NATALUPANGDAN mo bala nga madamo nga tawo subong ang nagabatyag nga importante gid sila? Kag bisan pa espesyal na ang pagtrato sa ila, pamatyag nila kulang pa ini. Gani, ginauna nila ang ila kaugalingon kag indi sila mapinasalamaton. Nagsiling ang Biblia nga mangin amo sini ang pamatasan sang mga tawo sa katapusan nga mga adlaw.​—2 Tim. 3:2.

Halin pa sang una, may mga tawo na nga nagapakaimportante sa ila kaugalingon. Halimbawa, gusto ni Adan kag ni Eva nga sila ang magdesisyon kon ano ang maayo kag malain. Bangod ginsunod nila ang ila gusto, nagaantos kita tanan subong. Ang isa pa ka halimbawa amo si Hari Uzias sang Juda. Naghunahuna sia nga may kinamatarong sia nga magsunog sing incienso sa templo. Pero wala gid sia sing kinamatarong nga himuon ini. (2 Cron. 26:​18, 19) Nagapati naman ang mga Fariseo kag mga Saduceo nga dapat sila pasulabihon sang Dios bangod mga kaliwatan sila ni Abraham.​—Mat. 3:9.

Madamo nga tawo subong ang nagapakaimportante sa ila kaugalingon, kag puede nila kita maimpluwensiahan. (Gal. 5:26) Posible maghunahuna kita nga dapat ihatag sa aton ang isa ka pribilehiyo ukon dapat tratuhon kita nga espesyal. Paano naton malikawan ini nga panghunahuna? Dapat naton maintiendihan ang pagtan-aw ni Jehova parte sini. Makabulig sa aton ang duha ka prinsipio sa Biblia.

Si Jehova ang nagadesisyon kon ano ang nagakadapat nga ihatag sa aton. Binagbinaga ang pila ka halimbawa.

• Gusto ni Jehova nga respetuhon sang asawa ang iya bana, kag dapat palanggaon sang bana  ang iya asawa. (Efe. 5:33) Kag parte sa romantiko nga gugma sang bana kag asawa, dapat ihatag lang nila ini sa isa kag isa. (1 Cor. 7:3) Sa bahin sang mga ginikanan, dapat tumanon sila sang ila mga kabataan. Kag sa bahin sang mga kabataan, dapat palanggaon sila kag atipanon sang ila mga ginikanan.​—2 Cor. 12:14; Efe. 6:2.

• Dapat naton respetuhon ang aton mapisan nga mga gulang sa kongregasyon. (1 Tes. 5:12) Pero, wala sila sing kinamatarong nga kontrolon ang mga kauturan.​—1 Ped. 5:​2, 3.

• Ginhatagan sang Dios ang mga gobierno sang kinamatarong nga magbaton sang mga buhis kag sang kadungganan halin sa ila mga ginagamhan.​—Roma 13:​1, 6, 7.

Sobra pa sa dapat naton mabaton ang ginahatag ni Jehova bangod palangga niya kita. Napanubli naton ang sala halin kay Adan. Bangod sini, nagakadapat kita mapatay. (Roma 6:23) Pero bangod sa mainunungon nga gugma ni Jehova, ginahatagan niya kita sang madamo nga pagpakamaayo. (Sal. 103:​10, 11) Ginahatag niya ini bangod sa iya wala tupong nga kaayo.​—Roma 12:​6-8; Efe. 2:8.

Indi magpaimpluwensia sa panghunahuna sang kalibutan. Posible nga indi naton matalupangdan nga nagahunahuna na kita nga dapat gid kita pasulabihon. Sa isa ka ilustrasyon ni Jesus, ginpakita niya nga posible gid ini matabo. Parte ini sa mga trabahador nga ginsuelduhan sing isa ka denario. Ang iban aga pa nga nagsugod sa pag-obra, kag bilog nga adlaw sila nga nag-obra sa nagatagiti nga init. Pero ang iban, isa ka oras lang nga nag-obra. Naghunahuna ang mga aga pa nag-obra nga dapat mas daku ang ila sueldo. (Mat. 20:​1-16) Paagi sa sini nga ilustrasyon, ginpakita ni Jesus nga dapat makontento ang iya mga sumulunod sa ginahatag sang Dios sa ila.

Mangin mapinasalamaton, kag indi pag-ipabatyag sa iban nga obligado sila nga hatagan ka. (1 Tes. 5:18) Iluga si apostol Pablo. Wala niya ginsilingan ang mga kauturan sa Corinto nga dapat nila sia hatagan sang mga butang nga kinahanglan niya bisan pa may kinamatarong sia nga himuon ini. (1 Cor. 9:​11-14) Dapat naton pasalamatan ang mga pagpakamaayo nga ginahatag sa aton, kag indi naton  pag-ipabatyag sa iban nga obligado sila nga hatagan kita.

Mangin mapainubuson. Sa masami, kon nagapakaimportante ang isa ka tawo, ginahunahuna niya nga dapat hatagan sia sang sobra pa sa mga nabaton niya. Pero kon mapainubuson kita, malikawan naton ini nga panghunahuna.

Binagbinaga ang halimbawa ni manalagna Daniel. Mapainubuson gid sia. Nagdaku sia sa isa ka prominente nga pamilya, guapo sia, maalam, kag madamo sia sing ikasarang. Gani, puede kuntani niya hunahunaon nga nagakadapat gid man sia pasulabihon kag hatagan sang mga pribilehiyo. (Dan. 1:​3, 4, 19, 20) Pero, padayon nga nangin mapainubuson si Daniel. Bangod sini, nangin hamili sia kay Jehova.​—Dan. 2:30; 10:​11, 12.

Gani, indi naton pag-ilugon ang mga tawo nga nagapakaimportante sa ila kaugalingon nga lapnag sa kalibutan subong. Sa baylo, dapat kita malipay sa tanan nga pagpakamaayo nga ginahatag ni Jehova sa aton bangod sa iya wala tupong nga kaayo.