1. Ano nga maayo nga kinaiya ang ginapakita sang katawhan ni Jehova?

 GINTAGNA sang Biblia nga ang katawhan sang Dios “magahalad sing kinabubut-on sang ila kaugalingon.” Buot silingon, kinabubut-on sila nga magaalagad kay Jehova kag sundon nila ang panuytoy sang iya Anak. (Sal. 110:3) Nagakatuman gid ini nga tagna subong. Kada tuig, nagabantala sing minilyon ka oras ang mapisan nga mga alagad ni Jehova. Ginahimo nila ini sing kinabubut-on kag wala sila ginasuelduhan. Ginagamit man nila ang ila tion para buligan ang ila mga kauturan, para palig-unon sila, kag para pabakuron ang ila gugma kay Jehova. Madamo nga oras ang ginagamit sang mga gulang kag mga ministeryal nga alagad sa paghanda sa ila mga bahin sa miting kag sa pag-shepherding sa ila mga kauturan. Ngaa ginahimo ini sang katawhan ni Jehova? Bangod palangga nila si Jehova kag palangga nila ang mga tawo.​—Mat. 22:37-39.

2. Base sa Roma 15:1-3, ano nga halimbawa ang ginpakita ni Jesus?

² Maayo gid nga halimbawa si Jesus sa pag-una sa kaayuhan sang iban. Ginapanikasugan gid naton nga ilugon sia. (Basaha ang Roma 15:1-3.) Madamo ang benepisyo kon ilugon naton sia. Nagsiling si Jesus: “Mas malipayon ang nagahatag sangsa nagabaton.”​—Binu. 20:35.

3. Ano ang binagbinagon naton sa sini nga artikulo?

³ Sa sini nga artikulo, binagbinagon naton ang pila sa mga sakripisyo nga ginhimo ni Jesus para buligan ang iban, kag kon paano naton sia mailog. Binagbinagon man naton kon ano ang himuon naton para mas makabulig pa gid kita sa iban.

4. Paano ginpakita ni Jesus nga ginauna niya ang kaayuhan sang iban?

⁴ Ginbuligan ni Jesus ang iban bisan pa kapoy sia. Hunahunaa ang ginhimo ni Jesus sang ginkadtuan sia sang madamo nga tawo sang ara sia sa isa ka bukid, nga posible malapit sa Capernaum. Antes sini, bilog nga gab-i nga nagpangamuyo si Jesus. Gani posible nga kapoy gid si Jesus. Pero sang nakita niya ang madamo nga tawo, naluoy sia sa mga imol kag sa mga nagamasakit. Gani gin-ayo niya sila. Pero may ginhimo pa gid sia. Ginpalig-on niya sila paagi sa isa ka pamulongpulong. Masiling naton nga isa ini sa pinakamakapalig-on nga pamulongpulong, kag gintawag ini nga Sermon sa Bukid.​—Luc. 6:12-20.

5. Sa mga tion nga kapoy ang mga ulo sang pamilya, paano nila ginailog si Jesus sa pag-una sa kaayuhan sang iban?

⁵ Kon paano ginailog sang mga ulo sang pamilya si Jesus. Imadyina ini nga halimbawa: Pag-abot sang isa ka amay sa ila balay, kapoy gid sia sa bilog nga adlaw nga pag-obra. Daw gusto niya nga indi anay sila mag-Family Worship sina nga gab-i, pero nangamuyo sia kay Jehova nga hatagan sia sang kusog para maka-Family Worship sila. Ginsabat ni Jehova ang iya pangamuyo, gani regular nila nga nahimo ang ila Family Worship. Sadto nga gab-i, nakatuon ang iya kabataan sang isa ka importante nga leksion. Natun-an nila nga ang pinakaimportante sa ila mga ginikanan amo ang pagsimba kay Jehova.

6. Maghatag sing halimbawa kon paano ginsakripisyo ni Jesus ang iya tion para buligan ang iban.

⁶ Maalwan si Jesus sa paghatag sang iya tion. Ano ayhan ang ginbatyag ni Jesus sang nabal-an niya nga ginpugutan sing ulo ang iya abyan nga si Juan nga Manugbawtismo? Posible nga grabe gid ang iya kasubo. Ang Biblia nagasiling: “Sang mabatian [ni Jesus nga ginpatay si Juan], nagsakay sia sa sakayan pakadto sa baw-ing nga lugar agod mag-isahanon.” (Mat. 14:10-13) Nahangpan naton kon ngaa gusto niya mag-isahanon. Madamo sa aton ang gusto mag-isahanon kon nasubuan kita. Pero madamo nga tawo ang una pa nga nag-abot sa baw-ing nga lugar sangsa kay Jesus. Ano ang ginhimo ni Jesus? Ginhunahuna niya kon ano ang kinahanglan sang mga tawo, kag “naluoy” sia sa ila. Nakita niya nga kinahanglan gid nila ang pagpalig-on nga halin sa Dios, gani ginpalig-on niya sila dayon. Ginhimo niya ini paagi sa ‘pagtudlo sa ila sing madamo nga butang.’​—Mar. 6:31-34; Luc. 9:10, 11.

7-8. Maghatag sing halimbawa nga nagapakita nga ginailog sang mahigugmaon nga mga gulang si Jesus.

 ⁷ Kon paano ginailog sang mahigugmaon nga mga gulang si Jesus. Nagapasalamat gid kita sa mga sakripisyo nga ginahimo sang mga gulang para sa aton kaayuhan. Wala sing ideya ang kalabanan nga kauturan sa kongregasyon parte sa tanan nga ginahimo sang mga gulang. Halimbawa, kon may emergency, ginakadtuan dayon sang mga miembro sang Hospital Liaison Committee ang ila mga kauturan nga nagakinahanglan sang bulig. Sa masami, gab-i nagakatabo ini nga mga emergency. Pero naluoy ini nga mga gulang sa ila mga kauturan nga nagakinahanglan sang bulig. Ginauna sini nga mga gulang kag sang ila pamilya ang kaayuhan sang ila mga kauturan.

⁸ Nagaboluntaryo man ang mga gulang sa pagpatindog sang mga Kingdom Hall kag iban pa nga mga pasilidad, kag nagabulig sila sa mga nahalitan sang kalamidad. Kag sa aton mga kongregasyon, madamo nga oras ang ginagamit sang mga gulang para tudluan kita, palig-unon, kag buligan. Dapat gid naton dayawon kag pasalamatan ini nga mga utod kag ang ila pamilya. Kabay pa nga pakamaayuhon ni Jehova ang ila mga pagsakripisyo. Pero dapat man mangin balanse ang mga gulang. Dapat sila maghalong nga indi maubos ang ila tion sa mga hilikuton sa kongregasyon kay basi wala na sila sang tion para atipanon ang ila pamilya.

9. Suno sa Filipos 2:4, 5, ano nga panghunahuna ang dapat ipakita sang tanan nga Cristiano?

⁹ Basaha ang Filipos 2:4, 5. Indi lang ang mga gulang ang dapat mag-ilog kay Jesus sa pag-una sa kaayuhan sang iban, kundi kita tanan. Ang Biblia nagasiling nga ‘nangin kaangay sia  sang ulipon.’ (Fil. 2:7) Hunahunaa kon ano ang aton matun-an sa sini. Gusto sang isa ka ginapabaloran nga ulipon, ukon alagad, nga himuon ang iya bug-os nga masarangan para malipay ang iya agalon. Bangod mga ulipon kita ni Jehova kag mga alagad kita sang aton mga kauturan, gusto naton nga dugangan ang aton ginahimo para kay Jehova kag para sa aton mga kauturan. Binagbinagon naton ang pila ka panugda nga makabulig sa aton nga mahimo ini.

10. Ano ang mga puede naton ipamangkot sa aton kaugalingon?

¹⁰ Usisaa ang imo panimuot. Pamangkuta ang imo kaugalingon: ‘Handa bala ako pirme magsakripisyo para buligan ang iban? Halimbawa, ano ang reaksion ko kon ginapangabay ako nga bisitahan ang tigulang nga brother ukon sugaton ang tigulang nga sister para maka-attend sia sa miting? Nagaboluntaryo bala ako dayon sa pagtinlo sang lugar nga hiwatan sang kombension ukon sa pagmentinar sang Kingdom Hall?’ Sang nagdedikar kita kay Jehova, nagpromisa kita sa iya nga gamiton naton ang tanan nga ara sa aton para alagaron sia. Gusto niya nga gamiton naton ang aton tion, kusog, kag materyal nga mga pagkabutang para buligan ang iban. Nalipay gid sia kon ginahimo naton ini para sa kaayuhan sang iban, indi para sa aton kaayuhan. Kon nakita naton nga may dapat kita pauswagon, ano ang puede naton himuon?

11. Paano makabulig ang pangamuyo para mangin handa kita pirme sa pagbulig sa iban?

¹¹ Hanuot nga mangamuyo kay Jehova. Ano abi kon narealisar mo nga may dapat ka pauswagon, pero daw indi mo man gusto magbag-o? Kon amo sini ang imo ginabatyag, hanuot nga mangamuyo kay Jehova. Mangin honest kay Jehova. Isugid sa iya kon ano gid ang imo ginabatyag, kag pangabaya sia nga hatagan ka sang “handum kag kusog nga himuon” ang dapat mo himuon.​—Fil. 2:13.

12. Paano makabulig ang mga pamatan-on nga brother nga bawtismado na?

¹² Kon isa ikaw ka pamatan-on nga brother nga bawtismado na, pangabaya si Jehova nga handumon kon paano ka mas makabulig pa gid sa kongregasyon. Sa pila ka pungsod, mas madamo ang mga gulang sangsa mga ministeryal nga alagad. Kag madamo sa sini nga mga ministeryal ang indi na pamatan-on ukon may edad na. Samtang nagauswag ang organisasyon, kinahanglan naton ang bulig sang madamo nga pamatan-on nga brother para mag-atipan sa katawhan ni Jehova. Kon handa ka nga himuon ang bisan ano nga asaynment nga ihatag sa imo, mangin malipayon ka gid. Ngaa? Bangod malipay sa imo si Jehova, mangin maayo ang imo reputasyon, kag makabulig ka sa iban.

13-14. Ano ang puede naton himuon para mabuligan naton ang aton mga kauturan? (Tan-awa ang piktyur sa kober.)

¹³ Mag-obserbar kon sin-o ang nagakinahanglan sang bulig. Ginlaygayan ni apostol Pablo ang mga Hebreo: “Indi man pagkalimti nga maghimo sing maayo kag magpaambit sa iban sing mga butang nga yara sa imo, kay nahamuot gid ang Dios sa sini nga mga halad.” (Heb. 13:16) Maayo gid ini nga laygay. Wala madugay pagkatapos mabaton sang mga Cristiano sa Judea ini nga sulat, kinahanglan nila biyaan ang ila mga balay, mga negosyo, kag mga paryente nga indi Cristiano para “magpalagyo sa mga bukid.” (Mat. 24:16) Sadto nga tion, importante gid nga magbuligay sila. Gani ginlaygayan sila ni Pablo nga hatagan kag buligan ang mga nagakinahanglan. Kon gin-aplikar nila ini antes pa sila nagpalagyo, posible gid nga nahapusan sila mag-adjust sa simple nga kabuhi sang ara na sila sa ila ginpalagyuhan nga lugar.

¹⁴ May mga tion nga wala ginasugid sang aton mga kauturan nga kinahanglan nila ang bulig. Halimbawa, ibutang ta nga napatay ang asawa sang isa ka brother. Basi puede naton sia lutuan,  sugaton kag idul-ong kon may kaladtuan sia, ukon buligan sia sa pila ka ulubrahon sa balay. Posible nga indi sia magsiling nga kinahanglan niya ang bulig kay indi niya gusto nga magpabug-at sa aton. Pero sigurado gid nga malipay sia kon buligan naton sia bisan pa wala sia nangayo sang bulig. Indi naton paghunahunaon nga indi na lang kita magbulig kay may mabulig man sa iya, kag indi man naton paghunahunaon nga hulaton lang naton nga mangayo sia sang bulig. Pamangkuta ang imo kaugalingon, ‘Kon ako ang sa iya sitwasyon, ano ang kinahanglan ko gid?’

15. Ano ang dapat naton himuon para makabulig kita sa iban?

¹⁵ Ipabatyag sa iban nga mahapos ka palapitan. Sigurado gid nga may mga utod sa aton kongregasyon nga handa pirme magbulig sa iban. Wala nila ginapabatyag sa aton nga nagapabug-at kita sa ila. Sigurado kita nga handa gid sila pirme nga buligan ang mga nagakinahanglan, kag gusto gid naton sila ilugon. Binagbinaga ang ginsiling sang 45 anyos nga gulang nga si Alan. Gusto niya nga indi matahap ang mga kauturan sa iya. Parte sa halimbawa ni Jesus, nagsiling sia: “Masako si Jesus, pero wala natahap nga mangayo sang bulig sa iya ang mga tawo bisan ano man ang ila edad. Kabalo sila nga nagaulikid gid sia sa ila. Gusto ko ilugon si Jesus nga mahapos palapitan, mainabyanon, kag mapinalanggaon.”

16. Paano makabulig ang Salmo 119:59, 60 para mailog naton sing maayo ang halimbawa ni Jesus?

¹⁶ Indi naton mailog sing perpekto si Jesus, pero indi kita dapat maluyahan sing buot. (Sant. 3:2) Kon ang isa ka tawo nagatuon pa lang sa pagdrowing, indi niya perpekto nga mailog ang obra-maestra sang nagatudlo sa iya nga sagad na magdrowing. Pero magauswag sia sa iya pagdrowing kon tinguhaan niya nga bag-uhon ang iya indi husto nga paagi sa pagdrowing, kag kon panikasugan niya nga ilugon sing maayo ang nagatudlo  sa iya. Kon iaplikar man naton ang aton natun-an sa aton pagtuon sang Biblia kag kon panikasugan gid naton nga bag-uhon ang mga dapat naton bag-uhon, mailog man naton sing maayo ang halimbawa ni Jesus.​—Basaha ang Salmo 119:59, 60.

17-18. Ano ang mga benepisyo kon ilugon naton si Jesus nga handa unahon ang kaayuhan sang iban?

¹⁷ Kon makita sang iban nga handa kita pirme magbulig, mapalig-on sila nga himuon man ini. Ang isa ka gulang nga si Tim nagsiling: “May pila ka brother sa amon kongregasyon nga mga ministeryal na subong bisan pamatan-on pa lang sila. Ang isa nga nagpalig-on sa ila amo ang nakita nila nga halimbawa sang mga kauturan nga handa pirme magbulig sa iban. Gusto nila ilugon ini nga mga kauturan. Daku gid ang bulig sini nga mga pamatan-on sa amon kongregasyon kag sa mga gulang.”

¹⁸ Madamo nga tawo subong ang ginauna ang ila kaayuhan. Pero indi pareho sa ila ang katawhan ni Jehova. Napalig-on kita sa halimbawa ni Jesus nga handa unahon ang kaayuhan sang iban, kag gusto gid naton sia ilugon. Indi naton sia mailog sing perpekto, pero ‘masunod naton sing maayo ang iya mga tikang.’ (1 Ped. 2:21) Kon ginahimo naton ang aton bug-os nga masarangan nga ilugon si Jesus nga handa unahon ang kaayuhan sang iban, mangin malipayon kita kay kabalo kita nga nalipay sa aton si Jehova.