TULUN-AN NGA ARTIKULO 6
AMBAHANON 18 Nagapasalamat Bangod sa Gawad
Nagapasalamat Gid Kita Bangod Ginapatawad Kita ni Jehova
“Ginhigugma gid sang Dios ang kalibutan amo nga ginhatag niya ang iya bugtong nga Anak.”—JUAN 3:16.
ANG MATUN-AN NATON
Gusto gid naton pirme ipak ita kay Jehova nga ginapasalamatan naton sia bangod ginapatawad niya kita. Para mahimo naton ini, tun-an naton kon ano ang ginhimo ni Jehova para mapatawad niya ang aton mga sala.
1-2. Ano ang pagkaanggid sang aton sitwasyon sa sitwasyon sang pamatan-on nga lalaki nga ginsambit sa parapo 1?
IMADYINA ang isa ka pamatan-on nga lalaki nga may manggaranon nga mga ginikanan. Isa ka adlaw, napatay ang iya mga ginikanan bangod sa isa ka aksidente. Grabe gid ang kasubo nga iya nabatyagan. Pero, may isa pa gid ka masubo nga balita. Nabal-an niya nga gin-uyangan gali sang iya mga ginikanan ang ila kuarta kag nalubong sila sa utang. Gani imbes nga kuarta ang iya mapanubli, ang utang sang iya mga ginikanan ang iya napanubli. Ginasukot sia sang mga tawo nga gin-utangan sang iya mga ginikanan, pero indi gid niya ini masarangan nga bayaran.
2 Daw pareho sa sitwasyon sang sini nga pamatan-on ang aton sitwasyon subong. Perpekto ang aton una nga mga ginikanan nga sanday Adan kag Eva, kag nagaistar sila sa isa ka matahom nga paraiso. (Gen. 1:27; 2:7-9) May paglaum kuntani sila nga mabuhi sing wala sing katapusan. Pero nagpakasala sila, kag indi gid maayo ang resulta sini. Ginpahalin sila sa hardin sang Eden, kag wala na sila sing paglaum nga mabuhi sing wala sing katapusan. Ano ang napanubli sang ila mga kabataan halin sa ila? Ang Biblia nagasiling: “Paagi sa isa ka tawo [si Adan] nagsulod ang sala sa kalibutan kag ang kamatayon paagi sa sala, kag naglapnag ang kamatayon sa tanan nga tawo bangod sila tanan nakasala.” (Roma 5:12) Napanubli naton kay Adan ang sala nga nagaresulta sa kamatayon. Ini nga sala daw pareho sa isa ka daku nga utang, kag wala sing bisan sin-o man sa aton ang makasarang magbayad sa sini.—Sal. 49:8.
3. Ngaa mapaanggid sa “utang” ang aton mga sala?
3 Ginpaanggid ni Jesus sa “utang” ang aton mga sala. (Mat. 6:12, footnote; Luc. 11:4) Kon makasala kita, daw pareho lang nga nakautang kita kay Jehova nga indi gid naton masarangan nga bayaran. Kon indi kita pagbuligan, ang aton lamang kamatayon ang makabayad sa sini, kag wala kita sing paglaum nga mabuhi liwat.—Roma 6:7, 23.
4. (a) Kon wala kita ginbuligan, ano kuntani ang matabo sa aton bilang makasasala nga mga tawo? (Salmo 49:7-9) (b) Sa Biblia, ano ang ginapatuhuyan sang tinaga nga “sala”? (Tan-awa ang kahon nga “ Sala.”)
4 May posibilidad pa bala nga mabaton naton ang tanan nga nadula ni Adan kag ni Eva? Huo, pero kinahanglan naton ang bulig. (Basaha ang Salmo 49:7-9.) Kon wala kita ginbuligan, wala kuntani kita sing paglaum nga mabuhi sing wala sing katapusan ukon sa pagkabanhaw. Kon mapatay kita, mangin pareho kita sa mga sapat nga wala sing paglaum nga mabuhi liwat.—Man. 3:19; 2 Ped. 2:12.
5. Paano kita ginbuligan sang aton mahigugmaon nga Amay para mabayaran ang sala nga napanubli naton? (Tan-awa ang piktyur.)
5 Binagbinaga ang pamatan-on nga ginsambit sa umpisa. Ano ayhan ang mabatyagan niya kon may isa ka manggaranon nga tawo nga magsiling nga bayaran niya ang tanan nga utang sang pamatan-on? Sigurado nga magapasalamat gid ang pamatan-on kag batunon niya ining maalwan nga regalo. Sing kaanggid, ginhatagan kita sang aton mahigugmaon nga Amay nga si Jehova sing regalo. Ini nga regalo amo ang ginbayad sa sala nga napanubli naton kay Adan. Amo ini ang ginsiling ni Jesus parte sa sini: “Ginhigugma gid sang Dios ang kalibutan amo nga ginhatag niya ang iya bugtong nga Anak, agod ang tanan nga nagatuo sa iya indi malaglag kundi makatigayon sang kabuhi nga wala sing katapusan.” (Juan 3:16) Paagi man sa sini nga regalo, puede na mangin maayo liwat ang aton kaangtanan kay Jehova.
Ginbantala ni Jesus ang maayong balita parte sa pagpatawad ni Jehova nga nabase sa halad-gawad. (Juan 3:16) Dayon kinabubut-on niya nga ginhalad ang iya kabuhi para maaman ini nga gawad (Tan-awa ang parapo 5)
6. Ano nga mga tinaga sa Biblia ang binagbinagon naton sa sini nga artikulo, kag ngaa?
6 Paano kita nagabenepisyo sa sining dalayawon nga regalo nga nagpaposible para mapatawad ang aton mga sala? Para masabat ini, binagbinagon naton ang mga tinaga sa Biblia nga pagpasag-uli, pagtumbas, gawad, pagtubos, kag ginkabig nga matarong. Sa sini nga artikulo, binagbinagon naton ang kahulugan sini nga mga tinaga. Kon pamalandungan naton ang ginhimo ni Jehova para mapatawad niya ang aton mga sala, pasalamatan gid naton sia.
GUSTO NI JEHOVA NGA MANGIN ABYAN NATON SIA
7. (a) Ano pa ang nadula ni Adan kag ni Eva? (b) Bilang mga anak ni Adan kag ni Eva, ano ang kinahanglan gid naton? (Roma 5:10, 11)
7 Nadula ni Adan kag ni Eva ang paglaum nga mabuhi sing wala sing katapusan. Magluwas sa sini, nadula man nila ang ila hamili nga kaangtanan sa ila Amay nga si Jehova. Antes nagpakasala si Adan kag si Eva, bahin sila sang pamilya sang Dios. (Luc. 3:38) Pero sang ginlapas nila ang sugo ni Jehova, ginpagua niya sila sa iya pamilya. Natabo ini antes pa sila makabata. (Gen. 3:23, 24; 4:1) Gani bilang ila mga anak, kinahanglan gid naton ang bulig para mapasag-uli kita kay Jehova. (Basaha ang Roma 5:10, 11.) Buot silingon, dapat mangin maayo liwat ang aton kaangtanan sa iya. Suno sa isa ka reperensia, ang Griego nga tinaga nga gingamit para sa “pagpasag-uli” nagakahulugan nga “himuon nga abyan ang isa ka kaaway.” Dalayawon gid si Jehova kay sia ang nagpaposible para mangin abyan naton sia. Paano?
ANG GINHIMO NI JEHOVA PARA MANGIN ABYAN NATON SIA
8. Ano ang pagtumbas?
8 Ang pagtumbas amo ang ginhimo ni Jehova para mapasag-uli ang maayo nga kaangtanan sang makasasala nga mga tawo sa iya. Para mabalik ang isa ka butang nga nadula, dapat pareho ang balor sang butang nga ibaylo sa sini. Sa bahin ni Jehova, gintumbasan niya ang nadula ni Adan. Ginsambit man sa Griegong Kasulatan ang ginhimo ni Jehova para mangin abyan niya ang isa ka tawo.—Roma 3:25.
9. Ano nga temporaryo nga kahimusan ang ginhimo ni Jehova para mapatawad niya ang mga sala sang mga Israelinhon?
9 Para mangin maayo ang kaangtanan sang mga Israelinhon kay Jehova, naghimo sia sang temporaryo nga kahimusan para mapatawad niya ang ila mga sala. Sa Israel sang una, nagahiwat sila sang Adlaw sang Pagtumbas Para sa Sala kada tuig. Sa sina nga adlaw, nagahalad sing mga sapat ang mataas nga saserdote para sa mga sala sang katawhan. Siempre, indi bug-os nga matumbasan sang halad nga mga sapat ang mga sala sang mga Israelinhon bangod mas manubo ang balor sang mga sapat sangsa mga tawo. Pero handa si Jehova nga patawaron ang mga Israelinhon basta nagahinulsol sila kag ginatuman nila ang iya mga kasuguan parte sa paghalad. (Heb. 10:1-4) Magluwas sa mga halad nga ginahimo sa Adlaw sang Pagtumbas Para sa Sala, regular man nga nagahalad ang mga Israelinhon para sa ila mga sala. Paagi sa sini nga mga halad, narealisar nila nga makasasala sila kag kinahanglan ang permanente nga solusyon nga makatumbas sing bug-os sa ila mga sala.
10. Ano nga permanente nga kahimusan ang ginhimo ni Jehova para mapatawad niya ang aton mga sala?
10 May ginhimo si Jehova nga permanente nga kahimusan para mapatawad niya ang aton mga sala. “Ginhalad” niya ang iya pinalangga nga Anak “sing makaisa gid lang agod dalhon ang mga sala sang madamo.” (Heb. 9:28) Kag ‘ginhatag ni Jesus ang iya kabuhi nga gawad kabaylo sang madamo.’ (Mat. 20:28) Ano ang gawad?
ANG BILI NGA GINBAYAD PARA MANGIN ABYAN NATON SI JEHOVA
11. (a) Suno sa Biblia, ano ang gawad? (b) Ano ang kinahanglan para mabayaran ang gawad?
11 Suno sa Biblia, ang gawad amo ang bili nga ginbayad para mangin posible ang pagtumbas kag ang pagpasag-uli. a Paagi sa sini, puede na ibalik ni Jehova ang nadula ni Adan. Paano? Dumduma nga nadula ni Adan kag ni Eva ang ila perpekto nga kabuhi kag ang ila paglaum nga mabuhi sing wala sing katapusan. Gani ang bili sang gawad dapat pareho sa bili sang nadula ni Adan. (1 Tim. 2:6) Mabayaran lamang ini sang isa ka adulto nga tawo nga (1) perpekto; (2) may posibilidad nga mabuhi sing wala sing katapusan sa duta; kag (3) handa nga ihatag, ukon isakripisyo, ang iya kabuhi para sa aton. Ang kabuhi sini nga tawo amo ang magabulos, ukon magatumbas, sa kabuhi nga nadula.
12. Ngaa nabayaran ni Jesus ang gawad?
12 Binagbinaga ang tatlo ka rason kon ngaa nabayaran ni Jesus ang gawad. (1) Perpekto sia kag “wala sia sing nahimo nga sala.” (1 Ped. 2:22) (2) Bangod sini, may posibilidad sia nga mabuhi sing wala sing katapusan sa duta. (3) Handa sia nga mapatay kag ihatag ang iya kabuhi para sa aton. (Heb. 10:9, 10) Pareho sa una nga tawo nga si Adan antes sia nagpakasala, perpekto man si Jesus. (1 Cor. 15:45) Gani paagi sa kamatayon ni Jesus, natumbasan niya ang sala ni Adan, ukon nabayaran niya ang bili nga kinahanglan para mabayluhan ang nadula ni Adan. (Roma 5:19) Gani si Jesus ang nangin “katapusan nga Adan.” Indi na kinahanglan sang isa pa ka perpekto nga tawo para magbayad sa nadula ni Adan. Napatay si Jesus “sing makaisa gid lang.”—Heb. 7:27; 10:12.
13. Ano ang kinalain sang pagtumbas kag sang gawad?
13 Ano ang kinalain sang pagtumbas kag sang gawad? Ang pagtumbas amo ang ginhimo sang Dios para mapasag-uli ang maayo nga kaangtanan sang mga tawo sa iya. Ang gawad amo ang bili nga ginbayad para mangin posible ang pagtumbas sa makasasala nga mga tawo. Ang bili sini amo ang hamili nga dugo ni Jesus nga ginbubo para sa aton.—Efe. 1:7; Heb. 9:14.
GINTUBOS KITA NI JEHOVA KAG GINKABIG NIYA KITA NGA MATARONG
14. Ano naman ang binagbinagon naton subong, kag ngaa?
14 Ano ang mga resulta sang pagtumbas nga ginhimo ni Jehova? Madamo nga mga ekspresyon ang ginagamit sang Biblia para ipaathag ang mga resulta sini. Bisan pa halos pareho ang kahulugan sini nga mga ekspresyon, may matun-an kita sa kada ekspresyon parte sa ginhimo ni Jehova para mapatawad niya ang aton mga sala. Samtang ginabinagbinag naton ini nga mga tinaga, makita man naton ang mga pagpakamaayo sa aton sang pagtumbas nga ginhimo ni Jehova.
15-16. (a) Sa Biblia, ano ang ginapatuhuyan sang tinaga nga “gintubos”? (b) Ano ang nabatyagan naton bangod gintubos kita?
15 Sa Biblia, ang tinaga nga gintubos nagapatuhoy sa kahilwayan nga resulta sang pagbayad sang gawad. Amo ini ang ginsiling ni apostol Pedro parte sa sini: “Nakahibalo kamo nga indi paagi sa madinulunton nga mga butang, sa pilak ukon bulawan, nga nahilway [sa literal, “nagawad; natubos”] kamo sa inyo wala sing pulos nga dalanon sang pagkabuhi nga nabaton ninyo sa inyo mga katigulangan. Kundi paagi sa hamili nga dugo sang Cristo, nga kaangay sang dugo sang kordero nga wala sing depekto kag wala sing higko.”—1 Ped. 1:18, 19; footnote.
16 Bangod sa halad-gawad, mahilway na kita sa sala kag kamatayon nga nagapaantos gid sa aton. (Roma 5:21) Gani, daku ang aton kabalaslan kay Jehova kag kay Jesus. Nagapasalamat gid kita sa ila bangod gintubos kita paagi sa hamili nga dugo, ukon kabuhi, ni Jesus.—1 Cor. 15:22.
17-18. (a) Ano ang buot silingon sang ekspresyon nga ginkabig nga matarong? (b) Ano ang mga pagpakamaayo bangod ginakabig kita nga matarong ni Jehova?
17 Ang ekspresyon nga ginkabig nga matarong nagakahulugan nga ginpanas na ang aton mga sala. Bisan pa ginhimo ini ni Jehova, wala niya ginlapas ang iya mga kasuguan parte sa hustisya. Ginakabig niya kita nga matarong indi bangod ginpanikasugan naton ini, kag wala man niya ginakunsinti ang aton mga sala. Pero bangod nagatuo kita sa ginhimo ni Jehova kag ni Jesus para maaman ang gawad, handa si Jehova nga patawaron ang aton mga sala.—Roma 3:24; Gal. 2:16.
18 Ano ang mga pagpakamaayo bangod ginakabig kita nga matarong ni Jehova? May pila nga ginpili nga maggahom sa langit upod kay Jesus. Ginkabig sila nga matarong bilang mga anak sang Dios. (Tito 3:7; 1 Juan 3:1) Ginpatawad na ang ila mga sala. Ginpanas na ini, gani daw pareho lang nga wala nila nahimo ini nga mga sala. Bangod sini, kalipikado sila nga maggahom sa Ginharian. (Roma 8:1, 2, 30) May iban naman nga magakabuhi sing wala sing katapusan sa duta. Ginkabig sila nga matarong bilang mga abyan sang Dios, kag ginpatawad na ang ila mga sala. (Sant. 2:21-23) Ang dakung kadam-an nga makalampuwas sa Armageddon may paglaum nga indi makaeksperiensia sang kamatayon. (Juan 11:26) Pagabanhawon ang napatay nga “mga matarong” kag “mga indi matarong.” (Binu. 24:15; Juan 5:28, 29) Sa ulihi, mabaton sang tanan nga matinumanon nga alagad ni Jehova sa duta “ang mahimayaon nga kahilwayan sang mga anak sang Dios.” (Roma 8:21) Excited na gid kita sa tion nga mapasag-uli na sing bug-os ang aton kaangtanan sa aton Amay nga si Jehova.
19. Paano nangin maayo ang aton sitwasyon? (Tan-awa man ang kahon nga “ Ang Pagpatawad ni Jehova.”)
19 Ginsambit sa umpisa ang parte sa isa ka pamatan-on nga wala sing napanubli nga manggad. Ang napanubli niya amo ang daku nga utang nga indi gid niya masarangan nga bayaran. Daw pareho sa iya sitwasyon ang aton sitwasyon sadto. Pero nagapasalamat kita kay Jehova kay ginbuligan niya kita. Nangin maayo ang aton sitwasyon bangod may ginhimo si Jehova para mapatawad niya ang aton mga sala kag bangod ginbayaran ni Jesus ang gawad. Gintubos kita, ukon ginhilway, sa sala kag kamatayon bangod sa aton pagtuo kay Jesucristo. Ginpanas man ni Jehova ang aton mga sala nga daw pareho lang nga wala naton ini nahimo. Kag ang pinakaimportante sa tanan, puede na mangin maayo ang aton kaangtanan sa aton mahigugmaon nga Amay nga si Jehova.
20. Ano ang binagbinagon naton sa masunod nga artikulo?
20 Kon pamalandungan naton ang ginhimo ni Jehova kag ni Jesus para sa aton, gusto gid naton sila pasalamatan. (2 Cor. 5:15) Kon wala nila kita ginbuligan, wala gid kita sang paglaum. Pero, paano kita nagabenepisyo bangod ginapatawad kita ni Jehova? Binagbinagon naton ini sa masunod nga artikulo.
AMBAHANON 10 Dayawon si Jehova nga Aton Dios!
a Sa pila ka lenguahe, ang ekspresyon nga gingamit para i-translate ang tinaga nga “gawad” literal nga nagakahulugan sing “ang bili sang kabuhi,” ukon “ang ginbayad.”
