1. Ano ang isa ka rason kon ngaa nahiusa ang pamilya ni Jehova?

NALIPAY kita kay bahin kita sang pamilya ni Jehova. Ngaa may paghidait kag paghiusa ang aton pamilya? Ang isa ka rason amo nga ginahimo naton ang aton bug-os nga masarangan nga respetuhon ang mga ginhatagan ni Jehova sang awtoridad. Kag kon mahangpan naton sing maayo kon ngaa ginhatagan ni Jehova sang awtoridad ang iban, mas mahiusa pa gid kita.

2. Ano nga mga pamangkot ang sabton naton sa sini nga artikulo?

² Sa sini nga artikulo, binagbinagon naton kon sin-o ang may awtoridad sa kongregasyon. Sabton man naton ini nga mga pamangkot: Ano ang responsibilidad sang mga sister? Ang tanan bala nga brother ulo sang tanan nga sister? Ang awtoridad bala sang mga gulang sa mga kauturan pareho sa awtoridad sang ulo sang pamilya sa iya asawa kag kabataan? Antes naton ini sabton, binagbinagon anay naton kon paano naton dapat tamdon ang mga sister.

3. Ano ang makabulig sa aton para mas pabaloran pa gid naton ang ginahimo sang aton mga sister?

³ Ginapabaloran naton ang aton mga sister nga ginahimo ang ila bug-os nga masarangan para atipanon ang ila pamilya, para magbantala sang maayong balita, kag para buligan ang iban sa kongregasyon. Mas pabaloran pa gid naton sila kon binagbinagon naton ang pagtamod ni Jehova kag ni Jesus sa ila. Kag matudluan kita kon paano naton dapat trataron ang mga babayi kon binagbinagon naton ang halimbawa ni apostol Pablo.

4. Paano ginapakita sang Biblia nga pareho nga ginapabaloran ni Jehova ang mga babayi kag mga lalaki?

⁴ Ginapakita sang Biblia nga pareho nga ginapabaloran ni Jehova ang mga babayi kag mga lalaki. Halimbawa, ginasugid sang Biblia nga sang unang siglo, ginhatagan ni Jehova sang balaan  nga espiritu ang mga babayi kag mga lalaki para makahimo sila sang dalayawon nga mga buhat, pareho sang paghambal sing lainlain nga lenguahe. (Binu. 2:1-4, 15-18) Ginhaplasan sang balaan nga espiritu ang mga babayi kag mga lalaki kag magagahom sila kaupod sang Cristo. (Gal. 3:26-29) Ang mga babayi kag mga lalaki may paglaum nga mabuhi sing wala sing katapusan sa duta. (Bug. 7:9, 10, 13-15) Kag ginsugo ang mga lalaki kag mga babayi nga magbantala kag magtudlo sang maayong balita. (Mat. 28:19, 20) Halimbawa, ginasugid sang libro sang Binuhatan ang parte sa isa ka utod nga babayi nga si Priscila nga may bana nga si Aquila. Ginbuligan nila si Apolos, nga madamo sing nahibaluan sa Kasulatan, nga mahangpan sing husto ang kamatuoran.—Binu. 18:24-26.

5. Suno sa Lucas 10:38, 39, 42, paano ginpakita ni Jesus nga ginarespeto niya ang mga babayi?

⁵ Ginpadunggan kag ginrespeto ni Jesus ang mga babayi. Wala gin-ilog ni Jesus ang mga Fariseo. Ginapakanubo nila ang mga babayi, wala nila sila ginaistorya sa publiko nga mga lugar, kag wala nila sila ginatudluan parte sa Kasulatan. Indi pareho sa mga Fariseo, ginsugid ni Jesus ang importante nga mga kamatuoran sa mga babayi kag mga lalaki. * (Basaha ang Lucas 10:38, 39, 42.) Ginpaupod man niya ang mga babayi sa iya paglakbay para magbantala. (Luc. 8:1-3) Kag ginhatagan ni Jesus sang pribilehiyo ang mga babayi nga amo ang magsugid sa iya mga apostoles nga nabanhaw sia.—Juan 20:16-18.

6. Paano ginpakita ni apostol Pablo nga ginarespeto niya ang mga babayi?

⁶ Ginpahanumdom ni apostol Pablo si Timoteo nga padunggan ang mga babayi. Ginsilingan sia ni Pablo nga kabigon ang ‘tigulang nga mga babayi subong mga iloy’ kag ang ‘lamharon nga mga babayi subong mga utod.’ (1 Tim. 5:1, 2) Daku ang nabulig ni Pablo para mangin hamtong nga Cristiano si Timoteo, pero ginpadunggan niya ang iloy kag ang lola ni Timoteo sang nagsiling sia nga sila ang una nga nagtudlo kay Timoteo sang “balaan nga mga sinulatan.” (2 Tim. 1:5; 3:14, 15) Ginsambit ni Pablo ang ngalan sang mga utod nga babayi sang ginkamusta niya sila sa iya sulat para sa mga taga-Roma. Natalupangdan ni Pablo ang ginhimo sining mga utod nga babayi kag ginpasalamatan niya sila.—Roma 16:1-4, 6, 12; Fil. 4:3.

7. Ano nga mga pamangkot ang binagbinagon naton?

⁷ Ginpakita sang nagligad nga mga parapo nga wala ginasiling sang Biblia nga mas importante ang mga brother sangsa mga sister. Daku gid ang mabulig sa kongregasyon sang mahigugmaon kag maalwan nga mga sister, kag nalipay gid ang mga gulang sa ginahimo sini nga mga sister para may paghidait kag paghiusa sa kongregasyon. Pero dapat naton sabton ang masunod nga mga pamangkot: Ngaa gusto ni Jehova nga magpandong ang mga sister sa pila ka sitwasyon? Kag bangod mga brother lang ang ginatangdo bilang mga gulang kag mga ministeryal nga alagad, buot bala silingon nga ang tanan nga brother sa kongregasyon ulo sang tanan nga sister?

8. Suno sa Efeso 5:23, ang tanan bala nga brother ulo sang tanan nga sister? Ipaathag.

⁸ Ang tanan bala nga brother sa kongregasyon ulo sang tanan nga sister? Indi. Ang Cristo amo ang ulo sang kongregasyon. (Basaha ang Efeso 5:23.) Sa pamilya, ang bana ang ulo sang iya asawa. Ang bawtismado nga anak nga lalaki indi ulo sang iya iloy. (Efe. 6:1, 2) Kag sa kongregasyon, may awtoridad ang mga gulang sa mga brother kag mga sister, pero may limitasyon ini. (1 Tes. 5:12; Heb. 13:17) Pero kamusta ang isa ka dalaga nga sister nga wala na nagaistar sa balay sang iya mga ginikanan? Dapat niya gihapon respetuhon  ang iya mga ginikanan. Ginarespeto man niya ang mga gulang. Pero pareho sa mga brother sa kongregasyon, isa lang ang iya ginakilala nga ulo, si Jesus.

9. Ngaa may mga sitwasyon nga kinahanglan magpandong sang mga sister?

⁹ Gintangdo ni Jehova ang mga lalaki para pangunahan ang pagtudlo sa kongregasyon kag pagsimba sa iya, pero wala niya ginhatagan ang mga babayi sang sini nga responsibilidad. (1 Tim. 2:12) Ngaa? Para maorganisar ang kongregasyon. Amo man ini ang rason kon ngaa gintangdo niya si Jesus nga ulo sang lalaki. Sa mga sitwasyon nga kinahanglan himuon sang isa ka sister ang responsibilidad sang isa ka brother, dapat sia magpandong kay amo ini ang ginapatuman ni Jehova. * (1 Cor. 11:4-7) Gusto ni Jehova nga himuon ini sang mga sister para ipakita nga ginarespeto nila ang ginhatagan ni Jehova sang awtoridad, indi para pakanubuon ang mga sister. Gani binagbinagon naton ini nga pamangkot: Ano nga awtoridad ang ginhatag ni Jehova sa mga ulo sang pamilya kag sa mga gulang?

10. Ngaa mahimo nagabatyag ang isa ka gulang nga kinahanglan niya maghimo sang mga pagsulundan para sa mga kauturan sa kongregasyon?

¹⁰ Palangga sang mga gulang ang Cristo, kag palangga nila ang “mga karnero” nga ginapaatipan ni Jehova kag ni Jesus sa ila. (Juan 21:15-17) Bangod ginaatipan sang isa ka gulang ang mga kauturan sa kongregasyon, posible magbatyag sia nga pareho sia sa isa ka amay. Gani mahimo sia magpensar nga kon ang isa ka ulo sang pamilya puede makahimo sang mga pagsulundan para amligan ang iya pamilya, puede man sia maghimo sang mga pagsulundan para amligan ang mga karnero sang Dios. Kag bangod ginapangabay sang pila ka kauturan ang mga gulang  nga maghimo sing desisyon para sa ila, nagabatyag pa gid ang mga gulang nga husto nga maghimo sila sang mga pagsulundan para sa mga kauturan. Pero pareho lang bala ang awtoridad sang mga gulang sang kongregasyon kag sang mga ulo sang pamilya?

11. Ano ang pagkaanggid sang awtoridad sang mga ulo sang pamilya kag sang mga gulang?

¹¹ Ginapakita sang ginsiling ni apostol Pablo nga may pagkaanggid ang awtoridad sang ulo sang pamilya kag sang mga gulang. (1 Tim. 3:4, 5) Halimbawa, gusto ni Jehova nga tumanon sang mga miembro sang pamilya ang ulo sang pamilya. (Col. 3:20) Kag gusto niya nga tumanon sang mga kauturan ang mga gulang sa kongregasyon. Gusto ni Jehova nga tudluan sang mga ulo sang pamilya ang mga miembro sini nga mangin suod kay Jehova, kag amo man ini ang gusto niya nga himuon sang mga gulang sa mga kauturan sa kongregasyon. Ginasigurado man sang mga ulo sang pamilya nga mabatyagan sang mga miembro sang ila pamilya nga palangga sila, kag amo man sini ang ginahimo sang mga gulang sa mga kauturan sa kongregasyon. Kag pareho sa mga ulo sang pamilya nga nagabulig gid sa mga miembro sang ila pamilya, ginabuligan man sang mga gulang ang mga kauturan sa kongregasyon kon may problema sila. (Sant. 2:15-17) Dugang pa, gusto ni Jehova nga buligan sang mga gulang kag sang mga ulo sang pamilya ang  iban nga sundon ang iya mga ginapatuman. Ginpaandaman man niya sila nga ‘indi magsobra sa mga butang nga nasulat’ sa Biblia.—1 Cor. 4:6.

12-13. Suno sa Roma 7:2, ano ang kinatuhayan sang awtoridad sang mga ulo sang pamilya kag sang mga gulang?

¹² Pero, may daku man nga kinatuhayan ang awtoridad sang mga gulang kag sang mga ulo sang pamilya. Halimbawa, gintangdo ni Jehova ang mga gulang nga mangin hukom, kag ginhatagan niya sila sang responsibilidad nga sikwayon sa kongregasyon ang indi mahinulsulon nga nakasala.—1 Cor. 5:11-13.

¹³ Pero may ginhatag nga awtoridad si Jehova sa mga ulo sang pamilya nga wala niya ginhatag sa mga gulang. Halimbawa, ginhatagan ni Jehova sang awtoridad ang ulo sang pamilya nga maghimo sang mga pagsulundan para sa iya pamilya kag ipatuman ini. (Basaha ang Roma 7:2.) Halimbawa, ang ulo sang pamilya may awtoridad nga magpatuman kon ano oras nga ara na dapat sa balay ang kabataan kon gab-i. May awtoridad man sia nga disiplinahon ang iya kabataan nga wala nagtuman sa sina nga pagsulundan. (Efe. 6:1) Pero, antes maghimo sang pagsulundan ang isa ka mahigugmaon nga ulo sang pamilya, ginaistoryahan nila anay ini sang iya asawa, kay ‘isa sila ka unod.’ *—Mat. 19:6.

14. (a) Suno sa Marcos 10:45, ngaa nagakaigo nga gintangdo ni Jehova si Jesus bilang ulo sang kongregasyon? (b) Ano ang responsibilidad sang Nagadumala nga Hubon? (Tan-awa ang kahon nga “ Ang Responsibilidad sang Nagadumala nga Hubon.”)

¹⁴ Paagi sa gawad, ginbakal ni Jehova ang kabuhi sang tanan sa kongregasyon kag sang tanan nga nagatuo kay Jesus. (Basaha ang Marcos 10:45; Binu. 20:28; 1 Cor. 15:21, 22) Bangod  ginhatag ni Jesus ang iya kabuhi bilang gawad, nagakaigo lang nga sia ang gintangdo ni Jehova nga ulo sang kongregasyon. Gani may awtoridad si Jesus nga maghimo sang mga pagsulundan kon ano ang dapat himuon sang kada isa, sang mga pamilya, kag sang bilog nga kongregasyon. May awtoridad man sia nga ipatuman ini nga mga pagsulundan. (Gal. 6:2) Pero magluwas sa paghimo sang mga pagsulundan, ginaatipan man niya kita sing maayo kag ginapalangga.—Efe. 5:29.

15-16. Ano ang natun-an mo sa ginsiling sang isa ka sister nga si Marley kag sang isa ka brother nga si Benjamin?

¹⁵ Ginapakita sang mga sister nga ginarespeto nila ang Cristo kon ginasunod nila ang panuytoy sang mga lalaki nga gintangdo sang Cristo nga magaatipan sa ila. Madamo nga sister ang nagakomporme sa ginsiling ni Marley nga taga-United States. Nagsiling sia: “Ginapabaloran ko gid ang akon mga responsibilidad bilang isa ka asawa kag bilang isa ka utod nga babayi sa kongregasyon. Kinahanglan ko pirme magpanikasog para respetuhon ang ginhatagan ni Jehova sang awtoridad. Nangin mahapos ini sa akon bangod ginarespeto ako sang akon bana kag sang mga brother sa kongregasyon kag ginaapresyar nila ang akon mga ginahimo.”

¹⁶ Kon nahangpan sang mga brother ang awtoridad nga ginhatag sa ila, respetuhon nila kag padunggan ang mga sister. Si Benjamin, nga isa ka brother nga taga-England, nagsiling: “Madamo gid ako sing natun-an sa mga komento sang mga sister sa mga miting kag sa ila mga panugda kon paano magtuon kag kon paano ko mapauswag ang akon pagbantala kag pagpanudlo. Para sa akon, importante gid ang ila ginahimo.”

17. Ngaa dapat naton ipakita nga ginarespeto naton ang paghatag ni Jehova sang awtoridad sa iban?

¹⁷ Kon nahangpan sang tanan nga lalaki, babayi, ulo sang pamilya, kag gulang ang rason kon ngaa ginhatagan ni Jehova sang awtoridad ang iban kag respetuhon nila ini, may paghidait gid sa kongregasyon. Kag labaw sa tanan, madayaw naton ang aton mahigugmaon nga Amay sa langit, si Jehova.—Sal. 150:6.