1. Ano ang epekto sa aton sang maiyaiyahon nga espiritu sang kalibutan?

NGAA mabudlay ang pag-aplikar sang aton natun-an sa Pulong sang Dios? Ang isa ka rason amo nga kinahanglan ang pagkamapainubuson para mahimo naton ang husto, pero indi ini mahapos himuon. Sa sining “katapusan nga mga adlaw,” madamo nga tawo ang “mahigugmaon sa kaugalingon, mahigugmaon sa kuarta, bugalon, matinaastaason,” kag “wala sing pagpugong sa kaugalingon.” (2 Tim. 3:1-3) Bilang mga alagad sang Dios, kabalo kita nga malain ini nga mga kinaiya, pero kon kaisa mahimo makita naton nga nagamadinalag-on kag malipayon ang mga nagahimo sini. (Sal. 37:1; 73:3) Gani mahimo magpalibog kita: ‘May pulos gid bala nga ginauna ko ang kaayuhan sang iban? Kon magpaubos ako, respetuhon pa ayhan ako sang iban?’ (Luc. 9:48) Kon maimpluwensiahan kita sang espiritu sang kalibutan, mahimo maguba ang aton maayo nga kaangtanan sa aton mga kauturan kag mahimo indi kita makilala nga mga Cristiano. Pero pakamaayuhon kita kon tun-an naton ang maayo nga mga halimbawa sa Biblia kag ilugon sila.

2. Ano ang matun-an naton sa matutom nga mga alagad sang Dios sang una?

 ² Para mailog naton ang mga matutom sang una, dapat naton hibaluon ang ila ginhimo amo nga ginpakamaayo sila. Paano sila nangin abyan sang Dios? Paano nila natigayon ang iya kahamuot? Kag paano sila nakatigayon sing kusog para mahimo ang husto? Kon tun-an naton kag pamalandungan ang ila halimbawa, magabakod ang aton pagtuo.

3, 4. (a) Paano kita nakabaton sing mga instruksion halin kay Jehova? (b) Ngaa indi lang pagkuha sing ihibalo ang kinahanglan para magbakod ang aton pagtuo?

³ Madamo kita sing nabaton nga maayo nga mga laygay kag paghanas halin sa Biblia, sa aton mga publikasyon, mga website, JW Broadcasting, kag mga miting kag asembleya. Pero nagsiling si Jesus nga indi lang pagkuha sing ihibalo ang kinahanglan naton. Ano pa ang kinahanglan? Si Jesus nagpaathag: “Ang akon pagkaon amo ang paghimo sang kabubut-on sang nagpadala sa akon kag ang pagtapos sang iya buluhaton.”—Juan 4:34.

⁴ Para kay Jesus, ang paghimo sang kabubut-on sang Dios daw pareho sa pagkaon. Ngaa? Subong nga ang masustansia nga pagkaon nagapabakod sang aton lawas, ang paghimo naton sang kabubut-on sang Dios nagapabakod man sang aton pagtuo. Halimbawa, nakaagi ka bala nga kapoy ka sa miting para sa pag-alagad sa latagon pero nangin malipayon ka kag naumpawan pagkatapos magbantala?

5. Ano ang padya kon maalamon kita?

⁵ Maalamon kita kon ginatuman naton ang mga sugo sang Dios. (Sal. 107:43) Kag padyaan kita kon magpakita kita sing kaalam. “Wala sang bisan ano nga puede mo handumon nga mapaanggid sa sini. . . . Ang kaalam kahoy sang kabuhi, kag ang nagapanguyapot sa sini magakabuhi sing malipayon.” (Hulu. 3:13-18) Si Jesus nagsiling: “Bangod nahibaluan ninyo ini, malipayon kamo kon himuon ninyo ini.” (Juan 13:17) Mangin malipayon ang mga disipulo ni Jesus kon padayon nila nga sundon ang mga sugo niya. Gintuman nila si Jesus indi lang sadto nga tion kundi sa bilog nila nga kabuhi.

6. Ngaa dapat padayon naton nga iaplikar ang aton natun-an?

⁶ Subong, dapat padayon man naton nga iaplikar ang aton natun-an. Halimbawa, ang isa ka mekaniko may mga gamit, materyales, kag ihibalo. Pero wala ini sing pulos kon indi niya ini paggamiton. Bisan pa madugay na sia nga mekaniko, dapat padayon sia nga magpangay-o para mangin maayo pa gid sia nga mekaniko. Sing kaanggid, mahimo nga nalipay kita sang una naton nga gin-aplikar ang aton natun-an sa Biblia. Pero padayon kita nga mangin malipayon kon ginaaplikar naton ang mga sugo ni Jehova kada adlaw.

7. Ano ang dapat naton himuon sa matun-an naton nga mga halimbawa sa Biblia?

⁷ Binagbinagon naton ang pila ka sitwasyon nga mahimo mabudlayan kita nga mangin mapainubuson kag tan-awon naton kon paano ini naatubang sing madinalag-on sang matutom nga mga alagad sang Dios sang una. Pero indi bastante nga basahon lang naton ini nga mga halimbawa. Dapat naton pamensaron sing maayo kon paano naton ini iaplikar gilayon.

8, 9. Ano ang ginasugid sang Binuhatan 14:8-15 parte sa pagkamapainubuson ni apostol Pablo? (Tan-awa ang piktyur sa umpisa sini nga artikulo.)

⁸ Luyag sang Dios nga ang “tanan nga sahi sang tawo maluwas kag makadangat sa sibu nga ihibalo tuhoy sa kamatuoran.”  (1 Tim. 2:4) Ano ang pagtamod mo sa mga tawo nga wala pa makatuon sang kamatuoran? Si apostol Pablo nagbantala sa mga Judiyo nga may nahibaluan na parte sa Dios. Pero nagbantala man sia sa mga nagasimba sa butig nga mga dios, kag nagtilaw ini sang iya pagkamapainubuson.

⁹ Halimbawa, sa una nga paglakbay ni Pablo bilang misyonero, nagkadto sila ni Bernabe sa siudad sang Listra. Nasal-an sila sang mga Licaonianhon nga butig nga mga dios nga sanday Zeus kag Hermes. Nanamian bala sanday Pablo kag Bernabe sa atension nga nabaton nila? Gintamod bala nila ini nga kaumpawan sa tanan nga paghingabot nga ila naeksperiensiahan sa duha ka siudad nga ila ginbisitahan antes sini? Nahunahuna bala nila nga bangod ginadayaw sila, mas pamatian sang mga tawo ang maayong balita? Wala! Insigida nga gingisi nila ang ila mga bayo kag nagdalagan sa mga tawo, kag nagsinggit sila: “Ngaa ginahimo ninyo ini? Mga tawo man kami nga may mga kaluyahon pareho sa inyo.”—Binu. 14:8-15.

10. Ano ang buot silingon nanday Pablo kag Bernabe sang nagsiling sila nga pareho sila sa mga Licaonianhon?

¹⁰ Sang nagsiling sanday Pablo kag Bernabe nga mga tawo man sila nga may mga kaluyahon pareho sa mga Licaonianhon, indi nila buot silingon nga pareho ang paagi sang ila pagsimba sa sini nga mga pagano. Mga misyonero sila nga ginsugo sang Dios. (Binu. 13:2) Ginhaplasan sila sang balaan nga espiritu kag may dalayawon sila nga paglaum. Pero nahangpan nanday Pablo kag Bernabe nga mabaton man sang mga Licaonianhon ini nga paglaum kon batunon nila ang maayong balita.

11. Paano naton mailog ang pagkamapainubuson ni Pablo sa aton pagbantala?

¹¹ Paano naton mailog ang pagkamapainubuson ni Pablo? Una, indi naton paghandumon nga dayawon kita sa mga nahimo naton bangod sa bulig ni Jehova. Pamangkuton naton ang aton kaugalingon: ‘Ano ang akon pagtamod sa mga tawo nga akon ginabantalaan? Ginapakanubo ko bala ang iban sa amon lugar bangod amo sini ang pagtamod sa ila sang kalabanan?’ Sa bilog nga kalibutan, ginahibalo sang mga Saksi ni Jehova kon may mga tawo nga nagahambal sing lain nga lenguahe sa ila teritoryo. Luyag nila nga mas madamo pa ang makabati sang maayong balita. Ang iban nagatuon sang mga lenguahe kag kultura sang mga tawo nga ginapakanubo sang iban. Wala gid ginatamod sang mga Saksi ang ila kaugalingon nga mas labaw sangsa ila ginabantalaan, kundi ginatinguhaan nila nga mahangpan ang kada tawo para malab-ot ang ila tagipusuon sang mensahe sang Ginharian.

12. Paano gin-una ni Epafras ang kaayuhan sang iban?

¹² Mapakita man naton nga mapainubuson kita kon ipangamuyo naton ang mga “nakabaton sang pagtuo nga subong ka bilidhon sang [aton] pagtuo.” (2 Ped. 1:1) Amo sini ang ginhimo ni Epafras. Ginsambit sia sa Biblia sing tatlo lang ka beses sa inspirado nga sinulatan ni Pablo. Sang napriso si Pablo sa Roma, nagsulat sia sa mga Cristiano sa Colosas nga si Epafras ‘pirme nagapangamuyo sing hanuot tungod sa ila.’ (Col. 4:12) Kilala gid ni Epafras ang mga kauturan, kag nagaulikid sia sa ila. Bisan pa “masigkabilanggo” sia ni Pablo, ginapamensar niya gihapon ang kinahanglanon sang iban sa espirituwal. (Filem. 23) Kag may ginhimo sia para buligan sila. Indi bala pag-una gid ini sa kaayuhan sang iban? Ang pagpangamuyo  naton para sa aton mga kauturan, ilabi na ang pagsambit sang ila ngalan, may daku gid nga epekto.—2 Cor. 1:11; Sant. 5:16.

13. Paano mo mailog si Epafras sa imo mga pangamuyo?

¹³ Hunahunaa kon sin-o ang puede mo ipangamuyo. Pareho kay Epafras, ginapangamuyo sang madamo naton nga mga kauturan ang ila mga utod sa kongregasyon, kag ang mga pamilya nga may mabug-at nga mga responsibilidad. Mahimo nagaatubang sila sang importante nga mga desisyon ukon sang pagtilaw. Ginapangamuyo man sang madamo ang ila mga kauturan nga ang mga ngalan ara sa jw.org/hil sa artikulo nga “Mga Lugar Kon Diin May mga Saksi ni Jehova nga Ara sa Prisuhan Bangod sa Ila Pagtuo.” (Buksi ang NEWSROOM > MGA KASO SA KORTE.) Ipangamuyo man naton ang mga napatyan sang pinalangga, naapektuhan sang mga kalamidad kag inaway, kag ang mga ara sa kapigaduhon. Madamo sa aton mga kauturan ang dapat naton ilakip sa aton pangamuyo kag makabenepisyo gid sila sa sini. Kon ginapangamuyo naton sila, ginapakita naton nga ginauna naton indi ang aton personal nga kaayuhan, kundi ang iya sang iban. (Fil. 2:4) Nagapamati gid si Jehova sa sini nga mga pangamuyo.

14. Ngaa si Jehova ang pinakamaayo nga halimbawa sa pagpamati sa iban?

¹⁴ Ang isa pa ka paagi nga mapakita naton nga mapainubuson kita amo ang kahanda naton sa pagpamati sa iban. Ang Santiago 1:19 nagasiling nga dapat kita “mangin maabtik sa pagpamati.” Si Jehova ang pinakamaayo nga halimbawa sa sini. (Gen. 18:32; Jos. 10:14) Binagbinagon naton ang aton matun-an sa Exodo 32:11-14. (Basaha.) Indi kinahanglan ni Jehova ang opinyon ni Moises, pero ginpamatian niya si Moises. Pamatian mo bala sing maayo ang isa ka tawo nga nakahimo sing sala nga desisyon kag dayon sundon ang iya panugda? Pero, ginapamatian gid ni Jehova ang mga tawo nga nagapangamuyo sa iya nga may pagtuo.

15. Paano naton mailog si Jehova sa pagpadungog sa iban?

¹⁵ Pamangkuton naton ang aton kaugalingon: ‘Kon si Jehova mapainubuson nga nagapakig-angot sa mga tawo kag nagapamati sa ila pareho sang ginhimo niya kanday Abraham, Raquel, Moises, Josue, Manoa, Elias, kag Ezequias, indi bala nga dapat ko man padunggan ang tanan nga kauturan, pamatian ang ila opinyon, kag sundon ang ila maayo nga mga panugda kon posible? May ara bala sa kongregasyon ukon sa akon pamilya nga nagakinahanglan sang akon tion kag dapat ko pamatian sing maayo? Ano ang dapat ko himuon?’—Gen. 30:6; Huk. 13:9; 1 Hari 17:22; 2 Cron. 30:20.

16. Ano ang reaksion ni Hari David sang ginpaakig sia ni Simei?

¹⁶ Ang pagkamapainubuson makabulig man sa aton nga punggan ang aton kaugalingon kon ginapaakig sang iban. (Efe. 4:2) Ang isa ka maayo nga halimbawa sa sini mabasa sa 2 Samuel 16:5-13. (Basaha.) Ginbatas ni David kag sang iya mga alagad ang pagpang-insulto kag pagpanakit ni Simei, nga paryente ni Hari Saul. Mapauntat kuntani ini ni David, pero ginbatas niya ini. Paano napunggan ni David ang iya kaugalingon? Mahibaluan naton ini kon usisaon naton ang ikatlo nga Salmo.

17. Ngaa napunggan ni David ang iya kaugalingon, kag paano naton sia mailog?

¹⁷ Suno sa superskripsion sang Salmo 3,  ginsulat ini ni David “sang nagapalagyo sia kay Absalom nga iya anak.” Ang bersikulo 1 kag 2 nagasugid sang pareho nga hitabo sa kapitulo 16 sang Ikaduhang Samuel. Dayon ginpadaku sang Salmo 3:4 ang pagsalig ni David: “Magapanawag ako kay Jehova, kag halin sa iya balaan nga bukid magasabat sia sa akon.” Dapat man kita mangamuyo kon ginapaakig kita. Sabton ini ni Jehova paagi sa paghatag sang iya balaan nga espiritu para makabatas kita. May mahunahuna ka bala nga sitwasyon nga dapat mo punggan ang imo kaugalingon ukon patawaron ang nagahimo sing malain sa imo? Nagasalig ka bala nga nakita ni Jehova ang imo pag-antos kag pakamaayuhon ka niya?

18. Ano ang benepisyo kon padayon naton nga sundon ang mga sugo sang Dios?

¹⁸ Pakamaayuhon gid kita kon himuon naton ang husto. Ang Hulubaton 4:7 nagasiling nga “ang kaalam amo ang pinakaimportante sa tanan”! Ang kaalam nabase sa ihibalo, pero nagalakip ini indi lang sang kamatuoran nga aton nahangpan kundi pati sang aton ginahimo nga desisyon. Bisan ang mga subay nagapakita sing kaalam. Ginapakita nila ini paagi sa pagtipon sing pagkaon kon tingadlaw. (Hulu. 30:24, 25) Ang Cristo, “ang kaalam sang Dios,” pirme nagahimo sang kalahamut-an sa iya Amay. (1 Cor. 1:24; Juan 8:29) Pakamaayuhon kita sang Dios kon mangin mapainubuson kita kag mangin maalamon paagi sa paghimo sang husto. (Basaha ang Mateo 7:21-23.) Gani mangin mapainubuson. Kon himuon mo ini, mapalig-on mo ang iban nga mangin mapainubuson man sa pag-alagad kay Jehova. Nagakinahanglan sang tion kag pagkamapinasensiahon ang paghimo sang husto, pero pagpakita ini sing pagkamapainubuson kag mangin malipayon kita subong kag sing wala sing katapusan.