1-3. (a) Paano naton mapat-od nga puede kita mangin abyan sang Dios? (b) Ano ang binagbinagon naton sa sini nga artikulo?

TATLO ka beses nga ginsambit sang Biblia nga si Abraham abyan sang Dios. (2 Cron. 20:7; Isa. 41:8; Sant. 2:23) Ang matuod, ining matutom nga lalaki amo lang ang ginsambit sing subong sini sa Biblia. Buot bala silingon nga si Abraham lang ang tawo nga nangin abyan ni Jehova? Indi, kay ginapakita sang Biblia nga puede kita tanan mangin abyan sang Dios.

² Ang Pulong sang Dios madamo sing kasaysayan sang matutom nga mga lalaki kag babayi nga may kahadlok kay Jehova, nagtuo sa iya, kag nangin suod niya nga mga abyan. (Basaha ang Salmo 25:14.) Nagsulat si apostol Pablo parte sa “tuman kadaku nga panganod sang mga saksi,” nga pat-od gid nga mga abyan sang Dios. (Heb. 12:1) Madamo kita sing matun-an sa sining sarisari nga mga indibiduwal.

³ Binagbinagon naton ang tatlo ka suod nga abyan ni Jehova nga ginlaragway sa inspirado nga rekord: (1) si Rut, ang mainunungon nga lamharon nga balo nga taga-Moab; (2) si Ezequias, ang matarong nga hari sang Juda; kag (3) si Maria, ang mapainubuson nga iloy ni Jesus. Paano sila nangin abyan sang Dios, kag ano ang matun-an naton sa sini?

4, 5. Ano nga desisyon ang kinahanglan himuon ni Rut, kag ngaa mabudlay ini? (Tan-awa ang piktyur sa umpisa sini nga artikulo.)

⁴ Imadyina ang tatlo ka balo, ang ila mga bayo ginapalidpalid sang hangin samtang nagalakat sila sa dalan sa kapatagan sang Moab. Sila amo si Noemi kag ang iya mga umagad nga sanday Rut kag Orpa. Naglakat na si Orpa kay ginpakamaayo niya nga magbalik sa Moab. Determinado si Noemi nga magbalik sa Israel, ang iya duta nga natawhan. Kaupod niya si Rut nga kinahanglan maghimo sang pinakaimportante nga desisyon sa iya kabuhi. Mabalik bala sia sa iya katawhan sa Moab, ukon maupod sia sa iya ugangan nga si Noemi pakadto sa Betlehem?—Rut 1:1-8, 14.

⁵ Puede tani irason ni Rut, nga isa ka lamharon nga balo, nga mabalik na lang sia sa Moab kay didto ang iya iloy kag mga paryente nga makaatipan sa iya. Ang Moab amo ang iya duta nga natawhan. Amo ini ang iya kultura, lenguahe, kag katawhan. Indi mapasalig ni Noemi nga mangin amo man sini ang iya kahimtangan sa Betlehem. Ginlaygayan pa gani niya si Rut nga magpabilin na lang sa Moab. Nabalaka si Noemi nga basi indi makapamana ang iya mga umagad kag wala sila sing maistaran sa Betlehem. Ano ang himuon ni Rut? Si Orpa ‘nagbalik sa iya katawhan kag sa iya mga dios.’ (Rut 1:9-15) Mabalik man bala si Rut sa butig nga mga dios sang iya katawhan? Indi.

6. (a) Ano nga maayo nga desisyon ang ginhimo ni Rut? (b) Ngaa nakasiling si Boaz nga nagdangop si Rut sa idalom sang mga pakpak ni Jehova?

⁶ Mahimo gid nga nakilala ni Rut si Jehova nga Dios paagi sa iya bana ukon paagi kay Noemi. Si Jehova indi pareho sa mga dios sang Moab. Natun-an ni Rut nga si Jehova takus higugmaon kag simbahon. Pero indi bastante nga kilala lang niya si Jehova. Kinahanglan ni Rut maghimo sang desisyon. Si Jehova bala ang pilion niya nga Dios? Maayo nga desisyon ang ginhimo ni Rut. “Ang imo katawhan mangin akon katawhan,” siling niya kay Noemi, “kag ang imo Dios mangin akon Dios.” (Rut 1:16) Dalayawon ang gugma ni Rut kay Noemi, pero mas dalayawon ang gugma niya kay Jehova. Sang ulihi, gindayaw si Rut sang tag-iya sang uma nga si Boaz bangod nagdangop sia sa idalom sang mga pakpak ni Jehova. (Basaha ang Rut 2:12.) Ginapahanumdom sini sa aton ang isa ka boto sang pispis nga nagapanago sa idalom sang mga pakpak sang inang para maamligan ini. (Sal. 36:7; 91:1-4) Amo man sini ang pag-amlig ni Jehova kay Rut. Ginpadyaan niya ang iya pagtuo, kag wala gid naghinulsol si Rut sa iya desisyon.

7. Ano ang makabulig sa mga nagapangalag-ag nga magdedikar kay Jehova?

⁷ Madamo ang nakatuon parte kay Jehova pero nagapangalag-ag sila nga magdangop sa iya, kag mangin dedikado kag bawtismado nga mga alagad niya. Kon daw indi ka makadesisyon nga magdedikar kay Jehova, napamangkot mo na bala ang imo kaugalingon kon ngaa? Ang kada isa may ginasimba gid nga dios. (Jos. 24:15) Indi bala mas maayo nga pilion naton ang Dios nga amo lamang ang takus simbahon kag dangpan? Ang pagdedikar kay Jehova isa ka maayo gid nga paagi nga mapakita naton ang aton pagtuo sa iya. Buligan ka niya sa pagtuman sang imo dedikasyon kag sa pag-atubang sa mga kabudlayan. Amo ini ang ginhimo sang Dios kay Rut.

8. Ilaragway ang gindak-an nga pamilya ni Ezequias.

⁸ Indi pareho kay Rut, ang pamatan-on nga si Ezequias nabun-ag sa isa ka pungsod nga nadedikar kay Jehova. Pero indi tanan nga Israelinhon nangin matutom. Ang isa sa ila amo ang amay ni Ezequias nga si Hari Ahaz. Bangod sining malaut nga tawo, ang ginharian sang Juda nagsimba sa mga diosdios, kag ginpasipalahan niya ang templo  ni Jehova sa Jerusalem. Tuman gid kalain sang mga hitabo sang bata pa si Ezequias, kay ang pila sa iya utod nga lalaki ginsunog nga buhi bilang mga halad sa butig nga dios!—2 Hari 16:2-4, 10-17; 2 Cron. 28:1-3.

9, 10. (a) Ngaa mahimo kuntani maghinakit si Ezequias? (b) Ngaa indi kita dapat maghinakit sa Dios? (c) Ngaa indi kita dapat maghunahuna nga kon ano ang aton gindak-an nga pamilya amo man ang mangin kabuhi naton sa ulihi?

⁹ Samtang nagadaku si Ezequias, mahimo kuntani sia maghinakit kag maakig sa Dios. Ang iban nga nagabatas sang indi masyado kabudlay nga kahimtangan kon ipaanggid sa naeksperiensiahan ni Ezequias nagapati nga may rason sila nga ‘maakig kay Jehova’ ukon maghinakit sa iya organisasyon. (Hulu. 19:3) Nagapati naman ang iban nga nangin malain ang ila pagkabuhi bangod sa ila indi maayo nga pamilya, kag ginasulit lang nila ang sala sang ila mga ginikanan. (Ezeq. 18:2, 3) Husto bala sila?

¹⁰ Ang kabuhi ni Ezequias nagahatag sa aton sang maathag nga sabat: Indi gid! Wala gid kita sing rason nga maghinakit kay Jehova, bangod indi sia ang ginahalinan sang kalautan nga ginaantos sang katawhan sa sining malaut nga kalibutan. (Job 34:10) Ang mga ginikanan may daku nga impluwensia sa ila kabataan, maayo man ini ukon malain. (Hulu. 22:6; Col. 3:21) Pero indi buot silingon nga kon ano ang aton gindak-an nga pamilya amo man ang mangin kabuhi naton sa ulihi. Sa baylo, tanan kita ginhatagan ni Jehova sang isa ka hamili nga regalo—ang ikasarang sa pagpili kon ano ang aton himuon kag kon mangin ano kita nga sahi sang tawo. (Deut. 30:19) Paano gingamit ni Ezequias ini nga regalo?

11. Ngaa nangin maayo gid nga hari sang Juda si Ezequias?

¹¹ Nangin maayo gid nga hari si Ezequias bisan pa nga malain nga hari sang Juda ang iya amay. (Basaha ang 2 Hari 18:5, 6.) Malain gid nga impluwensia ang iya amay, pero may iban pa nga puede mag-impluwensia sa iya. Nagaalagad sadto bilang manalagna sanday Isaias, Miqueas, kag Oseas. Ginpamalandungan sing maayo ni Hari Ezequias ang inspirado nga mga mensahe sining matutom nga mga lalaki, kag ginpamatian niya ang laygay kag pagtadlong ni Jehova. Bangod sini, ginsugdan ni Ezequias nga tadlungon ang indi maayo nga mga hinimuan sang iya amay.  Ginhimo niya ini paagi sa pagtinlo sang templo, pagtumbas sa mga sala sang katawhan, kag pagguba sang tanan nga pagano nga mga diosdios sa bug-os nga ginharian. (2 Cron. 29:1-11, 18-24; 31:1) Sang nag-atubang sia sang mabudlay nga mga kahimtangan, pareho sang ginsalakay sang hari sang Asiria nga si Senaquerib ang Jerusalem, nagpakita si Ezequias sing daku nga kaisog kag pagtuo. Nagsalig sia nga luwason sia sang Dios kag ginpabakod niya ang iya katawhan paagi sa iya ginsiling kag halimbawa. (2 Cron. 32:7, 8) Sang ulihi, sang gintadlong si Ezequias bangod nangin matinaastaason sia, nagpaubos sia kag naghinulsol. (2 Cron. 32:24-26) Gani wala gintugutan ni Ezequias nga mangin malain ang iya kabuhi ukon maguba ang iya palaabuton bangod sang iya malain nga gindak-an. Sa baylo, ginpakita niya nga abyan sia ni Jehova kag isa ka maayo nga halimbawa nga takus ilugon.

12. Pareho kay Ezequias, paano ginpamatud-an sang madamo subong nga abyan sila ni Jehova?

¹² Bangod nagapuyo kita sa mapintas kag wala sing gugma nga kalibutan, indi katingalahan nga madamo nga kabataan ang nagdaku nga wala ginhigugma kag gin-amligan sang ila mga ginikanan. (2 Tim. 3:1-5) Madamo nga Cristiano subong ang nagdaku sa indi maayo nga pamilya, pero nangin suod sila nga abyan ni Jehova. Pareho kay Ezequias, ginpamatud-an nila nga ang palaabuton sang isa ka tawo wala nagadepende sa iya gindak-an. Ginpadunggan kita sang Dios sa paghatag sa aton sing regalo nga kahilwayan sa pagpili, kag pribilehiyo naton nga gamiton ini nga regalo para mangin matutom kay Jehova agod mapadunggan sia kag mahimaya, pareho sa ginhimo ni Ezequias.

13, 14. Ngaa mahimo mabudlay gid ang mangin responsibilidad ni Maria, pero ano ang sabat niya kay Gabriel?

¹³ Madamo nga siglo pagkatapos sang panahon ni Ezequias, isa ka mapainubuson nga lamharon nga Judiyo nga babayi nga taga-Nazaret ang nangin abyan ni Jehova. Tumalagsahon gid ang ila pag-abyanay kag ginhatagan sia sing pinasahi nga responsibilidad. Sia ang magabusong, magabun-ag, kag magapadaku sang bugtong nga Anak sang Dios! Daku gid ang pagsalig ni Jehova kay Maria, nga anak ni Heli. Pero ano ang una nga reaksion ni Maria sa sini nga responsibilidad?

¹⁴ Nagadayaw gid kita sa pinasahi nga pribilehiyo ni Maria, pero ano ayhan ang mga ginakabalak-an niya? Ginsilingan sia ni Gabriel, nga anghel sang Dios, nga magabusong sia paagi sa isa ka milagro bisan pa wala sia makahulid sa lalaki. Pero wala ginpaathag ni Gabriel sa pamilya ni Maria kag sa iya mga kaingod kon ngaa magabusong sia. Ano ayhan ang ila hunahunaon? Mahimo nga nabalaka si Maria sa mangin reaksion sang iya palamanhon nga si Jose. Paano niya mapapati si Jose nga wala sia nagluib bisan pa nagabusong sia? Dugang pa, isa ka mabug-at nga  responsibilidad ang pagpadaku, pag-atipan, kag paghanas sa bugtong nga Anak sang Labing Mataas! Indi naton mahibaluan ang tanan nga kabalaka nga nagsulod sa hunahuna ni Maria sang gin-istorya sia ni Gabriel. Pero, nahibaluan naton ang iya sabat: “Ako ulipon ni Jehova! Kabay nga matuman sa akon ang suno sa imo ginsiling.”—Luc. 1:26-38.

15. Ngaa tumalagsahon ang pagtuo ni Maria?

¹⁵ Indi bala nga tumalagsahon gid ang pagtuo ni Maria? Pareho sa isa ka ulipon nga handa sa pagtuman sa ginapahimo sang iya agalon, handa man sia nga tumanon ano man ang ipahimo sang iya Agalon nga si Jehova. Nagasalig sia nga atipanon sia kag amligan ni Jehova. Ngaa may amo sia sini nga pagtuo? Wala kita nabun-ag nga may pagtuo. Ang pagtuo resulta sang pagpanikasog sang kada isa kag pagpakamaayo sang Dios. (Gal. 5:22; Efe. 2:8) May pamatuod bala nga si Maria nagpanikasog nga mapabakod ang iya pagtuo? May ara gid. Binagbinaga kon paano sia nagpamati kag kon parte sa ano ang iya mga ginhambal.

16. Ano ang nagapakita nga si Maria maayo nga manugpamati?

¹⁶ Kon paano nagpamati si Maria. Ginalaygayan kita sang Biblia nga mangin “maabtik sa pagpamati, [kag] mahinay sa paghambal.” (Sant. 1:19) Maayo bala nga manugpamati si Maria? Huo. Duha ka beses nga ginpakita sa Ebanghelyo ni Lucas nga namati sing maayo si Maria sa mga mensahe nga may madalom nga espirituwal nga kahulugan, kag ginpamalandungan niya ini sang ulihi. Sang ginbun-ag si Jesus, ang mapainubuson nga mga manugbantay nagsugid kay Maria sang mensahe halin sa anghel. Sang ulihi, bisan 12 anyos pa lang si Jesus, naghambal sia parte sa isa ka importante nga espirituwal nga butang. Ginpamatian ini tanan ni Maria, gintandaan, kag ginpamalandungan sing maayo.—Basaha ang Lucas 2:16-19, 49, 51.

17. Ano ang matun-an naton parte sa mga ginhambal ni Maria?

¹⁷ Kon parte sa ano ang mga ginhambal ni Maria. Diutay lang sa mga ginhambal ni Maria ang narekord sa Biblia. Ang pinakamalawig sa sini mabasa sa Lucas 1:46-55. Ginapakita sang mga ginhambal ni Maria nga nahangpan niya sing maayo ang Kasulatan. Ang iya mga ginhambal daw pareho sa pangamuyo ni Hana, nga iloy ni manalagna Samuel. (1 Sam. 2:1-10) Suno sa pagbulubanta, mga 20 ka beses nga nagkutlo sa Kasulatan si Maria. Gani maathag nga gusto niya istoryahan ang parte sa espirituwal nga mga butang. Ang iya tagipusuon puno sang hamili nga mga kamatuoran nga natun-an niya parte sa iya pinakasuod nga Abyan, si Jehova nga Dios.

18. Paano naton mailog ang pagtuo ni Maria?

¹⁸ Pareho kay Maria, mahimo nga makabaton man kita sang mga responsibilidad halin kay Jehova nga daw mabudlay himuon. Pareho sa iya, mapainubuson man naton nga itugyan ang aton kaugalingon kay Jehova, kag magsalig nga buligan gid niya kita. Mailog naton ang pagtuo ni Maria paagi sa pagpamati sing maayo kay Jehova kag pagpamalandong sa aton mga natun-an parte sa iya kag sa iya mga katuyuan, kag paagi sa malipayon nga pagsugid sa iban sang aton natun-an.—Sal. 77:11, 12; Luc. 8:18; Roma 10:15.

19. Kon ilugon naton ang pagtuo sang mga matutom nga narekord sa Biblia, ano ang mapat-od naton?

¹⁹ Maathag nga sanday Rut, Ezequias, kag Maria mga abyan man ni Jehova, pareho kay Abraham nga nauna sa ila. Sila kag ang tanan nga “tuman kadaku nga panganod sang mga saksi” kag ang madamo pa gid nga matutom halin sang una nakatigayon sing pinasahi nga pribilehiyo nga mangin mga abyan sang Dios. Kabay pa nga padayon naton nga ilugon ang ila pagtuo. (Heb. 6:11, 12) Kon himuon naton ini, pat-od nga matigayon naton ang daku gid nga padya—ang mangin suod nga abyan ni Jehova sing wala katapusan!