IMPORTANTE gid ang musika sa kultura sang Israel sang una. Madamo kita sing mabasa sa Biblia parte sa mga tawo nga nagatokar sang mga instrumento kag nagakanta sang mga ambahanon. Ang matuod, daku nga bahin sang Biblia ang ambahanon. Ang halimbawa sa sini amo ang Salmo, Ambahanon ni Solomon, kag Panalambiton. Suno sa libro nga Music in Biblical Life, ginapakita sang Biblia nga importante gid ang musika sa madamo nga mga hilikuton sang mga Israelinhon.

Ang musika sa adlaw-adlaw nga pagkabuhi sang mga Israelinhon. Nagatokar sang mga instrumento kag nagakanta sang mga ambahanon ang mga Israelinhon para ipabutyag ang ila nabatyagan. (Isa. 30:29) Halimbawa, kon may gintangdo nga bag-o nga hari, kon nagdaug ang mga soldado sa inaway, kag kon tion sang kapiestahan, nagatokar sang mga tamburin ang mga babayi samtang nagakanta sila kag nagasaot. (Huk. 11:34; 1 Sam. 18:​6, 7; 1 Hari 1:​39, 40) Kon may mapatay nga Israelinhon, nagakanta sila sang mga panalambiton para ipabutyag ang ila kasubo. (2 Cron. 35:25) Ang McClintock and Strong’s Cyclopedia nagsiling nga “nanamian gid sa musika ang mga Hebreo.”

Ang musika sa kabuhi sang mga hari. Nanamian man magpamati sang musika ang mga hari sang Israel. Halimbawa, ginpatawag ni Hari Saul sa iya palasyo si David para magtokar sang arpa. (1 Sam. 16:​18, 23) Sang nangin hari si David, naghimo sia sang mga instrumento sa musika, nagkomposo sia sang manami nga mga kanta, kag nag-organisar sia sang orkestra para magtokar sa templo ni Jehova. (2 Cron. 7:6; Amos 6:5) Sa bahin naman ni Hari Solomon, may mga lalaki kag mga babayi nga mga manug-amba sa iya palasyo.​—Man. 2:8.

Ang musika sa pagsimba sang mga Israelinhon. Para sa mga Israelinhon, importante gid ang musika sa ila pagsimba kay Jehova. Ang matuod, 4,000 gid ang mga nagtokar sang instrumento sa templo sa Jerusalem. (1 Cron. 23:5) Nagtokar sila sing mga simbal, de-kuerdas nga mga instrumento, mga arpa, kag mga trumpeta. (2 Cron. 5:12) Pero indi lang ang mga kabalo magtokar sini nga mga instrumento ang nagadayaw kay Jehova. Madamo man nga mga Israelinhon ang nagakanta samtang nagapakadto sila sa Jerusalem para saulugon ang mga kapiestahan didto, kag ginakanta nila ang Ambahanon sang mga Nagataklad. (Sal. 120-134) Kag suno sa sinulatan sang mga Judiyo, ginakanta sang mga Israelinhon ang pila ka mga ambahanon sa Salmo a sa tion sang panihapon sa Paskua.

Importante man ang musika sa mga alagad sang Dios subong. (Sant. 5:13) Kay man, bahin sang aton pagsimba kay Jehova ang pagkanta sang mga ambahanon. (Efe. 5:19) Nagasuod man kita sa aton mga kauturan kon nagakanta kita upod sa ila. (Col. 3:16) Kag kon may mga problema kita, nagapabakod sa aton ang mga musika parte sa aton pag-alagad kay Jehova. (Binu. 16:25) Paagi sa musika, mapakita naton ang aton pagtuo kay Jehova kag mapabutyag naton sa iya nga palangga naton sia.