Natawo ako sang 1941 sa Paris, France. Indi manggaranon ang amon pamilya. Nanamian ako magtuon, gani nasubuan gid ako sang nag-untat ako sa pag-eskwela sang dies anyos ako kay nagmasakit ako sang tuberculosis. Nagsiling ang mga doktor nga dapat magpahuway lang ako sa balay kay maluya ang akon baga. Gani sa sulod sang pila ka bulan, pirme ko ginabasa ang dictionary kag nagapamati ako sa mga programa sa radyo sang University of Paris nga ginatawag Radio Sorbonne. Sang ulihi, nagsiling ang mga doktor nga ayo na ako kag puede na ako makaeskwela liwat. Grabe gid ang akon kalipay! Nahunahuna ko, ‘Kanami gid sang ginahimo sang mga doktor!’ Sugod sadto, ginhandum ko nga buligan ang mga tawo paagi sa pag-ayo sa ila mga balatian. Kon pamangkuton gani ako sang akon amay kon ano ang gusto ko nga obra sa ulihi, nagasabat ako, “Gusto ko mangin doktor.” Amo lang ini pirme ang akon sabat. Gani nangin pinakaimportante sa akon kabuhi ang akon handum nga mangin doktor.

Katoliko ang amon pamilya. Pero diutay lang ang akon nabal-an parte sa Dios, kag madamo ako sing ginapaligban nga mga pamangkot. Sang nag-eskwela ako sing medicine sa isa ka unibersidad, nakumbinsi ako nga may ara gid sang nagtuga sang tanan nga butang.

Nadumduman ko ang pinakauna nga tion nga gintan-aw ko sa microscope ang mga cell sang tanom nga tulip. Nagdayaw gid ako sa reaksion sang mga cell sa init kag tugnaw. Naobserbahan ko man nga nagagamay ang cytoplasm (isa ka substance sa sulod sang cell) kon ibutang ini sa tubig nga  may asin, pero nagadaku ini kon ibutang ini sa matinlo nga tubig. Pila lang ini sa madamo nga reaksion nga makita bisan sa pinakagamay nga buhi nga mga butang. Bangod sini, mabuhi sila sa nagabag-obag-o nga palibot. Sang natun-an ko ang dalayawon nga pagkadesinyo sang mga cell, nakumbinsi ako nga may nagtuga gid sa sini.

Sa ikaduha ko nga tuig sa medicine, nakita ko ang dugang nga mga pamatuod nga may ara gid sang Dios. Sa amon mga klase sa anatomy, natun-an namon nga ang desinyo sang aton butkon amo ang nagapaposible para mahulaghulag naton ang aton mga tudlo. Dalayawon gid ang pagbuligay sang mga muscle, ligament, kag tendon. Halimbawa, natun-an ko nga may tendon nga nagakonek sang muscle sa butkon kag sang ikaduha nga tul-an sa tudlo. Nagatunga ini nga tendon para makaagi ang isa pa ka tendon pakadto sa punta sang tudlo. Daw halos nagatapik ini nga mga tendon sa mga tul-an sang tudlo. Kon indi amo sini ang pagkadesinyo sa aton mga tudlo, magapalanghugot ang mga tendon kag indi naton mahulaghulag sing maayo ang aton mga tudlo. Para sa akon, maalam gid ang nagdesinyo sang aton lawas.

Mas nagdayaw pa gid ako sa Manunuga sang natun-an ko kon ano ang proseso para makaginhawa ang bag-ong bun-ag nga bata. Samtang ginabusong ang bata, indi niya kinahanglan magginhawa kay may ara oxygen nga nagahalin sa iya iloy nga nagaagi sa umbilical cord. Gani wala pa sing sulod nga hangin ang parte sang baga nga ginatawag nga mga alveolus, nga daw gamay nga mga balloon ang hitsura. Pero mga pila ka semana antes ibun-ag ang bata, ginakulapan sang likido nga ginatawag surfactant ang sulod sang mga alveolus. Dayon kon mabun-ag na ang bata, dalayawon gid ang nagakatabo sa una niya nga pagginhawa. Nagasira ang buho sa tagipusuon sang bata, gani nagadiretso sa baga ang dugo. Nagabulig ang surfactant para indi magtapikanay ang sulod sang mga alveolus, gani madasig ini nga masudlan sang hangin. Paagi sa sini, makaginhawa na ang bata.

Gusto ko makilala kon sin-o ang nagdesinyo sining dalayawon nga mga proseso, gani ginbasa ko sing maayo ang Biblia. Nagdayaw ako sa mga kasuguan parte sa katinlo nga ginhatag sang Dios sa mga Israelinhon sobra na 3,000 ka tuig ang nagligad. Ginsugo niya sila nga ilubong ang ila mga higko, pirme manghinaw kag maligo, kag ikuarentina ang may sintomas sang makalalaton nga balatian. (Lev. 13:50; 15:11; Deut. 23:13) Sining nagligad lang nga 150 ka tuig nadiskobrehan sang mga scientist kon paano nagalapta ang mga balatian, pero dalayawon gid nga madugay na nga ginsulat sa Biblia ang parte sa sini. Nagdayaw man ako sa mga kasuguan parte sa sex nga mabasa sa Levitico kay nakaamlig ini sa pungsod sang Israel sa madamo nga sakit. (Lev. 12:1-6; 15:16-24) Bangod sini, nahangpan ko nga para sa kaayuhan sang mga Israelinhon ang mga kasuguan nga ginhatag sa ila sang Manunuga, kag ginpakamaayo niya ang mga nagtuman sa iya mga sugo. Nakumbinsi ako nga halin gid sa Dios ang mga ginsulat sa Biblia, pero indi ko pa sia kilala sadto nga tion.

Samtang nagaeskwela ako sing medicine sa unibersidad, nakilala ko si Lydie kag naluyag ako sa iya. Nagpakasal kami sang 1965, pero sige pa sadto ang akon pag-eskwela. Sang 1971, tatlo na ang amon bata. Pero sang ulihi, nadugangan pa gid ini sing tatlo. Ginasuportahan gid ako pirme ni Lydie sa akon ginahimo bilang doktor kag sa amon pamilya.

 Tatlo ka tuig ako nga nag-obra sa ospital antes ako nagbukas sang akon clinic. Sang ulihi, may nagpakonsulta nga isa ka mag-asawa, nga ginsambit ko sa umpisa. Sang resetahan ko na ang bana, nagsiling ang asawa: “Dok, palihug wala lang dugo ang ireseta mo nga bulong.” Nakibot ako sa iya ginsiling, gani ginpamangkot ko sia: “Ngaa haw?” Nagsabat sia: “Mga Saksi ni Jehova kami, Dok.” Bag-o lang ako kabati sang relihion nga Saksi ni Jehova, kag wala ako sing ideya sa ila mga ginatudlo parte sa dugo. Ginkuha sang asawa ang iya Biblia kag ginpakita niya sa akon ang teksto nga ginbasihan sang ila ginatudlo parte sa dugo. (Binu. 15:28, 29) Dayon ginpaathag niya kag sang iya bana nga dulaon sang Ginharian sang Dios ang pag-antos, mga balatian, kag kamatayon. (Bug. 21:3, 4) Nalipay gid ako sa nabatian ko, gani nagsiling ako: “Ang ginasugid ninyo sa akon amo gid ang ginahandum ko nga matabo halin sang bata pa ako! Gusto ko gid mabuligan ang mga nagaantos bangod sa balatian, gani ginpanikasugan ko gid nga mangin doktor.” Bangod sang akon kalipay, mga isa ka oras kag tunga kami nga nag-istoryahanay. Paghalin sang mag-asawa, nabatyagan ko nga indi ko na gusto magsimba sa Katoliko, kag natun-an ko nga Jehova ang ngalan sang Manunuga nga ginadayaw ko gid.

Tatlo ka beses ko nga naistorya ang mag-asawa nga Saksi sa akon clinic, kag sobra pirme sa isa ka oras ang amon pag-istoryahanay. Ginpakadto ko sila sa balay para makaistoryahanay kami sing mas malawig parte sa Biblia. Nag-upod man si Lydie sa amon pag-Bible study, pero indi niya mabaton nga sala ang pila ka panudlo sang Katoliko. Gani gin-imbitar ko ang isa ka pari nga magkadto sa amon balay. Gusto ko nga pamatud-an niya gamit lang ang Biblia ang parte sa mga ginatudlo sa simbahan. Gab-i na katama natapos ang amon diskusyon. Bangod sini, nakumbinsi si Lydie nga kamatuoran ang ginatudlo sang mga Saksi ni Jehova. Amat-amat nga nagbakod ang amon gugma kay Jehova nga Dios kag nagpabawtismo kami sang 1974.

Sang natun-an ko ang parte sa katuyuan sang Dios para sa mga tawo, nagbag-o ang akon prioridad sa kabuhi. Ang pag-alagad kay Jehova amo na ang pinakaimportante sa amon ni Lydie. Ginpanikasugan gid namon nga gamiton ang mga prinsipio sa Biblia sa pagpadaku sa amon kabataan. Gintudluan namon sila nga higugmaon ang Dios kag ang mga tawo. Bangod sini, mas nagsuod pa gid ang amon pamilya.—Mat. 22:37-39.

Kon parte sa paghanas sa kabataan, pirme pareho ang desisyon namon ni Lydie. Naham-ot kami kon madumduman namon ang epekto sini sa amon kabataan. Kabalo sila nga dapat sundon sa amon pamilya ang ginsiling ni Jesus nga “ang inyo ‘Huo’ mangin huo, ang inyo ‘Indi,’ indi.” (Mat. 5:37) Halimbawa,  nadumduman ko ang natabo sa isa namon ka bata nga babayi sang 17 anyos pa lang sia. Naglisensia sia nga maglagaw upod sa pila ka pamatan-on, pero wala nagpasugot si Lydie. Ginsilingan sia sang isa ka pamatan-on, “Kon indi magsugot si Mama mo, kay Papa mo ka lisensia eh!” Pero nagsabat ang amon bata: “Pareho ’na ’ya pirme ang desisyon ni Papa kag ni Mama. Wala ’na sila ’ya nagakontrahanay.” Nakita sang amon anom ka bata nga kon parte sa mga prinsipio sa Biblia, pareho gid pirme ang amon desisyon ni Lydie. Nagapasalamat gid kami kay Jehova kay madamo sa amon pamilya ang nagaalagad man sa iya subong.

Bisan pa ginbag-o sang kamatuoran ang akon prioridad, gusto ko man gamiton ang akon propesyon bilang doktor para buligan ang katawhan sang Dios. Gani nagboluntaryo ako sa Bethel sa Paris, kag sang ulihi sa bag-o nga Bethel sa Louviers. Mga 50 ka tuig na ako nga nagaboluntaryo sa Bethel bilang isa ka commuter. Nalipay ako nga nangin suod ko nga abyan ang madamo nga Bethelite, nga ang pila sa ila nobentahon na. Isa ka adlaw, nalipay man ako sang nakilala ko ang isa ka bag-o nga Bethelite. Ako gali sadto ang doktor sang ginbata sia ni Mama niya 20 ka tuig na ang nagligad.

Nakita ko kon paano ginagiyahan kag ginaamligan ni Jehova ang iya katawhan paagi sa iya organisasyon, gani mas ginpalangga ko pa gid si Jehova. Sang mga 1980, may ginhimo nga programa sa United States ang Nagadumala nga Hubon. Ginhimo ini para mabuligan ang mga doktor kag mga medical personnel nga mas maintiendihan sing maayo ang ila mga pasyente nga Saksi.

Dayon sang 1988, naghimo ang Nagadumala nga Hubon sang isa ka bag-o nga department sa Bethel nga gintawag Hospital Information Services. Sang primero, gindumalahan sini nga department ang mga Hospital Liaison Committee (HLC) nga ginhimo sa United States. Ginhimo ang HLC para mabuligan ang mga Saksi nga makakita sang mga doktor nga nagarespeto sang aton desisyon nga indi magpatughong sang dugo. Sang ulihi, naghimo man sang mga HLC sa iban nga mga pungsod, lakip na sa France. Nagdayaw gid ako sa pagpalangga kag pagbulig sang organisasyon ni Jehova sa mga kauturan nga nagamasakit.

Sang una, pinakaimportante gid sa akon ang akon propesyon bilang doktor. Pero sang gin-usisa ko ang akon mga prioridad, nahangpan ko nga ang pinakaimportante sa tanan amo ang pagbulig sa mga tawo para makilala nila kag maalagad si Jehova nga Dios nga naghatag sa aton sang kabuhi. Sang nagretiro ako, nagregular payunir kami ni Lydie. Gani kada bulan, madamo nga oras ang amon ginagamit sa pagbantala sang maayong balita sang Ginharian. Ginahimo namon gihapon ang amon bug-os nga masarangan sa sini nga hilikuton nga nagaluwas sang kabuhi.

Nagabulig ako gihapon sa mga nagamasakit para maumpawan sila sa ila ginabatyag. Pero narealisar ko nga indi masarangan bisan sang pinakamaayo nga doktor nga ayuhon ang tanan nga balatian ukon ang pagdula sang kamatayon. Gani ginahandum ko gid ang bag-ong kalibutan nga wala na sing kasakit, balatian, kag kamatayon. Malapit na gid ini mag-abot. Sa sina nga tion, puede ko na tun-an asta sa wala sing katapusan ang parte sa mga tinuga sang Dios, pati na ang dalayawon nga desinyo sang aton lawas. Wala pa natuman sing bug-os ang ginahandum ko halin sang bata pa ako, pero kumbinsido ako nga matuman gid ini sa palaabuton.