1. Ngaa kinahanglan naton ang panuytoy ni Jehova? Maghatag sing ilustrasyon.

 IMADYINA nga nagtalang ka sa kagulangan. Delikado gid ini kay may ilahas nga mga sapat nga puede maghalit sa imo, may mga insekto nga nagadala sang balatian, may makahililo nga mga tanom, kag puede ka mahulog sa pil-as. Sigurado gid nga magapasalamat ka kon may upod ka kuntani nga isa ka guide nga sunado ang kagulangan. Kabalo sia kon diin nga parte sang kagulangan ang delikado kadtuan, gani mabuligan ka niya nga malikawan ini. Daw pareho sa sini nga kagulangan ini nga kalibutan. Madamo diri sing katalagman nga puede makaguba sang aton kaangtanan kay Jehova. Pero may perpekto kita nga Guide ukon Manugtuytoy nga amo si Jehova. Ginabuligan niya kita nga malikawan ang mga katalagman, kag ginatuytuyan niya kita pakadto sa aton destinasyon nga amo ang kabuhi nga wala sing katapusan sa bag-ong kalibutan.

2. Paano kita ginatuytuyan ni Jehova?

² Paano kita ginatuytuyan ni Jehova? Ang panguna niya nga ginagamit amo ang iya Pulong, ang Biblia. Pero, may ginagamit man sia nga mga tawo para tuytuyan kita. Halimbawa, ginagamit niya “ang matutom kag mainandamon nga ulipon” para hatagan kita sang espirituwal nga pagkaon nga nagabulig sa aton nga makahimo sang maayo nga mga desisyon. (Mat. 24:45) Ginagamit man ni Jehova ang iban pa nga mga lalaki nga may mga ikasarang para tuytuyan kita. Ang halimbawa sa sini amo ang mga circuit overseer kag mga gulang sa kongregasyon. Ginapalig-on nila kita kag ginahatagan sang mga instruksion nga nagabulig sa aton nga mabatas ang mabudlay nga mga sitwasyon. Nagapasalamat gid kita kay Jehova kay ginatuytuyan niya kita samtang nagakabuhi kita sa sining mabudlay nga katapusan nga mga adlaw. Ginabuligan niya kita nga indi maguba ang aton kaangtanan sa iya para makapabilin kita sa dalan nga nagapadulong sa kabuhi.

3. Ano ang binagbinagon naton sa sini nga artikulo?

³ Pero may mga tion nga posible nabudlayan kita nga sundon ang panuytoy ni Jehova ilabi na kon ginhatag ini sang indi perpekto nga mga tawo. Ngaa? Bangod posible nga indi naton gusto ang ginhatag  nila nga instruksion. Ukon posible nga indi praktikal ang ginhatag nila nga instruksion, gani pamatyag naton wala ini naghalin kay Jehova. Sa sini nga mga sitwasyon, dapat kita magsalig nga si Jehova ang nagapanguna sa iya katawhan. Dapat man kita magsalig nga para gid pirme sa aton kaayuhan ang iya mga panuytoy. Para magbakod ang aton pagsalig, binagbinagon sa sini nga artikulo (1) kon paano gintuytuyan ni Jehova ang iya katawhan sang panahon sang Biblia, (2) kon paano niya kita ginatuytuyan subong, kag (3) kon ano ang mga pagpakamaayo kon padayon naton nga ginasunod ang iya mga panuytoy.

KON PAANO GINTUYTUYAN NI JEHOVA ANG MGA ISRAELINHON

4-5. Paano ginpakita ni Jehova nga ginagamit niya si Moises para tuytuyan ang mga Israelinhon? (Tan-awa ang piktyur.)

⁴ Gintangdo ni Jehova si Moises nga pangunahan ang mga Israelinhon pagua sa Egipto. Kag ginhatagan ni Jehova ang mga Israelinhon sing makita nga pamatuod nga ginatuytuyan niya sila paagi kay Moises. Halimbawa, nag-aman Sia sing haligi nga panganod kon adlaw kag sing haligi nga kalayo kon gab-i. (Ex. 13:21) Ginsundan ni Moises ang haligi, kag gindala sia sini sa Pula nga Dagat upod ang mga Israelinhon. Pero ginlagas sila sang mga Egiptohanon. Sang nakita sang mga Israelinhon nga daw nakibon sila sang dagat kag sang mga Egiptohanon, hinadlukan gid sila. Nahunahuna nila nga indi husto ang ginhimo ni Moises kay gindala niya sila sa Pula nga Dagat. Pero husto ang iya ginhimo. Kay man, gingamit ni Jehova si Moises para pangunahan ang Iya katawhan pakadto didto. (Ex. 14:2) Kag ginluwas sila ni Jehova sa tumalagsahon gid nga paagi.​—Ex. 14:​26-28.

⁵ Sa sulod sang 40 ka tuig pagkatapos sini, ginpakita ni Moises nga nagasalig sia kay Jehova paagi sa padayon nga pagsunod sa haligi nga panganod para tuytuyan ang Iya katawhan sa kamingawan. a May tion nga ginbutang ni Jehova ini nga haligi sa ibabaw sang tolda ni Moises, kag makita ini sang tanan nga Israelinhon. (Ex. 33:​7, 9, 10) Halin sa sini nga haligi, nagpakighambal si Jehova kay Moises. Dayon ginsugid ni Moises sa katawhan kon ano ang instruksion ni Jehova sa ila. (Sal. 99:7) Gani may maathag nga pamatuod nga ginagamit ni Jehova si Moises para tuytuyan ang mga Israelinhon.

6. Ano ang reaksion sang mga Israelinhon sa panuytoy ni Jehova? (Numeros 14:​2, 10, 11)

⁶ Makapasubo nga ginbalewala sang kalabanan nga Israelinhon ang maathag nga pamatuod nga naghalin kay Jehova ang ginsiling ni Moises sa ila. (Basaha ang Numeros 14:​2, 10, 11.) Madamo nga beses nga ginpakita nila nga wala sila nagapati nga ginagamit ni Jehova si Moises para tuytuyan sila. Bangod sini, wala sila ginpasulod ni Jehova sa Ginsaad nga Duta.​—Num. 14:30.

7. Maghatag sing halimbawa sang mga nagsunod sa panuytoy ni Jehova. (Numeros 14:24) (Tan-awa man ang piktyur.)

⁷ Pero, may pila ka Israelinhon nga nagsunod sa panuytoy ni Jehova. Halimbawa, si Jehova nagsiling: “Nagasunod [si Caleb] sa akon sing bug-os tagipusuon.” (Basaha ang Numeros 14:24.) Ginpadyaan sang Dios si Caleb, kag ginhatag pa gani niya kay Caleb ang bahin sang Canaan nga gusto niya. (Jos. 14:​12-14) Nangin maayo man nga halimbawa sa pagsunod sa panuytoy ni Jehova ang mga Israelinhon nga nakasulod sa Ginsaad nga Duta. Sang nagbulos si Josue kay Moises bilang gintangdo nga lider sang mga Israelinhon, “gintahod gid nila sia sa bug-os niya nga kabuhi.” (Jos. 4:14) Gani ginpakamaayo sila ni Jehova paagi sa paghatag sa ila sang duta nga ginpromisa niya sa ila.​—Jos. 21:​43, 44.

8. Ipaathag kon paano gintuytuyan ni Jehova ang iya katawhan sang panahon sang mga hari. (Tan-awa man ang piktyur.)

⁸ Pagligad sang mga tinuig, nagtangdo si Jehova sang mga hukom para tuytuyan ang iya katawhan. Dayon, sang panahon sang mga hari, nagtangdo si Jehova sang mga manalagna para tuytuyan ang iya katawhan. Ginsunod sang matutom nga mga  hari ang mga laygay sang mga manalagna. Halimbawa, mapainubuson nga ginbaton ni Hari David ang pagtadlong sa iya ni manalagna Natan. (2 Sam. 12:​7, 13; 1 Cron. 17:​3, 4) Ginsunod ni Hari Jehosapat ang instruksion sa iya ni manalagna Jahaziel kag ginpalig-on niya ang katawhan sang Juda nga ‘magtuo sa mga manalagna sang Dios.’ (2 Cron. 20:​14, 15, 20) Sang grabe ang kabalaka ni Hari Ezequias, nagpabulig sia kay manalagna Isaias. (Isa. 37:​1-6) Sa kada tion nga ginatuman sang mga hari ang panuytoy ni Jehova, ginapakamaayo niya sila kag ginaamligan niya ang iya katawhan. (2 Cron. 20:​29, 30; 32:22) Gani indi gid mapanghiwala sang tanan nga Israelinhon ang maathag nga mga pamatuod nga ginagamit ni Jehova ang iya mga manalagna para tuytuyan sila. Pero, wala ginpamatian sang kalabanan nga mga hari kag mga Israelinhon ang mga manalagna ni Jehova.​—Jer. 35:​12-15.

KON PAANO GINTUYTUYAN NI JEHOVA ANG MGA CRISTIANO SANG UNANG SIGLO

9. Sin-o ang gingamit ni Jehova para tuytuyan ang mga Cristiano sang unang siglo? (Tan-awa man ang piktyur.)

⁹ Sang unang siglo C.E., ginporma ni Jehova ang Cristianong kongregasyon. Paano niya gintuytuyan ang mga Cristiano sang unang siglo? Gintangdo niya si Jesus bilang ulo sang kongregasyon. (Efe. 5:23) Pero wala nagpakighambal si Jesus sa kada disipulo para isiling sa ila kon ano ang dapat nila himuon. Sa baylo, gingamit niya ang mga apostoles kag ang mga gulang sa Jerusalem para pangunahan sila. (Binu. 15:​1, 2) May mga gulang man nga gintangdo sa mga kongregasyon para tuytuyan sila.​—1 Tes. 5:12; Tito 1:5.

10. (a) Ano ang reaksion sang kalabanan nga mga Cristiano sang unang siglo sa panuytoy nga ila nabaton? (Binuhatan 15:​30, 31) (b) Ngaa ginsikway sang iban ang mga tawo nga gingamit ni Jehova para tuytuyan sila? (Tan-awa ang kahon nga “ Kon Ngaa Ginsikway sang Iban ang Maathag nga Pamatuod.”)

¹⁰ Ano ang reaksion sang mga Cristiano sang unang siglo sa panuytoy nga ila nabaton? Nalipay ang kalabanan sa ila kag ginsunod nila ini. Ang matuod, “nalipay gid sila tungod sa pagpalig-on sa ila.” (Basaha ang Binuhatan 15:​30, 31.) Ti, paano naman ginatuytuyan ni Jehova ang iya katawhan sa aton tion subong?

KON PAANO KITA GINATUYTUYAN NI JEHOVA SUBONG

11. Maghatag sing halimbawa nga nagapakita nga ginatuytuyan ni Jehova ang nagapanguna nga mga utod sa aton tion subong.

¹¹ Padayon nga ginapangunahan ni Jehova ang iya katawhan subong. Ginahimo niya ini paagi sa  iya Pulong kag paagi sa iya Anak nga ulo sang kongregasyon. Pero padayon gihapon nga nagagamit ang Dios sing mga tawo para tuytuyan kita subong. May mga pamatuod bala kita sa sini? Huo. Halimbawa, binagbinaga ang natabo pagkatapos sang tuig 1870. Nahangpan ni Charles Taze Russell kag sang iya mga kaupod nga mangin isa ka importante nga tuig ang 1914 sa katumanan sang tagna parte sa Ginharian sang Dios. (Dan. 4:​25, 26) Nasiling nila ini bangod gintun-an nila ang mga tagna sa Biblia. Gintuytuyan bala ni Jehova ang ila pag-research parte sa ginasiling sang Biblia? Maathag nga huo. Ang mga natabo sang 1914 nagapamatuod nga nagsugod na sa paggahom ang Ginharian sang Dios. Nag-umpisa sadto ang Bug-os Kalibutan nga Inaway I, kag ginsundan ini sang mga balatian, mga linog, kag kakulang sa pagkaon. (Luc. 21:​10, 11) Maathag nga ginagamit ni Jehova ining sinsero nga mga estudyante sang Biblia para buligan ang iya katawhan.

12-13. Sa tion sang Bug-os Kalibutan nga Inaway II, ano ang ginhimo sang nagapanguna nga mga utod para mas madamo nga mga tawo ang malab-ot sang aton pagbantala kag pagtudlo nga hilikuton?

¹² Binagbinaga man ang natabo sa tion sang Bug-os Kalibutan nga Inaway II. Sang gintun-an sang nagapanguna nga mga utod sa world headquarters ang Bugna 17:​8, nahangpan nila nga indi magaresulta sa Armageddon ini nga inaway. Nahangpan nila nga pagkatapos sang Bug-os Kalibutan nga Inaway II, makaeksperiensia sing paghidait ang kalibutan gani may kahigayunan sila nga mabantalaan ang mas madamo nga mga tawo. Gani ginsugdan sang organisasyon ni Jehova ang Watchtower Bible College (School) of Gilead bisan pa daw indi ini praktikal sadto nga tion. Hanason sa sini nga eskwelahan ang mga misyonero para bantalaan kag tudluan ang mga tawo sa bilog nga kalibutan. Gani samtang sige ang inaway, may mga misyonero nga ginpadala sa madamo nga lugar. Ginsugdan man sang matutom nga ulipon ang Course in Theocratic Ministry b para hanason ang tanan nga manugbantala nga mangin mas epektibo pa gid sa pagbantala kag pagtudlo nga hilikuton. Nakabulig ini tanan nga mga paghanas para mangin handa ang katawhan sang Dios sa ila hilikuton.

¹³ Kon balikan naton ang mabudlay nga tion nga naeksperiensiahan sang katawhan ni Jehova, maathag nga gintuytuyan gid niya sila. Sugod sang Bug-os Kalibutan nga Inaway II, hilway nga nakabantala ang katawhan ni Jehova sa madamo nga pungsod. Gani nag-uswag gid ang aton pagbantala kag pagtudlo nga hilikuton.

14. Ngaa masaligan naton ang mga instruksion halin sa organisasyon ni Jehova kag halin sa gintangdo nga mga gulang? (Bugna 2:1) (Tan-awa man ang piktyur.)

¹⁴ Subong, padayon nga nagapatuytoy sa Cristo ang mga miembro sang Nagadumala nga Hubon. Ginasigurado nila nga ang mga instruksion nga ihatag nila sa mga kauturan amo ang gusto ni Jehova kag ni Jesus nga himuon nila. Dayon ginagamit nila ang mga circuit overseer kag ang mga gulang para maghatag sang mga instruksion sa mga kongregasyon. c Ara sa “tuo nga kamot” sang Cristo ang hinaplas nga mga gulang. (Basaha ang Bugna 2:1.) Siempre, indi perpekto ang mga gulang kag makahimo sila sang sala. Halimbawa, may mga tion nga nakahimo sang sala si Moises kag si Josue, kag nakahimo man sang sala ang mga apostoles. (Num. 20:12; Jos. 9:​14, 15; Roma 3:23) Pero, ginatuytuyan gid sing maayo sang Cristo ang matutom nga ulipon kag ang gintangdo nga mga gulang, kag padayon niya ini nga himuon “sa tanan nga tion tubtob sa hingapusan sang sistema sang mga butang.” (Mat. 28:20) Gani, may rason gid kita nga saligan ang iya mga panuytoy nga ginahatag niya sa aton paagi sa nagapanguna nga mga utod.

PAKAMAAYUHON KITA KON PADAYON NATON NGA GINASUNOD ANG PANUYTOY NI JEHOVA

15-16. Ano ang natun-an mo sa eksperiensia sang mga nagsunod sa panuytoy ni Jehova?

¹⁵ Kon padayon naton nga ginasunod ang panuytoy ni Jehova, makabaton kita sang mga pagpakamaayo bisan subong pa lang. Halimbawa, gin-aplikar nanday Andy kag Robyn ang laygay sang matutom nga ulipon nga pasimplehon naton ang aton kabuhi. (Mat. 6:22) Gani nakaboluntaryo sila sa konstruksion sang mga Kingdom Hall kag iban pa nga mga pasilidad sang organisasyon. Si Robyn nagsiling: “May mga tion nga grabe kagamay sang amon ginaistaran kag wala ini sing kusina. Kag bisan pa nanamian gid ako magpamiktyur, ginbaligya ko ang madamo ko nga camera kag mga lens. Naghibi gid ako sang ginbaligya ko ini. Pero gusto ko ilugon si Sara nga asawa ni Abraham. Indi ako dapat masubuan sa akon mga ginsakripisyo, kundi dapat ako magpokus sa akon ginahimo subong sa akon pag-alagad kay Jehova.” (Heb. 11:15) Ano nga pagpakamaayo ang nabaton sini nga mag-asawa? Si Robyn nagsiling: “Nalipay gid kami bangod kabalo kami nga ginahatag namon kay Jehova ang amon bug-os nga masarangan. Sa kada tion nga may ginahimo kami nga asaynment halin sa organisasyon, mabatyagan namon nga sampol pa lang ini sang mangin kabuhi naton sa bag-ong kalibutan.” Komporme sa sini si Andy, kag nagsiling sia: “Nalipay gid kami bangod ginahatag namon ang amon tanan nga tion kag kusog para sa Ginharian.”

 ¹⁶ Ano pa ang mga pagpakamaayo kon padayon naton nga ginasunod ang panuytoy ni Jehova? Binagbinaga ang eksperiensia ni Marcia. Pag-graduate niya sa high school, gusto gid niya himuon ang ginpalig-on sa iya nga magpayunir. (Mat. 6:33; Roma 12:11) Nagsiling sia: “May gin-offer sa akon ang isa ka university nga apat ka tuig nga scholarship. Pero gusto ko ihatag kay Jehova ang akon pinakamaayo. Gani wala ko ginbaton ang offer. Sa baylo, nag-eskwela ako sa isa ka technical training school para magtuon sang isa ka ikasarang nga makabulig sa akon nga masuportahan ang akon kaugalingon para makapayunir ako. Isa ini sa pinakamaayo nga desisyon nga nahimo ko. Subong, nalipay gid ako mag-alagad bilang isa ka regular payunir. Kag bangod flexible ang iskedyul sang akon obra, nagaalagad man ako bilang isa ka commuter sa Bethel, kag may iban pa gid ako nga mga pribilehiyo.”

17. Ano pa ang iban nga mga pagpakamaayo kon padayon naton nga ginasunod ang panuytoy ni Jehova? (Isaias 48:​17, 18)

¹⁷ Kon kaisa, makabaton kita sang mga laygay halin sa organisasyon para amligan kita. Halimbawa, ginpaandaman kita parte sa materyalismo kag parte sa mga buhat nga posible makasulay sa aton nga lapason ang mga kasuguan sang Dios. Para gid sa aton kaayuhan ang pagsunod sa mga panuytoy ni Jehova parte sa sini. Mangin matinlo pirme ang aton konsiensia kag malikawan naton ang madamo nga problema. (1 Tim. 6:​9, 10) Masarangan naton dayon nga simbahon si Jehova sing bug-os tagipusuon. Ano ang mabatyagan naton kon ginahimo naton ini? Mangin mas malipayon kita, mangin malinong ang aton hunahuna, kag mangin kontento kita.​—Basaha ang Isaias 48:​17, 18.

18. Ngaa gusto mo nga padayon nga sundon ang panuytoy ni Jehova?

¹⁸ Sigurado gid nga padayon nga magagamit si Jehova sing mga tawo para maghatag sing panuytoy sa tion sang dakung kapipit-an asta sa tion sang Isa ka Libo ka Tuig nga Paggahom sang Cristo. (Sal. 45:16) Sa sina nga tion, padayon bala naton nga sundon ang ila mga panuytoy bisan pa nga lain kuntani ang gusto naton nga himuon? Nagadepende ini sa aton reaksion sa mga panuytoy ni Jehova subong. Gani, pirme naton sundon ang mga panuytoy ni Jehova, lakip na ang mga panuytoy nga ginahatag niya paagi sa mga utod nga gintangdo nga magbantay sa aton. (Isa. 32:​1, 2; Heb. 13:17) Masaligan gid naton ang aton Guide ukon Manugtuytoy nga si Jehova bangod ginabuligan niya kita nga malikawan ang bisan ano nga posible makaguba sang aton kaangtanan sa iya, kag ginatuytuyan niya kita pakadto sa aton destinasyon nga amo ang kabuhi nga wala sing katapusan sa bag-ong kalibutan.