

4. Sang unang siglo, ano ang pila sa mga ginhimo sang mga ministeryal para buligan ang iban?

⁴ Sang unang siglo, gintangdo ang pila ka utod nga lalaki bilang mga ministeryal nga alagad. (1 Tim. 3:8) Posible nga sila ang “mga nagabulig sa nagakinahanglan” nga ginsambit ni Pablo sa iya sulat. (1 Cor. 12:28) Ginhimo sang mga ministeryal ang madamo nga importante nga mga hilikuton para makapokus ang mga gulang sa pagtudlo kag pag-shepherding. Halimbawa, posible nga nagbulig ang mga ministeryal sa pagkopya sang Kasulatan, ukon posible nga sila ang nagbakal sang mga butang nga kinahanglan sa pagkopya sini.

5. Subong, ano ang pila sa mga ginahimo sang mga ministeryal para buligan ang iban?

⁵ Binagbinaga ang pila sa mga ginahimo sang mga ministeryal sa inyo kongregasyon. (1 Ped. 4:10) Posible nga iasayn sila nga mag-asikaso sang accounts ukon teritoryo sang kongregasyon, mag-order sang mga publikasyon para sa mga kauturan, mag-operate sang mga gamit sa audio kag video, mangin atendant, ukon magbulig sa pagmentinar sang Kingdom Hall. Importante ini tanan nga mga hilikuton para maorganisar sing maayo ang kongregasyon. (1 Cor. 14:40) Magluwas sa sini, may pila ka ministeryal nga ginahatagan man sang bahin sa Pagkabuhi kag Pagministeryo nga Miting kag ginaasayn nga mag-public talk. Puede man itangdo ang isa ka ministeryal bilang assistant sang group overseer. May mga tion man nga ginaupod sang mga gulang ang kalipikado nga mga ministeryal sa ila pag-shepherding.

6. Ano ang pila ka rason kon ngaa ginaapresyar gid naton ang aton mapisan nga mga ministeryal?

⁶ Paano nagabenepisyo ang kongregasyon sa mga ginahimo sang mga ministeryal? Ang isa ka sister sa Bolivia nga si Beberly b nagsiling: “Nagapasalamat gid ako sa amon mga ministeryal kay nagabenepisyo gid ako sa mga miting.” Nagsiling pa sia: “Bangod sa ila mga ginahimo, makakanta ako, makakomento, makapamati sa mga bahin, kag makatuon ako sa mga video kag mga piktyur. Ginasigurado nila nga safe ang tanan nga naga-attend kag makapamati sing maayo ang mga nakakonek sa videoconference. Pagkatapos sang miting, nagabulig sila sa pagpaninlo, sa pag-asikaso sang accounts, kag sa pagpanghatag sang mga publikasyon. Nagapasalamat gid ako sa ila.” Si Leslie nga taga-Colombia, nga asawa sang isa ka gulang, nagsiling: “Nagapabulig ang akon bana sa mga ministeryal sa paghimo sang pila ka hilikuton. Kon wala ang mga ministeryal, posible nga grabe pa gid kasako ang akon bana. Gani, nagapasalamat gid ako sa ila kay mapisan sila kag handa gid magbulig.” Sigurado gid nga amo man sini ang imo ginabatyag.​—1 Tim. 3:13.

7. Paano naton mapakita ang aton apresasyon sa mga ministeryal? (Tan-awa man ang piktyur.)

⁷ Naapresyar gid naton ang mga ministeryal. Pero ang Biblia nagasiling: “Ipakita nga mapinasalamaton kamo.” (Col. 3:15) Paano ginapakita sang isa ka gulang sa Finland nga si Krzysztof ang iya apresasyon? Nagsiling sia: “Nagapadala ako  sang card ukon text sa isa ka ministeryal. Naga-share ako sang teksto kag ginasambit ko kon ano ang ginhimo niya nga nagpalig-on sa akon kag kon ngaa nagapasalamat gid ako sa iya.” Ginapangamuyo naman ni Pascal kag ni Jael, nga taga-New Caledonia, ang mga ministeryal. Nagsiling si Pascal, “Pirme namon ginapangamuyo ang amon mga ministeryal para pasalamatan si Jehova kag pangabayon sia nga buligan sila.” Ginapamatian ni Jehova ini nga mga pangamuyo, gani nagabenepisyo ang bilog nga kongregasyon.​—2 Cor. 1:11.

ANG MGA GULANG “NAGAPANGABUDLAY SING LAKAS PARA SA INYO”

8. Sang unang siglo, ngaa nagsiling si Pablo nga ang mga gulang “nagapangabudlay sing lakas”? (1 Tesalonica 5:​12, 13)

⁸ Sang unang siglo, nagpangabudlay gid ang mga gulang para sa kongregasyon. (Basaha ang 1 Tesalonica 5:​12, 13; 1 Tim. 5:17) “Nagadumala” sila sa kongregasyon paagi sa pagdumala sa mga miting kag paghimo sang mga desisyon bilang hubon sang mga gulang. “Nagalaygay” man sila sa mga kauturan, kag ginahimo nila ini sa mahigugmaon nga paagi para maamligan ang kongregasyon. (1 Tes. 2:​11, 12; 2 Tim. 4:2) Siempre, nagapangabudlay man ang mga gulang para maamanan nila ang ila mga pamilya kag para mangin mabakod pirme ang ila kaangtanan kay Jehova.​—1 Tim. 3:​2, 4; Tito 1:​6-9.

9. Subong, ano ang pila ka responsibilidad sang mga gulang?

⁹ Sa aton tion subong, masako man ang mga gulang. Halimbawa, nagaalagad sila bilang mga ebanghelisador. (2 Tim. 4:5) Mapisan nila nga ginapangunahan ang pagministeryo nga hilikuton, ginaorganisar nila ang pagbantala sa teritoryo sang kongregasyon, kag ginahanas nila kita kon paano mangin epektibo sa aton pagbantala kag pagtudlo nga hilikuton. Nagaalagad man sila bilang maluluy-on nga mga hukom, kag wala sila sing ginapasulabi. Kon nakahimo sang serioso nga sala ang isa ka utod, ginapanikasugan nila nga buligan sia nga makay-o ang iya kaangtanan kay Jehova. Kag ginapanikasugan man nila nga mangin matinlo pirme ang kongregasyon. (1 Cor. 5:​12, 13; Gal. 6:1) Labaw sa tanan, nagaalagad ang mga gulang bilang mga manugbantay. (1 Ped. 5:​1-3) Nagapanikasog gid sila para mahatag nila sing maayo ang ila mga bahin nga nabase sa Biblia, para makilala nila ang tanan sa kongregasyon, kag para ma-shepherding nila ang mga kauturan. Magluwas sa madamo nila nga mga asaynment, nagabulig man ang iban nga mga gulang sa konstruksion kag pagmentinar sang Kingdom Hall, sa pag-organisar sang kombension, kag sa mga hilikuton sang Hospital Liaison Committee kag Patient Visitation Group. Nagapangabudlay gid ang mga gulang para sa aton.

10. Ano ang pila ka rason kon ngaa ginaapresyar naton ang aton mapisan nga mga gulang?

¹⁰ Gintagna ni Jehova nga atipanon gid kita sing maayo sang mga manugbantay kag ‘indi na kita mahadlok ukon makugmat.’ (Jer. 23:4) Naeksperiensiahan ini ni Johanna, nga isa ka sister sa Finland, sang nagmasakit sing grabe ang iya iloy. Nagsiling sia: “Nabudlayan ako nga isugid sa iban ang akon ginabatyag. Pero may isa ka gulang nga indi ko masyado kilala nga mapinasensiahon nga nagpamati sa akon, nangamuyo sia upod sa akon, kag ginpasalig niya sa akon nga palangga ako ni Jehova. Indi ko na madumduman kon ano gid ang iya ginsiling, pero madumduman ko nga nagtawhay ang akon hunahuna sadto nga tion. Nagapati ako nga ginpadala sia ni Jehova para buligan ako sa tion nga kinahanglan ko gid ini.” Sa imo bahin, paano ka ginbuligan sang mga gulang sa inyo kongregasyon?

11. Paano naton mapakita ang aton apresasyon sa mga gulang? (Tan-awa man ang piktyur.)

¹¹ Gusto ni Jehova nga ipakita naton ang aton tinagipusuon nga apresasyon sa mga gulang “bangod sa ila buluhaton.” (1 Tes. 5:​12, 13) Si Henrietta, nga taga-Finland man, nagsiling: “Handa gid pirme magbulig ang mga gulang. Pero indi buot silingon sini nga mas madamo sila sang tion kag kusog kon ikumparar sa iban, ukon wala sila  sing mga problema sa ila kabuhi. Kon kaisa, ginasilingan ko sila, ‘Gusto ko mabal-an mo Brod nga maayo ka gid nga gulang.’” Ang isa ka sister sa Türkiye c nga si Sera nagsiling: “Kinahanglan sang mga gulang ang pagpalig-on para padayon nila nga mahimo ang ila mga hilikuton. Gani puede naton sila hatagan sang card, agdahon sa pagkaon, ukon updan sila sa pagbantala.” May gulang bala sa inyo kongregasyon nga gusto mo gid pasalamatan bangod sa iya mga pagpangabudlay? Ipakita sa iya nga ginaapresyar mo sia.​—1 Cor. 16:18.

GINAPABAKOD KITA SANG MGA CIRCUIT OVERSEER

12. Sang unang siglo, ano pa ang ginhatag ni Jesus para pabakuron ang mga kongregasyon? (1 Tesalonica 2:​7, 8)

¹² May ginhatag man si Cristo Jesus nga “mga dulot nga mga lalaki” para pabakuron ang kongregasyon sa lain naman nga paagi. Gingamit niya ang mga gulang sa Jerusalem para ipadala si Pablo, si Bernabe, kag ang iban pa bilang nagalakbay nga mga manugtatap. (Binu. 11:22) Ngaa? Pareho man sa rason kon ngaa may gintangdo nga mga ministeryal kag mga gulang, nga amo ang pabakuron ang mga kongregasyon. (Binu. 15:​40, 41) Nagsakripisyo ini nga mga utod kag ginrisgo pa gani nila ang ila kabuhi para matudluan nila kag mapalig-on ang iban.​—Basaha ang 1 Tesalonica 2:​7, 8.

13. Ano ang pila ka responsibilidad sang mga circuit overseer?

¹³ Pirme nagabiyahe ang mga circuit overseer. Ang iban sa ila nagabiyahe sing ginatos ka kilometro para mabisitahan nila ang mga kongregasyon. Kada semana, nagahatag sang madamo nga pamulongpulong ang isa ka circuit overseer kag naga-shepherding sia sa mga kauturan. Nagadumala man sia sang miting upod sa mga payunir, sang miting upod sa mga gulang, kag sang mga  miting sa pag-alagad sa latagon. Nagahanda sia sang mga pamulongpulong para sa mga sirkito nga mga asembleya kag mga kombension, kag ginaorganisar niya ini nga mga pagtililipon. Nagatudlo sia sa eskwelahan para sa mga payunir, kag ginaorganisar niya ang pinasahi nga miting upod sa mga payunir sa iya sirkito. Magluwas sa sini tanan, may mga ginapahimo man sa iya ang branch office nga ginadalian kon kaisa.

14. Ano ang pila ka rason kon ngaa ginaapresyar naton ang aton mapisan nga mga circuit overseer?

¹⁴ Paano nagabenepisyo ang mga kongregasyon sa ginahimo sang mga circuit overseer? Parte sa mga pagbisita nga ginahimo sang mga circuit overseer, ang isa ka brother sa Türkiye nagsiling: “Kada bisita sang circuit overseer sa amon kongregasyon, pirme ako mapalig-on nga dugangan ang akon tion sa pagbulig sa mga kauturan. Madamo na ako sing nakilala nga mga circuit overseer, kag wala gid sing bisan isa sa ila ang nagpabatyag sa akon nga indi sia puede istoryahon ukon masako sia.” Sa bahin ni Johanna, nga ginsambit kaina, nakaupod niya ang circuit overseer sa pagbantala, pero wala gid sila sing naistorya. “Pero,” siling niya, “indi ko gid ’to malipatan nga adlaw. Bag-o lang sadto nagsaylo sa iban nga lugar ang akon duha ka magulang nga babayi, gani nahidlaw gid ako sa ila. Ginbuligan ako sang circuit overseer nga marealisar nga may mga tion gid nga posible mapalayo kita sa aton mga pamilya kag mga abyan. Pero basta padayon kita nga nagaalagad kay Jehova, makaupod naton sila sing wala sing katapusan sa bag-ong kalibutan.” Madamo sa aton ang may makalilipay man nga mga eksperiensia upod sa aton mga circuit overseer.​—Binu. 20:37–21:1.

15. (a) Base sa 3 Juan 5-8, paano naton mapakita ang aton apresasyon sa mga circuit overseer? (Tan-awa man ang piktyur.) (b) Ngaa dapat naton ipakita ang aton apresasyon sa mga asawa sang mga brother nga nagapangabudlay sa kongregasyon, kag paano naton ini mahimo? (Tan-awa ang kahon nga “ Dumduma ang Ila mga Asawa.”)

¹⁵ Ginpalig-on ni apostol Juan si Gayo nga abiabihon  niya ang nagbisita nga mga kauturan kag ‘buligan sila sa paagi nga makapahalipay sa Dios.’ (Basaha ang 3 Juan 5-8.) Ang isa ka paagi para mahimo naton ini amo ang pag-agda sa circuit overseer sa pagkaon. Ang isa pa ka paagi amo ang pagbantala sa tion sang iya bisita. Ginapakita ni Leslie, nga ginsambit kaina, ang iya apresasyon sa iban pa nga paagi. “Nagapangamuyo ako kay Jehova nga kabay pa nga hatagan niya sila sang ila mga kinahanglanon,” siling niya. “Ginasulatan man namon sila sang akon bana para ipabalo sa ila nga nakabulig gid sa amon ang ila pagbisita.” Dumdumon naton nga ginakapoy man ang mga circuit overseer. May mga tion man nga nagamasakit sila, nabalaka, kag naluyahan sang buot. Gani posible nga ang aton makapalig-on nga ginasiling sa ila ukon ang aton simple nga regalo sa ila amo ang sabat sa ila mga pangamuyo.​—Hulu. 12:25.

KINAHANGLAN NATON ANG “MGA DULOT NGA MGA LALAKI”

16. Base sa Hulubaton 3:​27, ano ang puede ipamangkot sang mga brother sa ila kaugalingon?

¹⁶ Sa bilog nga kalibutan, kinahanglan naton sang madamo nga mga brother para mag-alagad bilang “mga dulot nga mga lalaki.” Kon isa ikaw ka bawtismado nga brother, ‘masarangan mo bala ang pagbulig’ sa sini nga paagi? (Basaha ang Hulubaton 3:27.) Nagapanikasog ka bala nga mangin isa ka ministeryal nga alagad? Kon isa na ikaw ka ministeryal, nagapanikasog ka bala nga mangin isa ka gulang para mag-alagad sa imo mga kauturan? d Makahimo ka bala sang mga pagbag-o para makaeskwela ka sa School for Kingdom Evangelizers? Hanason ka sa sini nga eskwelahan para mas magamit ka pa gid ni Jesus. Kon nagabatyag ka nga indi mo masarangan ini nga mga pribilehiyo, mangamuyo kay Jehova. Pangabaya sia nga buligan ka sang iya balaan nga espiritu para mahimo mo sing maayo ang mga asaynment nga ginhatag sa imo.​—Luc. 11:13; Binu. 20:28.

17. Ano ang ginapamatud-an sang “mga dulot nga mga lalaki” parte sa aton Hari nga si Cristo Jesus?

¹⁷ Ang pagpangabudlay sang mga gintangdo ni Jesus bilang “mga dulot nga mga lalaki” nagapamatuod nga ginapangunahan niya kita sa sining katapusan nga mga adlaw. (Mat. 28:20) Nagapasalamat gid kita sa aton mahigugmaon kag maalwan nga Hari. Kabalo gid sia sang aton mga kinahanglanon, gani ginhatagan niya kita sang mga brother nga magabulig sa aton. Gani ipakita ang imo apresasyon sa sining mapisan nga mga lalaki. Kag indi pagkalimti nga pasalamatan si Jehova, bangod sia ang ginahalinan sang “tagsa ka maayo nga dulot kag tagsa ka himpit nga regalo.”​—Sant. 1:17.