Si Mary kag ang iya bana nga si John a nalipay gid nga isugid ang maayong balita sa mga Pilipino nga nagsaylo kag nag-obra sa ila pungsod. Sa tion sang COVID-19 nga pandemic, nakakita si Mary sang Bible study sa ila pungsod kag sa iban nga pungsod. Paano niya ini ginhimo?

Ginapamangkot ni Mary ang iya mga Bible study, “May ara ka kilala nga gusto man magtuon sa Biblia?” Kon may ara, ginapangabay niya nga ipakilala ini sa iya. Simple lang ini nga pamangkot, pero maayo gid ang resulta sini. Ngaa? Kay man, gusto isugid sang mga nagatuon sa Pulong sang Dios ang ila mga natun-an sa ila pamilya kag mga abyan. Ano ang resulta sang pamangkot ni Mary?

Ang Bible study ni Mary nga si Jasmin may ginpakilala nga apat nga gusto man magtuon sa Biblia. Ang isa sa ila amo si Kristine. Nanamian gid sia sa iya pagtuon, gani ginpangabay niya si Mary nga magtuon sila sing duha ka beses kada semana. Sang ginpamangkot sia ni Mary kon may ara sia kilala nga gusto man magtuon sa Biblia, nagsiling si Kristine, “Sige, ipakilala ko ikaw sa mga ’miga ko.” Sa sulod lang sang pila ka semana, ginpakilala ni Kristine kay Mary ang apat niya ka amiga nga gusto man magtuon sa Biblia. Sang ulihi, ginpakilala pa gid ni Kristine sa iya ang iban niya nga mga abyan. Kag ang pila sa mga abyan ni Kristine may ginpakilala pa gid kay Mary nga interesado man magtuon sa Biblia.

Gusto ni Kristine nga magtuon man sa Biblia ang iya pamilya sa Pilipinas. Gani gin-istorya niya ang iya bata nga babayi nga si Andrea. Abi sadto ni Andrea ang mga Saksi isa ka kulto, wala sila nagapati kay Jesus, kag ang Daan nga Katipan lang ang ila ginagamit. Pero pagkatapos sang una pa lang nila nga pagtuon, narealisar niya nga sala gali ang iya ginahunahuna. Kon may bag-o sia nga natun-an, nagasiling sia, “Kon amo ina ang ginasiling sang Biblia, buot silingon amo ina ang kamatuoran.”

Sang ulihi, may ginpakilala si Andrea kay Mary nga duha niya ka abyan kag isa ka upod sa obra, kag nag-Bible study man sila. Kag kon naga-Bible study si Andrea, wala kabalo si Mary nga nagapamati gali ang bulag nga tiya ni Andrea nga si Angela. Isa ka adlaw, ginpangabay ni Angela si Andrea nga ipakilala sia kay Mary para makapa-Bible study man sia. Nanamian gid si Angela sa iya natun-an. Sa sulod sang isa ka bulan, madamo na sia sing nasaulo nga teksto kag gusto niya nga magtuon sila sing apat ka beses kada semana. Sa bulig ni Andrea,  regular sia nga nakatambong sa mga miting paagi sa videoconference.

Sang nabal-an ni Mary nga nagapamati gali pirme ang bana ni Kristine nga si Joshua sa ila pagtuon, ginpamangkot sia ni Mary kon gusto man niya mag-upod sa ila. Si Joshua nagsiling, “Mamati lang ako sa inyo, pero indi lang ’ko pagpamangkuta kay mahalin gid ’ko.” Pero lima pa lang ka minuto, mas madamo pa sia sing pamangkot sangsa kay Kristine. Kag gusto na niya magpa-Bible study.

Bangod sa simple nga pamangkot ni Mary, madamo ang nagpa-Bible study. Gani ginhatag niya sa iban nga kauturan ang pila sa ila. Sa kabilugan, 28 ang iya nangin Bible study sa apat ka pungsod.

Si Jasmin, ang una nga nagpa-Bible study nga ginsambit kaina, nabawtismuhan sang Abril 2021. Si Kristine naman ginbawtismuhan sang Mayo 2022, kag nagpauli sia sa Pilipinas para makaupod ang iya pamilya. Nabawtismuhan man ang duha ka Bible study nga ginpakilala ni Kristine kay Mary. Pagligad sang pila ka bulan pagkatapos nabawtismuhan si Kristine, nabawtismuhan man si Angela kag regular payunir na sia subong. Ang bana ni Kristine nga si Joshua, ang ila bata nga si Andrea, kag ang iban pa nga Bible study padayon nga nagauswag sa ila pagtuon sa Biblia.

Sang unang siglo, madamo nga tawo ang nagsugid sang maayong balita sa ila pamilya kag mga abyan. (Juan 1:​41, 42a; Binu. 10:​24, 27, 48; 16:​25-33) Puede mo man pamangkuton ang imo mga Bible study kag ang mga interesado, “May ara ka kilala nga gusto man magtuon sa Biblia?” Posible gid nga madamo ka man sing makita nga gusto magtuon sa Biblia paagi sa sining simple nga pamangkot.