1, 2. Ano nga pag-ipit ang ginaatubang sang mga pamatan-on subong, kag ano ang pila ka paagi nga mabatuan nila ini?

“ABI ko maalam ka, pero nagapati ka gali sa Dios,” siling sang isa ka estudyante sa isa ka pamatan-on nga utod nga babayi sa Britanya. Ang isa ka utod nga lalaki sa Germany nagsulat: “Para sa akon mga manunudlo, sugidsugid lang ang kasaysayan sang Biblia parte sa pagpanuga. Kag wala sila sing labot kon ang mga estudyante nagapati sa ebolusyon.” Ang isa ka pamatan-on nga utod nga babayi sa France nagsiling: “Indi gid makapati ang mga manunudlo sa amon eskwelahan nga may mga estudyante pa nga nagapati sa Biblia.”

² Bilang pamatan-on nga alagad ni Jehova ukon nagatuon pa lang parte sa Iya, ginaipit ka bala nga magsunod sa pila ka bantog nga mga pagpati, subong sang ebolusyon, sa baylo nga magpati sa Manunuga? Kon amo sini, may pila ka paagi nga mapalig-on mo ang imo pagtuo. Ang isa amo ang paggamit mo sa ginhatag sang Dios nga ikasarang sa paghunahuna sing maayo, nga “padayon nga magabantay sa imo.” Buligan ka sini nga sikwayon ang sayop nga mga pilosopiya nga makaguba sang imo pagtuo.—Basaha ang Hulubaton 2:10-12.

3. Ano ang binagbinagon naton sa sini nga artikulo?

 ³ Ang matuod nga pagtuo nabase sa sibu nga ihibalo parte sa Dios. (1 Tim. 2:4) Gani kon nagatuon ka sa Pulong sang Dios kag sa aton Cristianong mga publikasyon, indi ka dapat magdali. Gamita ang imo ikasarang sa paghunahuna sing maayo para ‘mahangpan’ mo ang imo ginabasa. (Mat. 13:23) Binagbinagon naton kon paano gid ini makabulig sa imo nga mapalig-on ang imo pagtuo sa Dios bilang ang Manunuga kag sa Biblia, mga topiko nga may tuman kadamo nga “makapakumbinsi nga ebidensia.”—Heb. 11:1, footnote.

4. Ngaa kinahanglan gid ang pagtuo sa pagpati sa Dios kag sa ginhalinan sang kabuhi, kag paano kita makahimo sang nagakaigo nga konklusion?

⁴ May nakasiling na bala sa imo nga nagapati sila sa ebolusyon bangod nabase ini sa siensia pero ang pagpati sa Dios nabase sa pagtuo? Madamo ang may amo sini nga pagtamod. Pero maayo nga dumdumon naton ini: Kinahanglan gid ang pagtuo, nagapati man kita sa Dios ukon sa ebolusyon. Ngaa? Wala sing isa sa aton ang nakakita sa Dios ukon nakakita sang pagpanuga. (Juan 1:18) Kag wala sing tawo—sientipiko man sia ukon indi—nga nakakita kon paano nagbag-o ang isa ka sahi sang kabuhi pakadto sa isa. Halimbawa, wala sing nakakita sang amu nga nangin tawo. (Job 38:1, 4) Gani tanan kita dapat magbinagbinag sang ebidensia kag gamiton naton ang aton ikasarang sa paghunahuna sing maayo para makahimo sing nagakaigo nga konklusion. Parte sa pagpanuga, si apostol Pablo nagsulat: “Ang iya [sang Dios] indi makita nga mga kinaiya, ang iya wala katapusan nga gahom kag pagka-Dios, maathag nga makita halin pa sang pagtuga sa kalibutan, bangod makita ini sa mga butang nga gintuga, gani wala sila sing ibalibad nga wala sila makakilala sa Dios.”—Roma 1:20.

5. Ano nga mga bulig sa pag-research ang natigayon naton bilang katawhan sang Dios para magamit naton ang aton ikasarang sa paghangop?

⁵ Kon tan-awon naton ang palibot kag hunahunaon ini sing maayo, mahangpan naton nga ang tanan ginhimo sing makatilingala. “Bangod sa pagtuo nahangpan naton” nga may Manunuga, bisan pa nga indi sia makita. Narealisar naton nga may maayo sia nga personalidad kag maalam gid sia. (Heb. 11:3, 27) Madamo kita sang matun-an sa iya mga tinuga  paagi sa pagbasa sang natukiban sang mga sientipiko. Ang pila sini nga impormasyon makita sa mga bulig sa pag-research pareho sang video nga The Wonders of Creation Reveal God’s Glory, sang mga brosyur nga Gintuga Bala ang Kabuhi? kag The Origin of Life—Five Questions Worth Asking, kag sang libro nga Is There a Creator Who Cares About You? Madamo man kita sing makuha nga ihibalo sa aton mga magasin. Ginainterbyu pirme sang Magmata! ang mga sientipiko kag ang iban pa kon ngaa nagapati na sila subong sa Dios. Ang mga artikulo nga “Gindesinyo Bala Ini?” nagpadaku sang mga halimbawa sang makatilingala nga mga desinyo sa aton palibot. Ginatinguhaan pirme sang mga sientipiko nga ilugon ining matahom nga mga desinyo.

6. Ano ang pila ka benepisyo sa paggamit sang mga bulig sa pag-research, kag paano ka nakabenepisyo?

⁶ Parte sa duha ka brosyur nga nasambit na, ang isa ka 19 anyos nga utod sa Estados Unidos nagsiling: “Daku gid ang nabulig sini sa akon. Pila ka beses ko na ini gintun-an.” Ang isa ka utod sa France nagsulat: “Nanamian gid ako sa mga artikulo nga ‘Gindesinyo Bala Ini?’ Ginapakita sini nga puede ilugon sang pinakamaalam nga mga enhinyero ang mga desinyo sa palibot pero indi nila ini matupungan.” Ang mga ginikanan sang isa ka 15 anyos nga dalagita sa South Africa nagsiling: “Ang una nga ginabasa sang amon bata sa Magmata! amo ang artikulo nga ‘Interbyu.’” Kamusta ikaw? Ginabasa mo man bala ini nga mga publikasyon? Makabulig ini sa imo pagtuo nga mangin pareho sa isa ka kahoy nga nakapanggamot sing maayo. Kon amo na sini ang imo pagtuo, mabatuan mo ang sayop nga mga panudlo nga daw pareho sang mabaskog nga hangin.—Jer. 17:5-8.

7. Ngaa luyag sang Dios nga gamiton mo ang imo ikasarang sa pagpangatarungan?

⁷ Sayop bala nga mamangkot parte sa Biblia? Indi! Luyag ni Jehova nga gamiton mo ang imo “ikasarang sa pagpangatarungan” para makumbinsi ka sang kamatuoran. Indi niya luyag nga magpati ka lang kay nagapati man ang iban. Gani gamita ang imo ikasarang sa paghunahuna sing maayo para matigayon mo ang sibu nga ihibalo. Ini nga ihibalo amo ang mangin mabakod nga basihan sang imo matuod nga pagtuo. (Basaha ang Roma 12:1, 2; 1 Timoteo 2:4.) Ang isa ka paagi nga mahimo mo ini amo ang pagtuon sang mga topiko nga luyag mo pa tun-an.

8, 9. (a) Ano ang gintun-an sang pila nga nalipay sila sa sini? (b) Ano ang napuslan sang iban sa pagpamalandong sa ila natun-an?

⁸ Ginpakamaayo sang pila nga tun-an ang mga tagna sa Biblia ukon ang kasaysayan, arkeolohiya, kag pagkasibu sang Biblia sa siensia. Ang isa ka talalupangdon nga tagna amo ang Genesis 3:15. Ginapakilala sini nga bersikulo ang panguna nga tema sang Biblia, nga amo ang pagbindikar sang pagkasoberano sang Dios kag ang pagpakabalaan sang iya ngalan paagi sa Ginharian. Paagi sa malaragwayon nga mga pinamulong, ginpakita sa sini nga bersikulo kon paano dulaon ni Jehova ang tanan nga pag-antos nga nagsugod sa Eden. Paano mo tun-an ang Genesis 3:15? Ang isa ka paagi amo ang paglista sing pasunod sang mga hitabo. Mahimo nalakip sa sini ang mga teksto nga ginapaathag sang Dios sing amat-amat ang mga karakter kag kahimusan nga ginsambit sa sini nga bersikulo, kag nagapamatuod nga natuman ang tagna. Samtang nakita mo nga nagahiliugyon ang tanan nga teksto, makahinakop ka nga ang mga manalagna kag manunulat sang Biblia ‘ginapahulag sang balaan nga espiritu.’—2 Ped. 1:21.

⁹ Nabinagbinag sang utod nga lalaki sa Germany kon paano ang kada libro sang Biblia may mga detalye parte sa Ginharian. Sia nagsiling: “Talalupangdon ini kay kalabanan sang mga 40 ka manunulat sang Biblia wala gani mag-abtanay kag wala magkilalahay.” Ang isa ka utod nga babayi sa Australia  napalig-on sang isa ka tulun-an nga artikulo sa Ang Lalantawan sa gua sang Disiembre 15, 2013, parte sa kahulugan sang Paskua. Ining pinasahi nga pagsaulog naangot gid sa Genesis 3:15 kag sa nagapakari nga Mesias. “Nahangpan ko sa sini nga pagtuon kon daw ano ka dalayawon si Jehova,” sulat niya. “Nagdayaw gid ako nga may naghimo sini nga kahimusan para sa mga Israelinhon kag nga matuman ini paagi kay Jesus. Nagdulog gid ako kag nagpamalandong kon daw ano ka tumalagsahon ang panihapon sa Paskua!” Ngaa amo sini ang ginbatyag sang utod? Ginpamalandungan niya ang iya nabasa kag “nakahangop sini.” Naglig-on ang iya pagtuo kag nangin suod sia kay Jehova.—Mat. 13:23.

10. Paano mapalig-on ang aton pagtuo sang pagkabunayag sang mga manunulat sang Biblia?

¹⁰ Makapalig-on man sang pagtuo ang pagbinagbinag sang kaisog kag pagkabunayag sang mga manunulat sang Biblia. Madamo nga manunulat sadto ang nagadayaw sang ila mga lider kag sang ila mga ginharian. Pero ang mga manalagna ni Jehova wala nagabutig. Handa sila nga irekord ang mga sala sang ila mismo katawhan, bisan sang ila mga hari. (2 Cron. 16:9, 10; 24:18-22) Kag ginsulat nila ang ila mga sala kag ang sala sang iban nga alagad sang Dios. (2 Sam. 12:1-14; Mar. 14:50) “Talagsa lang ini nga pagkabunayag,” siling sang isa ka solterito nga utod sa Britanya. “Nagdugang pa gid ini sang amon pagsalig nga ang Biblia halin gid kay Jehova.”

11. Paano pa gid maapresyar sang mga pamatan-on ang mga prinsipio sa Biblia?

¹¹ Madamo ang kumbinsido nga ang Biblia naghalin sa Dios bangod sang mga prinsipio sini. (Basaha ang Salmo 19:7-11.) Ang isa ka pamatan-on nga utod nga babayi sa Japan nagsulat: “Nalipay gid kami sang akon pamilya sang ginsunod namon ang mga panudlo sa Biblia. May kalinong kami, may paghiusa, kag may gugma.” Ginaamligan kita sang mga prinsipio sa Biblia gikan sa butig nga pagsimba kag sa mga disparatis nga nagaulipon sa madamo. (Sal. 115:3-8) Ano ang epekto sa katawhan sa pagpati nila sa mga pilosopiya nga wala sing Dios? Bangod sang mga panudlo pareho sang ebolusyon, ginapakadios nila ang mga tinuga, kag ginaagaw sini ang himaya nga para lang kay Jehova. Ang mga nagasiling nga wala sing Dios nagapangangkon nga kita ang bahala sa aton palaabuton. Pero wala man sila sing matanyag nga maayo nga paglaum sa palaabuton.—Sal. 146:3, 4.

12, 13. Paano naton mapaathag sa iban ang pagpanuga ukon ang Biblia?

¹² Paano mo ipaathag sing maayo sa iban ang pagpanuga kag ang Biblia? Una, hibalua anay ang ginapatihan nila. Ang pila nagasiling nga nagapati sila sa ebolusyon, pero nagapati man sila nga may Dios. Ginapatihan nila nga gingamit sang Dios ang ebolusyon sa pagtuga. Ang iban nagasiling nga nagapati sila sa ebolusyon kay indi ini pag-itudlo sa eskwelahan kon indi ini matuod. Kag ang iban wala na nagapati sa Dios kay nagsunggod sila sa relihion. Gani kon may ginaistorya ka parte sa ginhalinan sang kabuhi, mas maayo nga pamangkuton mo sia anay. Hibalua kon ano ang iya ginapatihan. Kon mangin makatarunganon ka kag pamatian mo sia, mahimo nga mamati man sia sa imo.—Tito 3:2.

¹³ Kon may magbais sa imo parte sa pagpanuga, hibalua anay ang iya pagpati. Mahimo mo sia pamangkuton kon paano nagsugod ang kabuhi kay wala sing Manunuga. Para magpadayon ang una nga porma sang kabuhi, dapat masarangan sini ang pagdamo. Ang isa ka propesor sang kemistri nagsiling nga para mahimo ini, kinahanglan ang (1) putos nga nagaamlig sa sini, (2) ikasarang nga makakuha kag makagamit sang enerhiya, (3) impormasyon sa mga gene, kag (4) ikasarang nga makopya ini nga mga impormasyon. Nagsiling pa sia: “Ang isa mahalawhaw gid sa kasibod bisan sang pinakasimple nga porma sang kabuhi.”

14. Ano ang imo himuon kon daw indi ka pa handa sa pagbinagbinag sang ebolusyon ukon sang pagpanuga?

 ¹⁴ Kon daw indi ka pa handa sa pagbinagbinag sang ebolusyon ukon sang pagpanuga, mahimo mo sundon ang simple nga pangatarungan ni Pablo. Nagsulat sia: “Ang tagsa ka balay may nagtukod, apang ang nagtukod sang tanan nga butang amo ang Dios.” (Heb. 3:4) Ini nga argumento makatarunganon gid kag epektibo! Huo, ang mabudlay nga mga desinyo ginhimo sang isa nga maalam. Mahimo mo man gamiton ang aton publikasyon nga nagapaathag parte sa sini. Ang isa ka utod nga babayi naghatag sang aton duha ka brosyur nga ginsambit kaina sa isa ka pamatan-on nga lalaki nga nagsiling nga wala sia nagapati nga may Dios pero nagapati sia sa ebolusyon. Pagligad sang mga isa ka semana, nagsiling ang pamatan-on, “Nagapati na ako subong nga may Dios.” Nasugdan ang pagtuon sa Biblia, kag ini nga pamatan-on nangin utod naton.

15, 16. Ano ang aton himuon antes naton ipaathag sa isa ang Biblia, kag ano dapat ang aton tulumuron?

¹⁵ Puede mo man ini himuon kon nagapakighambal ka sa isa nga nagaduhaduha sa Biblia. Hibalua kon ano gid ang iya ginapatihan kag kon ano nga topiko ang luyag niya. (Hulu. 18:13) Kon interesado sia parte sa siensia, mahimo sia mangin interesado kon sambiton mo ang mga punto nga nagapakita nga sibu ang Biblia sa siensia. Ang iban mahimo mangin interesado kon ipakita ang mga halimbawa sa Biblia nga sibu ang mga tagna kag kasaysayan sa sini. Ukon mahimo mo ipakita ang mga prinsipio sa Biblia nga makabulig sa pagkabuhi, pareho sang makita sa Sermon sa Bukid.

¹⁶ Dumduma nga ang imo tulumuron amo ang pagpahulag sang tagipusuon, indi ang magdaug sa mga argumento. Gani mamati sing maayo. Mamangkot sing sinsero, kag magsabat sing malulo kag sing matinahuron, ilabi na kon mas magulang sa imo ang imo ginaistorya. Mahimo nga pamatian man nila ang imo mga pagpati. Mahimo matalupangdan man nila nga ginapamensaran mo gid ang imo ginapatihan, kay madamo nga pamatan-on ang wala nagahimo sina. Siempre, dapat mo dumdumon nga indi na kinahanglan nga sabton mo ang mga luyag lang makigbais ukon luyag nga pakahuy-an ka.—Hulu. 26:4.

17, 18. (a) Ano ang makabulig sa imo nga matun-an ang kamatuoran sa Biblia kag mapalig-on ang imo pagtuo? (b) Ano nga pamangkot ang binagbinagon naton sa masunod nga artikulo?

¹⁷ Ang malig-on nga pagtuo wala lang nabase sa simple nga ihibalo sa Biblia. Gani tun-i sing maayo ang Pulong sang Dios, nga daw nagakutkot ka sang natago nga mga bahandi. (Hulu. 2:3-6) Gamita ang iban pa nga bulig sa pag-research nga matigayon sa inyo lenguahe, pareho sang Watchtower Library sa DVD, Watchtower ONLINE LIBRARY, subong man ang Watch Tower Publications Index ukon ang Giya sa Pagtuon Para sa mga Saksi ni Jehova. Tinguhai man nga basahon ang bug-os nga Biblia. Tilawi nga himuon ini sa sulod lang sang 12 ka bulan. Magalig-on gid ang imo pagtuo kon basahon mo ang Pulong sang Dios. Ang isa ka manugtatap sang sirkito nga naghimo sini sang pamatan-on pa sia, nagsiling: “Ang isa nga nakabulig sa akon nga mangin kumbinsido nga ang Biblia Pulong gid sang Dios amo ang pagbasa sini sing bug-os. Nahangpan ko na ang mga istorya sa Biblia nga gintudlo sa akon sang bata pa ako. Amo ini ang nagbulig sa akon nga mag-uswag sa espirituwal.”

¹⁸ Mga ginikanan—daku ang inyo mahimo para mag-uswag sa espirituwal ang inyo kabataan. Paano ninyo sila buligan para maglig-on ang ila pagtuo? Binagbinagon ini sa masunod nga artikulo.