1. Ngaa malipayon ang mga nagasimba kay Jehova? (Tan-awa ang piktyur sa umpisa sini nga artikulo.)

ANG mga Saksi ni Jehova malipayon gid nga katawhan. Malipayon sila nga nagaistoryahanay kag nagakinadlaw kon nagaupdanay sila sa ila mga miting, asembleya, kag mga pagtilipon. Ngaa malipayon gid sila? Ang panguna nga rason amo nga nakilala nila, ginaalagad, kag ginatinguhaan nila nga ilugon si Jehova, ang “malipayon nga Dios.” (1 Tim. 1:11; Sal. 16:11) Bangod sia ang Ginhalinan sang kalipay, luyag sang Dios nga mangin malipayon kita, kag ginahatagan niya kita sing madamo nga rason nga magkalipay.—Deut. 12:7; Man. 3:12, 13.

2, 3. (a) Ano ang kalipay? (b) Ngaa mahimo mabudlay mangin malipayon?

² Kamusta ikaw? Malipayon ka bala? Mas mangin malipayon ka pa bala? Ang kalipay isa ka balatyagon nga nagadugay, halin sa pagbatyag nga kontento ka asta sa pagbatyag nga nanamian ka gid sa imo kabuhi, kag gusto mo nga magpadayon ini. Ang Biblia nagasiling nga mangin matuod nga malipayon lang ang isa kon may maayo sia nga kaangtanan kay Jehova. Pero subong, indi mahapos mangin malipayon. Ngaa?

 ³ Mabudlay mangin malipayon kon makaeksperiensia kita sang masubo nga mga kahimtangan pareho sang pagkapatay ukon pagka-disfellowship sang aton pinalangga, pagbulagay, ukon pagkadula sing obra. Mabudlay man mangin malipayon kon pirme may pagbangigay sa pamilya, ginayaguta kita sa ulubrahan ukon sa eskwelahan, ukon ginahingabot kita ukon ginpriso bangod nagaalagad kita kay Jehova. Indi man mahapos mangin malipayon kon nagaluya na ang aton panglawas, may balatian kita nga kadugay mag-ayo, ukon may depresyon. Pero luyag ni Jesucristo, “ang malipayon kag lamang Gamhanan nga Manuggahom,” nga malugpayan kag mangin malipayon ang mga tawo. (1 Tim. 6:15; Mat. 11:28-30) Sa iya Sermon sa Bukid, ginsambit niya ang mga kinaiya nga makabulig sa aton nga mangin malipayon bisan sang mga pagtilaw sa kalibutan ni Satanas.

4, 5. Ano ang aton himuon para mangin malipayon kita kag para magpadayon ini?

⁴ Ang una nga ginsambit ni Jesus importante gid. Nagsiling sia: “Malipayon ang mga mahunahunaon sa ila espirituwal nga kinahanglanon, kay ila ang Ginharian sang langit.” (Mat. 5:3) Paano kita mangin mahunahunaon sa aton espirituwal nga kinahanglanon? Paagi sa pagtuon sa Biblia, pagtuman sa mga sugo sang Dios, kag pag-una sa pagsimba sa malipayon nga Dios sa aton kabuhi. Mangin malipayon gid kita kon himuon naton ini. Mangin mabakod ang aton pagtuo sa katumanan sang mga promisa sang Dios. Kag “ang makalilipay nga paglaum” nga ginahatag sang Pulong sang Dios para sa matuod nga mga sumilimba magapalig-on sa aton.—Tito 2:13.

⁵ Para padayon kita nga mangin malipayon, dapat naton pabakuron ang aton kaangtanan kay Jehova. Si apostol Pablo nagsulat: “Magkasadya kamo pirme sa Ginuo [nga si Jehova]. Suliton ko, Magkasadya kamo!” (Fil. 4:4) Para may hamili kita nga kaangtanan sa iya, dapat naton tigayunon ang kaalam halin sa Dios. Ang Pulong sang Dios nagasiling: “Malipayon ang tawo nga nakaangkon sing kaalam kag ang tawo nga nakatigayon sing paghantop. Ang kaalam kahoy sang kabuhi, kag ang nagapanguyapot sa sini magakabuhi sing malipayon.”—Hulu. 3:13, 18.

6. Ano pa ang himuon naton para mangin malipayon?

⁶ Pero, indi lang pagbasa sang Pulong sang Dios ang aton himuon para padayon kita nga mangin malipayon, dapat man naton ini iaplikar. Ginpadaku ini ni Jesus sang nagsiling sia: “Bangod nahibaluan ninyo ini, malipayon kamo kon himuon ninyo ini.” (Juan 13:17; basaha ang Santiago 1:25.) Importante ang pag-aplikar sang aton natun-an para matigayon naton ang aton espirituwal nga kinahanglanon kag para padayon kita nga mangin malipayon. Pero paano kita mangin malipayon bisan madamo ang mahimo magdula sang aton kalipay? Usisaon naton ang masunod nga ginsiling ni Jesus sa iya Sermon sa Bukid.

7. Paano mangin malipayon ang mga nagalalaw?

⁷ “Malipayon ang mga nagalalaw, kay lugpayan sila.” (Mat. 5:4) Mahimo mamangkot ang iban, ‘Paano mangin malipayon ang isa kon nagalalaw sia?’ Wala ginapatuhuyan ni Jesus ang tanan nga nagalalaw. Bisan ang mga malauton nagalalaw man bangod sa mga pag-antos nga ila naeksperiensiahan sa sining “makahalanguyos nga mga tion nga mabudlay atubangon.” (2 Tim. 3:1) Pero  maiyaiyahon sila kag ang ila paglalaw wala nagapasuod sa ila kay Jehova, amo nga indi sila malipayon. Ang ginapatuhuyan ni Jesus amo ang mga mahunahunaon sa ila espirituwal nga kinahanglanon kag nagalalaw sila bangod sa kalautan nga nagakatabo. Nahibaluan nila nga makasasala sila kag nakita nila ang makapasubo nga resulta sang sala sa kalibutan. Natalupangdan ni Jehova ining mga sinsero nga nagalalaw; ginalugpayan niya sila paagi sa iya Pulong, kag ginabuligan niya sila nga mangin malipayon.—Basaha ang Ezequiel 5:11; 9:4.

8. Ipaathag kon paano mangin malipayon ang isa nga malulo.

⁸ “Malipayon ang mga malulo, kay magapanubli sila sang duta.” (Mat. 5:5) Paano mangin malipayon ang isa nga malulo? Madamo nga tawo ang nagbag-o sang nahibaluan nila ang sibu nga ihibalo sang kamatuoran. Sang una, mahimo nga mapintas sila, palaaway, kag madali maakig. Pero ginsuksok nila “ang bag-o nga personalidad” kag ginpakita “ang mapinalanggaon nga kaawa, kaayo, pagkamapainubuson, kalulo, kag pagkamapinasensiahon.” (Col. 3:9-12) Gani, nangin mahidaiton sila, mahigugmaon, kag mas malipayon sa ila kabuhi. Dugang pa, ang Pulong sang Dios nagpromisa nga “magapanubli sila sang duta.”—Sal. 37:8-10, 29.

9. (a) Sa ano nga kahulugan nga ang mga malulo ‘magapanubli sang duta’? (b) Ngaa “ang mga ginagutom kag ginauhaw sa pagkamatarong” mangin malipayon?

⁹ Sa ano nga kahulugan nga ang mga malulo “magapanubli sang duta”? Ang hinaplas nga mga disipulo ni Jesus magapanubli sang duta kon maggahom sila sa sini subong mga hari kag saserdote. (Bug. 20:6) Pero ang minilyon nga ang paglaum indi sa langit magapanubli sang duta kay magaistar sila sa sini sing wala sing katapusan. Mangin himpit na sila, may paghidait, kag malipayon. Ining duha ka grupo ang ginapatuhuyan ni Jesus nga malipayon bangod “ginagutom [sila] kag ginauhaw sa pagkamatarong.” (Mat. 5:6) Ang ila handum sa pagkamatarong ihatag ni Jehova sa bag-ong kalibutan. (2 Ped. 3:13) Kon dulaon na sang Dios ang tanan nga kalautan, mangin malipayon na ang mga matarong kag indi na gid sila maglalaw bangod sa ginahimo sang mga malauton.—Sal. 37:17.

10. Ano ang buot silingon kon maluluy-on ang isa?

¹⁰ “Malipayon ang mga maluluy-on, kay pakitaan sila sing kaluoy.” (Mat. 5:7) Maluluy-on ang isa kon mainayuhon sia, mapinalanggaon, kag mainawaon, ukon nabatyagan niya ang pag-antos sang iban. Pero ang kaluoy indi lang isa ka balatyagon. Suno sa Biblia, dapat ini ipakita sa buhat.

11. Ano ang matun-an naton sa ilustrasyon parte sa mabinuligon nga Samaritano?

¹¹ Basaha ang Lucas 10:30-37. Ang ilustrasyon ni Jesus parte sa mabinuligon nga Samaritano maathag nga nagapakita kon paano mangin maluluy-on. Bangod naluoy gid ang isa ka Samaritano, napahulag sia nga buligan ang isa nga nagaantos. Pagkatapos ginsaysay ni Jesus ini nga ilustrasyon, nagsiling sia: “Lakat ka, kag himua man ini.” Gani, mahimo naton pamangkuton ang aton kaugalingon: ‘Ginahimo ko man bala ang ginhimo sang maluluy-on nga Samaritano? Ano pa ang puede ko himuon para buligan ang mga nagaantos? Halimbawa, makabulig bala ako sa tigulang nga mga Cristiano, sa mga balo, kag sa mga kabataan nga indi Saksi ang mga ginikanan? Ano ang puede ko himuon para “malugpayan ang mga ginapung-awan”?’—1 Tes. 5:14; Sant. 1:27.

12. Ngaa malipayon kita kon maluluy-on kita?

¹² Pero ngaa malipayon kita kon maluluy-on kita? Kay kon maluluy-on kita, mabatyagan naton ang kalipay nga resulta  sang paghatag. Malipayon man kita bangod nahibaluan naton nga nahamuot si Jehova sa aton. (Binu. 20:35; basaha ang Hebreo 13:16.) Si Hari David nagsiling parte sa tawo nga maluluy-on: “Bantayan sia ni Jehova kag amligan ang iya kabuhi. Kabigon sia nga malipayon sa duta.” (Sal. 41:1, 2) Kon maluluy-on kita, kaluy-an man kita ni Jehova kag mangin malipayon kita sing dayon.—Sant. 2:13.

13, 14. Ngaa malipayon “ang mga putli sing tagipusuon”?

¹³ “Malipayon ang mga putli sing tagipusuon,” siling ni Jesus, “kay makita nila ang Dios.” (Mat. 5:8) Para mangin putli ang aton tagipusuon, dapat matinlo ang aton ginahunahuna kag ginahandum. Importante gid ini para batunon ni Jehova ang aton pagsimba.—Basaha ang 2 Corinto 4:2; 1 Tim. 1:5.

¹⁴ Ang mga putli sing tagipusuon makatigayon sing matinlo kag malipayon nga kaangtanan kay Jehova, nga nagsiling: “Malipayon ang mga nagalaba sang ila malaba nga mga panapton.” (Bug. 22:14) Ano ang buot silingon sang ‘paglaba sang ila malaba nga mga panapton’? Para sa hinaplas nga mga Cristiano, ang ‘paglaba sang ila malaba nga mga panapton’ nagakahulugan nga matinlo sila sa panulok ni Jehova, kag hatagan niya sila sing imortal nga kabuhi kag mangin malipayon sila sing wala sing katapusan sa langit. Para naman sa daku nga kadam-an nga nagalaum nga mabuhi sa duta, nagakahulugan ini nga mangin abyan sila sang Dios bangod ginatamod niya sila nga matarong. Ang Biblia nagasiling nga ‘ginalabhan nila ang ila malaba nga panapton kag ginapaputi ini sa dugo sang Kordero.’—Bug. 7:9, 13, 14.

15, 16. Paano ang mga putli sing tagipusuon ‘makakita sa Dios’?

¹⁵ Pero paano ang mga putli sing tagipusuon ‘makakita sa Dios’ kay “wala sing tawo nga makakita sa [Dios] kag mabuhi pa”? (Ex. 33:20) Ang Griego nga tinaga nga gin-translate “makita” mahimo magkahulugan sing “makita paagi sa hunahuna, mahangpan, mahibaluan.” Ang mga nakakita sa Dios paagi sa ‘mga mata sang ila tagipusuon’ amo yadtong nakakilala gid sa iya, kag nagapabalor sang iya mga kinaiya. (Efe. 1:18) Perpekto nga gin-ilog ni Jesus ang personalidad sang Dios, gani nakasiling sia: “Ang bisan sin-o nga nakakita sa akon nakakita man sa Amay.”—Juan 14:7-9.

¹⁶ Dugang pa, ang matuod nga mga sumilimba ‘makakita sa Dios’ kon maeksperiensiahan nila ang iya bulig sa ila. (Job 42:5) Ginapokus man nila ang ‘mga mata sang ila tagipusuon’ sa dalayawon nga mga pagpakamaayo nga ginpromisa sang Dios para sa mga nagapabilin nga putli kag matutom sa iya. Kag ang ginbanhaw nga mga hinaplas  literal nga makakita kay Jehova kon mabaton na nila ang ila padya sa langit.—1 Juan 3:2.

17. Ngaa malipayon ang mga makihidaiton?

¹⁷ Dayon, nagsiling si Jesus: “Malipayon ang mga makihidaiton.” (Mat. 5:9) Mangin malipayon gid ang mga nagatinguha nga makighidait sa iban. Si disipulo Santiago nagsulat: “Ang mga nagapakighidait magasab-ug sa mahidaiton nga mga kahimtangan kag magaani sang bunga sang pagkamatarong.” (Sant. 3:18) Kon may problema kita sa isa ka utod sa aton kongregasyon ukon sa aton pamilya, pangabayon naton ang bulig sang Dios para mangin makihidaiton kita. Dayon, ihatag ni Jehova ang iya balaan nga espiritu, kag buligan kita sini nga mapakita ang Cristiano nga mga kinaiya, kag mangin malipayon gid kita. Ginpadaku ni Jesus nga importante gid nga mangin makihidaiton kita sang nagsiling sia: “Gani, kon nagadala ka sang imo dulot sa halaran kag madumduman mo nga ang imo utod may malain nga buot sa imo, ibilin ang imo dulot sa atubangan sang halaran, kag maglakat ka. Makighidait ka anay sa imo utod, kag sa pagbalik mo, ihalad ang imo dulot.”—Mat. 5:23, 24.

18, 19. Ngaa malipayon ang mga Cristiano bisan ginahingabot sila?

¹⁸ “Malipayon kamo kon ginapakahuy-an kamo kag ginahingabot kag ginabutangbutangan sang tanan nga sahi sang kalautan tungod sa akon.” Ano ang buot silingon ni Jesus? Nagdugang sia: “Magkasadya kamo kag magkalipay, kay daku ang inyo padya sa langit, bangod amo man sina ang paghingabot nila sa mga manalagna nga nauna sa inyo.” (Mat. 5:11, 12) Sang ginbunal kag ginmanduan ang mga apostoles nga mag-untat na sa pagbantala, “naghalin sila sa atubangan sang Sanhedrin, nga nagakasadya.” Wala sila nalipay bangod ginbunal sila. Pero, nalipay sila “bangod ginkabig sila nga takus pakahuy-an tungod sa [ngalan ni Jesus].”—Binu. 5:41.

¹⁹ Subong, malipayon nga ginabatas sang katawhan ni Jehova ang mga pagtilaw ukon ang mga paghingabot tungod sa ngalan ni Jesus. (Basaha ang Santiago 1:2-4.) Pareho sa mga apostoles, wala kita nalipay bangod nagaantos kita. Pero kon huptan naton ang aton integridad sa Dios kon may mga pagtilaw, buligan kita ni Jehova nga makabatas. Halimbawa, sang Agosto 1944, si Henryk Dornik kag ang iya utod ginpadala sa concentration camp. Ang mga nagahingabot sa ila nagsiling: “Indi gid sila magkompromiso. Malipayon sila bisan pahugon sila nga patyon ukon paantuson.” Si Brother Dornik nagsiling: “Indi ko gusto mag-antos ukon mapatay, pero nalipay gid ako nga mag-antos nga may kaisog kag dignidad tungod sa akon katutom kay Jehova. . . . Ang tinagipusuon nga mga pangamuyo nagpasuod pa gid sa akon kay Jehova, kag nangin masaligan gid sia nga Manugbulig.”

20. Ngaa malipayon kita nga nagaalagad sa “malipayon nga Dios”?

²⁰ Kon nahamut-an kita sang “malipayon nga Dios,” mangin malipayon kita bisan ginahingabot kita, ginapamatukan sang aton pamilya, may balatian, ukon tigulang na. (1 Tim. 1:11) Malipayon man kita bangod sang matahom nga mga promisa sang aton Dios, “nga indi makabutig.” (Tito 1:2) Kon matuman na ang dalayawon nga mga promisa ni Jehova, malipatan na naton ang mga kabudlayan subong. Sa Paraiso, sobra pa sa maimadyin naton ang mga pagpakamaayo nga ihatag ni Jehova. Kag indi gid matupungan ang kalipay nga aton mabatyagan. Huo, “mangin malipayon gid [kita] sa bugana nga paghidait.”—Sal. 37:11.