1. Ano ang ginsiling ni Jesus sa iya katapusan nga gab-i upod sa iya mga disipulo?

SA IYA katapusan nga gab-i upod sa iya mga disipulo, ginsambit ni Jesus ang gugma sing halos 30 ka beses. Ginsugo niya sila nga dapat sila “maghigugmaanay.” (Juan 15:12, 17) Mangin talalupangdon gid ang ila gugma sa isa kag isa amo nga paagi sini makilala sila nga matuod nga mga sumulunod ni Jesus. (Juan 13:34, 35) Ini nga gugma indi sa balatyagon lamang. Ang ginapatuhuyan ni Jesus amo ang gugma nga handa magsakripisyo. Nagsiling sia: “Wala sing makalabaw sa gugma sang isa nga naghatag sang iya kabuhi para sa iya mga abyan. Mga abyan ko kamo kon ginahimo ninyo ang ginasugo ko sa inyo.”—Juan 15:13, 14.

2. (a) Sa ano makilala ang mga alagad sang Dios? (b) Ano nga mga pamangkot ang sabton naton sa sini nga artikulo?

² Ang gugma nga handa magsakripisyo kag ang mabakod nga paghiusa sang mga alagad ni Jehova nagapakilala nga sila mga katawhan sang Dios. (1 Juan 3:10, 11) Nagapasalamat gid kita nga ginapakita sang mga alagad ni Jehova ini nga gugma nga ginpakita man sang Cristo bisan ano man ang ila pungsod, tribo, lenguahe, ukon gindak-an! Pero mahimo kita mamangkot:  ‘Ngaa importante gid ang gugma subong? Paano si Jehova kag si Jesus nagapalig-on sa aton? Paano mapakita sang kada isa sa aton ang gugma sang Cristo nga “nagapalig-on”?’—1 Cor. 8:1.

3. Ano ang epekto sang “makahalanguyos nga mga tion” sa mga tawo?

³ Ang kabuhi ‘puno sing kabudlayan kag kasubo.’ Gani sa sining “makahalanguyos nga mga tion,” madamo ang nagaantos sang sarisari nga problema. (Sal. 90:10; 2 Tim. 3:1-5) Madamo ang daw mangampo na. Ginabanta nga kada tuig, sobra 800,000 ang nagakapatay bangod naghikog sila, ukon isa ang mapatay kada 40 segundos. Makapasubo nga bisan ang pila ka Cristiano nga nakaeksperiensia sini nga kabudlayan ang naghikog man.

4. Sin-o ang mga ginsambit sa Biblia nga luyag kuntani mapatay?

⁴ Sa panahon sang Biblia, ang pila sa matutom nga mga alagad sang Dios nakaeksperiensia sing grabe nga kabudlayan amo nga luyag nila nga mapatay. Halimbawa, nag-antos gid si Job amo nga nagsiling sia: “Ginakaugtan ko ang akon kabuhi; indi ko na luyag nga mabuhi pa.” (Job 7:16; 14:13) Si Jonas nga nasubuan gid sa resulta sang iya asaynment nagsiling: “O Jehova, kuhaa na lang ang akon kabuhi, kay maayo pa nga mapatay na lang ako sangsa mabuhi.” (Jon. 4:3) Isa ka bes, nasubuan gid si Elias amo nga luyag man niya nga mapatay. Nagsiling sia: “Sobra na ini! O Jehova, kuhaa na lang ang akon kabuhi.” (1 Hari 19:4) Pero palangga sila ni Jehova kag gusto niya nga pabaloran nila ang ila kabuhi. Wala sia naakig sa ila ginbatyag, kundi ginbuligan niya sila para indi sila mangampo kag ginpalig-on sila nga padayon nga mangin matutom sa iya.

5. Ngaa kinahanglan gid palig-unon kag higugmaon ang aton mga kauturan subong?

⁵ Subong, madamo sa aton mga kauturan ang nagaatubang sang mga problema kag dapat naton sila palig-unon kag higugmaon. Ang iban ginahingabot kag ginayaguta. May ara nga ginadaugdaug kag ginakutsokutso sa ila ulubrahan, ukon ginakapoy bangod kinahanglan nila mag-obertaym ukon mabudlay ang ila trabaho. Ang iban pa gid may problema sa pamilya kag mahimo nga ginapakalain sang ila indi Saksi nga tiayon. Gani bangod sini nga mga problema kag iban pa nga kabudlayan, madamo sa kongregasyon ang ginakapoy kag naluyahan sing buot. Sin-o ang makabulig sa ila?

6. Paano ang gugma ni Jehova nagapalig-on sa iya mga alagad?

⁶ Ginapalig-on ni Jehova ang iya mga alagad paagi sa pagpasalig sa ila nga palangga gid niya sila. Sigurado gid nga napalig-on ang matutom nga mga Israelinhon sang ginsilingan sila ni Jehova: “Nangin hamili ka sa akon, ginpadunggan ka, kag ginhigugma ko ikaw. . . . Indi ka mahadlok, kay kaupod mo ako”! (Isa. 43:4, 5) Bilang isa sa mga alagad ni Jehova, makasalig ka nga palangga ka gid ni Jehova. * Para sa mga nagauna sang matuod nga pagsimba, ang Pulong sang Dios nagpromisa: “Subong Isa nga gamhanan, sia ang magaluwas. Magahugyaw sia kag magakasadya tungod sa imo.”—Sof. 3:16, 17.

7. Ano ang pagkaanggid sang gugma ni Jehova sa gugma sang isa ka nagapasuso nga iloy? (Tan-awa ang piktyur sa umpisa sini nga artikulo.)

⁷ Nagpromisa si Jehova nga buligan niya  kag paumpawan ang iya katawhan bisan ano man nga pagtilaw ang ila ginaatubang. “Magasuso kamo kag pasalikaon kamo sa balikawang, kag tatapon kamo sing mahigugmaon sa iya mga tuhod. Subong sang iloy nga nagalugpay sa iya anak, padayon ko man kamo nga lugpayan.” (Isa. 66:12, 13) Makapalig-on gid hunahunaon ang isa ka iloy nga ginakugos ang iya lapsag ukon ginadalodalo ini! Paagi sa sini nga pagpaanggid, ginapakita ni Jehova kon daw ano ka daku sang iya gugma sa iya matuod nga mga alagad. Makasalig ka nga bilidhon ka para kay Jehova kag palangga ka gid niya.—Jer. 31:3.

8, 9. Paano ang gugma ni Jesus nagapalig-on sa aton?

⁸ Ari ang isa pa ka rason nga makasalig kita nga palangga kita ni Jehova: “Ginhigugma gid sang Dios ang kalibutan amo nga ginhatag niya ang iya bugtong nga Anak, agod ang tanan nga nagatuo sa iya indi malaglag kundi makatigayon sang kabuhi nga wala sing katapusan.” (Juan 3:16) Palangga man kita ni Jesus bangod ginhatag niya ang iya kabuhi para sa aton, kag ini nga gugma nagapalig-on sa aton. Ang Pulong sang Dios nagpromisa nga bisan ang ‘kapipit-an ukon kasisit-an’ indi “makapugong sa Cristo sa paghigugma sa aton.”—Roma 8:35, 38, 39.

⁹ Kon nagabatas kita sang mga pagtilaw nga nagapaluya sa aton, ukon nagadula sang aton kalipay sa pag-alagad kay Jehova, ang gugma sang Cristo nagahatag sa aton sing kusog para makabatas. (Basaha ang 2 Corinto 5:14, 15.) Ini nga gugma nagabulig sa aton nga makapadayon kag indi magpangampo bisan pa sang mga kalamidad, paghingabot, kapaslawan, ukon kabalaka.

10, 11. Sin-o ang may responsibilidad nga palig-unon ang mga naluyahan sing buot? Ipaathag.

¹⁰ Ginapalig-on man kita ni Jehova paagi sa Cristianong kongregasyon. Mabalusan sang kada isa sa aton ang iya gugma kon higugmaon kag palig-unon man naton ang aton mga kauturan. (1 Juan 4:19-21) Ginlaygayan ni apostol Pablo ang mga Cristiano: “Padayon nga palig-una kag pabaskuga ang isa kag isa, subong sang ginahimo na ninyo.” (1 Tes. 5:11) Indi lang ang mga gulang  ang dapat maghimo sini. Mailog man sang tanan sa kongregasyon si Jehova kag si Jesus sa pagpaumpaw kag pagpalig-on sa mga kauturan.—Basaha ang Roma 15:1, 2.

¹¹ Ang iban sa kongregasyon nga may depresyon mahimo kinahanglan magpadoktor kag magtomar sing bulong. (Luc. 5:31) Nahibaluan sang mga gulang kag sang iban sa kongregasyon nga indi sila doktor. Pero, daku ang ila mahimo para ‘lugpayan ang mga ginapung-awan, sakdagon ang mga maluya, kag mangin mapinasensiahon sa tanan.’ (1 Tes. 5:14) Ang tanan nga Cristiano dapat magpakita sing empatiya kag mangin mapinasensiahon, para mapalig-on nila ang mga naluyahan sing buot. Ginapalig-on mo bala ang iban? May mahimo ka pa bala para labi ka nga makapalig-on?

12. Maghatag sing halimbawa sang isa nga napalig-on bangod sang gugma sang kongregasyon.

¹² Paano naton mapalig-on ang mga naluyahan sing buot? “May mga tion nga gusto ko maghikog,” siling sang isa ka sister sa Europe. “Pero madamo ang nagabulig sa akon. Ang pagpalig-on kag pagpalangga sang mga kauturan sa kongregasyon amo ang nagluwas sang akon kabuhi. Ara gid sila pirme para sa akon bisan diutay lang ang nakahibalo nga may depresyon ako. May mag-asawa nga nagabulig nga magbakod ang akon espirituwalidad. Ginaatipan gid nila ako, kag handa gid sila sa pagbulig sa akon sa tanan nga tion.” Siempre, indi palareho ang mahatag naton nga bulig. Pero ang aton sinsero nga pagbulig may daku nga epekto sa mga naluyahan sing buot. *

13. Ano ang dapat naton himuon para mapalig-on naton ang iban?

¹³ Mamati sing maayo. (Sant. 1:19) Ang pagpamati nga may empatiya pagpakita gid sang gugma. Mahimo ka mamangkot sing mataktikanhon kag mainayuhon para mahangpan mo ang ginabatyag sang isa nga naluyahan sing buot. Kon himuon mo ini, mahibaluan mo kon paano mo sia mapalig-on. Dapat makita sa imo pangguyahon nga sinsero gid ang imo pagbulig. Kag kon magpabutyag sia sang iya balatyagon, mangin mapinasensiahon kag likawi nga magsaligbat. Kon mamati ka sing maayo, mahimo mo sia mahangpan. Makabulig ini nga magsalig sia sa imo kag mahimo mamati man sia sa imo ihambal para palig-unon sia. Kon ipakita mo nga nagaulikid ka gid, makapaumpaw gid ini sa iban.

14. Ngaa dapat naton likawan nga pakalainon ang iban?

¹⁴ Likawi nga pakalainon ang iban. Madugangan ang kasubo sang mga naluyahan sing buot kon pakalainon naton sila, kag mabudlayan kita nga mapalig-on sila. “Ang paghambal nga wala ginahunahuna sing maayo kaangay sang buno sang espada, apang ang pulong sang maalamon makapaayo.” (Hulu. 12:18) Siempre, indi naton gusto nga hungod nga ‘bun-on’ ang mga naluyahan sing buot paagi sa masakit nga tinaga. Pero, bisan pa indi naton ini hungod, masakit gihapon ini. Para mapalig-on naton ang iban, dapat naton tinguhaan nga ipakita ang empatiya, nga daw kita ang ara sa ila sitwasyon.—Mat. 7:12.

15. Ano ang puede naton gamiton para palig-unon ang iban?

¹⁵ Paumpawi ang iban paagi sa Pulong sang Dios. (Basaha ang Roma 15:4, 5.) Ang  Balaan nga Kasulatan makapaumpaw gid sa aton bangod naghalin ini sa “Dios nga nagapabakod sa aton kag nagabulig sa aton sa pagbatas.” May ara man kita sing mga bulig sa pagtuon sa Biblia pareho sang Watch Tower Publications Index kag Giya sa Pagtuon Para sa mga Saksi ni Jehova. Makabulig ini sa aton nga makit-an ang makapalig-on nga mga punto sa Kasulatan para maatubang naton ang sarisari nga mga problema. Nagabulig man ini sa aton para mangin epektibo pa gid kita sa aton panikasog nga mapalig-on ang aton mga kauturan.

16. Ano nga mga kinaiya ang dapat naton ipakita kon nagapalig-on sa isa ka Cristiano nga naluyahan sing buot?

¹⁶ Mangin mapinalanggaon kag malulo. Mga kinaiya ini sang gugma nga handa magsakripisyo nga aton ginapakita kon nagapalig-on sa iban. Si Jehova “ang Amay nga may mapinalanggaon nga kaluoy kag ang Dios nga nagahatag sang tanan nga sahi sang lugpay” sa iya mga alagad. (Basaha ang 2 Corinto 1:3-6; Luc. 1:78; Roma 15:13) Nangin maayo nga halimbawa sa sini si Pablo. Nagsulat sia: “Nangin malulo kami sa inyo, subong sang nagabatiti nga iloy nga mapinalanggaon nga nagaatipan sang iya mga anak. Gani bangod palangga namon kamo, determinado kami nga ipaambit sa inyo, indi lamang ang maayong balita sang Dios, kundi ang amon man kaugalingon.” (1 Tes. 2:7, 8) Kon ipakita naton ang pagpalangga nga ginpakita sang Dios, mapalig-on naton ang naluyahan sing buot kag mangin sabat kita sa iya pangamuyo.

17. Paano naton dapat tamdon ang aton mga kauturan para mapalig-on naton sila?

¹⁷ Indi magpaabot sing kahimpitan sa imo mga kauturan. Mangin balanse sa imo pagtamod sa iban. Mapaslawan ka lang kon magpaabot ka nga indi sila makasala, kag indi ini realistiko. (Man. 7:21, 22) Dumduma nga makatarunganon ang ginapaabot ni Jehova sa iya mga alagad. Kon ilugon naton sia, mangin mapinasensiahon kita sa kaluyahon sang iban. (Efe. 4:2, 32) Imbes nga ipabatyag nga kulang ang ila ginahimo sa pag-alagad, pasalamati sila sa ila maayo nga ginahimo. Mapalig-on gid sila sini. Ang sinsero nga komendasyon makapalig-on sa iban kag mangin ‘malipayon’ sila sa ila sagrado nga pag-alagad. Mas maayo ini himuon sangsa ipaanggid ang ila nahimuan sa iban.—Gal. 6:4.

18. Ano ang benepisyo kon palig-unon naton ang iban?

¹⁸ Ang kada karnero ni Jehova hamili gid sa iya kag kay Jesus, nga nag-aman sang halad-gawad. (Gal. 2:20) Palangga gid naton ang aton mga kauturan, gani dapat gid kita mag-ulikid sa ila. Para mangin makapaumpaw sa iban, “tinguhaan naton nga himuon ang mga butang nga nagadala sing paghidait kag ang mga butang nga makapabakod sa isa kag isa.” (Roma 14:19) Ginakalangkagan na gid naton ang tion nga indi na kita maluyahan sing buot kon mag-abot na ang Paraiso! Madula na ang balatian, inaway, kamatayon nga napanubli naton, paghingabot, problema sa pamilya, kag kasubo. Pagkatapos sang Isa ka Libo ka Tuig nga Paggahom, mangin himpit na ang katawhan. Ang mga makalampuwas sa katapusan nga pagtilaw pagaadoptaron bilang mga anak ni Jehova nga Dios diri sa duta kag may “mahimayaon nga kahilwayan sang mga anak sang Dios.” (Roma 8:21) Kabay nga kita tanan padayon nga magpakita sang gugma nga nagapalig-on, kag buligan naton ang kada isa nga makasulod sa bag-ong kalibutan sang Dios.