Antes pa magpakasal ang akon mga ginikanan, natun-an na nila ang kamatuoran. Natabo ini sang mga tuig pagligad sang 1920. Natawo ako sang 1939, kag nag-istar kami sa England. Sang bata pa ako, nagaupod ako sa akon mga ginikanan kon magtambong sila sa mga miting. Sang ulihi, nagpalista ako sa Teokratikong Eskwelahan Para sa Ministeryo. Sa akon una nga bahin, ginpatungtong nila ako sa isa ka tulungtungan para magtaastaas ako sa podyum. Seis anyos pa lang ako sadto kag grabe gid ang akon kulba sang nakita ko ang mga may edad na nga tumalambong.

Para makabantala ako, ginhimuan ako ni Tatay sang simple nga presentasyon kag gin-type niya ini sa card. Otso anyos ako sang una ako nga nagbantala nga wala sing partner, kag nanuktok ako sa isa ka balay. Nalipay gid ako sang ginbasa sang tagbalay ang akon nga card kag ginbaton niya dayon ang libro nga “Pakamatuura ang Dios.” Nagdalagan ako pakadto kay Tatay kag ginsugid sa iya ang natabo. Nalipay gid ako magbantala kag magtambong sa mga miting. Nagpalig-on ini sa akon nga mag-alagad kay Jehova sing bug-os tion.

Ginpabaloran ko pa gid ang Biblia sang nag-subscribe si Tatay sang Ang Lalantawan para sa akon. Ginabasa ko gid dayon ang kada magasin pag-abot sini. Nakabulig ini sa akon nga magsalig pa gid kay Jehova kag magdedikar sa iya.

Sang 1950, nagtambong ang amon pamilya sa Theocracy’s Increase Assembly sa New York. Ang tema sang Huebes, Agosto 3, amo ang “Missionary Day.” Sadto nga adlaw, si Brother Carey Barber, nga nangin miembro sang Nagadumala nga Hubon sang ulihi, amo ang nagpamulongpulong para sa bawtismo. Sa katapusan sang iya pamulongpulong, ginpamangkot niya kami nga mga balawtismuhan sang duha ka pamangkot. Dayon, nagtindog ako kag nagsabat,  “Huo!” Bisan pa 11 anyos lang ako sadto, nahangpan ko nga importante gid ining akon ginhimo. Pero bangod indi ako kabalo maglangoy, nakulbaan ako manaug sa tubig. Gani gin-updan ako ni Tito kag ginsilingan niya ako nga indi magpakulba kay indi man ako maano. Kadasig lang sang pagbawtismo sa akon kay wala gani kadapat ang akon tiil sa idalom sang swimming pool. Duha ka brother ang nagbulig sa akon, ang isa amo ang nagbawtismo sa akon kag ang isa pa amo ang nagpatakas sa akon. Sugod sadtong importante nga adlaw, padayon nga gintadlong ni Jehova ang akon mga banas.

Pagkatapos ko hayskul, gusto ko magpayunir. Pero ginpilit ako sang akon mga maestro nga mag-eskwela sa unibersidad. Gani nag-eskwela ako. Pero narealisar ko sang ulihi nga maapektuhan gid ang akon pag-alagad kon magpokus ako sa akon pag-eskwela. Gani nagdesisyon ako nga mag-untat. Ginpangamuyo ko ini kay Jehova kag nagsulat ako sa akon mga maestro. Ginpaathag ko sa ila sing maayo nga tapuson ko na lang ang una nga tuig sang akon pag-eskwela kag dayon mauntat na ako. Bug-os gid ang akon pagsalig kay Jehova, gani nagpayunir ako dayon.

Sang Hulyo 1957, nagpayunir ako sa banwa sang Wellingborough. Ginpamangkot ko ang mga kauturan sa Bethel sa London kon may marekomendar sila nga madugay na nga payunir nga brother nga puede ko updan. Ginrekomendar nila si Brother Bert Vaisey, kag madamo gid sia sing gintudlo sa akon. Mapisan gid sia sa pagbantala kag ginbuligan niya ako nga maghimo sang maayo nga iskedyul sa akon pag-alagad. Walo lang kami sa kongregasyon, si Brother Vaisey, ako, kag ang anom ka tigulang nga sister. Paagi sa paghanda kag pagpakigbahin sa mga miting, nagbakod ang akon pagsalig kay Jehova kag mapabutyag ko ang akon pagtuo sa iya.

Bangod indi ako magsoldado, napriso ako sa malip-ot nga tion. Paggua ko, nakilala ko ang isa ka espesyal payunir nga si Barbara. Nagpakasal kami sang 1959, kag handa kami mag-alagad bisan diin. Una kami nga nag-alagad sa Lancashire sa aminhan sang England. Sang Enero 1961, gin-agda ako nga mag-eskwela sing isa ka bulan sa Kingdom Ministry School sa Bethel sa London. Wala ko gid ginapaabot nga sa katapusan sang amon klase, gin-asayn ako bilang manugtatap sang sirkito. Ginhanas ako sang madugay na nga manugtatap sang sirkito sa siudad sang Birmingham sing duha ka semana, kag ginpaupod man sa sini si Barbara. Dayon, nagkadto kami sa amon asaynment sa Lancashire kag Cheshire.

Samtang nagabakasyon kami sang Agosto 1962, nakabaton kami sang sulat halin sa branch office. May unod ini nga mga application form para sa Gilead School. Ginpangamuyuan namon ini ni Barbara. Dayon, ginpil-apan namon ang mga form kag ginpadala ini sa branch office. Pagligad sang lima ka bulan, nagbiyahe kami pakadto sa Brooklyn, New York, para mag-eskwela sa ika-38 nga klase sang Gilead. Gintun-an namon sing napulo ka bulan ang Biblia.

Sa Gilead School, madamo kami sing natun-an parte sa Pulong sang Dios, sa iya organisasyon, kag sa mga kauturan sa bilog nga kalibutan.  Madamo gid kami sing natun-an sa iban nga estudyante kay 24 anyos lang ako sadto kag si Barbara 23 anyos. Nalipay gid ako nga may asaynment ako kada adlaw sa Bethel nga amo ang pagbulig kay Brother Fred Rusk, nga isa sa amon mga instruktor. Ang isa ka leksion nga gintudlo niya amo nga kon maglaygay ka, siguraduhon mo nga nabase ini sa Kasulatan. Nagpamulongpulong man sa amon klase si Nathan Knorr, si Frederick Franz, kag si Karl Klein. Madamo kami sing natun-an sa halimbawa sang mapainubuson nga brother nga si A. H. Macmillan. Paagi sa iya pamulongpulong, gintudluan niya kami kon paano ginbuligan ni Jehova ang iya katawhan sang nakaeksperiensia sila sang kabudlayan sa organisasyon sugod sang 1914 asta sang 1919.

Sang dali na lang matapos ang klase, ginsilingan kami ni Brother Knorr nga iasayn kami ni Barbara sa Burundi sa Africa. Nagdalidali kami kadto sa library sa Bethel para tan-awon ang Yearbook kon pila ang manugbantala sa Burundi sadto. Natingala gid kami kay wala kami sing nakita nga report parte sa sini nga pungsod. Makadto kami sa teritoryo nga wala pa gid mabantalaan, kag sakop ini sang Africa nga halos wala gid kami sing nabal-an. Grabe gid ang amon kabalaka. Gani nangamuyo kami kag nakabulig ini sa amon nga mangin kalmado.

Namag-uhan kami sa amon bag-o nga asaynment. Lain ang klima sa sini nga lugar, lain ang kultura sang mga tawo, kag lain ang ila lenguahe. Kinahanglan namon magtuon sang French nga lenguahe. Kinahanglan man namon mangita sang ilistaran. Pagligad sang duha ka adlaw sugod sang nag-abot kami, ginbisita kami ni Harry Arnott, nga klasmeyt namon sa Gilead. Mabalik na sia sa iya asaynment sa Zambia. Ginbuligan niya kami nga makakita sang apartment, kag amo ini ang pinakauna nga ilistaran para sa mga misyonero sa sini nga lugar. Pero sang ulihi, ginpamatukan kami sang mga opisyal sang gobierno nga wala sing nahibaluan parte sa mga Saksi ni Jehova. Nalipay gid kami sa amon asaynment, pero ginsilingan kami sang mga opisyal sang gobierno nga pahalinon nila kami kon wala kami sing permit. Nasubuan gid kami kay kinahanglan namon maghalin kag mag-adjust sa bag-o naman nga teritoryo sa Uganda.

Nakulbaan kami kay wala kami sing visa para makasulod sa Uganda. Pero nagsalig kami kay Jehova. Ginbuligan kami sang isa ka brother nga taga-Canada nga nagaalagad sa Uganda. Ginpaathag niya ang amon sitwasyon sa isa ka opisyal sa  immigration office. Nagsiling ang opisyal nga puede kami makatener sing pila ka bulan asta nga makakuha kami sing permit nga mag-istar sa sini nga pungsod. Ini nga eksperiensia nagpabakod sang amon pagsalig nga ginabuligan kami ni Jehova.

Lain gid ang sitwasyon sa Uganda sangsa Burundi. Nasugdan na ang pagbantala sa Uganda, pero 28 pa lang ang Saksi sa sini nga pungsod. Madamo kami sing naistorya nga nagahambal sang English. Pero narealisar namon nga para mag-uswag ang mga interesado, kinahanglan namon magtuon sang bisan isa lang ka lenguahe sa madamo nga lenguahe nga ginahambal sang mga tumandok. Nagbantala kami sa siudad sang Kampala, kag sa mga lugar sa palibot sini. Luganda ang lenguahe sang madamo nga tawo diri, gani amo ini ang amon gintun-an. Mga pila man ka tuig nga nagtuon kami antes kami nangin sagad sa sini nga lenguahe, pero nakabulig gid ini sa amon nga mangin epektibo sa amon pagbantala. Mas nahangpan namon kon ano pa ang dapat namon itudlo sa amon mga Bible study. Sang nakita nila nga gusto gid namon sila buligan, ginsugid nila sa amon ang ila ginbatyag kag kon ano ang ila masiling sa ila natun-an.

Nalipay kami nga buligan ang mga tawo nga matun-an ang kamatuoran. Kag nagdugang pa gid ang amon kalipay sang gin-asayn kami nga mag-alagad bilang nagalakbay nga manugtatap sa bilog nga pungsod. Ginpangabay kami sang branch office sa Kenya nga libuton ang bilog nga pungsod para mabal-an kon diin nga mga lugar nagakinahanglan sang espesyal payunir. Madamo nga beses nga gin-abiabi kami sang mga tawo nga wala pa makakilala sa mga Saksi. Gin-asikaso gid nila kami sing maayo kag ginhandaan sang pagkaon.

Dayon, may ginhimo naman ako nga pagbiyahe. Halin sa Kampala, nagbiyahe ako sakay sa tren sing duha ka adlaw pakadto sa Mombasa sa Kenya. Dayon, nagsakay ako sa barko pakadto sa Seychelles, nga amo ang tawag sa grupo sang mga isla sa Indian Ocean. Sang ulihi, sugod sang 1965 asta sang 1972, nagaupod na si Barbara sa akon kon magkadto ako sa Seychelles. Sang primero, duha lang ka manugbantala ang nagaistar sa sining malayo nga lugar. Pero sang ulihi, may isa na ka grupo sang mga manugbantala diri kag nangin isa ini ka kongregasyon. Nagbiyahe man ako para bisitahan ang mga kauturan sa Eritrea, Ethiopia, kag Sudan.

Gulpi lang nga nagbag-o ang sitwasyon sa Uganda bangod ginkontrol sang isa ka grupo sang militar ang gobierno. Bangod sini, nagbudlay gid ang sitwasyon sa sulod sang mga tinuig kag nakita ko nga maayo gid sundon ang sugo sang Biblia nga ‘ihatag sa Cesar ang mga butang nga iya sang Cesar.’ (Mar. 12:17) Ginapatuman sadto nga ang tanan nga taga-iban nga pungsod nga nagaistar sa Uganda dapat magparehistro sa police station malapit sa ila ginaistaran. Gintuman namon ini dayon. Pagligad sang pila ka adlaw, sang nag-agi ako sa Kampala upod ang isa pa ka misyonero, ginpalapitan kami sang mga pulis. Grabe gid ang amon kulba. Gin-akusahan nila kami nga mga espiya kuno kami kag gindala nila kami sa headquarters sang mga pulis. Ginpaathag namon sa ila nga mga misyonero kami kag wala kami nagapanggamo. Nagsiling kami nga nakaparehistro na kami sa mga pulis, pero ginapabungulbungulan lang nila kami. Gin-aresto nila kami kag gindala sa police station malapit sa amon ginaistaran. Nakilala kami sang opisyal didto kag kabalo sia nga nakaparehistro na kami. Gani ginsilingan niya ang nag-aresto sa amon nga buy-an kami. Naumpawan gid kami sa amon kakulba.

Sadto nga tion, nakulbaan gid kami sa mga checkpoint, ilabi na kon nakainom ang mga  soldado nga magpapundo sa amon. Pero pirme kami nagapangamuyo, kag nagakadula ang amon kakulba kay ginapasugtan kami nga mag-agi sa checkpoint. Pero nasubuan gid kami kay sang 1973, ginpahalin sa Uganda ang tanan nga misyonero nga taga-iban nga pungsod.

Nagbag-o naman ang amon asaynment, kay gin-asayn kami sa Côte d’Ivoire, West Africa. Daku naman ini nga pagbag-o para sa amon. Kinahanglan namon tun-an ang bag-o nga kultura, maghambal liwat sang French, kag mag-adjust kay naghalin sa lainlain nga pungsod ang kaupod namon nga mga misyonero. Pero nakita namon liwat ang mga pagpakamaayo ni Jehova kay madamo nga mapainubuson kag sinsero nga mga tawo ang nagbaton sang maayong balita. Naeksperiensiahan namon ni Barbara nga ginatadlong ni Jehova ang amon mga banas kon nagasalig kami sa iya.

Sang ulihi, nakibot kami sang mabal-an namon nga may kanser si Barbara. Madamo nga beses kami nga nagbalikbalik sa Europe para ipabulong si Barbara. Sang 1983, narealisar namon nga indi na kami makapadayon sa amon asaynment sa Africa. Nasubuan gid kami.

Nag-alagad kami sa Bethel sa London. Sang ulihi, naglala ang kanser ni Barbara kag napatay sia. Daku gid ang nabulig sa akon sang mga kauturan sa Bethel. May isa ka mag-asawa nga nagbulig sa akon nga maka-adjust kag padayon nga magsalig kay Jehova. Sang ulihi, nakilala ko si Ann nga isa ka commuter sa Bethel. Espesyal payunir sia sang una kag palangga gid niya si Jehova. Nagpakasal kami ni Ann sang 1989, kag sugod sadto, magkaupod kami nga nag-alagad sa Bethel.

Sugod sang 1995 asta sang 2018, nag-alagad ako bilang tiglawas sang ulong talatapan (nga ginatawag anay nga zone overseer), kag nakabisita ako sa halos 60 ka pungsod. Sa tanan nga pungsod nga akon nabisitahan, nakita ko nga ginabuligan gid ni Jehova ang iya katawhan bisan ano man nga kabudlayan ang ila naeksperiensiahan.

Sang 2017, nakabalik ako sa Africa sang ginbisitahan namon ang Burundi. Nalipay gid ako nga makaupod si Ann. Una nga beses niya nga nagkadto sa sini nga pungsod kag nagdayaw gid kami kon ano na kadamo ang mga Saksi diri. Katahom sang ila Bethel, nga nagatatap sang hilikuton sang sobra 15,500 ka manugbantala. Nadumduman ko nga sang 1964, nagabantala ako sa lugar nga ginatindugan sang Bethel subong.

Nalipay gid ako sang nabaton ko ang listahan sang mga pungsod nga bisitahan ko sa 2018. Isa sa sini ang pungsod sang Côte d’Ivoire. Pag-abot namon sa Abidjan, pamatyag ko nagpauli lang ako sa amon lugar. Sang gintan-aw ko ang listahan sang numero sa telepono sang mga Bethelite, nakita ko nga ang Bethelite sa tupad sang amon guest room amo si Brother Sossou. Nadumduman ko nga sia ang city overseer sang ara ako sa Abidjan. Pero lain gali ini nga Brother Sossou. Anak na gali sia sang kilala ko.

Ginatuman gid ni Jehova ang iya promisa. Madamo ako sang kabudlayan nga naeksperiensiahan. Pero natun-an ko nga kon magsalig kita kay Jehova, tadlungon gid niya ang aton mga banas. Gusto ko gid nga padayon nga maglakat sa masanag nga banas nga magasanag pa gid sa bag-ong kalibutan.—Hulu. 4:18.