1, 2. (a) Paano naton nahibaluan nga ang mga tawo puede mangin abyan sang Dios? (b) Ano ang binagbinagon naton sa sini nga artikulo?

KINAHANGLAN gid naton ang gugma sa bug-os naton nga kabuhi. Ginahandum sang tawo ang gugma, kag wala lamang ini nagapatuhoy sa romantiko nga gugma. Gusto gid naton magpakig-abyan kag mangin suod sa iban. Pero may isa ka sahi sang gugma nga kinahanglan gid naton—ang gugma ni Jehova. Madamo ang daw indi makapati nga ang mga tawo puede mangin suod nga abyan sang Labing Gamhanan nga Dios, nga indi makita nga Espiritu sa langit. Amo man bala sina ang aton ginahunahuna? Indi!

² Ginapakita sang Biblia nga ang indi himpit nga mga tawo nangin abyan sang Dios. Takus binagbinagon ang ila mga halimbawa, kay ini nga pagpakig-abyan amo ang pinakamapuslanon nga tulumuron nga aton mahimo. Ang isa ka maayo gid nga halimbawa sa sini nga pagpakig-abyan amo si Abraham. (Basaha ang Santiago 2:23.) Paano nangin suod si Abraham kay Jehova? Ang panguna nga nakabulig sa sini nga pag-abyanay amo ang pagtuo. Ang  matuod, gintawag sang Biblia si Abraham nga ‘amay sang tanan nga may pagtuo.’ (Roma 4:11) Binagbinagon naton kon paano ang pagtuo ni Abraham nakabulig sa iya nga mangin suod nga abyan sang Dios. Dapat man kita mamangkot, ‘Paano ko mailog ang pagtuo ni Abraham kag mapabakod ang akon pagpakig-abyan kay Jehova?’

3, 4. (a) Ilaragway ang mahimo pinakamabudlay nga pagtilaw sa pagtuo ni Abraham. (b) Ngaa handa si Abraham nga ihalad si Isaac?

³ Imadyina ang isa ka tigulang nga nagataklad sa bukid. Mahimo nga amo ini ang iya pinakamabudlay nga paglakbay, pero indi ini bangod sa iya edad. Kay bisan mga 125 anyos na si Abraham, mabakod gihapon sia. ^[1] Nagasunod sa iya ang isa ka pamatan-on, nga mga 25 anyos. Sia si Isaac nga iya anak, nga nagapas-an sang inuggatong. Si Abraham may dala nga sundang kag inugsindi. Ginpangabay sia ni Jehova nga ihalad ang iya anak!—Gen. 22:1-8.

⁴ Mahimo nga amo ini ang pinakamabudlay nga pagtilaw sa pagtuo ni Abraham. May mga nagasiling nga mapintas kuno ang Dios bangod sang iya ginpangabay kay Abraham, kag ang iban nagasiling nga nagtuman lang si Abraham nga wala nagapamensar kag wala sia sing kaluoy. Amo ini ang ila pagpati kay wala sila sang pagtuo kag wala nila nahangpan kon ano ini. (1 Cor. 2:14-16) Nakahibalo si Abraham sang iya ginahimo. Nagtuman sia bangod sang iya matuod nga pagtuo. Nahangpan niya nga ang iya Amay sa langit nga si Jehova indi gid magpahimo sa Iya matutom nga mga alagad sang butang nga makahalit sa ila. Nahibaluan ni Abraham nga kon tumanon niya si Jehova nga iya Dios, pakamaayuhon sia kag ang iya pinalangga nga anak. Sa ano nabase ini nga pagtuo? Sa ihibalo kag eksperiensia.

5. Paano mahimo nakilala ni Abraham si Jehova, kag ano ang epekto sa iya sang ihibalo parte kay Jehova?

⁵ Ihibalo. Nagdaku si Abraham sa Ur, nga isa ka siudad sa Caldea nga madamo ang nagasimba sa diosdios, lakip ang iya amay nga si Tera. Gani paano niya nakilala si Jehova? (Jos. 24:2) Wala ini espesipiko nga ginasabat sang Biblia, pero ginasugid sini nga si Abraham ikasiam nga henerasyon halin kay Sem, nga isa sa mga anak ni Noe kag may mabakod nga pagtuo. Napatay si Sem sang mga 150 anyos si Abraham. Indi naton mapat-od kon bala si Sem ang nagtudlo kay Abraham parte kay Jehova. Pero, makasiling kita nga gintudlo ni Sem sa iya pamilya ang nahibaluan niya parte kay Jehova. Kag mahimo nga ini nga ihibalo nakalab-ot kay Abraham kag natandog ang iya tagipusuon. Gani ginhigugma niya ang Dios nga nakilala niya, kag ini nga ihibalo nakabulig sa iya nga magtuo.

6, 7. Paano ang mga eksperiensia ni Abraham nagpabakod sang iya pagtuo?

⁶ Eksperiensia. Paano nakatigayon si Abraham sang eksperiensia nga nagpabakod sang iya pagtuo kay Jehova? Ginapatihan nga ang panghunahuna nagaapektar sa balatyagon kag ang balatyagon nagaresulta sa buhat. Bangod sang natun-an ni Abraham parte sa Dios, nagbatyag sia sing tudok nga kahadlok kag tinagipusuon nga pagtahod kay “Jehova nga Labing Mataas nga Dios, ang Manunuga sang langit kag sang duta.” (Gen. 14:22) Ini nga balatyagon gintawag sa Biblia nga “kahadlok sa Dios,” kag importante ini para mangin suod nga abyan sang Dios. (Heb. 5:7; Sal. 25:14) Ini nga kahadlok sa Dios amo ang nagbulig kay Abraham nga magtuman.

⁷ Ginsugo sang Dios ang tigulang nga sanday Abraham kag Sara nga magbiya sa Ur kag magkadto sa iban nga lugar. Magaistar sila sa mga tolda sa bug-os nila nga kabuhi. Bangod nagtuman si Abraham, ginpakamaayo sia ni Jehova kag gin-amligan. Halimbawa, nahadlok si Abraham nga basi patyon sia kag  kuhaon sa iya ang iya matahom nga asawa nga si Sara. May basihan ang iya kahadlok, pero wala ini magpugong sa iya nga tumanon si Jehova. Pila ka beses nga gin-amligan ni Jehova sanday Abraham kag Sara paagi sa milagro. (Gen. 12:10-20; 20:2-7, 10-12, 17, 18) Ini nga mga eksperiensia nagpabakod sa pagtuo ni Abraham.

8. Paano naton matigayon ang ihibalo kag eksperiensia nga magapabakod sang aton pagpakig-abyan kay Jehova?

⁸ Mahimo man bala naton mangin abyan si Jehova? Huo! Mahapos naton matigayon ang ihibalo kag eksperiensia nga kinahanglan naton. Diutay lang ang nahibaluan ni Abraham kon ipaanggid sa bugana nga kaalam nga makuha naton subong sa Biblia. (Dan. 12:4; Roma 11:33) Ang Pulong sang Dios puno sing bahandi nga makadugang sa aton ihibalo parte sa “Manunuga sang langit kag sang duta” nga magaresulta sa pagtahod kag gugma sa iya. Ini nga balatyagon magabulig sa aton nga tumanon ang Dios. Kon tumanon naton ang Dios, magahatag ini sa aton sang makapabakod nga mga eksperiensia. Maeksperiensiahan naton nga ang iya mga laygay nagaamlig sa aton kag ginapakamaayo niya kita kag ginapabakod. Matun-an naton nga ang bug-os tagipusuon nga pag-alagad sa Dios nagaresulta sa kaayawan, paghidait, kag kalipay. (Sal. 34:8; Hulu. 10:22) Samtang nagadamo ang aton ihibalo kag eksperiensia, magabakod ang aton pagtuo kay Jehova kag ang aton pagpakig-abyan sa iya.

9, 10. (a) Ano ang kinahanglan para magbakod ang pag-abyanay? (b) Paano ginpabaloran kag ginpabakod ni Abraham ang iya pagpakig-abyan kay Jehova?

⁹ Ang pag-abyanay isa ka hamili nga bahandi. (Basaha ang Hulubaton 17:17.) Pero, ang pag-abyanay indi pareho sa isa ka butang nga wala sing kabuhi nga puede naton baklon kag taguon lang kag payab-ukan. Ang pag-abyanay daw pareho sa buhi nga butang nga kinahanglan atipanon kag palambuon para magpadayon kag magbakod. Ginpabaloran kag ginpabakod ni Abraham ang iya pagpakig-abyan kay Jehova. Paano?

¹⁰ Wala gid ginhunahuna ni Abraham nga bastante na ang iya mga ginhimo sang una para ipakita nga matinumanon sia kag nahadlok sa Dios. Samtang nagalakbay sila sang iya daku nga pamilya pakadto sa Canaan, padayon sia nga nagpatuytoy kay Jehova sa paghimo sing mga desisyon, gamay man ini ukon daku. Isa ka tuig antes natawo si Isaac, sang 99 anyos si Abraham, ginpatuman ni Jehova nga tulion ang tanan nga lalaki sa panimalay ni Abraham. Ginkuestyon bala ni Abraham ini nga sugo ukon nagpamalibad bala sia sa pagtuman? Wala, nagsalig sia sa Dios kag nagtuman “sa sina mismo nga adlaw.”—Gen. 17:10-14, 23.

11. Ngaa nabalaka si Abraham nga laglagon ang Sodoma kag Gomorra, kag paano sia ginbuligan ni Jehova?

¹¹ Bangod pirme ginatuman ni Abraham si Jehova bisan sa gamay nga mga butang,  napabakod niya ang iya pagpakig-abyan sa Dios. Hilway niya nga mahambal ang iya ginabatyag kay Jehova, kag nagpabulig sia nga mahangpan ang iya mga ginakabalak-an. Halimbawa, sang nahibaluan niya nga laglagon sang Dios ang mga siudad sang Sodoma kag Gomorra, nabalaka si Abraham nga basi malaglag pati ang mga matarong. Ayhan nabalaka si Abraham sa iya hinablos nga si Lot kag sa pamilya sini nga nagaistar sadto sa Sodoma. Mapainubuson nga namangkot si Abraham kag nagsalig sia sa Dios nga “Hukom sang bug-os nga duta.” Mapinasensiahon nga gintudluan ni Jehova si Abraham parte sa Iya kaluoy bisan sa tion sang paghukom. Maluluy-on sia kay ginausisa niya ang tagsa ka tagipusuon kag ginapangita ang mga matarong para luwason.—Gen. 18:22-33.

12, 13. (a) Paano nakabulig sang ulihi kay Abraham ang iya ihibalo kag eksperiensia? (b) Paano ginpakita ni Abraham ang iya pagsalig kay Jehova?

¹² Pat-od gid nga ang tanan nga ihibalo kag eksperiensia ni Abraham nakabulig sa iya nga mapabakod ang iya suod nga pagpakig-abyan kay Jehova. Sang ulihi, sang ginpangabay sia ni Jehova nga ihalad ang iya anak nga si Isaac, nga isa ka mabudlay nga pagtilaw, ginpamalandungan ni Abraham kon ano nga sahi sang Persona ang iya Abyan sa langit. Balikan naton ang matutom nga tigulang nga nagataklad sa bukid sa duta sang Moria. Ginahunahuna bala niya nga hinali lang nga nangin mapintas kag wala sing kaluoy si Jehova? Wala gid ini ginhunahuna ni Abraham! Ngaa masiling naton ini?

¹³ Antes nila ginbiyaan ang mga alagad nga kaupod nila, nagsiling si Abraham: “Diri lang kamo anay upod sa asno, kay makadto kami sang akon anak didto sa unhan agod magsimba kag pagkatapos mabalik kami dayon.” (Gen. 22:5) Ano ang buot silingon ni Abraham? Nagbinutig bala si Abraham sa iya mga alagad, kay nagsiling sia nga mabalik si Isaac bisan pa nahibaluan niya nga ihalad si Isaac? Wala. Ginhatagan kita sang Biblia sang ideya kon ano ang ginhunahuna ni Abraham. (Basaha ang Hebreo 11:19.) “Nangatarungan [si Abraham] nga ang Dios makasarang sa pagbanhaw [kay Isaac] bisan gikan sa mga patay.” Huo, nagapati si Abraham sa pagkabanhaw. Nahibaluan niya nga ginbalik ni Jehova ang ila ikasarang ni Sara nga makabata bisan pa tigulang na sila. (Heb. 11:11, 12, 18) Narealisar ni Abraham nga wala sing imposible kay Jehova. Gani nagsalig sia nga bisan ano man ang matabo sadto nga adlaw, ang iya pinalangga nga anak ibalik sa iya para matuman ang tanan nga saad ni Jehova. Indi katingalahan nga gintawag si Abraham nga ‘amay sang tanan nga may pagtuo’!

14. Ano nga mga kabudlayan ang imo ginaatubang sa pag-alagad kay Jehova, kag paano makabulig sa imo ang halimbawa ni Abraham?

¹⁴ Kamusta kita? Matuod, indi na pareho sini ang ginapangabay sa aton sang Dios. Pero ginapangabay niya nga tumanon naton ang iya mga sugo bisan pa nabudlayan kita ukon bisan pa indi naton mahangpan kon ngaa ginasugo niya ini. May ginahunahuna  ka bala nga sugo sang Dios nga nabudlayan ka nga himuon? Ang iban nabudlayan sa pagbantala. Mahimo nga mahuluy-on sila amo nga nabudlayan sila sa pagsugid sang maayong balita sa mga indi nila kilala. Ang iban naman nabudlayan nga mangin tuhay, ayhan sa eskwelahan ukon sa ulubrahan. (Ex. 23:2; 1 Tes. 2:2) Nabatyagan mo man bala ang ginbatyag ni Abraham, nga daw nagataklad ka man sa bukid sa Moria, kay sa banta mo indi mo masarangan ang imo asaynment? Kon huo, mapalig-on ka sa halimbawa ni Abraham kag sa iya pagtuo! Ang pagpamalandong sa mga halimbawa sang matutom nga mga lalaki kag babayi makabulig sa aton nga ilugon sila kag mangin suod kay Jehova bilang aton Abyan.—Heb. 12:1, 2.

15. Ngaa sigurado kita nga wala ginhinulsulan ni Abraham ang iya katutom kag pagtuman kay Jehova?

¹⁵ Sa banta mo, ginhinulsulan bala ni Abraham ang iya katutom kag pagtuman kay Jehova? Talupangda ang ginsiling sang Biblia sang napatay sia: “Napatay si Abraham sa tapos magkabuhi sing maayo kag malawig, tigulang kag kontento.” (Gen. 25:8) Sang 175 anyos si Abraham, maluya na sia, pero malipayon sia kag kontento sa ginhimo niya sa iya kabuhi. Ang iya bug-os nga kabuhi nasentro sa iya pagpakig-abyan kay Jehova nga Dios. Pero, bisan pa ginsiling nga “tigulang kag kontento” si Abraham, wala ini nagakahulugan nga para sa iya amo na ini ang pinakamaayo nga kabuhi kag wala na sia nagahandum nga mabuhi sa palaabuton.

16. Ngaa malipay si Abraham sa Paraiso?

¹⁶ Nagasiling ang Biblia parte kay Abraham: “Ginahulat niya ang siudad nga may matuod nga mga sadsaran, nga ang nagdesinyo kag manunukod amo ang Dios.” (Heb. 11:10) Nagatuo si Abraham nga makita niya ini nga siudad, nga amo ang Ginharian sang Dios, nga magagahom sa bug-os nga duta—kag pat-od nga makita niya ini! Maimadyin mo bala ang kalangkag ni Abraham nga magkabuhi sa Paraiso sa duta kag padayon nga pabakuron ang iya pagpakig-abyan kay Jehova? Pat-od gid nga malipay sia nga mahibaluan nga ang iya ginpakita nga pagtuo nakabulig sa mga alagad ni Jehova sa sulod sang linibo ka tuig sa tapos sia mapatay. Sa Paraiso, mahibaluan niya nga ang pagbalik sa iya kay Isaac ‘naglaragway’ sa mas daku pa nga butang. (Heb. 11:19) Kag mahibaluan niya nga ang kasakit nga ginbatyag niya samtang ginahanda niya nga ihalad si Isaac nakabulig sa minilyon ka matutom nga katawhan nga mahangpan ang kasakit nga ginbatyag ni Jehova sang ginhatag niya bilang gawad ang iya Anak nga si Jesucristo. (Juan 3:16) Ang halimbawa ni Abraham nakabulig sa aton tanan nga apresyahon pa gid ang gawad, ang pinakadaku nga buhat bangod sang gugma sa bug-os nga kasaysayan!

17. Ano ang imo determinasyon, kag ano ang binagbinagon naton sa masunod nga artikulo?

¹⁷ Kabay pa nga mangin determinado kita tanan nga ilugon ang pagtuo ni Abraham. Samtang ginakilala pa gid naton si Jehova, mangin matutom pa gid kita sa iya kag makatigayon kita sing madamo nga eksperiensia kay ginapadyaan niya ang aton katutom. (Basaha ang Hebreo 6:10-12.) Kabay pa nga mangin Abyan naton si Jehova sing dayon! Sa masunod nga artikulo, binagbinagon naton ang tatlo pa ka halimbawa sang mga matutom nga nangin suod nga mga abyan sang Dios.