1-2. Suno sa Mateo 5:11, paano naton dapat tamdon ang mga pagtilaw?

NAGPROMISA si Jesus sa iya mga sumulunod nga mangin matuod sila nga malipayon. Pero ginsilingan man niya sila nga makaeksperiensia sila sang mga pagtilaw. (Mat. 10:22, 23; Luc. 6:20-23) Nalipay kita kay nangin disipulo kita sang Cristo. Pero ano ang batyagon naton kon pamatukan kita sang aton pamilya, hingabuton sang gobierno, ukon piliton sang aton mga kaupod sa trabaho ukon sa eskwelahan nga maghimo sing malain? Mahimo nga mabalaka gid kita.

² Para sa kalabanan nga tawo, indi posible nga mangin malipayon kon ginahingabot ka. Pero ang Pulong sang Dios nagasiling nga puede ka gihapon mangin malipayon bisan pa ginahingabot ka. Halimbawa, si disipulo Santiago nagsulat nga indi kita dapat madulaan sing paglaum kon may kabudlayan. Sa baylo, dapat kita mangin malipayon. (Sant. 1:2, 12) Kag si Jesus nagsiling nga dapat kita mangin malipayon bisan pa ginahingabot kita. (Basaha ang Mateo 5:11.) Paano kita makapabilin nga malipayon bisan pa may mga pagtilaw? Madamo kita sing matun-an sa sulat ni Santiago para sa mga Cristiano sang una. Binagbinagon naton ang pila sa sini. Una naton nga binagbinagon ang mga kabudlayan nga naeksperiensiahan sang mga Cristiano.

3. Ano ang natabo pagkatapos nangin disipulo ni Jesus si Santiago?

³ Wala magdugay pagkatapos nangin disipulo si Santiago nga utod ni Jesus sa iloy, ginhingabot ang mga Cristiano sa Jerusalem. (Binu. 1:14; 5:17, 18) Kag sang ginpatay si disipulo Esteban, madamo nga Cristiano ang nagpalagyo kag ‘nag-alaplaag sa bug-os nga mga rehiyon sang Judea kag Samaria.’ Ang iban gani sa ila nakalab-ot sa Cipre kag Antioquia. (Binu. 7:58–8:1; 11:19) Madamo nga kabudlayan ang naeksperiensiahan sang mga disipulo. Pero mapisan nila nga ginbantala ang maayong balita sa mga lugar nga ginkadtuan nila. Bangod sini, madamo nga tawo ang nangin Cristiano, gani may mga  kongregasyon na sa lugar nga sakop sang Emperyo sang Roma. (1 Ped. 1:1) Pero pagkatapos sini, madamo pa nga kabudlayan ang naeksperiensiahan sang mga Cristiano sang una.

4. Ano pa nga mga kabudlayan ang naeksperiensiahan sang mga Cristiano sang una?

⁴ Madamo nga kabudlayan ang naeksperiensiahan sang mga Cristiano sang una. Halimbawa, sang mga 50 C.E., nagmando si Emperador Claudio sa tanan nga Judiyo nga maghalin sa Roma. Gani ginbiyaan sang mga Judiyo nga nangin Cristiano ang ila mga balay kag nagsaylo sa iban nga lugar. (Binu. 18:1-3) Sang mga 61 C.E., nagsulat si apostol Pablo nga ang iya mga kauturan ginpakahuy-an sang mga tawo, ginpriso, kag ginpangkuha ang ila mga pagkabutang. (Heb. 10:32-34) Kag pareho sa iban nga mga tawo, ang pila ka Cristiano pigado man kag nagamasakit.—Roma 15:26; Fil. 2:25-27.

5. Ano nga mga pamangkot ang sabton naton?

⁵ Sang ginhimo ni Santiago ang iya sulat antes sang 62 C.E., nabal-an niya ang mga kabudlayan nga naeksperiensiahan sang iya mga kauturan. Gintuytuyan ni Jehova si Santiago nga sulatan ini nga mga Cristiano para buligan sila nga magpabilin nga malipayon bisan pa may mga problema. Binagbinagon naton ang sulat ni Santiago kag sabton naton ini nga mga pamangkot: Ngaa posible gihapon mangin malipayon ang isa ka Cristiano bisan pa may mga problema sia? Ano ang posible nga makadula sang kalipay sang isa ka Cristiano? Kag paano makabulig sa aton ang kaalam, pagtuo, kag kaisog para mangin malipayon bisan pa may mga problema?

6. Suno sa Lucas 6:22, 23, ngaa posible gihapon mangin malipayon ang isa ka Cristiano bisan pa may mga problema sia?

⁶ Para sa mga tawo, mangin malipayon lang sila kon wala sila balatian, madamo sila sing kuarta,  kag wala problema ang ila pamilya. Pero ang kalipay nga ginsambit ni Santiago sa iya sulat amo ang ginapatubas sang espiritu sang Dios, gani puede kita mangin malipayon bisan ano pa ang aton kahimtangan. (Gal. 5:22) Kon ginapahamut-an sang isa ka Cristiano si Jehova kag ginasunod niya si Jesus, mangin malipayon gid sia kag amo ini ang matuod nga kalipay. (Basaha ang Lucas 6:22, 23; Col. 1:10, 11) Ang kalipay sang isa ka Cristiano daw pareho sa kalayo sa lampara. Wala nagakaapektuhan ang kasanag sini bisan pa maghangin ukon mag-ulan. Wala man nagakaapektuhan ang aton kalipay bisan pa nagamasakit kita ukon pigado. Kag mangin malipayon kita gihapon bisan pa ginapakalain ukon ginahingabot kita sang aton pamilya ukon sang iban. Samtang ginatinguhaan sang mga nagapamatok nga dulaon ang aton kalipay, mas nagadugang pa gid ang aton kalipay. Ang mga pagtilaw sa aton pagtuo nagapamatuod nga matuod kita nga mga disipulo sang Cristo. (Mat. 10:22; 24:9; Juan 15:20) Gani nagsulat si Santiago: “Mga kauturan ko, magkalipay kamo kon nagaatubang kamo sang nanuhaytuhay nga pagtilaw.”—Sant. 1:2.

7-8. Paano nagabakod ang aton pagtuo kon may mga problema kita?

⁷ May ginsiling pa si Santiago kon ngaa handa ang mga Cristiano nga batason ang mabudlay nga mga problema. Nagsiling sia: “Ang inyo pagtuo nga natilawan sa sini nga paagi nagaresulta sang pagbatas.” (Sant. 1:3) Ang mga pagtilaw daw pareho sa kalayo nga ginagamit para himuon nga espada ang isa ka salsalon. Kon ibutang sa kalayo ang espada kag dayon ibutang sa tubig, mas nagabakod pa gid ini. Sing kaanggid, kon nabatas naton ang aton mga problema, nagabakod ang aton pagtuo. Gani si Santiago nagsulat: “Tuguti nga makapanghikot sing bug-os ang pagbatas, agod mangin bug-os kamo kag maayo sa tanan nga paagi.” (Sant. 1:4) Kon may problema kita kag nabatas naton ini, mangin malipayon gid kita kay kabalo kita nga nagapabakod ini sang aton pagtuo.

⁸ Sa sulat ni Santiago, ginsambit niya ang pila ka rason nga posible makadula sang aton kalipay. Ano ini nga mga kabudlayan, kag ano ang dapat naton himuon para mangin malipayon kita gihapon?

9. Ngaa kinahanglan naton sing kaalam?

⁹ Ang makadula sang aton kalipay: Kon indi kita kabalo sang aton himuon. Kon may mga problema kita, gusto naton magpabulig kay Jehova para makahimo kita sang mga desisyon nga makapahamuot sa iya, makapalig-on sa aton mga kauturan, kag makabulig sa aton nga mangin matutom kay Jehova. (Jer. 10:23) Kinahanglan naton ang kaalam para mabal-an naton kon ano ang dapat naton himuon kag kon ano ang dapat naton isiling sa mga nagapamatok sa aton. Kon indi kita kabalo sang dapat naton himuon, mahimo magluya ang aton buot kag posible madula dayon ang aton kalipay.

10. Suno sa Santiago 1:5, ano ang dapat naton himuon para mabaton ang kaalam?

¹⁰ Ang dapat naton himuon: Mangayo sing kaalam  kay Jehova. Para mabatas naton ang aton mga problema kag indi madula ang aton kalipay, ang una nga dapat naton himuon amo nga mangamuyo kita kay Jehova nga hatagan kita sing kaalam para makahimo kita sang maayo nga mga desisyon. (Basaha ang Santiago 1:5.) Ano ang dapat naton himuon kon pamatyag naton wala dayon ginsabat ni Jehova ang aton pangamuyo? Si Santiago nagsiling nga dapat ‘padayon kita nga magpangayo’ sa Dios. Wala natak-an si Jehova bisan pa sulitsulit kita nga mangayo sing kaalam sa iya. Indi gid sia maakig sa aton. Kon mangamuyo kita sa aton Amay sa langit sing kaalam para mabatas ang aton mga problema, “maalwan Sia nga nagahatag.” (Sal. 25:12, 13) Nabal-an niya ang aton mga problema, nasubuan sia kon nagaantos kita, kag gusto gid niya kita buligan. Nagahatag gid ini sa aton sang kalipay. Pero, paano naman kita ginahatagan ni Jehova sing kaalam?

11. Ano pa ang dapat naton himuon para mabaton ang kaalam?

¹¹ Ginahatagan kita ni Jehova sing kaalam paagi sa iya Pulong. (Hulu. 2:6) Para mabaton naton ina nga kaalam, dapat naton tun-an ang Pulong sang Dios kag ang aton mga publikasyon. Pero magluwas sa pagtuon, may dapat pa kita himuon. Dapat naton sundon ang ginapahimo sang Dios sa aton. Si Santiago nagsulat: “Mangin mga manugtuman kamo sang pulong kag indi mga manugpamati lamang.” (Sant. 1:22) Kon ginasunod naton ang laygay sang Dios, mangin mas mahidaiton kita, makatarunganon, kag maluluy-on. (Sant. 3:17) Ini nga mga kinaiya makabulig sa aton nga mabatas ang bisan ano nga problema kag indi madula ang aton kalipay.

12. Ngaa importante nga tun-an naton sing maayo ang Biblia?

¹² Ang Pulong sang Dios daw pareho sa isa ka espiho. Nagabulig ini sa aton nga mabal-an kon ano ang mga dapat naton bag-uhon kag kon paano naton ini himuon. (Sant. 1:23-25) Halimbawa, basi dali kita maakig. Sa tapos naton matun-an ang Pulong sang Dios, narealisar naton nga dapat naton punggan ang aton kaugalingon para indi kita dali  maakig. Buligan kita ni Jehova nga mangin kalmado kon ara kita sa sitwasyon nga posible kita maakig bangod sa ginhimo sang iban ukon bangod sang aton mga problema. Kon kalmado kita, mas makapamensar kita sing maayo kon ano ang dapat naton himuon kon may mga problema kita kag makabulig ini sa aton nga makahimo sang maayo nga mga desisyon. (Sant. 3:13) Gani, importante gid nga tun-an naton sing maayo ang Biblia.

13. Ngaa dapat naton tun-an ang mga halimbawa nga mabasa sa Biblia?

¹³ Kon kaisa, mabal-an lang naton ang mga dapat naton likawan kon nahimo na naton ang isa ka sala. Pero indi kinahanglan nga masakitan pa kita para makatuon. Makatuon kita kon binagbinagon naton ang mga maayo nga ginhimo sang iban kag ang mga sala nga ila ginhimo. Amo nga ginpalig-on kita ni Santiago nga tun-an ang mga halimbawa nga mabasa sa Biblia pareho nanday Abraham, Rahab, Job, kag Elias. (Sant. 2:21-26; 5:10, 11, 17, 18) Nabatas sining matutom nga mga alagad ni Jehova ang mga kabudlayan nga puede kuntani magdula sang ila kalipay. Ginapakita sang ila mga halimbawa nga buligan man kita ni Jehova nga makabatas.

14-15. Ngaa indi naton dapat pagbalewalaon kon nagaduhaduha kita?

¹⁴ Ang makadula sang aton kalipay: Kon nagaduhaduha kita sa aton ginapatihan. Kon kaisa, may ginasiling ang Biblia nga daw nabudlayan kita maghangop. Ukon lain sa ginapaabot naton ang sabat ni Jehova sa aton mga pangamuyo. Posible ini mangin rason nga magduhaduha kita. Kon balewalaon lang naton ini, magaluya ang aton pagtuo kag mahalitan ang aton kaangtanan kay Jehova. (Sant. 1:7, 8) Kag posible indi naton mabaton ang aton paglaum sa palaabuton.

¹⁵ Ginpaanggid ni apostol Pablo sa isa ka angkla ang aton paglaum sa palaabuton. (Heb. 6:19) Kon may bagyo, ang angkla nagabulig sa barko nga indi maanod kag indi makabunggo sa kabatuhan. Pero makabulig lang ang angkla kon ang kadena sini nga naangot sa barko indi mautod. Kon may tuktok ang kadena sang angkla, indi na ini mabakod. Sing kaanggid, kon nagaduhaduha kita, mahimo nga indi na mabakod ang aton pagtuo. Kag kon makaeksperiensia kita sang mga problema, indi kita dapat magduhaduha kay posible madula ang aton pagtuo kay Jehova nga tumanon niya ang iya mga promisa. Kon madula ang aton pagtuo, madulaan man kita sing paglaum. Si Santiago nagsiling nga ang isa nga nagaduhaduha “kaangay sang balod sa dagat nga ginahuyop sang hangin kag ginapalidpalid bisan diin.” (Sant. 1:6) Indi gid mangin malipayon ang amo sini nga klase sang tawo.

16. Ano ang dapat naton himuon kon nagaduhaduha kita?

¹⁶ Ang dapat naton himuon: Dulaa ang imo pagpangduhaduha kag pabakura ang imo pagtuo. Mangin kumbinsido sa imo ginapatihan. Sang panahon ni manalagna Elias, ang katawhan ni Jehova indi kumbinsido sa ila ginapatihan. Ginsilingan sila ni Elias: “Tubtob san-o pa kamo nga indi makadesisyon? Kon si Jehova ang matuod nga Dios, simbaha ninyo sia; apang kon si Baal, simbaha ninyo sia!” (1 Hari 18:21) Sa aton bahin subong, dapat kita magdesisyon gilayon. Dapat kita mag-research para mangin kumbinsido kita nga si Jehova amo ang Dios, ang Biblia amo ang iya Pulong, kag ang mga Saksi ni Jehova amo ang iya katawhan. (1 Tes. 5:21) Kon himuon naton ini, madula ang aton pagpangduhaduha kag magapabakod ini sang aton pagtuo. Puede man kita magpabulig sa mga gulang para madula ang aton pagpangduhaduha. Dapat gid naton himuon ini dayon para indi madula ang aton kalipay sa pag-alagad kay Jehova.

17. Ano ang mangin resulta kon madula naton ang aton kaisog?

¹⁷ Ang makadula sang aton kalipay: Kon magluya ang aton buot. Ang Pulong sang Dios nagsiling: “Kon maluya ang imo buot sa tion sang kalisdanan, magaluya man ang imo kusog.” (Hulu. 24:10) Ang Hebreo nga tinaga nga gin-translate ‘magluya ang buot’ mahimo man magkahulugan sing “madula ang kaisog.” Kon madula ang imo kaisog, madali lang madula ang imo kalipay.

18. Ano ang kahulugan sang pagbatas?

 ¹⁸ Ang dapat naton himuon: Magsalig kay Jehova nga hatagan ka niya sing kaisog nga magbatas. Kinahanglan naton sing kaisog para mabatas ang aton mga problema. (Sant. 5:11) Ang tinaga nga gingamit ni Santiago nga gin-translate “pagbatas” mahimo man gamiton para ilaragway ang isa ka tawo nga wala nagahalin sa iya puesto bisan ano man ang matabo. Daw pareho sia sa isa ka maisog nga soldado nga wala nagahalin sa iya puesto kag wala nagapalagyo bisan pa ginasalakay na sia sang kaaway.

19. Ano ang matun-an naton sa halimbawa ni apostol Pablo?

¹⁹ Maayo gid nga halimbawa si apostol Pablo kay nagpakita sia sing kaisog kag pagbatas. May mga tion nga nagbatyag sia nga maluya sia. Pero nabatas niya ang iya mga problema kay nagsalig sia kay Jehova nga hatagan sia sing kusog nga kinahanglan niya. (2 Cor. 12:8-10; Fil. 4:13) Kon mapainubuson kita kag batunon naton nga kinahanglan naton ang bulig ni Jehova, hatagan man niya kita sing kusog kag kaisog nga kinahanglan naton.—Sant. 4:10.

20-21. Ano ang masiguro naton?

²⁰ Sigurado kita nga ang aton mga problema indi silot halin kay Jehova. Si Santiago nagpasalig sa aton: “Kon ang isa yara sa pagtilaw, indi sia magsiling: ‘Ginatilawan ako sang Dios.’ Kay ang Dios indi matilawan paagi sa malaut nga mga butang kag wala man sia nagatilaw sa kay bisan sin-o.” (Sant. 1:13) Kon nagapati gid kita sa sini, mangin suod pa gid kita sa aton Amay sa langit.—Sant. 4:8.

²¹ Si Jehova “wala nagabag-o.” (Sant. 1:17) Ginbuligan niya ang mga Cristiano sang unang siglo nga mabatas nila ang ila mga problema kag buligan man niya kita subong. Hanuot nga mangamuyo kay Jehova nga hatagan ka niya sing kaalam, pagtuo, kag kaisog. Sabton gid niya ang imo mga pangamuyo. Sigurado gid nga buligan ka niya nga mangin malipayon gihapon bisan pa may mga pagtilaw!