1. Sa masami, ngaa mabudlay mabal-an kon ano ang buot silingon sang isa ka tawo kon magsiling sia nga ginapatawad ka na niya?

 “GINAPATAWAD KO NA IKAW.” Sigurado gid nga maumpawan ka kon ihambal ini sang isa ka tawo nga naglain ang buot sa imo, ilabi na kon kabalo ka nga may nasiling ka ukon nahimo nga nakasakit sang iya balatyagon. Pero ano gid bala ang buot niya silingon? Ginapahangop bala niya nga mag-abyanay na kamo liwat? Ukon basi indi lang niya gusto istoryahan ang natabo? Ginapakita sini nga mabudlay mabal-an kon ano ang buot silingon sang isa ka tawo kon magsiling sia nga ginapatawad ka na niya.

 2. Paano ginalaragway sa Biblia ang pagpatawad ni Jehova? (Tan-awa man ang footnote.)

² Kon ikumparar sa aton ginahimo nga pagpatawad sa isa kag isa, lain gid ang pagpatawad ni Jehova sa aton. Pinasahi gid ang pagpatawad ni Jehova. Parte kay Jehova, ang salmista nagsiling: “Sa imo yara ang matuod nga kapatawaran, agod tahuron ka sang mga tawo.” a (Sal. 130:4) Gani, “matuod nga kapatawaran” ang pagpatawad ni Jehova. Ginapakita niya sa aton kon ano gid ang buot silingon sang pagpatawad. May mga tion nga gingamit sang mga manunulat sang Biblia ang isa ka Hebreo nga tinaga para ilaragway ang pagpatawad ni Jehova. Wala gid ginagamit ini nga tinaga para ilaragway ang pagpatawad sang mga tawo.

 3. Ano ang kinalain sang pagpatawad ni Jehova sa aton pagpatawad? (Isaias 55:​6, 7)

³ Kon ginapatawad ni Jehova ang isa ka tawo, ginapanas niya ang sala sina nga tawo. Gani, mangin maayo liwat ang ila kaangtanan.  Nagapasalamat gid kita kay Jehova kay bisan pa makasala kita sing madamo nga beses, handa sia nga patawaron kita sing bug-os.​—Basaha ang Isaias 55:​6, 7.

 4. Paano kita ginabuligan ni Jehova para mahangpan naton kon ano ang matuod nga pagpatawad?

⁴ Bangod lain ang pagpatawad ni Jehova kon ikumparar sa aton, paano naton mahangpan kon ano ang matuod nga pagpatawad? Ginabuligan kita ni Jehova nga mahangpan ini paagi sa paggamit sang mga ilustrasyon. Binagbinagon naton ang pila sa sini. Ipakita sini nga mga ilustrasyon kon paano ginadula ni Jehova ang aton sala kag kon paano niya ginabalik ang aton maayo nga kaangtanan sa iya. Samtang ginabinagbinag naton ini nga mga ilustrasyon, palig-unon kita sini nga pasalamatan pa gid ang aton mahigugmaon nga Amay nga nagapatawad sa aton sa madamo nga paagi.

GINADULA NI JEHOVA ANG SALA

 5. Ano ang ginahimo ni Jehova kon ginapatawad niya ang aton mga sala?

⁵ Sa masami, ginakumparar sang Biblia sa mabug-at nga mga palas-anon ang aton mga sala. Amo ini ang ginsiling ni Hari David parte sa iya mga sala: “Kay ang akon mga sala tagalumapaw; kaangay sang mabug-at nga palas-anon, indi ko ini masarangan.” (Sal. 38:4) Pero kon maghinulsol ang isa nga nakasala, patawaron sia ni Jehova. (Sal. 25:18; 32:5) Ang Hebreo nga ekspresyon nga gin-translate “patawara” nagakahulugan sing “hakwata” ukon “dal-a.” Gani, daw pareho si Jehova sa isa ka makusog nga tawo nga nagahakwat sang aton ginapas-an kag ginadala niya ini sa malayo.

 6. Daw ano kalayo ang ginadal-an ni Jehova sang aton mga sala?

⁶ Daw ano kalayo ang ginadal-an ni Jehova sang aton mga sala? Ginasabat ini sang isa pa ka ilustrasyon. Amo ini ang ginasiling sa aton sang Salmo 103:12: “Subong nga malayo ang sidlangan sa katundan, amo man sina kalayo ang pagpahilayo niya sa aton sang aton mga paglapas.” Ang sidlangan amo ang pinakamalayo nga lugar halin sa katundan. Indi gid magtabuay ang sidlangan kag ang katundan. Ginapahangop sini nga ginadala ni Jehova ang aton mga sala sa pinakamalayo nga lugar halin sa aton. Ginapakita sini nga ginapatawad kita ni Jehova sing bug-os.

 7. Suno sa Biblia, ano ang ginahimo ni Jehova sa aton mga sala? (Miqueas 7:​18, 19)

⁷ Bisan pa ginadala ni Jehova ang aton mga sala palayo sa aton, ginatago bala niya ini? Wala. Amo ini ang ginsiling ni Hari Ezequias parte kay Jehova: “Ginhaboy mo ang tanan ko nga sala sa imo likuran.” Ang footnote sini nagasiling nga “ginkuha mo ang tanan ko nga sala sa imo panulok.” (Isa. 38:​9, 17; footnote) Ginapahangop sini nga kon maghinulsol ang isa nga nakasala, ginahaboy ni Jehova ang iya mga sala para indi na ini makita. Puede man ini i-translate sing, “Ginpaposible mo nga daw wala lang natabo ang akon mga sala.” Ginpaathag pa gid ini sang isa pa ka ilustrasyon nga mabasa sa Miqueas 7:​18, 19. (Basaha.) Suno sa sini nga teksto, ginahaboy ni Jehova sa kadadalman sang dagat ang aton mga sala. Sang una, indi na gid makita liwat ang isa ka butang nga ginhaboy sa kadadalman sang dagat.

 8. Ano na ang natun-an naton?

⁸ Paagi sa sini nga mga ilustrasyon, natun-an naton nga kon ginapatawad kita ni Jehova, daw ginahakwat niya ang aton mabug-at nga ginapas-an ukon ginadula niya ang aton mga sala. Matuod gid ang ginsiling ni David nga “malipayon ang mga tawo nga ang iya mga paglapas ginpatawad kag ang ila mga sala gintabunan; malipayon ang tawo nga ang iya sala indi pag-isipon ni Jehova.” (Roma 4:​6-8) Amo ini ang buot silingon sang matuod nga pagpatawad.

GINAPANAS NI JEHOVA ANG SALA

 9. Ano nga ilustrasyon ang gingamit ni Jehova para ipakita nga ginapatawad niya kita sing bug-os?

⁹ Kon maghinulsol ang isa nga nakasala, ginapanas ni Jehova ang iya mga sala paagi sa  halad-gawad. Naggamit si Jehova sang isa pa ka ilustrasyon para ipaathag ini. Suno sa Biblia, ginahugasan kag ginabunlawan ni Jehova ang mga sala. Paagi sa sini, mangin matinlo ang isa nga nakasala. (Sal. 51:7; Isa. 4:4; Jer. 33:8) Ginlaragway mismo ni Jehova kon ano ang resulta sang iya ginahimo. Nagsiling sia: “Bisan pa ang inyo mga sala mapula, papution ini kaangay sang niebe; bisan pa kaangay ini sang mapula nga tela, mangin kaangay ini sang balahibo sang karnero.” (Isa. 1:18) Kon pula ang kolor sang mantsa sa isa ka tela, mabudlay gid ini kuhaon. Pero paagi sa ilustrasyon nga gingamit ni Jehova, ginapasalig niya sa aton nga hugasan niya sing maayo ang aton mga sala kag indi na ini makita.

10. Ano ang isa pa ka ilustrasyon nga gingamit ni Jehova para ipakita ang iya kahanda sa pagpatawad?

¹⁰ Ginsambit sa nagligad nga artikulo nga ginpaanggid sa “utang” ang aton mga sala. (Mat. 6:​12, footnote; Luc. 11:4) Gani sa kada tion nga makasala kita kay Jehova, daw pareho lang nga nagadaku ang aton utang sa iya. Daku gid katama ang utang naton kay Jehova. Pero kon ginapatawad kita ni Jehova, daw pareho lang nga nagasiling sia nga indi na niya pagpabayaran ang aton utang. Indi na niya kita pagsukton sa mga sala nga napatawad na niya. Makapaumpaw gid ang pagpatawad ni Jehova.

11. Ano ang buot silingon sang ginasiling sang Biblia nga ‘ginpanas’ ang aton mga sala? (Binuhatan 3:​19, footnote)

¹¹ Magluwas nga indi na pagpabayaran ni Jehova ang aton mga utang, ukon mga sala, ginapanas man niya ini. (Basaha ang Binuhatan 3:​19, footnote.) Binagbinaga ini nga ilustrasyon. Imadyina nga ginbutangan sang isa ka daku nga ekis ukon letra nga X ang imo utang nga nakasulat sa papel. Pero, posible nga kitaon gihapon ang mga numero bisan pa nga gin-ekisan na ini. Indi pareho sa sini ang ginatawag nga pagpanas. Para mahangpan naton ini nga ilustrasyon, dapat naton dumdumon nga mahapos lang panason ang tinta nga ginagamit sang mga tawo sang una. Puede lang sila maggamit sang basa nga espongha para panason ang ila ginsulat. Gani kon ‘ginpanas’ ang isa ka utang nga nakasulat sa papel, indi na gid ini kitaon. Wala na gid bisan kurit lang nga makita sa papel. Gani, wala ka na sang utang. Makapaumpaw gid mabal-an nga magluwas nga indi na pagpabayaran ni Jehova ang aton mga sala, ginapanas man niya ini sing bug-os.​—Sal. 51:9.

12. Ano ang ginatudlo sa aton sang ilustrasyon parte sa panganod?

¹² Parte sa pagpanas sang mga sala, naggamit si Jehova sang isa pa ka ilustrasyon. Nagsiling sia: “Panason ko ang imo mga kasaypanan kag tabunan ko ang imo mga sala sang panganod.” (Isa. 44:22) Gani kon nagapatawad si Jehova, daw pareho lang nga nagagamit sia sang madamol nga panganod sa pagtabon sa aton mga sala para indi na gid ini makita.

13. Ano ang ginabatyag naton bangod ginapatawad ni Jehova ang aton mga sala?

¹³ Ano ang ginatudlo sa aton sini nga mga ilustrasyon? Bangod ginapatawad ni Jehova ang aton mga sala, indi naton dapat pagpabug-atan ang aton kaugalingon paagi sa paghunahuna nga wala pa niya kita mapatawad. Paagi sa dugo ni Jesucristo, ginbayaran na sing bug-os ang aton mga utang ukon mga sala. Indi na gid makita ang listahan sini nga mga utang. Amo ini ang buot silingon sang matuod nga pagpatawad. Ipakita sa aton ni Jehova ini nga klase sang pagpatawad kon hinulsulan naton ang aton mga sala.

GINABALIK NI JEHOVA ANG ATON MAAYO NGA KAANGTANAN SA IYA

14. Ngaa masaligan naton si Jehova kon magsiling sia nga ginapatawad niya kita? (Tan-awa man ang mga piktyur.)

¹⁴ Bangod ginapatawad kita ni Jehova sing bug-os, puede na liwat mangin maayo ang aton kaangtanan sa iya. Buligan man kita sini nga malikawan ang panghunahuna nga indi gid niya kita mapatawad. Indi kita dapat mahadlok nga basi  akig pa sa aton si Jehova kag nagapangita sia sing paagi para silutan kita. Indi gid ina matabo. Ngaa masaligan naton si Jehova kon magsiling sia nga ginapatawad niya kita? Kay man, ginsilingan ni Jehova si manalagna Jeremias: “Patawaron ko ang ila kasaypanan, kag indi ko na pagdumdumon ang ila sala.” (Jer. 31:34) Kag ginkutlo ini ni apostol Pablo sang nagsiling sia: “Indi ko na pagdumdumon ang ila mga sala.” (Heb. 8:12) Pero ano gid bala ang buot silingon sini?

15. Ano ang buot silingon sang ekspresyon nga indi na pagdumdumon ni Jehova ang aton mga sala?

¹⁵ Kon ginapamensar sang isa ka tawo ang isa ka hitabo nga natabo sang una, masiling naton nga ginadumdom niya ini. Pero sa Biblia, may mga tion nga indi amo sini ang buot silingon sang ekspresyon nga “dumduma.” Kay man, puede man ini magpatuhoy sa ginahimo sang isa ka tawo para sa iban. Binagbinaga ang kriminal nga ginbitay sa usok sa tupad ni Jesus. Nagpangabay sia: “Jesus, dumduma ako kon magsulod ka sa imo Ginharian.” (Luc. 23:​42, 43) Gusto bala niya nga pamensaron sia ni Jesus sadto nga tion? Indi. Sa baylo, gusto niya nga may himuon si Jesus para sa iya. Ginapahangop sang ginsiling ni Jesus sa kriminal nga banhawon sia ni Jesus. Gani, sang nagsiling si Jehova nga indi na niya pagdumdumon ang aton mga sala, ginapahangop niya nga ginpatawad na niya ang aton mga sala. Indi niya paggamiton ini nga mga sala para silutan kita sa palaabuton.

16. Bangod ginapatawad kita ni Jehova, sa ano ginpaanggid sang Biblia ang aton kahimtangan?

¹⁶ Bangod ginapatawad kita ni Jehova, hilway na kita. Naggamit ang Biblia sang isa pa ka ilustrasyon para buligan kita nga mahangpan ini. Bangod indi kita perpekto, “mga ulipon [kita] sang sala.” Pero bangod ginapatawad kita ni Jehova, “ginhilway na [kita] sa pagkaulipon sa sala.” (Roma 6:​17, 18; Bug. 1:5) Bangod kabalo kita nga ginapatawad kita ni Jehova, daw pareho kita sa isa ka malipayon nga ulipon nga ginhilway na.

17. Ngaa masiling naton nga nag-ayo na kita bangod ginapatawad kita ni Jehova? (Isaias 53:5)

¹⁷ Basaha ang Isaias 53:5. Suno sa katapusan  nga ilustrasyon nga binagbinagon naton, daw pareho kita sa mga tawo nga may makamamatay nga balatian. Pero bangod sa halad-gawad nga gin-aman ni Jehova paagi sa iya Anak, daw pareho lang nga nag-ayo na kita. (1 Ped. 2:24) Bangod sa sala, naguba ang aton kaangtanan kay Jehova. Pero paagi sa gawad, mapatawad niya kita kag mangin maayo liwat ang aton kaangtanan sa iya. Kon nag-ayo ang isa ka tawo nga may malala nga balatian, sigurado nga nalipay gid sia. Gani nalipay man kita bangod ginapatawad kita ni Jehova kag nangin maayo liwat ang aton kaangtanan sa iya.

ANG EPEKTO SA ATON SANG PAGPATAWAD NI JEHOVA

18. Ano ang natun-an naton sa mga ilustrasyon sa Biblia parte sa pagpatawad ni Jehova? (Tan-awa man ang kahon nga “Kon Paano Kita Ginapatawad ni Jehova.”)

¹⁸ Ano ang natun-an naton sa mga ilustrasyon sa Biblia parte sa pagpatawad ni Jehova? Bug-os ang pagpatawad ni Jehova kag indi na niya pagdumdumon ang aton mga sala. Gani ginpaposible sang aton Amay sa langit nga mangin maayo ang aton kaangtanan sa iya. Pero, dapat man naton tandaan nga isa ka regalo ang pagpatawad ni Jehova. Regalo niya ini sa aton bangod palangga niya kita. Ginhatag niya ini indi bangod nagakadapat kita nga hatagan sini, kundi bangod sa iya wala tupong nga kaayo.​—Roma 3:24.

19. (a) Ngaa nagapasalamat gid kita? (Roma 4:8) (b) Ano ang binagbinagon naton sa masunod nga artikulo?

¹⁹ Basaha ang Roma 4:8. Nagapasalamat gid kita bangod si Jehova ang Dios sang “matuod nga kapatawaran.” (Sal. 130:4) Pero para patawaron kita, may dapat kita himuon kag importante gid ini. Nagsiling si Jesus: “Kon wala ninyo ginapatawad ang mga nakasala sa inyo, indi man kamo pagpatawaron sang inyo Amay sa inyo mga sala.” (Mat. 6:​14, 15) Maathag nga dapat naton ilugon si Jehova kag dapat naton patawaron ang iban. Paano naton ini mahimo? Binagbinagon naton ini sa masunod nga artikulo.