1, 2. Ano ang ginapakigbatuan sang mga alagad ni Jehova?

ANG tanan nga matutom nga alagad sang Dios padayon nga nagapanikasog, halin kay Abel asta subong. Si apostol Pablo nagsulat sa Hebreo nga mga Cristiano nga ‘nagbatas sila kag nag-antos sang tuman nga mga pagtilaw,’ para mahamuot sa ila si Jehova kag mabaton nila ang iya pagpakamaayo. (Heb. 10:32-34) Ginpaanggid ni Pablo ang ila pagpanikasog sa mga atleta nga nagapaindisanay sa hampang sang mga Griego, pareho sang palumba sa dalagan, dumugay, kag boksing. (Heb. 12:1, 4) Nagapalumba kita subong para sa kabuhi, kag may mga kaaway kita nga luyag magpugong sa aton, magsandad sa aton, magtumba sa aton, kag indi luyag nga magmalipayon kita kag matigayon naton ang padya sa ulihi.

² Una, nagapakig-away (ukon, “nagapakigdumog,” footnote) kita kay Satanas kag sa iya malaut nga kalibutan. (Efe. 6:12) Kinahanglan gid nga pakigbatuan naton ang “bisan ano nga butang nga natukod sing malig-on” sa kalibutan. Nagalakip ini sang mga doktrina sini, pilosopiya, kag makahalalit nga  mga buhat, pareho sang imoralidad, pagpanigarilyo, pagpahubog, kag pag-abuso sa droga. Kag dapat man naton pirme pakigbatuan ang aton kaluyahon kag pagluya sing buot.—2 Cor. 10:3-6; Col. 3:5-9.

3. Paano kita ginahanas sang Dios para mabatuan naton ang aton mga kaaway?

³ Madaug gid bala naton ining gamhanan nga mga kaaway? Huo, pero dapat naton sila batuan. Ginpaanggid ni Pablo ang iya kaugalingon sa boksingero sang nagsiling sia: “Ang akon paagi sang pagsumbag indi pagsumbag sa hangin.” (1 Cor. 9:26) Pareho sang nagaboksing, dapat batuan naton ang aton mga kaaway. Ginahanas kag ginabuligan kita ni Jehova para mahimo ini. May mga instruksion sia sa iya Pulong para maluwas kita. Ginabuligan man niya kita paagi sa mga publikasyon base sa Biblia, Cristianong mga miting, mga asembleya, kag mga kombension. Ginagamit mo bala ang imo natun-an? Kon wala, mahimo nga ‘hangin lang ang imo ginasumbag,’ indi ang imo mga kaaway.

4. Ano ang aton himuon para indi kita madaug sang malaut?

⁴ Dapat pirme kita nagabantay kay mahimo atakehon kita sang aton mga kaaway kon indi kita handa ukon kon maluya kita. Ang Biblia nagapaandam sa aton: “Indi ka magpadaug sa malaut, kundi padayon nga dauga ang malaut paagi sa maayo.” (Roma 12:21) Ang mga tinaga nga “indi ka magpadaug sa malaut” nagapahangop nga puede naton madaug ang malaut. Mahimo naton ini kon padayon kita nga nagabato. Pero mahimo kita madaug ni Satanas, sang iya malaut nga kalibutan, kag sang aton mga kaluyahon kon indi kita magbantay kag kon mangampo na kita. Indi gid magpadaug kay Satanas!—1 Ped. 5:9.

5. (a) Ano ang makabulig sa aton pagpakig-away para pakamaayuhon sang Dios? (b) Sin-o sa Biblia ang binagbinagon naton?

⁵ Para magdaug, dapat naton pirme dumdumon kon ngaa nagapakig-away kita. Luyag naton nga pahamut-an ang Dios para pakamaayuhon niya. Ang Hebreo 11:6 nagasiling: “Ang nagapalapit sa Dios dapat magpati nga nagaluntad sia kag nagapadya sa mga hanuot nga nagapangita sa iya.” Ang Griegong tinaga nga ginbadbad nga “hanuot nga nagapangita” nagapahangop sang mabaskog kag bug-os gid nga panikasog. (Binu. 15:17) Madamo sing maayong mga halimbawa sa Kasulatan sadtong nanikasog nga tigayunon ang pagpakamaayo ni Jehova. Sanday Jacob, Raquel, Jose, kag Pablo nakaeksperiensia sang mabudlay nga mga kahimtangan nga apektado ang ila emosyon kag panglawas, pero nagbatas sila asta natigayon nila ang mga pagpakamaayo. Paano naton mailog sila nga apat?

6. Ano ang nakabulig kay Jacob nga magbatas, kag ano ang iya padya? (Tan-awa ang piktyur sa umpisa sini nga artikulo.)

⁶ Ang matutom nga si Jacob nagpakigbato kag nagbatas kay ginahigugma niya si Jehova kag importante para sa iya ang ila kaangtanan. Nagatuo gid sia sa promisa ni Jehova nga pakamaayuhon ang iya kaliwat. (Gen. 28:3, 4) Gani gintinguhaan niya nga matigayon ang pagpakamaayo sang Dios bisan malapit na sia 100 ka tuig. Nakigdumog pa gani sia sa anghel para matigayon ini. (Basaha ang Genesis 32:24-28.) Madaug bala ni Jacob ang gamhanan nga anghel? Indi. Pero pursigido gid sia, kag ginpakita niya nga wala sia nagaisol sa bisan ano nga kabudlayan! Gani ginpadyaan ang iya pagbatas. Bagay  sa iya ang ginhatag nga ngalan nga Israel, nga nagakahulugan sing “Nagapakigbato sa Dios” ukon “Ang Dios Nagapakigbato.” Nabaton ni Jacob ang padya nga ginatinguhaan man naton, ang kahamuot kag pagpakamaayo ni Jehova.

7. (a) Ano ang problema ni Raquel? (b) Paano sia nagbatas kag ginpakamaayo sang ulihi?

⁷ Luyag man ni Raquel, nga pinalangga nga asawa ni Jacob, nga masaksihan kon paano tumanon ni Jehova ang ginpromisa sini sa iya bana. Pero may problema nga daw wala sing solusyon. Wala sia sing anak. Ginatamod sadto nga makahuluya ini nga kahimtangan. Paano nabatas ni Raquel ining makapasubo nga kahimtangan? Padayon sia nga naglaum. Nangamuyo pa gid sia. Nabatian ni Jehova ang iya pangamuyo, kag sang ulihi ginpakamaayo sia sing mga anak. Gani nakasiling sia: “Nagpakigdumog ako sing todo . . . Kag nagdaug ako!”—Gen. 30:8, 20-24.

8. Ano ang mga pagtilaw kay Jose, kag ngaa maayo sia nga halimbawa para sa aton?

⁸ Ang matutom nga halimbawa nanday Jacob kag Raquel nailog sang ila anak nga si Jose, kag nakabulig ini sa iya nga maatubang ang mga pagtilaw sa iya kabuhi. Sang 17 anyos sia, gulpi nagbag-o ang iya kahimtangan. Ginbaligya sia sang iya mga utod bilang ulipon kay nahisa sila sa iya. Pila ka tuig nga nag-antos sia sa prisuhan sa Egipto bisan inosente sia. (Gen. 37:23-28; 39:7-9, 20-21) Wala magluya ang buot ni Jose; wala man sia magdumot. Sa baylo, ginpakabahandi niya ang iya kaangtanan kay Jehova. (Lev. 19:18; Roma 12:17-21) Makabulig sa aton ang halimbawa ni Jose. Halimbawa, bisan pa nga mabudlay ang aton inagihan sang bata pa kita ukon daw wala sing solusyon ang aton mga problema, dapat padayon kita nga makigbato kag magbatas. Makasalig kita nga kon himuon naton ini, pakamaayuhon kita ni Jehova.—Basaha ang Genesis 39:21-23.

9. Paano naton mailog sanday Jacob, Raquel, kag Jose para pakamaayuhon kita ni Jehova?

⁹ Madamo kita sang mga kabudlayan nga dapat naton batason. Mahimo nga ang pila sini amo ang inhustisya, diskriminasyon, ukon pagpakalain. Ukon basi ginbutangbutangan ka bangod sa kahisa. Sa baylo nga magluya, dumduma kon ano ang nakabulig kanday Jacob, Raquel, kag Jose nga mag-alagad kay Jehova sing malipayon. Ginpalig-on sila kag ginpakamaayo sang Dios kay ginpakabahandi gid nila ang ila kaangtanan sa iya. Padayon sila nga nagpakigbato kag ginhimo nila ang ila ginpangamuyo. Nagakabuhi na kita sa katapusan nga mga adlaw, gani importante nga maathag ang aton paglaum! Handa ka bala nga manikasog gid, ukon makigdumog, para kahamut-an ni Jehova?

10, 11. (a) Ngaa kinahanglan nga manikasog kita para pakamaayuhon sang Dios? (b) Paano kita makahimo sang husto nga mga desisyon kag mapakigbatuan ang sayop nga mga handum?

¹⁰ Ano ang pila ka kahimtangan nga dapat kita manikasog para pakamaayuhon sang Dios? Madamo ang nagapakigbato sa ila mga kaluyahon. Ang iban nabudlayan nga mangin malipayon sa pagbantala. Ukon basi ginabatas mo ang mapigaw nga panglawas ukon ang kasubo. May pila man nga nabudlayan sa pagpatawad sa nagpalain sang ila buot ukon nakasala sa ila. Bisan madugay na kita nga nagaalagad kay Jehova, dapat pakigbatuan naton ang mga butang nga magapugong sa aton sa pag-alagad  sa Dios, kay ginapadyaan lamang niya ang mga matutom sa iya.

¹¹ Mabudlay gid ang maghimo sang husto nga mga desisyon kag mangin matutom nga Cristiano. Amo gid sini ilabi na kon ginapakigbatuan naton ang aton sayop nga mga handum. (Jer. 17:9) Kon amo sini ang imo kahimtangan, mangamuyo kay Jehova kag pangayua ang iya balaan nga espiritu. Buligan ka sang pangamuyo kag sang balaan nga espiritu nga himuon ang husto, kag pakamaayuhon ka ni Jehova. Himua kon ano ang imo ginpangamuyo. Tinguhai nga magbasa sang Biblia kada adlaw, kag mangin regular sa personal nga pagtuon kag Pangpamilya nga Pagsimba.—Basaha ang Salmo 119:32.

12, 13. Paano nabuligan ang duha ka Cristiano nga mabatuan ang sayop nga mga handum?

¹² Madamo sing halimbawa kon paano ang Pulong sang Dios, ang iya espiritu, kag ang aton mga publikasyon nakabulig sa mga Cristiano nga mabatuan ang sayop nga mga handum. Ginbasa sang isa ka solterito ang artikulo nga “Paano Mo Mapamatukan ang Malain nga mga Handum?” sa Disiembre 8, 2003, nga Magmata! Ano ang iya reaksion? “Ginatinguhaan ko nga kontrolon ang akon sayop nga mga panghunahuna. Sang nabasa ko sa artikulo ang dinalan nga ‘para sa madamo, ang pagpakigbato nga malandas ang malain nga mga handum mabaskog gid,’ narealisar ko nga may mga kauturan man gali nga pareho  ko sing problema. Indi lang gali ako.” Nakabulig man sa iya ang artikulo nga “Alternatibo nga mga Estilo sang Pagkabuhi—Ginakahamut-an Bala sang Dios?” sa Oktubre 8, 2003, nga gua. Natalupangdan niya sa artikulo nga ang pagpakigbato sang iban nangin “tunok sa unod.” (2 Cor. 12:7) Pero samtang ginapakigbatuan nila ini, magamadinalag-on gid sila. Nagsiling pa sia: “Gani nagapati ako nga makapabilin ako nga matutom. Nalipay gid ako kay ginagamit ni Jehova ang iya organisasyon sa pagbulig sa aton nga mangin matutom kada adlaw sa sining malaut nga kalibutan.”

¹³ Binagbinaga man ang eksperiensia sang isa ka utod nga babayi sa Estados Unidos. Nagsulat sia: “Salamat gid sa paghatag sa amon sing impormasyon nga kinahanglan gid namon. Pamatyag ko ginsulat ini nga mga artikulo para gid sa akon. Pila na ka tuig nga ginapakigbatuan ko ang handum nga ginakaugtan ni Jehova. Kon kaisa, daw mangampo na ako. Maluluy-on si Jehova kag handa magpatawad, pero bangod sining akon sayop nga handum nga wala ko ginakangil-aran, pamatyag ko indi na ako mabuligan. Apektado gid ako sini. . . . Pagkatapos ko mabasa ang artikulo nga ‘May Tagipusuon Ka Bala sa Pagkilala kay Jehova?’ sa Marso 15, 2013, nga Ang Lalantawan, nabatyagan ko nga luyag gid ni Jehova nga buligan ako.”

14. (a) Ano ang naeksperiensiahan ni Pablo parte sa iya mga kaluyahon? (b) Paano naton mapakigbatuan ang aton mga kaluyahon?

¹⁴ Basaha ang Roma 7:21-25. Naeksperiensiahan ni Pablo kon daw ano kabudlay pakigbatuan ang sayop nga mga handum kag kaluyahon. Pero nagasalig sia nga mabatuan niya ini paagi sa pagpangamuyo kay Jehova kag sa pagtuo sa halad-gawad ni Jesus. Kamusta kita? Madaug naton ang aton mga kaluyahon kon pakigbatuan naton ini. Paano? Paagi sa pag-ilog naton kay Pablo, pagsalig sing bug-os kay Jehova indi sa aton ikasarang, kag pagtuo sa gawad.

15. Ngaa makabulig sa aton ang pangamuyo para mangin matutom kita kag mabatas naton ang mga pagtilaw?

¹⁵ Kon kaisa, luyag sang Dios nga ipabutyag naton ang aton mga ginakabalak-an. Halimbawa, ano abi kon kita (ukon ang miembro sang aton pamilya) magabalatian sing malubha ukon hingabuton kita? Dapat magsalig kita sing bug-os kay Jehova paagi sa pagpangamuyo nga buligan niya kita nga mangin matutom kag indi naton madula ang aton kalipay sa pag-alagad sa iya. (Fil. 4:13) Ginapakita sang mga halimbawa sang mga Cristiano sang panahon ni Pablo kag subong, nga ang pangamuyo makabulig gid sa aton nga magbakod kag magbatas.

16, 17. Ano ang luyag mo panikasugan?

¹⁶ Luyag gid sang Yawa nga magluya ang imo buot kag mag-untat ka sa pag-alagad. Gani panikasugi gid nga ‘himuon pirme ang maayo.’ (1 Tes. 5:21) Madaug mo si Satanas, ang iya malaut nga kalibutan, kag ang bisan ano nga sayop nga mga handum. Mahimo mo ini kon magsalig ka nga pabakuron ka kag buligan sang Dios.—2 Cor. 4:7-9; Gal. 6:9.

¹⁷ Gani padayon nga makig-away. Padayon nga makigbato. Padayon nga manikasog. Padayon nga magbatas. Saligi nga “ibubo sa inyo [ni Jehova] ang mga pagpakamaayo tubtob wala na sing kulang.”—Mal. 3:10.