1. San-o dal-on sa langit ang tanan nga hinaplas nga ari pa sa duta?

 PILA ka tuig na ang nagligad, ginapaligban sang katawhan ni Jehova ini nga pamangkot: ‘San-o dal-on sa langit ang tanan nga hinaplas nga ari pa sa duta?’ Sang una, nahunahuna naton nga posible may mabilin pa nga mga hinaplas sa duta pagkatapos sang Armageddon kag magaistar pa sila sa Paraiso sa sulod sang malip-ot nga tion. Pero sa Hulyo 15, 2013, nga Ang Lalantawan, natun-an naton nga dal-on sa langit ang tanan nga hinaplas nga ari pa sa duta antes magsugod ang Armageddon.​—Mat. 24:31.

2. Ano ang posible ipamangkot sang iban, kag ano ang binagbinagon naton sa sini nga artikulo?

² Pero, posible mamangkot ang iban: Ano ang matabo sa “iban nga mga karnero” sang Cristo nga padayon nga nagaalagad sing matutom kay Jehova sa tion sang “dakung kapipit-an”? (Juan 10:16; Mat. 24:21) Posible nabalaka ang iban kay basi wala na sing magapanguna sa ila kon dal-on na sa langit ang aton pinalangga nga mga hinaplas. Binagbinagon naton ang duha ka kasaysayan sa Biblia nga posible amo ang rason kon ngaa nahunahuna nila ini. Dayon binagbinagon naton ang mga rason kon ngaa indi kita dapat mabalaka.

ANO ANG INDI MATABO SA “IBAN NGA MGA KARNERO”?

3-4. Ano ang mahimo ginakabalak-an sang iban, kag ngaa?

³ Mahimo nabalaka ang iban kay basi magauntat sa pag-alagad kay Jehova ang iban nga mga karnero kon wala na ang mga miembro sang Nagadumala nga Hubon nga magapanguna sa ila. Posible nahunahuna nila ini bangod sang pila ka kasaysayan sa Biblia. Binagbinagon naton ang duha sa sini nga mga kasaysayan. Ang una nga kasaysayan amo ang parte sa mataas nga saserdote nga si Jehoiada. Matutom sia nga alagad sang Dios. Gin-amligan niya kag sang iya asawa nga si Jehosabet ang bata nga lalaki nga si Jehoas, kag ginbuligan nila sia nga mangin isa ka maayo kag matutom nga  hari. Sang buhi pa ang tigulang na nga si Jehoiada, maayo ang ginahimo ni Jehoas. Pero sang napatay si Jehoiada, amat-amat nga naghimo sing malain si Jehoas. Ginpamatian niya ang malain nga mga pangulo kag nag-untat sia sa pag-alagad kay Jehova.​—2 Cron. 24:​2, 15-19.

⁴ Ang ikaduha nga kasaysayan amo ang parte sa mga Cristiano nga nagkabuhi sang ikaduhang siglo ukon sang tion nga patay na ang tanan nga apostoles. Ang pinakaulihi nga napatay sa mga apostoles amo si Juan. Madamo nga Cristiano ang nabuligan niya nga magpabilin nga matutom kay Jehova. (3 Juan 4) Pareho sa ginhimo sang iban pa nga matutom nga mga apostoles ni Jesus, ginpanikasugan gid ni Juan nga amligan ang kongregasyon sa panudlo sang mga apostata. (1 Juan 2:18; 2 Tes. 2:7) Pero sang napatay si Juan, madamo nga mga disipulo ang nagsunod sa panudlo sang mga apostata. Pagligad lang sang pila ka dekada, naimpluwensiahan na sang mga apostata ang Cristianong kongregasyon.

5. Ano ang indi naton dapat paghunahunaon base sa sining duha ka kasaysayan?

⁵ Ginapakita bala sining duha ka kasaysayan sa Biblia ang matabo sa iban nga mga karnero sang Cristo kon dal-on na sa langit ang mga hinaplas? Magahimo man bala sila sing malain pareho sa natabo kay Jehoas, ukon mangin apostata man bala sila pareho sa natabo sa madamo nga disipulo sang napatay ang mga apostoles? Indi gid ina matabo. Makasalig kita nga kon dal-on na sa langit ang mga hinaplas, padayon nga magasimba kay Jehova sa husto nga paagi ang iban nga mga karnero, kag padayon niya sila nga buligan. Ngaa masiling naton ini?

PADAYON NGA MAGASIMBA KAY JEHOVA SA HUSTO NGA PAAGI ANG IYA KATAWHAN

6. Ano ang tatlo ka tion nga binagbinagon naton?

⁶ Ngaa makasalig kita nga padayon nga magasimba kay Jehova sa husto nga paagi ang iya katawhan bisan pa makaeksperiensia sila sang mabudlay nga sitwasyon sa ulihi? Bangod natun-an naton sa Biblia ang parte sa aton tion subong. Daku ang kinalain sang aton tion subong kon ikumparar sa tion sang Israel sang una kag sa tion pagkatapos napatay ang mga apostoles. Gani binagbinagon naton ining tatlo ka tion: (1) Ang tion sang Israel sang una, (2) ang tion pagkatapos napatay ang mga apostoles, kag (3) ang aton tion subong nga amo ang “tion nga mapasag-uli sang Dios ang tanan nga butang.”​—Binu. 3:21.

7. Sa Israel sang una, ngaa wala naluyahan sang buot ang matutom nga mga Israelinhon bisan pa nagahimo sing malain ang ila mga hari kag ang madamo nga tawo?

⁷ Ang tion sang Israel sang una. Antes napatay si Moises, ginsilingan niya ang mga Israelinhon: “Nahibaluan ko gid nga kon patay na ako, magahimo kamo sing malain kag magasipak kamo sa dalan nga ginsugo ko sa inyo.” (Deut. 31:29) Ginpaandaman man ni Moises ang mga Israelinhon nga kon magrebelde sila kay Jehova, bihagon sila sang iban nga pungsod. (Deut. 28:​35, 36) Natabo bala ini sa mga Israelinhon? Huo. Sa sulod sang ginatos ka tuig, madamo nga hari ang naghimo sing malain sa panulok ni Jehova kag ginpasimba nila sa butig nga mga dios ang iya katawhan. Bangod sini, ginsilutan ni Jehova ang iya malain nga katawhan kag gintapos niya ang paggahom sang Israelinhon nga mga hari. (Ezeq. 21:​25-27) Pero sang nakita sang matutom nga mga Israelinhon nga natuman ang ginsiling sang Dios, naghatag ini sa ila sang kaisog nga padayon nga mag-alagad sing matutom sa iya.​—Isa. 55:​10, 11.

8. Bangod naimpluwensiahan sang mga apostata ang Cristianong kongregasyon sang ikaduhang siglo, dapat bala kita matingala sa sini? Ipaathag.

⁸ Ang tion pagkatapos napatay ang mga apostoles. Bangod naimpluwensiahan sang mga apostata ang Cristianong kongregasyon sang ikaduhang siglo, dapat bala kita matingala sa sini? Indi. Kay man, gintagna ni Jesus nga magalapnag ang apostasya. (Mat. 7:​21-23; 13:​24-30, 36-43) Sang unang siglo, nagsiling ang mga apostoles nga sanday Pablo, Pedro, kag Juan nga nagakatuman na ang gintagna ni Jesus. (2 Tes. 2:​3, 7; 2 Ped.  2:1; 1 Juan 2:18) Wala madugay pagkatapos napatay ang katapusan nga apostol, ang apostata nga Cristiandad nangin bahin sang Babilonia nga Daku, nga amo ang bug-os kalibutan nga emperyo sang butig nga relihion. Gani, natuman gid ang gintagna ni Jesus.

9. Kon ikumparar sa tion sang Israel sang una kag sa tion pagkatapos napatay ang mga apostoles, ano ang kinalain sang aton tion subong?

⁹ Ang “tion nga mapasag-uli sang Dios ang tanan nga butang.” Lain ang aton tion subong kon ikumparar sa tion sang Israel sang una kag sa tion nga naglapnag ang apostasya pagkatapos napatay ang mga apostoles. Ano ang tawag naton sa aton tion subong? Posible magasiling kita dayon nga ari na kita sa “katapusan nga mga adlaw” sining malain nga sistema sang mga butang. (2 Tim. 3:1) Pero ginapakita sang Biblia nga may isa pa ka tion nga dungan nga nag-umpisa sa “katapusan nga mga adlaw.” Mas importante kag mas malawig ini nga tion sangsa “katapusan nga mga adlaw.” Kay man, magapadayon ini asta nga mangin perpekto na ang mga tawo kag mangin paraiso na ang duta paagi sa Mesianikong Ginharian. Ginatawag ini nga “tion nga mapasag-uli sang Dios ang tanan nga butang.” (Binu. 3:21) Nag-umpisa ini nga tion sang 1914. Ti, ano na ang napasag-uli sang Dios? Gintangdo niya si Jesus bilang Hari sa langit. Gani may manuggahom naman nga kaliwat sang matutom nga si Hari David nga magarepresentar liwat kay Jehova. Pero, indi lang parte sa paggahom ang ginpasag-uli ni Jehova. Ginbuligan man ni Jehova ang iya mga alagad sa duta para masimba nila sia liwat sa husto nga paagi. (Isa. 2:​2-4; Ezeq. 11:​17-20) Maimpluwensiahan pa bala liwat sang apostasya ang pagsimba kay Jehova?

10. (a) Ano ang gintagna sang Biblia parte sa husto nga paagi sang pagsimba kay Jehova sa aton tion subong? (Isaias 54:17) (b) Ngaa makapalig-on sa aton ini nga mga tagna?

¹⁰ Basaha ang Isaias 54:17. Pamalandungi ini nga tagna: “Wala sing ginhimo nga hinganiban nga magmadinalag-on batok sa imo.” Nagakatuman ini nga tagna sa aton tion subong. Magluwas sa sini, nagakatuman man ining isa pa ka makapalig-on nga tagna: “Ang tanan mo nga anak pagatudluan ni Jehova, kag mangin bugana ang ila paghidait. Mapasad ka sing malig-on sa pagkamatarong. . . . Wala ka sing kahadlukan, kay indi ini mahanabo sa imo.” (Isa. 54:​13, 14) Gani wala gid sing makapauntat sa ginahimo sang katawhan ni Jehova nga pagtudlo sa mga tawo parte sa iya. Indi ini mapauntat bisan sang “dios sini nga sistema sang mga butang” nga si Satanas. (2 Cor. 4:4) Napasag-uli na ang pagsimba kay Jehova sa husto nga paagi, kag indi na gid ini maimpluwensiahan liwat sang apostasya. Magapabilin ini asta sa wala sing katapusan kay wala sing ginhimo nga hinganiban nga magmadinalag-on batok sa aton.

 ANO ANG MATABO?

11. Ngaa kumbinsido kita nga indi pagpabay-an ang daku nga kadam-an kon dal-on na sa langit ang mga hinaplas?

¹¹ Ano ang matabo kon dal-on na sa langit ang mga hinaplas? Tandaan naton nga si Jesus ang aton Manugbantay. Sia ang ulo sang Cristianong kongregasyon. Nagsiling si Jesus: “Isa lang ang inyo Lider kag sia amo ang Cristo.” (Mat. 23:10) Makasalig kita nga himuon gid sang aton Hari sa langit nga si Jesus ang iya responsibilidad. Bangod ang Cristo mismo ang nagapanguna sa iya mga sumulunod diri sa duta, wala sila sing dapat kahadlukan. Pero wala kita kabalo kon paano pangunahan sang Cristo ang iya katawhan kon dal-on na sa langit ang mga hinaplas. Gani binagbinagon naton ang pila ka halimbawa sa Biblia nga magapalig-on sa aton.

12. Paano gingiyahan ni Jehova ang iya katawhan (a) pagkatapos napatay si Moises? (b) pagkatapos ginhatagan si Elias sing lain nga asaynment? (Tan-awa man ang piktyur.)

¹² Napatay si Moises antes magsulod ang mga Israelinhon sa Ginsaad nga Duta. Ti, ano ang natabo sa katawhan sang Dios? Ginpabay-an bala ni Jehova ang iya katawhan bangod patay na ang iya matutom nga alagad? Wala. Kay man, padayon sila nga ginabuligan ni Jehova basta matutom sila nga nagaalagad sa iya. Antes mapatay si Moises, ginsilingan sia ni Jehova nga itangdo niya si Josue nga pangunahan ang katawhan. Madamo na nga tinuig nga ginahanas ni Moises si Josue. (Ex. 33:11; Deut. 34:9) Kag madamo pa gid nga mga lalaki ang nagapanguna sa katawhan, pareho sang mga pangulo sang kada 1,000, mga pangulo sang kada 100, mga pangulo sang kada 50, kag may ara pa gani mga pangulo sang kada 10. (Deut. 1:15) Gani naatipan gid sing maayo ang katawhan sang Dios. Pareho man sa sini ang halimbawa ni Elias. Madamo nga tinuig niya nga ginpangunahan ang mga Israelinhon para masimba nila si Jehova sa husto nga paagi. Pero ginhatagan sia ni Jehova sing lain nga asaynment kag ginsaylo sia sa Juda. (2 Hari 2:1; 2 Cron. 21:12) Ti, napabay-an bala ang matutom nga katawhan sa napulo ka tribo sang Israel? Wala. Kay man, madamo na nga tinuig nga ginahanas ni Elias si Eliseo. Kaupod man nila ang mga “anak sang mga manalagna” nga posible nagapatuhoy sa asosasyon sang mga manalagna. (2 Hari 2:7) Gani, madamo nga matutom nga mga lalaki ang puede magbulig para pangunahan ang katawhan sang Dios. Padayon nga ginatuman ni Jehova ang iya katuyuan, kag gin-atipan niya ang iya matutom nga mga alagad.

13. Ano ang ginpromisa ni Jehova sa aton nga mabasa sa Hebreo 13:5b? (Tan-awa man ang piktyur.)

¹³ Base sa mga halimbawa nga ginbinagbinag naton, ano sa banta mo ang matabo kon dal-on na sa langit ang tanan nga hinaplas nga ari pa sa duta? Indi kita dapat mabalaka. Kay man,  makapalig-on gid sa aton ining isa ka kamatuoran nga ginatudlo sang Biblia: Indi gid pagpabay-an ni Jehova ang iya katawhan sa duta. (Basaha ang Hebreo 13:5b.) Pareho kay Moises kag kay Elias, kabalo ang gamay nga grupo sang mga hinaplas nga nagapanguna sa aton subong nga importante gid ang paghanas sa iban. Sa sulod sang madamo na nga tinuig, padayon nga ginahanas sang mga miembro sang Nagadumala nga Hubon ang pila ka brother nga bahin sang iban nga mga karnero kon paano kita pangunahan. Halimbawa, nag-organisar sila sing madamo nga eskwelahan para hanason ang mga gulang, mga traveling overseer, mga miembro sang Branch Committee, mga overseer sa Bethel, kag iban pa. Ang mga miembro mismo sang Nagadumala nga Hubon ang nagahanas sa mga kabulig sa sarisari nga mga komite sang Nagadumala nga Hubon. Subong, matutom nga ginahimo sini nga mga kabulig ang ila madamo nga responsibilidad sa organisasyon. Nahanas sila sing maayo, gani handa gid sila nga atipanon ang mga karnero sang Cristo.

14. Ano ang panguna nga punto nga dapat naton tandaan sa aton ginabinagbinag?

¹⁴ Ari ang panguna nga punto nga dapat naton tandaan sa aton ginabinagbinag: Kon dal-on na sa langit ang tanan nga hinaplas nga ari pa sa duta antes matapos ang dakung kapipit-an, padayon nga magasimba kay Jehova sa husto nga paagi ang iya katawhan diri sa duta. Nagapasalamat gid kita sa pagpanguna ni Jesucristo kay ginabuligan niya kita nga padayon nga mangin matutom kay Jehova. Sa tion sang dakung kapipit-an, salakayon kita sang Gog sang Magog ukon sang naghimbon nga mga pungsod. (Ezeq. 38:​18-20) Pero mapaslawan ang ila pagsalakay kay indi gid nila mapauntat sa pagsimba kay Jehova ang iya katawhan. Sigurado gid nga luwason sila ni Jehova. Sa isa ka palanan-awon, nakita ni apostol Juan ang “daku nga kadam-an” sang iban nga mga karnero sang Cristo. Ginsilingan si Juan nga “naggua halin sa dakung kapipit-an” ining “daku nga kadam-an.” (Bug. 7:​9, 14) Gani sigurado kita nga amligan sila ni Jehova.

15-16. Suno sa Bugna 17:​14, ano ang himuon sang mga hinaplas sa tion sang Armageddon, kag ngaa makapalig-on ini sa aton?

¹⁵ Pero, posible nagapalibog ang iban, ‘Ano ang himuon sang mga hinaplas kon ara na sila sa langit?’ Direkta ini nga ginasabat sang Biblia. Nagsiling ini nga ‘magapakig-away sa Kordero’ ang  mga gobierno sini nga kalibutan. Siempre, wala gid sing padaug ang mga gobierno. Ang Biblia nagasiling: “Mapierde sila” sang Kordero. Kag sin-o ang magabulig sa Kordero? Suno sa teksto, ang mga “gintawag,” “pinili,” kag “matutom.” (Basaha ang Bugna 17:14.) Sin-o ini sila? Sila ang mga hinaplas nga ginbanhaw na sa langit. Gani kon dal-on na sa langit ang tanan nga hinaplas nga ari pa sa duta antes matapos ang dakung kapipit-an, ang isa sa una nila nga asaynment amo ang magpakig-away. Tumalagsahon gid ini nga asaynment. Antes nangin Saksi ni Jehova ang pila sa mga hinaplas, maisog gid sila magpakig-away. Nangin soldado pa gani ang pila sa ila. Pero sang ulihi, nangin matuod sila nga Cristiano kag natun-an nila nga pabaloran ang paghidait. (Gal. 5:22; 2 Tes. 3:16) Nag-untat na sila sa pagsuporta sa mga inaway. Pero kon banhawon na sila sa langit, magaupod sila sa Cristo kag sa iya balaan nga mga anghel sa katapusan nga inaway kontra sa mga kaaway sang Dios.

¹⁶ Hunahunaa ini. Tigulang na kag maluya ang iban nga mga hinaplas. Pero kon banhawon na sila sa langit, mangin gamhanan sila kag imortal nga mga espiritu, kag magapakig-away sila upod sa ila gamhanan nga Hari nga si Jesucristo nga handa magpakig-away. Pagkatapos sang Armageddon, magapakigbahin sila sa pagbulig sa mga tawo nga mangin perpekto. Gani kon sa langit na sila, mas madamo sila sing mahimo para sa ila pinalangga nga mga kauturan diri sa duta kon ikumparar sa ila mahimo bilang indi perpekto nga mga tawo.

17. Ngaa masiling naton nga indi mahalitan ang tanan nga alagad sang Dios sa tion sang Armageddon?

¹⁷ Bahin ka bala sang iban nga mga karnero? Ti, ano ang dapat mo himuon kon mag-umpisa na ang Armageddon? Amo lang ini ang dapat mo himuon: Magsalig kay Jehova, kag tumana ang iya instruksion. Ano ang posible nga nalakip sa sini? Ang Biblia nagasiling: “Magsulod kamo sa inyo mga hulot, kag isira ninyo ang puertahan. Magpanago kamo sing makadali tubtob magligad ang kaakig.” (Isa. 26:20) Gani sa tion sang Armageddon, indi mahalitan ang tanan nga matutom nga alagad sang Dios sa langit kag sa duta. Pareho kay apostol Pablo, kumbinsido kita nga bisan “ang mga panguluhan ukon ang mga butang karon ukon ang mga butang nga maabot . . . indi makapugong nga mabaton naton ang gugma sang Dios.” (Roma 8:​38, 39) Dumduma ini pirme: Palangga ka ni Jehova, kag indi ka gid niya pagpabay-an.