1. Para kay Jehova, daw ano ka hamili ang aton kabuhi?

 IMADYINA nga ginhatagan ka sang isa mo ka abyan sang daan nga painting. Naglus-aw na ang kolor sini kag may mga mantsa na kag mga crack. Pero bisan pa sini, milyon ang bili sini nga painting. Gani sigurado nga pabaloran mo gid ini kag proteksionan. Sing kaanggid, ginhatagan man kita ni Jehova sang hamili nga regalo nga amo ang aton kabuhi. Ang matuod, hamili gid kay Jehova ang aton kabuhi amo nga ginhatag niya ang iya Anak bilang gawad para sa aton.—Juan 3:16.

2. Suno sa 2 Corinto 7:1, ano ang gusto ni Jehova nga himuon naton?

² Si Jehova ang naghatag sa aton sang kabuhi. (Sal. 36:9) Nagapati sa sini si apostol Pablo amo nga nagsiling sia: “Paagi sa iya, may kabuhi kita kag nagahulag kag nagaluntad.” (Binu. 17:25, 28) Gani masiling naton nga ang aton kabuhi isa ka regalo halin sa Dios. Bangod palangga niya kita, ginhatagan niya kita sang tanan naton nga kinahanglan para mabuhi kita. (Binu. 14:15-17) Pero wala nagamilagro si Jehova para proteksionan ang aton kabuhi. Sa baylo, gusto niya nga himuon naton ang aton bug-os nga masarangan para mangin mapagros kita pirme kag padayon kita nga mag-alagad sa iya. (Basaha ang 2 Corinto 7:1.) Ngaa dapat naton tinguhaan nga mangin mapagros pirme kag proteksionan ang aton kabuhi, kag paano naton ini mahimo?

3. Ano ang isa ka rason kon ngaa dapat naton tinguhaan nga mangin mapagros pirme?

³ Ari ang isa ka rason kon ngaa dapat naton tinguhaan nga mangin mapagros pirme: Gusto naton nga alagaron si Jehova sa bug-os naton nga masarangan. (Mar. 12:30) Gusto naton nga ipresentar ang aton “lawas nga isa ka halad nga buhi, balaan kag kalahamut-an sa Dios,” gani ginalikawan naton ang mga puede mangin rason nga magmasakit kita. (Roma 12:1) Siempre, kabalo  kita nga bisan ano pa ang himuon naton, indi gid naton malikawan nga magmasakit. Pero, ginatinguhaan gid naton nga mangin mapagros pirme kay gusto naton ipakita sa aton Amay sa langit nga ginapabaloran naton ang aton kabuhi nga ginregalo niya sa aton.

4. Ano ang gusto himuon ni Hari David?

⁴ Ginpaathag ni Hari David kon ngaa ginapabaloran niya ang kabuhi nga regalo sang Dios. Nagsiling sia: “Ano bala ang kapuslanan sang akon kamatayon, sang akon pagpanaug sa buho? Dayawon ka bala sang yab-ok? Magasugid bala ini sang imo pagkamasaligan?” (Sal. 30:9) Posible nga ginsulat ini ni David sang dali na lang sia mapatay. Pero gusto niya gihapon nga padayon nga mabuhi kag mangin mapagros para madayaw niya si Jehova. Sigurado nga amo man sini ang gusto naton tanan nga himuon.

5. Bisan pa tigulang na kita ukon nagabalatian, ano ang puede gihapon naton mahimo?

⁵ Madamo kita sang masarangan himuon sang una, pero bangod sang balatian kag katigulangon, posible nga indi na naton ini mahimo subong. Bangod sini, basi masubuan kita kag maluyahan sang buot. Pero dapat naton gihapon tinguhaan nga mangin mapagros pirme. Ngaa? Bangod pareho kay Hari David, madayaw gihapon naton si Jehova bisan pa may balatian kita ukon tigulang na kita. Makapaumpaw gid mahibaluan nga bisan pa amo sini ang aton sitwasyon, hamili kita gihapon sa aton Dios. (Mat. 10:29-31) Kag bisan pa mapatay kita, handum gid niya nga banhawon kita. (Job 14:14, 15) Gani, dapat gid naton himuon ang aton bug-os nga masarangan nga mangin mapagros pirme kag proteksionan ang aton kabuhi.

6. Ano ang gusto ni Jehova nga himuon naton parte sa aton pagkaon kag pag-inom sing alak?

⁶ Ang Biblia indi isa ka libro parte sa kapagros ukon parte sa pagkaon, pero ginasugid sang Biblia kon ano ang gusto ni Jehova nga himuon naton parte sa sini. Halimbawa, ginalaygayan niya kita nga “isikway ang mga butang nga makahalalit” sa aton lawas. (Man. 11:10) Ginasilingan man kita sang Biblia nga indi kita dapat mangin sobra ka palakaon ukon mangin palainom sing alak kay makahalit ini sa aton panglawas kag posible ini bangdan sang aton kamatayon. (Hulu. 23:20) Gusto ni Jehova nga kontrolon naton ang aton pagkaon kag ang aton pag-inom sing alak.—1 Cor. 6:12; 9:25.

7. Paano makabulig sa aton ang laygay sa Hulubaton 2:11 para makahimo kita sang maayo nga mga desisyon parte sa aton kapagros?

⁷ Kon gamiton naton ang aton ikasarang sa paghunahuna sing maayo, mapakita naton sa aton mga desisyon nga ginapabaloran naton ang kabuhi nga regalo sang Dios sa aton. (Sal. 119:99, 100; basaha ang Hulubaton 2:11.) Halimbawa, dapat naton pamensaran sing maayo kon ano ang aton kaunon. Posible nga may nanamitan kita nga pagkaon, pero kon puede ini bangdan nga magmasakit kita, indi naton ini dapat pagkaunon. Mapakita man naton nga nagahunahuna kita sing maayo kon nagatulog kita sang bastante, regular kita nga naga-exercise, kag ginatinguhaan naton nga pirme matinlo ang aton lawas kag ang aton balay.

8. Suno sa Biblia, daw ano ka importante kay Jehova nga maghalong kita pirme?

⁸ May ginhatag si Jehova nga mga kasuguan sa mga Israelinhon para malikawan ang mga aksidente sa ila balay ukon kon nagaobra sila. (Ex. 21:28, 29; Deut. 22:8) Kon aksidente nga napatay sang isa ka Israelinhon ang isa ka tawo, indi gid maayo ang epekto sini sa iya kabuhi. (Deut. 19:4, 5) Ginapatuman sang Kasuguan nga bisan pa indi hungod nga nahalitan sang isa ka tawo ang wala pa mabun-ag nga lapsag, dapat sia gihapon silutan. (Ex. 21:22, 23) Gani maathag nga  ginapakita sang Kasulatan nga gusto ni Jehova nga tinguhaan naton nga maghalong pirme para malikawan ang mga aksidente.

9. Ano ang puede naton himuon para malikawan ang mga aksidente? (Tan-awa man ang mga piktyur.)

⁹ Mapakita naton nga ginapabaloran naton ang kabuhi nga regalo sang Dios sa aton kon nagahalong kita pirme sa aton balay kag sa aton ulubrahan para malikawan ang mga aksidente. Halimbawa, kon may ihaboy kita nga taliwis ukon matalom nga mga butang, makahalalit nga mga kemikal, ukon mga bulong, dapat naton siguraduhon nga indi ini makahalit sa iban. Dapat man naton siguraduhon nga indi ini malab-ot sang mga bata. Dapat man kita maghalong kon may ginaobra kita nga nagagamit sang kalayo, kon may ginauyatan kita nga delikado pareho sang ininit nga tubig, kag kon nagagamit kita sang mga power tool. Kag indi naton ini dapat pagbiyaan nga wala sing may nagabantay ukon wala nahimos. Kon delikado para sa aton nga magdrayb pagkatapos naton magtomar sang bulong, mas maayo nga indi na lang kita magdrayb. Indi man kita dapat magdrayb kon nakainom kita ukon kon natuyo kita. Kag dapat naton likawan ang paggamit sang aton mga cell phone kon nagadrayb kita.

10. Ano ang puede naton himuon antes kag sa tion sang trahedya?

¹⁰ Kon kaisa, may delikado nga mga sitwasyon nga indi naton mapunggan nga matabo pareho sang kalamidad, epidemic, kag mga inaway. Pero may mahimo kita para makaluwas sa sini nga mga sitwasyon. Importante gid ang pagsunod sa mga sugo sang gobierno pareho sang pagbakwit dayon kag pagsunod sa ginapatuman nga curfew. (Roma 13:1, 5-7) May mahimo kita para mahandaan ang pila ka trahedya, gani sunda gid ang tanan nga ginapatuman sang gobierno antes pa ini mag-abot. Halimbawa, puede kita makapreparar sing abanse sang tubig, pagkaon, kag sang mga bulong nga dugay pa ma-expire.

11. Kon may nagalapta nga makalalaton nga balatian sa aton lugar, ano ang dapat naton himuon?

¹¹ Ano ang himuon naton kon may nagalapta nga makalalaton nga balatian sa aton lugar? Dapat naton sundon ang mga ginapatuman sang gobierno pareho sang pagpanghinaw sang kamot, pagdistansia sa iban, pagsuksok sang mask, kag pag-quarantine. Kon ginahimo naton ini, ginapakita naton nga ginapabaloran gid naton ang kabuhi nga regalo sang Dios sa aton.

12. Paano makabulig sa aton ang Hulubaton 14:15 kon ano nga mga impormasyon ang dapat naton pamatian sa tion sang trahedya?

¹² Kon may trahedya nga matabo, posible makabati kita sang indi matuod nga mga impormasyon halin sa aton mga abyan, mga kaingod, ukon sa mga balita. Imbes nga magpati kita dayon sa “bisan ano nga mabatian” naton, dapat naton pamatian ang pinakamasaligan nga mga impormasyon halin sa gobierno kag mga doktor. (Basaha ang Hulubaton 14:15.) Antes maghatag sang mga instruksion ang Nagadumala nga Hubon kag ang mga branch office parte sa aton mga miting kag pagbantala, ginasigurado gid anay nila nga husto ang mga impormasyon nga ila nakuha. (Heb. 13:17) Kon sundon naton ini nga mga instruksion, maproteksionan naton ang aton kaugalingon kag ang iban. Kag posible nga dayawon sang iban ang mga Saksi ni Jehova.—1 Ped. 2:12.

13. Paano naton mapakita nga ginasunod naton ang sugo ni Jehova parte sa dugo?

¹³ Para sa mga Saksi ni Jehova, balaan ang dugo. Madamo nga tawo ang nakabalo nga amo sini ang ila ginapatihan. Kon may emergency, wala kita nagapatughong sang dugo kay ginasunod naton ang sugo ni Jehova sa aton parte sa dugo. (Binu. 15:28, 29) Pero, indi buot silingon nga gusto naton nga mapatay na lang. Kay man, ginapabaloran gid naton ang kabuhi nga regalo sang Dios sa aton. Gani, nagapangita kita sang mga doktor nga handa magbulong sa aton nga indi kinahanglan magpatughong sang dugo.

14. Ano ang himuon naton para malikawan naton nga magmasakit sing grabe kag maaksidente nga kinahanglan sang operasyon?

¹⁴ Kon tinguhaan naton nga mangin mapagros paagi sa pagsunod sa mga panugda nga ginbinagbinag naton sa sini nga artikulo, mahimo nga malikawan naton nga magmasakit sing grabe nga posible kinahanglan sang operasyon. Kag kon mapagros kita, mas madasig kita mag-ayo kon kinahanglan gid man naton operahan. Isa pa, kon ginasigurado naton nga nahimos ang mga butang nga posible bangdan sang aksidente sa aton balay ukon sa aton ulubrahan, kag kon ginasunod naton ang mga kasuguan nga dapat sundon sang mga drayber, daku ang tsansa nga malikawan naton ang aksidente nga kinahanglan sang operasyon.

15. (a) Ngaa importante nga na-update naton ang aton durable power of attorney kag ginadala naton ini pirme? (Tan-awa man ang piktyur.) (b) Pareho sang makita sa video, paano kita makahimo sang husto nga desisyon parte sa pagpabulong nga nagagamit sang dugo?

¹⁵ Bangod ginapabaloran naton ang aton  kabuhi, nagapil-ap kita sang durable power of attorney (advance health-care directive) kag pirme naton ini ginadala. b Paagi sa sini nga dokumento, mabal-an sang iban kon ano ang aton desisyon parte sa pagpatughong sang dugo kag iban pa nga klase sang pagpabulong. Na-update mo na bala ang imo durable power of attorney? Kon wala ka pa nakapil-ap sini ukon kon kinahanglan mo ini i-update, himua ini dayon. Kon nakapil-ap kita sini, indi maatrasar ang pagbulong sa aton kay indi na naton kinahanglan magpaathag sa aton mga doktor parte sa aton desisyon. Makabulig man ini sa mga doktor para mabal-an nila kon ano nga mga bulong ang may indi maayo nga reaksion sa aton lawas. c

16. Ano ang himuon naton kon indi kita sigurado kon paano pil-apan ang durable power of attorney?

¹⁶ Bisan ano man ang aton edad ukon bisan daw ano man kita kapagros, tanan kita puede maaksidente ukon magmasakit. (Man. 9:11) Gani, maalamon gid kon magpil-ap kita sang durable power of attorney. Kon indi ka sigurado kon paano pil-apan ini nga dokumento, magpabulig sa mga gulang sa inyo kongregasyon. Kabalo sila kon paano ini pil-apan, pero indi sila  ang magadesisyon para sa imo parte sa pagpabulong. Imo ini responsibilidad. (Gal. 6:4, 5) Pero puede ka nila buligan para mahangpan mo ang imo mga pililian kon magpil-ap ka sini nga dokumento.

17. Paano naton mapakita nga makatarunganon kita kon parte sa pagpabulong?

¹⁷ Kinahanglan naton maghimo sang mga desisyon parte sa kapagros kag pagpabulong, kag madamo sa sini ang ginabase naton sa aton mga natun-an sa Biblia. (Binu. 24:16; 1 Tim. 3:9) Kon nagadesisyon kita kag kon ginaistorya naton sa iban ang aton desisyon, dapat naton dumdumon ang prinsipio sa Filipos 4:5: “Ipakita sa tanan nga tawo ang inyo pagkamakatarunganon.” Kon makatarunganon kita, wala kita nagakabalaka sing sobra sa aton kapagros, kag wala man naton ginapilit sa iban ang aton opinyon. Bisan pa lain ang ila desisyon sa aton desisyon, dapat naton gihapon ipakita ang gugma kag pagtahod sa aton mga kauturan.—Roma 14:10-12.

18. Paano naton mapakita nga nagapasalamat kita sa kabuhi nga regalo sa aton?

¹⁸ Si Jehova ang naghatag sa aton sang kabuhi. Mapakita naton nga nagapasalamat kita sa iya kon ginaproteksionan naton ang aton kabuhi kag ginahimo naton ang aton bug-os nga masarangan sa pag-alagad sa iya. (Bug. 4:11) Subong, posible kita magmasakit kag makaeksperiensia sang mga trahedya. Pero indi amo sini ang gusto sang aton Manunuga nga maeksperiensiahan naton. Sa indi madugay, hatagan niya kita sang kabuhi nga wala sing katapusan nga wala na sing pag-antos. (Bug. 21:4) Samtang ginahulat naton nga matabo ini, nalipay kita nga gamiton ang aton kabuhi para sa pag-alagad sa aton mahigugmaon nga Amay sa langit, si Jehova.