1, 2. (a) Indi pareho sa mga tawo nga may awtoridad kag posisyon, paano ginatratar ni Jehova ang katawhan? (b) Ano ang binagbinagon naton sa sini nga artikulo?

ANG mga tawo nga may awtoridad kag posisyon masami “nagapakaginuo” sa iban, kag nagapigos pa gani sa ila. (Mat. 20:25; Man. 8:9) Indi gid amo sini si Jehova! Bisan pa sia ang Labing Gamhanan, may konsiderasyon gid sia sa indi perpekto nga mga tawo. Mainayuhon sia kag nabalaka sia sa aton ginabatyag kag mga kinahanglanon. Bangod “ginadumdom niya nga kita yab-ok lamang,” wala niya ginapahimo ang indi naton masarangan.—Sal. 103:13, 14.

² Madamo sing halimbawa ang Biblia kon paano si Jehova nagpakita sing konsiderasyon sa iya mga alagad. Binagbinagon naton ang tatlo sini. Una, ang konsiderasyon nga ginpakita sang Dios sa bata nga si Samuel sang ginsugo sia nga isugid ang mensahe sang paghukom sa Mataas nga Saserdote nga si Eli; ikaduha, ang konsiderasyon nga ginpakita ni Jehova kay Moises sang nangindi si Moises nga manguna sa mga Israelinhon; kag ikatlo, ang konsiderasyon nga ginpakita sang Dios sang ginpagua niya ang mga Israelinhon sa Egipto. Tan-awon naton kon ano ang ginatudlo sini sa aton parte kay Jehova kag kon ano ang aton matun-an sa sini.

3. Ano ang indi kinaandan nga natabo sa bata nga si Samuel isa ka gab-i, kag ano ang mahimo naton ipamangkot? (Tan-awa ang piktyur sa umpisa sini nga artikulo.)

³ Bata pa si Samuel sang nagsugod sia sa ‘pag-alagad kay Jehova’ sa tabernakulo. (1 Sam. 3:1) Isa ka gab-i samtang nagakatulog si Samuel, may indi kinaandan nga natabo. * (Basaha ang 1 Samuel 3:2-10.) Nabatian niya nga may nagatawag sa iya. Abi niya ang Mataas nga Saserdote nga si Eli yadto, amo nga nagdalagan sia kay Eli kag nagsiling: “Ngaa gintawag mo ako ginuo ko?” Pero nagsiling si Eli nga wala niya sia gintawag. Sang natabo ini liwat sing duha pa ka beses, nahangpan ni Eli nga ang Dios ang nagatawag kay Samuel. Gani ginhambalan niya ang bata kon ano ang isabat, kag nagtuman si Samuel. Pero ngaa wala ginsugid ni Jehova, paagi sa iya anghel, nga sia ang nagatawag kay Samuel sa umpisa pa lang? Wala ginasugid sang Biblia ang rason, pero posible nga ginhimo ini ni Jehova bangod sang iya konsiderasyon sa bata nga si Samuel. Ngaa masiling naton ini?

4, 5. (a) Ano ang reaksion ni Samuel sa ginsugo sang Dios sa iya, kag ano ang natabo pagkaaga? (b) Ano ang ginatudlo sa aton sini nga rekord parte kay Jehova?

⁴ Basaha ang 1 Samuel 3:11-18. Ang Kasuguan ni Jehova nagasugo sa mga kabataan nga tahuron nila ang mga tigulang, ilabi na ang mga pangulo. (Ex. 22:28; Lev. 19:32) Gani daw indi naton maimadyin si Samuel nga makadto kay Eli pagkaaga kag isugid sa iya ang matigdas nga paghukom sang Dios. Ang rekord nagasiling nga “nahadlok si Samuel nga isugid kay Eli ang tuhoy sa palanan-awon.” Pero, gin-athag sang Dios kay Eli nga Sia ang nagatawag kay Samuel. Gani, ginsugo ni Eli si Samuel nga isugid sa iya ang ginsiling sang Dios. Nagsiling si Eli: “[Indi pag-ilikom] sa akon ang bisan isa lang ka tinaga sa tanan nga ginsiling niya sa imo.” Nagtuman si Samuel kag “ginsugiran [niya si Eli] sang tanan nga ginsiling sa iya.”

⁵ Wala na nakibot si Eli sa mensahe nga ginsugid ni Samuel, bangod antes sini, “ang tawo nga ginpadala sang Dios” nagsugid sa mataas nga saserdote sang pareho nga mensahe. (1 Sam. 2:27-36) Ini nga rekord parte kay Samuel kag kay Eli nagatudlo sa aton nga si Jehova may konsiderasyon gid kag maalam.

6. Ano ang matun-an naton sa paagi sang Dios sa pagbulig sa bata nga si Samuel?

⁶ Pamatan-on ka bala? Kon huo, ang rekord parte sa bata nga si Samuel nagapakita nga nahangpan ni Jehova ang imo mga kabudlayan kag ginabatyag. Mahimo mahuluy-on ka kag nabudlayan ka nga isugid ang mensahe sang Ginharian sa mga dalagku na, ukon nabudlayan ka nga mangin tuhay sa imo mga katubotubo. Makasalig ka nga gusto ka buligan ni Jehova. Gani mangamuyo sa iya kag isugid sa iya ang imo ginabatyag. (Sal. 62:8) Pamalandungi ang mga halimbawa sa Biblia sang mga pamatan-on pareho kay Samuel. Kag istoryaha ang imo mga masigka-Cristiano, pamatan-on man sila ukon tigulang na, nga nangin madinalag-on sa pag-atubang sang mga kabudlayan nga pareho sa imo ginaatubang. Sugiran ka nila sang mga tion nga ginbuligan sila ni Jehova, nga mahimo sa paagi nga wala gid nila ginapaabot.

7, 8. Paano ginpakita ni Jehova ang tumalagsahon nga konsiderasyon kay Moises?

⁷ Sang 80 anyos si Moises, mabudlay ang ginsugo sa iya ni Jehova. Luwason ni Moises ang pungsod sang Israel sa pagkaulipon sa Egipto. (Ex. 3:10) Mahimo nakibot gid si Moises sa sugo sang Dios, bangod isa sia ka manugbantay sang karnero sa Midian sing 40 ka tuig. Nagsiling sia: “Sin-o ako nga magkadto sa Paraon kag paguaon ko sa Egipto ang mga  Israelinhon?” Pero ginpasalig sia sang Dios: “Mangin kaupod mo ako.” (Ex. 3:11, 12) Nagpromisa man ang Dios nga ang mga gulang sang Israel “magapamati” kay Moises. Bisan pa sini, nagsabat si Moises: “Pananglitan . . . indi sila magpamati?” (Ex. 3:18; 4:1) Daw ginapahangop ni Moises nga basi indi matabo ang ginsiling sang Dios! Pero mapinasensiahon si Jehova kay Moises. Ang matuod, may ginhimo pa ang Dios. Ginhatagan niya sing gahom si Moises sa paghimo sing mga milagro, kag sia ang una nga tawo nga ginrekord sa Biblia nga nakahimo sini.—Ex. 4:2-9, 21.

⁸ Pero nagpamalibad gihapon si Moises. Nagsiling sia nga indi sia maayo maghambal. Nagsabat ang Dios: “Kaupod mo ako samtang nagahambal ka, kag tudluan ko ikaw kon ano ang isiling mo.” Nakumbinsi na bala si Moises? Wala gihapon, kay ginpangabay niya ang Dios nga iban na lang ang ipadala. Gani naakig si Jehova. Pero makatarunganon gihapon sia. Nagpakita sia sing konsiderasyon sa balatyagon ni Moises, gani gintangdo niya si Aaron subong humalambal ni Moises.—Ex. 4:10-16.

9. Paano ang pagkamapinasensiahon kag konsiderasyon ni Jehova nakabulig kay Moises sa iya asaynment?

⁹ Ano ang ginatudlo sini nga rekord parte kay Jehova? Subong Labing Gamhanan nga Dios, mahimo niya kuntani piliton si Moises para magtuman sa iya. Pero mapinasensiahon si Jehova kag mainayuhon, kag ginpasalig niya ang iya maugdang kag mapainubuson nga alagad nga kaupod niya sia. Nangin madinalag-on bala ang pagpakita sing konsiderasyon ni Jehova? Huo! Si Moises nangin maayo nga lider nga nagpakita sing kalulo kag konsiderasyon sa iban, pareho sa ginpakita ni Jehova sa iya.—Num. 12:3.

10. Ano ang benepisyo kon ilugon naton ang konsiderasyon ni Jehova?

¹⁰ Ano ang mga leksion para sa aton subong? Isa ka bala ka bana, ginikanan, ukon gulang sa kongregasyon? Kon huo, may awtoridad ka sa iban. Gani, importante gid nga ilugon mo si Jehova sa pagpakita sing konsiderasyon, kaayo, kag pagkamapinasensiahon sa imo asawa, mga kabataan, kag sa mga kauturan. (Col. 3:19-21; 1 Ped. 5:1-3) Kon ilugon  mo si Jehova kag ang Daku Pa nga Moises, nga si Jesucristo, mangin mahapos ka palapitan kag mapaumpawan mo ang iban. (Mat. 11:28, 29) Mangin maayo ka man nga halimbawa para sa ila.—Heb. 13:7.

11, 12. Samtang ginapagua ni Jehova ang mga Israelinhon sa Egipto, ano ang ginhimo niya para mabatyagan nila nga hilway sila sa katalagman kag naamligan?

¹¹ Sang nakagua ang mga Israelinhon sa Egipto sang 1513 B.C.E., mahimo sobra sila tatlo ka milyon. Posible nga tatlo sila ukon apat ka henerasyon nga may mga kabataan, tigulang, kag ang iban mahimo nagamasakit kag may kasablagan. Para magiyahan ining madamo nga tawo pagua sa Egipto, kinahanglan nila ang isa ka mahigugmaon kag may konsiderasyon nga Lider. Nangin amo gid sini nga Lider si Jehova paagi kay Moises. Gani nakabatyag ang mga Israelinhon nga hilway sila sa katalagman sang ginbayaan nila ang lugar nga ila natawhan.—Sal. 78:52, 53.

¹² Ano ang ginhimo ni Jehova para mabatyagan sang iya katawhan nga hilway sila sa katalagman kag naamligan? Una, ginpagua niya sila sa Egipto nga daw “organisado nga mga soldado.” (Ex. 13:18) Bangod organisado sila, nakita sang mga Israelinhon nga kontrolado sang ila Dios ang kahimtangan. Isa pa, mabatyagan nila nga kaupod nila si Jehova paagi sa “panganod kon adlaw kag . . . kasanag sang kalayo kon gab-i.” (Sal. 78:14) Daw pareho nga nagasiling si Jehova sa ila: “Indi kamo magkahadlok. Kaupod ninyo ako para tuytuyan kag amligan kamo.” Kinahanglan gid nila ini nga pasalig bangod sang masunod nga matabo.

13, 14. (a) Paano ginpakitaan ni Jehova sing konsiderasyon ang mga Israelinhon sa Pula nga Dagat? (b) Paano ginpakita ni Jehova ang iya gahom batok sa mga Egiptohanon?

¹³ Basaha ang Exodo 14:19-22. Imadyina nga ara ka didto upod sa mga Israelinhon. Nakibon kamo bangod ang hangaway sang Paraon ara sa likod ninyo kag ang Pula nga Dagat sa atubangan ninyo. Dayon nanghikot ang Dios. Ang haligi nga panganod nagsaylo sa likod sang inyo kampo, amo nga madulom sa bahin sang mga Egiptohanon. Pero may kasanag sa inyo kampo! Dayon nakita mo nga gin-untay ni Moises ang iya kamot sa dagat, kag naghuyop ang mabaskog nga hangin halin sa sidlangan amo nga natunga ang dagat kag may malapad na nga alagyan patabok. Gani ikaw, ang imo pamilya, kag ang tanan ninyo nga kasapatan nag-agi sa duta sa tunga sang dagat. Mahim-ong kamo nga naglakat upod sa iban pa nga katawhan. Dayon daw indi ka makapati nga ang imo ginaagyan indi lunangon ukon madanlog; mamala ini kag medyo matig-a amo nga mahapos ang paglakat sa sini. Gani bisan ang mga mahinay maglakat nakatabok nga hilway sa katalagman.

¹⁴ Basaha ang Exodo 14:23, 26-30. Dayon ang bugalon kag indi maalamon nga Paraon naglagas sa inyo. Gin-untay liwat ni Moises ang iya kamot sa dagat. Sa sini nga tion, ang tubig nga daw nangin pader nagbalik nga daw pareho sa duha ka tsunami nga nagbungguanay. Ginlapawan sini ang Paraon kag ang iya mga hangaway kag wala gid sa ila ang nakaluwas!—Ex. 15:8-10.

15. Ano ang ginatudlo sa imo sang sini nga rekord parte kay Jehova?

¹⁵ Matun-an naton sa sini nga rekord nga si Jehova isa ka organisado nga Dios, kag ini nga kinaiya nagabulig sa aton nga makabatyag nga hilway kita sa katalagman kag naamligan. (1 Cor. 14:33) Ginpakita man ni Jehova nga isa sia ka mahigugmaon nga manugbantay nga nagaulikid sa iya katawhan sa madamo nga paagi. Mapinalanggaon sia, kag ginaamligan niya sila batok sa ila mga kaaway. Nagapasalig gid ini sa aton nga indi mahadlok samtang nagahilapit ang katapusan sining sistema sang mga butang!—Hulu. 1:33.

16. Ano ang benepisyo kon repasuhon naton ang paagi ni Jehova sa pagluwas sa mga Israelinhon?

¹⁶ Subong, nagaulikid man si Jehova sa iya  katawhan bilang grupo. Nagaulikid sia sa ila sa espirituwal kag sa pisikal. Padayon niya nga himuon ini sa tion sang dakung kapipit-an nga tuman na gid kalapit. (Bug. 7:9, 10) Gani, pamatan-on man ukon tigulang, mapagros sa pisikal ukon may kasablagan, ang katawhan sang Dios indi mahadlok sa tion sang dakung kapipit-an. * Ang matuod, mangin maisog sila! Dumdumon nila ang ginsiling ni Jesucristo: “Magtindog kamo kag ihangad ang inyo ulo, bangod malapit na ang pagtubos sa inyo.” (Luc. 21:28) Padayon nila nga ipakita ang pagsalig bisan sa pag-atake sang Gog, nga nagapatuhoy sa paghimbon sang mga pungsod nga mas gamhanan pa sangsa Paraon sang una. (Ezeq. 38:2, 14-16) Ngaa nagasalig ang katawhan sang Dios? Bangod nahibaluan nila nga wala nagabag-o si Jehova. Ipakita niya liwat nga sia nagaulikid kag may konsiderasyon nga Manluluwas.—Isa. 26:3, 20.

17. (a) Ano ang benepisyo kon tun-an naton ang mga rekord sa Biblia parte sa pag-atipan ni Jehova sa iya katawhan? (b) Ano ang binagbinagon naton sa masunod nga artikulo?

¹⁷ Sa sini nga artikulo, nakita naton ang pila sa mga halimbawa nga nagapakita nga si Jehova mainayuhon kag may konsiderasyon kon nagaatipan, nagatuytoy, kag nagaluwas sa iya katawhan. Samtang ginapamalandungan mo ini nga mga rekord, tinguhai nga makatuon sing bag-o parte kay Jehova paagi sa pag-usisa sa mga detalye nga wala mo pa matalupangdan. Kon himuon mo ini, magatudok pa gid sa imo hunahuna kag tagipusuon ang iya matahom nga mga kinaiya, kag mangin mabakod ang imo gugma kag pagtuo sa Dios. Sa masunod nga artikulo, binagbinagon naton ang mga paagi nga mailog naton si Jehova sa pagpakita sing konsiderasyon sa pamilya, sa Cristianong kongregasyon, kag sa ministeryo.