SA BILOG nga kalibutan, ginapabaloran gid sang mga gulang ang ila pribilehiyo sa pag-alagad sa katawhan sang Dios. Pagpakamaayo gid sila sa aton tanan! Pero sining karon lang, may ginhimo nga pagbag-o. Ginpangabay ang may edad na nga mga gulang nga itugyan ang pila nila ka mabug-at nga mga responsibilidad sa mas bataon nga mga gulang. Sa ano nga paagi?

Ang bag-o nga kahimusan amo nga ang mga manugtatap sang sirkito kag field instructor indi na makaalagad sa sini nga pribilehiyo kon 70 anyos na sila. Ang mga koordinetor sang Komite sang Sanga ukon koordenitor sang hubon sang mga gulang nga 80 anyos na, magatugyan man sang ila mga asaynment sa mas bataon nga mga gulang. Ano ang reaksion sining may edad na nga mga gulang sa sini nga pagbag-o? Nangin mainunungon sila kay Jehova kag sa iya organisasyon!

“Ugyon gid ako sa ginhimo nga desisyon,” siling ni Ken, nga isa anay ka koordinetor sang Komite sang Sanga sing halos 49 ka tuig. “Sa tuod lang, sa sina gid nga aga pagkabalo ko, nangamuyo na ako nga daan kay Jehova nga  kinahanglan gid sang bataon nga utod para mangin koordinetor.” Amo man sini ang reaksion sang matutom nga mga tigulang sa bilog nga kalibutan. Pero bangod luyag gid nila mag-alagad sa mga kauturan, ang iban nasubuan sa primero.

“Medyo nasubuan ako,” siling ni Esperandio, nga isa anay ka koordenitor sang hubon sang mga gulang. Pero nag-aku sia, “Kinahanglan ko atipanon ang akon nagaluya nga panglawas.” Padayon nga nangin matutom si Esperandio sa pag-alagad kay Jehova kag pagpakamaayo gid sia sa ila kongregasyon.

Kamusta naman ang madugay na nga mga nagalakbay nga manugtatap nga nagbag-o ang asaynment? Si Allan, nga isa anay ka nagalakbay nga manugtatap sing 38 ka tuig, nagsiling, “Nakibot gid ako sang nabal-an ko.” Pero, nakita niya ang benepisyo sa paghanas sa bataon nga mga lalaki, kag padayon sia nga nagaalagad sing matutom.

Si Russell, nga 40 ka tuig nga nangin nagalakbay nga manugtatap kag field instructor, nagsiling nga nasubuan sila sang iya asawa sa primero. “Nanamian gid kami sa amon pribilehiyo kag pamatyag namon masarangan pa namon ini.” Pero subong, ginagamit ni Russell kag sang iya asawa ang nabaton nila nga paghanas kag eksperiensia para buligan ang ila kongregasyon, kag nalipay gid sa sini ang mga kauturan.

Kon wala ka nakaeksperiensia sang ginbatyag sang mga utod nga ginsambit kaina, mahimo mabuligan ka sang 2 Samuel para mahangpan sila.

Sang nagrebelde ang anak ni Hari David nga si Absalom, nalagyo si David sa Jerusalem pakadto sa Mahanaim, sa sidlangan sang Suba Jordan. Mabudlay gid didto ang kahimtangan ni David kag sang iya mga kaupod. Ano dayon ang natabo?

May tatlo ka tawo nga maalwan nga nagdala sing mga hiligdaan, pagkaon, kag kagamitan. Isa sa ila si Barzilai. (2 Sam. 17:27-29) Sang wala magmadinalag-on ang pagrebelde ni Absalom, nagbalik si David sa Jerusalem kag gindul-ong sia ni Barzilai sa Jordan. Ginpangabay sia ni David nga mag-upod sa iya sa Jerusalem. Nagsiling ang hari nga hatagan niya si Barzilai sing pagkaon, bisan pa “manggaranon gid” si Barzilai kag indi niya ini kinahanglan. (2 Sam. 19:31-33) Mahimo gusto ni David nga makaupod si Barzilai sa Jerusalem para makabenepisyo sia sa iya laygay bangod eksperiensiado sia. Isa gid kuntani ka pribilehiyo nga makaistar kag makaalagad sa palasyo!

Bangod maugdang sia kag makatarunganon, nagsiling si Barzilai nga 80 anyos na sia. Dayon nagsiling pa sia: “Mahangpan ko pa bala kon ano ang maayo kag malain?” (2 Sam. 19:35) Ano ang iya buot silingon? Sigurado gid nga bangod sang iya malawig nga kabuhi, nakatigayon sia sing kaalam. Makalaygay  man sia sing maayo pareho sa ginhimo sang ulihi sang “mga tigulang nga lalaki” kay Hari Rehoboam. (1 Hari 12:6, 7; Sal. 92:12-14; Hulu. 16:31) Gani ang ginsiling ni Barzilai nga indi na niya mahangpan ang maayo kag malain mahimo nagapatuhoy sa iya pisikal nga limitasyon bangod tigulang na sia. Ginbaton niya nga may epekto na ini sa iya panabor kag palamatin-an. (Man. 12:4, 5) Gani ginpangabay niya si David nga updon sa Jerusalem ang bataon nga si Kimham, nga mahimo anak niya.—2 Sam. 19:36-40.

Wala ginbaton ni Barzilai ang pribilehiyo nga gintanyag sa iya bangod tigulang na sia, kag makatarunganon gid ang iya ginpakita. Amo man sini ang rason sa pagbag-o nga ginsambit sa umpisa. Pero subong, indi lang ang kahimtangan kag ikasarang sang isa ka tawo ang ginabinagbinag, pareho sa sitwasyon ni Barzilai. Dapat binagbinagon man sing makatarunganon ang kaayuhan sang matutom nga mga gulang sa bilog nga kalibutan.

Nakita sining maugdang nga tigulang nga mga Cristiano nga mangin malig-on kag magauswag ang organisasyon ni Jehova kon itugyan nila ang madugay na nila nga mga responsibilidad sa bataon nga mga utod. Sa masami, ginahanas sini nga mga tigulang ang mga bataon, pareho sa ginhimo ni Barzilai sa iya anak kag ni apostol Pablo sa kay Timoteo. (1 Cor. 4:17; Fil. 2:20-22) Ining bataon nga mga utod nangin “dulot nga mga lalaki” nga nagabulig sa “pagpabakod sa lawas sang Cristo.”—Efe. 4:8-12; ipaanggid ang Numeros 11:16, 17, 29.

Sa mga kongregasyon sang katawhan sang Dios sa bilog nga kalibutan, madamo sa mga nagtugyan sang ila responsibilidad ang nagpanginpulos sa mga kahigayunan nga makabulig sa hilikuton ni Jehova.

“Ang akon bag-o nga kahimtangan nagtugot sa akon nga mabuligan ang indi Saksi nga mga bana sang amon mga kauturan sa kongregasyon,” siling ni Marco, nga 19 ka tuig nga nangin nagalakbay nga manugtatap.

“Tulumuron namon subong nga buligan ang mga indi aktibo kag makadumala sang madamo nga pagtuon sa Biblia,” siling ni Geraldo, nga 28 ka tuig nga nangin nagalakbay nga manugtatap. Nagsiling sia nga sila sang iya asawa nagadumala na karon sing 15 ka pagtuon sa Biblia kag may pila ka indi aktibo ang nagatambong na sa mga miting.

Si Allan, nga ginsambit kaina, nagsiling: “Subong, mas madamo na kami sing tion nga makapakigbahin sa sarisari nga paagi sang pagbantala. Nanamian kami magpanaksi sa publiko, sa mga duog sang negosyo, kag magpanaksi sa amon mga kaingod, kag duha na ang nagtambong sa Kingdom Hall.”

Kon isa ikaw sa mga matutom nga utod nga may bag-o nga asaynment sa katawhan sang Dios, makabulig ka pa sa isa ka pinasahi nga paagi. Makabulig ka sa hilikuton ni Jehova kon ipaambit mo ang imo eksperiensia sa bataon nga mga lalaki sa inyo kongregasyon. Si Russell, nga ginsambit kaina, nagsiling: “Ginahanas kag ginagamit ni Jehova ining masaligan nga bataon nga mga utod. Nakabenepisyo gid ang mga kauturan bangod sang ila maayo nga pagtudlo kag pag-shepherding!”—Tan-awa ang kahon nga “ Buligi ang Bataon nga mga Utod nga Mapakita ang Ila Bug-os nga Ikasarang.”

Kon bag-o na subong ang imo asaynment, mangin positibo. Madamo na ang imo nabuligan, kag padayon mo pa ini nga mahimo. Palangga ka gid sang mga kauturan.

Labaw sa tanan, ginapabaloran ka gid ni Jehova. Indi niya “pagkalimtan ang [imo] binuhatan kag ang gugma nga ginpakita [mo] para sa iya ngalan paagi sa pag-alagad kag sa padayon nga pag-alagad sa mga balaan.”  (Heb. 6:10) Ini nga teksto nagapasalig sa imo nga indi gid pagkalimtan ni Jehova ang mga nahimo mo sang una kag ang padayon mo nga ginahimo para pahamut-an sia bangod bilidhon ka gid para sa iya!

Pero ano abi kon isa ikaw ka bataon nga utod kag indi ikaw apektado sa sini nga pagbag-o? May matun-an ka gihapon sa sini. Sa ano nga paagi?

Kon may kilala ka nga matutom nga tigulang nga utod nga may bag-o nga asaynment, makabenepisyo ka sa iya pagkahamtong kag eksperiensia. Mangayo sing laygay kag panugda sa iya. Panilagi kon paano niya ginagamit ang iya eksperiensia sa iya bag-o nga asaynment.

Gani tigulang ka man nga may bag-o nga asaynment ukon bataon nga utod nga makatuon sa sini nga mga tigulang, dumduma nga ginapabaloran ni Jehova ang katutom sang mga madugay na nga nagaalagad sa iya kag padayon nga nagahimo sini.