1. Kon nagadesisyon ang isa ka sister kon sin-o ang iya pamanahon, ano ang mga dapat niya ipamangkot?

ANG tanan nga Cristiano dapat magpasakop sa awtoridad ni Jesucristo nga isa ka perpekto nga ulo. Pero kon mamana ang isa ka Cristianong babayi, dapat sia magpasakop sa indi perpekto nga lalaki bilang iya ulo. Indi ini mahapos. Gani kon ang isa ka sister nagapamensar kon bala pamanahon niya ang isa ka brother, dapat niya pamangkuton ang iya kaugalingon: ‘Ang mga ginahimo bala sini nga brother nagapakita nga mangin maayo sia nga ulo sang pamilya? Ang pag-alagad bala kay Jehova amo ang pinakaimportante sa iya kabuhi? Kon indi, ginahunahuna ko bala nga magabag-o sia kag mangin maayo nga ulo sang pamilya kon mag-asawahay na kami?’ Dapat man pamangkuton sang sister ang iya kaugalingon: ‘May mga kinaiya bala ako nga makabulig sa amon pag-asawahay? Mapinasensiahon bala ako kag maalwan? Mabakod bala ang akon kaangtanan kay Jehova?’ (Man. 4:9, 12) Kon nagahimo sang maayo nga mga desisyon ang isa ka babayi antes sia magpamana, makabulig ini sa iya nga mangin malipayon kon magpamana na sia.

2. Ano ang binagbinagon naton sa sini nga artikulo?

² Minilyon ka sister ang nagpakita sang maayo nga halimbawa kay nagapasakop sila sa ila bana. Dapat gid sila dayawon. Nalipay gid kita nga mag-alagad kay Jehova upod sa sining matutom nga mga babayi. Sa sini nga artikulo, binagbinagon naton ang sabat sa tatlo ka pamangkot: (1) Ano ang pila ka kabudlayan nga naeksperiensiahan sang mga asawa? (2) Ngaa dapat magpasakop ang isa ka asawa sa iya bana? (3) Ano ang matun-an sang Cristianong mga bana kag mga asawa sa halimbawa ni Jesus, ni Abigail, kag ni Maria, nga asawa ni Jose kag iloy ni Jesus, parte sa pagtuman kag pagpasakop sa awtoridad?

3. Ngaa makaeksperiensia gid sang mga problema ang tanan nga mag-asawa?

³ Ang pag-asawahay perpekto nga regalo halin sa Dios, pero indi perpekto ang mga tawo. (1 Juan 1:8) Gani ginapaandaman sang Pulong sang Dios ang mga mag-asawa nga makaeksperiensia sila sang mga kabudlayan nga ginatawag “kapipit-an sa unod.” (1 Cor. 7:28) Talupangda ang pila ka kabudlayan nga posible maeksperiensiahan sang isa ka asawa.

4. Ngaa mahimo magbatyag ang isa ka asawa nga mangin manubo ang pagtan-aw sang mga tawo sa iya kon magpasakop sia sa iya bana?

⁴ Kon kaisa, bangod sa gindak-an nga pamilya sang isa ka asawa, mahimo magbatyag sia nga mangin manubo ang pagtan-aw sang mga tawo sa iya kon magpasakop sia sa iya bana. Si Marisol, nga taga-United States, nagsiling: “Sa amon lugar, pirme ginasilingan ang mga babayi nga dapat sila mangin tupong sa mga lalaki. Kabalo ’ko nga ginhatagan ni Jehova sang awtoridad ang mga bana kag dapat sila tumanon sang ila asawa. Importante gid nga himuon namon ini nga mga asawa kag wala ini nagapakanubo sa amon. Pero mabudlay magpasakop sa awtoridad sang akon bana bangod indi amo sini ang gusto nga himuon sang kalabanan sa kalibutan.”

5. Ano ang ginapatihan sang pila ka lalaki nga wala nabase sa mga prinsipio sa Biblia parte sa responsibilidad sang mga babayi?

⁵ Pero kamusta naman kon ang bana nagapati nga ang mga lalaki mas importante sangsa mga babayi? Ang isa ka sister nga si Ivon, nga taga-South America, nagsiling: “Sa amon lugar, dapat mauna gid kaon ang mga lalaki sangsa mga babayi. Ang mga bata nga babayi amo ang nagaluto kag nagapaninlo, pero ang mga bata nga lalaki nagahulat lang nga asikasuhon sang ila iloy kag mga utod nga babayi, kag ginasilingan ang mga lalaki nga sila ang ‘hari sa balay.’” Si Yingling, nga isa ka sister nga taga-Asia, nagsiling: “May hambalanon sa amon nga indi kinahanglan sang mga babayi nga magtinguha pa nga mangin maalam ukon madamo sing nabal-an. Responsibilidad nila ang tanan nga obra sa balay, pero indi nila puede ihambal ang ila opinyon sa ila bana.” Ini nga pagpati wala nabase sa mga prinsipio sa Biblia. Kon ginahimo ini sang isa ka bana, wala sia nagapakita sang gugma, ginapabudlayan niya ang iya asawa, wala niya ginailog si Jesus, kag wala nalipay si Jehova sa iya.—Efe. 5:28, 29; 1 Ped. 3:7.

6. Ano ang dapat himuon sang mga asawa para magbakod ang ila kaangtanan kay Jehova?

⁶ Ginbinagbinag sa nagligad nga artikulo nga gusto ni Jehova nga buligan sang Cristianong mga bana ang ila pamilya nga mangin suod kay Jehova, mangin matawhay ang ila panghunahuna, kag amanan sila sang ila materyal nga kinahanglanon. (1 Tim. 5:8) Pero bisan pa masako ang mga asawa, dapat may tion sila kada adlaw nga basahon ang Pulong sang Dios kag pamalandungan ini, kag mangamuyo sing hanuot kay Jehova. Mahimo nga indi ini mahapos. Bangod sa ila kasakuon, basi magbatyag sila nga wala na sila sing tion ukon kusog nga himuon ini. Pero dapat gid nila ini hatagan sang tion. Ngaa? Bangod gusto ni Jehova nga mangin suod kita tanan sa iya kag indi maguba ang aton kaangtanan sa iya.—Binu. 17:27.

7. Ano ang makabulig sa isa ka asawa para mangin mas mahapos sa iya nga tumanon ang iya mga responsibilidad?

⁷ Mahimo kinahanglan sang isa ka asawa nga magpanikasog para magpasakop sa iya indi perpekto nga bana. Pero kon nahangpan niya ang ginasiling sang Biblia kon ngaa dapat niya respetuhon kag tumanon ang iya bana kag magakomporme sia sa sini, mangin mas mahapos sa iya nga tumanon ang mga responsibilidad nga ginhatag ni Jehova sa iya.

8. Suno sa Efeso 5:22-24, ngaa nagapasakop ang isa ka Cristianong asawa sa iya bana?

⁸ Nagapasakop ang isa ka Cristianong asawa sa iya bana bangod amo ini ang gusto ni Jehova nga himuon niya. (Basaha ang Efeso 5:22-24.) Nagasalig sia sa iya Amay sa langit, bangod kabalo sia nga palangga Niya sia kag ang tanan nga ginapahimo Niya sa iya para gid sa iya kaayuhan.—Deut. 6:24; 1 Juan 5:3.

9. Ano ang mangin resulta kon magpasakop ang isa ka asawa sa iya bana?

⁹ Ginaimpluwensiahan sang kalibutan ang mga babayi nga indi pagsundon ang mga ginapatuman ni Jehova kag indi magpasakop sa ila bana kay nagapakanubo kuno ini sa ila kaugalingon. Ang mga nagapati sa sini wala nakakilala sa aton mahigugmaon nga Dios. Indi gid pag-ipatuman ni Jehova sa iya pinalangga nga mga anak nga babayi ang isa ka sugo nga magapakanubo sa ila. Kon panikasugan sang isa ka asawa nga tumanon si Jehova paagi sa pagpasakop sa iya bana, makabulig sia nga mangin malinong ang ila pamilya. (Sal. 119:165) May benepisyo ini sa iya bana, sa iya kaugalingon, kag sa ila kabataan.

10. Ano ang matun-an naton sa ginsiling ni Carol?

¹⁰ Kon nagapasakop ang isa ka asawa sa iya indi perpekto nga bana, ginapakita niya nga palangga niya kag ginarespeto si Jehova nga amo ang naghatag sang awtoridad sa iban. Si Carol, nga taga-South America, nagsiling: “Nahangpan ko nga may tion nga makasala ang akon bana. Nahangpan ko man nga ang akon reaksion kon makasala ang akon bana nagapakita kon daw ano ka importante sa akon ang akon kaangtanan kay Jehova. Gani padayon ako nga nagapasakop sa akon bana kay gusto ko nga malipay sa akon ang akon Amay sa langit.”

11. Ano ang nakabulig sa isa ka sister nga si Aneese nga magpatawad, kag ano ang matun-an naton sa iya ginsiling?

¹¹ Mabudlay para sa isa ka asawa nga respetuhon ang iya bana kag magpasakop sa iya kon ginabalewala sang iya bana ang iya balatyagon kag mga kabalaka. Pero talupangda ang reaksion sang isa ka sister nga si Aneese kon ginahimo ini sang iya bana. Nagsiling sia: “Ginatinguhaan ko nga indi maakig. Ginadumdom ko nga tanan kita makasala. Gusto ko ilugon si Jehova nga nagapatawad sing kinabubut-on. Kon nagapatawad ako, nagakalma ako dayon.” (Sal. 86:5) Kon mapinatawaron ang isa ka  asawa, mas mahapos sa iya nga magpasakop sa iya bana.

12. Ano nga mga halimbawa ang mabasa naton sa Biblia?

¹² Ang iban nagapati nga maluya ang isa ka tawo kon nagapasakop sia sa iban. Pero indi ina matuod. Mabasa naton sa Biblia ang madamo nga halimbawa sang mga nagpasakop sa awtoridad sang iban, pero indi sila maluya. Binagbinaga kon ano ang matun-an naton kay Jesus, kay Abigail, kag kay Maria.

13. Ngaa nagapasakop si Jesus sa awtoridad ni Jehova? Ipaathag.

¹³ Nagpasakop si Jesus sa awtoridad ni Jehova, pero wala ini nagapahangop nga wala sia sing kaalam ukon ikasarang. Ang simple kag maathag nga paagi sang pagpanudlo ni Jesus nagapakita nga maalam gid sia. (Juan 7:45, 46) Kabalo si Jehova sang ikasarang ni Jesus, amo gani nga kaupod Niya si Jesus sang gintuga Niya ang tanan sa langit kag sa duta. (Hulu. 8:30; Heb. 1:2-4) Kag sa tapos ginbanhaw ni Jehova si Jesus, ginhatag Niya sa iya “ang bug-os nga awtoridad sa langit kag sa duta.” (Mat. 28:18) Bisan pa madamo sing ikasarang si Jesus, nagapatuytoy sia gihapon kay Jehova. Ngaa? Bangod palangga niya ang iya Amay.—Juan 14:31.

14. Ano ang matun-an sang mga bana (a) sa pagtan-aw ni Jehova sa mga babayi? (b) sa ginsiling sang Hulubaton 31?

¹⁴ Ang matun-an sang mga bana. Gusto ni Jehova nga magpasakop ang isa ka asawa sa iya bana. Pero indi buot silingon nga mas manubo ang iya pagtan-aw sa mga babayi sangsa mga lalaki. Maathag ini kay ginpili ni Jehova ang mga babayi kag mga lalaki nga mangin kaupod nga manuggahom ni Jesus. (Gal. 3:26-29) Ginhatagan ni Jehova sang awtoridad ang iya Anak bangod may salig sia sa iya. Sing kaanggid, ang maalam nga bana nagahatag sang awtoridad sa iya asawa. Ginsambit sang Biblia ang pila ka responsibilidad sang maayo nga asawa. Puede nga sia ang mag-asikaso sang mga hilikuton sa balay, magbakal kag mag-asikaso sang propiedad, kag magtransaksion sang negosyo. (Basaha ang Hulubaton 31:15, 16, 18.) Indi sia pareho sa isa ka suluguon nga indi puede maghambal sang iya opinyon. Sa baylo, ginasaligan sia sang iya bana kag ginapamatian ang iya opinyon. (Basaha ang Hulubaton 31:11, 26, 27.) Kon amo sini ang pagrespeto sang bana sa iya asawa, malipay gid ang iya asawa nga magpasakop sa iya.

15. Ano ang matun-an sang mga asawa sa halimbawa ni Jesus?

¹⁵ Ang matun-an sang mga asawa. Bisan pa madamo sing nahimo si Jesus, nagpasakop sia gihapon sa awtoridad ni Jehova kag wala sia nagbatyag nga nagapakanubo ini sa iya. (1 Cor. 15:28; Fil. 2:5, 6) Gani pareho kay Jesus, ang maayo nga asawa nga nagapasakop sa iya bana wala nagabatyag nga ginapakanubo niya ang iya kaugalingon. Bangod palangga niya ang iya bana, ginasuportahan niya sia. Pero ang panguna gid nga rason kon ngaa ginahimo niya ini amo nga palangga niya kag ginarespeto si Jehova.

16. Suno sa 1 Samuel 25:3, 23-28, ano nga problema ang naeksperiensiahan ni Abigail? (Tan-awa ang piktyur sa kober.)

¹⁶ Ang bana ni Abigail nga si Nabal bugalon, indi kabalo magpasalamat, kag kaugalingon lang niya ang iya ginapensar. Pero, wala ginhingalitan ni Abigail ang sitwasyon para matapos ang ila pag-asawahay. Puede kuntani nga pabay-an na lang niya si David kag ang iya mga tinawo nga patyon ang iya bana. Pero wala niya ina ginhimo. Sa baylo, gintinguhaan gid niya nga maamligan si Nabal kag ang ila daku nga panimalay. Imadyina ang kaisog ni Abigail sang nag-atubang sia sa 400 ka lalaki nga may mga armas kag nagpakighambal kay David. Handa pa gani sia nga akuon ang sala sang iya bana. (Basaha ang 1 Samuel 25:3, 23-28.) Nahangpan ni David nga gingamit ni Jehova ining maisog nga babayi para laygayan  sia kag punggan sia nga makahimo sang serioso nga sala.

17. Ano ang matun-an sang mga bana kay David kag kay Abigail?

¹⁷ Ang matun-an sang mga bana. Maalam nga babayi si Abigail. Maayo gid kay ginpamatian ni David ang iya laygay. Gani nalikawan ni David nga makapatay sang inosente nga mga tawo. Sing kaanggid, ginabinagbinag sing maayo sang maalam nga bana ang opinyon sang iya asawa antes maghimo sang importante nga desisyon. Ang opinyon sang iya asawa posible nga makabulig sa iya nga malikawan ang indi maayo nga desisyon.

18. Ano ang matun-an sang mga asawa sa halimbawa ni Abigail?

¹⁸ Ang matun-an sang mga asawa. Kon ang isa ka asawa nagapalangga kag nagarespeto kay Jehova, makabenepisyo gid ang iya pamilya bisan pa nga wala nagaalagad kay Jehova ang iya bana ukon nagasunod sa Iya mga prinsipio. Wala sia nagapangita sing paagi nga tapuson ang ila pag-asawahay. Sa baylo, ginarespeto niya ang iya bana kag nagapasakop sia sa iya, kag ginapalig-on niya ang iya bana nga magtuon parte kay Jehova. (1 Ped. 3:1, 2) Bisan pa indi mag-alagad kay Jehova ang iya bana, nalipay si Jehova sa iya kay nagapasakop sia sa iya bana kag matutom sia kay Jehova.

19. Sa ano nga mga sitwasyon nga indi dapat pagsundon sang asawa ang iya bana?

¹⁹ Dapat magpasakop ang Cristianong asawa sa iya bana, pero indi niya sia pagsundon kon ang ginapahimo sa iya nagalapas sa mga kasuguan ukon mga prinsipio sa Biblia. Halimbawa, basi hambalan sia sang iya indi tumuluo nga bana nga magbutig, magpangawat, ukon maghimo sang buhat nga indi suno sa Kasulatan. Dapat unahon sang tanan nga Cristiano, pati na sang mga asawa, ang pagtuman kay Jehova nga Dios. Kon ang ginapahimo sa isa ka sister nagalapas sa mga prinsipio sa Biblia, dapat niya ipaathag sing maayo kon ngaa indi niya ini mahimo kag dapat sia mangin malig-on.—Binu. 5:29.

20. Ngaa masiling naton nga suod si Maria kay Jehova?

²⁰ Suod gid si Maria kay Jehova. Madamo sia sing nabal-an sa Kasulatan. Sang nag-istoryahanay sila ni Elisabet, nga iloy ni Juan nga Manugbawtismo, sobra 20 ka beses nga nagkutlo si Maria sa Hebreong Kasulatan. (Luc. 1:46-55) Kag pamensara ini: Bisan pa kalaslon na si Maria kay  Jose, kay Maria una nga nagpakita ang anghel ni Jehova. Si Maria ang una nga ginsugiran sang anghel nga magabun-ag sia sang Anak sang Dios. (Luc. 1:26-33) Kilala sing maayo ni Jehova si Maria kag nagasalig sia nga palanggaon kag atipanon niya ang iya Anak. Kag sigurado gid nga suod gihapon si Maria kay Jehova bisan pa napatay na si Jesus kag ginbanhaw sa langit.—Binu. 1:14.

21. Ano ang matun-an sang mga bana sa ginsiling sang Biblia parte kay Maria?

²¹ Ang matun-an sang mga bana. Nalipay gid ang bana kon ang iya asawa madamo sing nabal-an sa Kasulatan. Wala niya ginahunahuna nga gusto sang iya asawa nga mangin ulo sang pamilya. Nahangpan niya nga makabulig gid ang iya asawa sa ila pamilya kon ang iya asawa madamo sing nabal-an sa Biblia kag sa mga prinsipio sini. Kag bisan pa mas mataas ang tinun-an sang asawa sangsa iya bana, responsibilidad gihapon sang bana nga pangunahan ang ila pangpamilya nga pagsimba kag iban pa nga hilikuton sa pag-alagad kay Jehova.—Efe. 6:4.

22. Ano ang matun-an sang mga asawa kay Maria?

²² Ang matun-an sang mga asawa. Dapat magpasakop ang asawa sa iya bana, pero responsibilidad sang asawa nga pabakuron ang iya mismo pagtuo. (Gal. 6:5) Gani dapat may tion sia para sa iya personal nga pagtuon kag pagpamalandong. Makabulig ini sa iya nga padayon nga palanggaon kag respetuhon si Jehova kag kinabubut-on nga magpasakop sa iya bana.

23. Kon nagapasakop ang mga asawa, ano ang benepisyo sini sa ila kaugalingon, sa ila pamilya, kag sa kongregasyon?

²³ Mas malipayon ang mga asawa nga nagapasakop sa ila bana sangsa mga wala nagapasakop sa ginhatagan ni Jehova sang awtoridad. Ginahimo nila ini bangod palangga nila si Jehova. Maayo man sila nga halimbawa sa pamatan-on nga mga lalaki kag mga babayi. Makabulig sila nga mangin malinong kag magpalanggaanay indi lang ang ila pamilya kundi ang bilog nga kongregasyon. (Tito 2:3-5) Subong, ang kalabanan nga matutom nga alagad ni Jehova mga babayi. (Sal. 68:11) Tanan kita, lalaki man ukon babayi, may importante nga responsibilidad sa kongregasyon. Binagbinagon naton sa masunod nga artikulo kon paano naton tanan matuman ina nga responsibilidad.