1-2. (a) Ngaa ang Armageddon isa ka maayong balita para sa katawhan? (b) Ano nga mga pamangkot ang binagbinagon naton sa sini nga artikulo?

ANG iban nagasiling nga ang “Armageddon” isa ka nuklear nga inaway ukon isa ka kalamidad nga magaguba sang kalibutan. Pero, indi amo sini ang ginatudlo sang Biblia. Sa baylo, ginatudlo sini nga ang Armageddon isa ka maayong balita kag dapat kita malipay sa sini! (Bug. 1:3) Ang inaway sa Armageddon indi magaresulta sa kalaglagan sang tanan nga tawo kundi sa kaluwasan sang katawhan! Paano?

² Ginapakita sang Biblia nga ang inaway sa Armageddon magaluwas sa katawhan bangod tapuson sini ang paggahom sang tawo. Laglagon sini ang mga malauton pero luwason sini ang mga matarong. Kag amligan man sini ang aton planeta para indi ini maguba. (Bug. 11:18) Para mas mahangpan pa gid naton ini, binagbinagon naton ang apat ka pamangkot: Ano ang Armageddon? Ano ang mga matabo antes sini? Paano kita malakip sa mga maluwas sa Armageddon? Paano kita makapabilin nga matutom samtang nagahilapit ang Armageddon?

3. (a) Ano ang buot silingon sang tinaga nga “Armageddon”? (b) Base sa Bugna 16:14, 16, ngaa masiling naton nga ang Armageddon indi isa ka literal ukon matuod nga lugar sa duta?

³ Basaha ang Bugna 16:14, 16. Ang tinaga nga “Armageddon” isa lang ka beses nga mabasa sa Kasulatan, kag naghalin ini sa Hebreo nga tinaga nga nagakahulugan “Bukid sang Megiddo.” (Bug. 16:16; footnote) Ang Megiddo isa ka siudad sa Israel sang una. (Jos. 17:11) Pero ang Armageddon indi isa ka literal ukon matuod nga lugar sa duta. Nagapatuhoy ini sa kahimtangan nga ang “mga  hari sa bug-os nga duta” gintipon sa pagpakig-away kay Jehova. (Bug. 16:14) Pero, sa sini nga artikulo, gamiton man naton ang tinaga nga “Armageddon” para sa inaway nga mahanabo gilayon pagkatapos matipon ang mga hari sa duta. Ngaa masiling naton nga ang Armageddon isa ka simbuliko nga lugar? Una, wala sing literal nga bukid sang Megiddo. Ikaduha, tama ka gamay ang lugar sa palibot sang Megiddo gani indi makaigo sa sini ang “mga hari sa bug-os nga duta” kag ang ila mga soldado kag mga armas sa inaway. Ikatlo, ang inaway sa Armageddon magasugod kon salakayon na sang “mga hari” sang kalibutan ang katawhan sang Dios nga nagaistar sa bilog nga kalibutan. Matun-an naton ining ikatlo nga rason sa sini nga artikulo.

4. Ngaa gin-angot sang Dios ang iya katapusan nga daku nga inaway sa Megiddo?

⁴ Ngaa gin-angot ni Jehova ang iya katapusan nga daku nga inaway sa Megiddo? Sa panahon sang Biblia, madamo nga inaway ang natabo sa Megiddo kag sa Nalupyakan sang Jezreel nga malapit sa sini. May mga tion nga direkta nga ginbuligan ni Jehova ang iya katawhan sa sini nga mga inaway. Halimbawa, “malapit sa katubigan sang Megiddo,” ginbuligan sang Dios ang Israelinhon nga si Hukom Barak nga mapierde ang mga soldado nga Canaanhon nga ginpangunahan ni Sisera. Ginpasalamatan ni Barak kag ni manalagna Debora si Jehova bangod ginpadaug niya sila paagi sa milagro. Nag-amba sila: “Nagpakig-away [kay Sisera] ang mga bituon halin sa langit . . . Gin-anod sang suba sang Kison ang mga kaaway.”—Huk. 5:19-21.

5. Ano ang talalupangdon nga kinatuhayan sang inaway sa Armageddon kag sang inaway sang panahon ni Barak?

⁵ Ang katapusan nga dinalan sa ambahanon nanday Barak kag Debora amo ini: “Gani kabay pa nga malaglag ang tanan mo nga kaaway, O Jehova, apang kabay pa nga ang mga nagahigugma sa imo mangin pareho sang adlaw nga nagasilak.” (Huk. 5:31) Sa Armageddon, malaglag man ang mga kaaway sang Dios, samtang ang mga nagahigugma sa Dios maluwas. Pero may isa ka talalupangdon nga kinatuhayan ining duha ka inaway. Sa Armageddon, ang katawhan sang Dios indi magapakig-away. Wala gani sila sang mga armas! Pero mangin ‘mabakod sila kon magpakalinong sila kag magsalig’ sila kay Jehova kag sa iya mga kasuldadusan sa langit.—Isa. 30:15; Bug. 19:11-15.

6. Ano ang himuon ni Jehova para mapierde ang iya mga kaaway sa Armageddon?

⁶ Ano ang himuon sang Dios para mapierde ang iya mga kaaway sa Armageddon? Mahimo nga magagamit sia sang madamo nga paagi. Halimbawa, mahimo niya gamiton ang linog, pag-ulan sang yelo, kag kilat. (Job 38:22, 23; Ezeq. 38:19-22) Mahimo niya pahanabuon nga mag-ilinaway ang iya mga kaaway. (2 Cron. 20:17, 22, 23) Kag mahimo niya gamiton ang iya mga anghel para pamatyon ang mga malauton. (Isa. 37:36) Ano man nga paagi ang gamiton sang Dios, sigurado gid nga magadaug sia. Ang tanan niya nga kaaway malaglag. Kag ang tanan nga matarong maluwas.—Hulu. 3:25, 26.

7-8. (a) Suno sa 1 Tesalonica 5:1-6, ano ang indi kinaandan nga pahibalo nga himuon sang mga lider sang kalibutan? (b) Ngaa isa ini ka makatalagam nga kabutigan?

⁷ Ang pagpahibalo nga may “paghidait kag kalig-unan” pagahimuon antes sang “adlaw ni Jehova.” (Basaha ang 1 Tesalonica 5:1-6.) Sa 1 Tesalonica 5:2, ang “adlaw ni Jehova” nagapatuhoy sa “dakung kapipit-an.” (Bug. 7:14) Paano naton mabal-an nga magasugod na ini nga kapipit-an? Ang Biblia nagasiling nga may himuon nga isa ka indi kinaandan nga pahibalo. Sinyales ini sang pagsugod sang dakung kapipit-an.

⁸ Ginapatuhuyan sini ang tagna parte sa pagpahibalo nga may “paghidait kag kalig-unan.” Ngaa ihambal ini sang mga lider sang kalibutan? Magaentra bala sa ila ang mga lider sang relihion? Posible. Pero, ini nga pahibalo isa ka kabutigan halin sa mga demonyo. Makatalagam gid ini nga  kabutigan bangod magahunahuna ang mga tawo nga mangin matawhay na ang tanan, pero ang matuod, magasugod na gali ang pinakadaku nga kapipit-an sa kasaysayan sang katawhan. Huo, “magaabot gilayon ang hinali nga kalaglagan sa ila, kaangay sang pagpasakit sang isa ka babayi nga nagabusong.” Kamusta naman ang matutom nga mga alagad ni Jehova? Mahimo nga makibot sila sa hinali nga pagsugod sang adlaw ni Jehova, pero nakahanda sila sa sini.

9. Paano laglagon sang Dios ang kalibutan ni Satanas?

⁹ Indi pareho sa ginhimo ni Jehova sang panahon ni Noe, indi niya pagpapason ang bilog nga kalibutan ni Satanas sa isa lang ka paglaglag. Sa baylo, may bahin sang kalibutan ni Satanas nga una niya nga laglagon, kag dayon laglagon man niya ang nabilin. Una, laglagon niya ang Babilonia nga Daku ukon ang bug-os kalibutan nga emperyo sang butig nga relihion. Dayon, sa Armageddon, laglagon niya ang nabilin sa kalibutan ni Satanas, lakip ang sistema sini sa pulitika, militar, kag komersio. Binagbinagon naton sing maayo ining duha ka importante nga hitabo.

10. Suno sa Bugna 17:1, 6 kag 18:24, ngaa laglagon ni Jehova ang Babilonia nga Daku?

¹⁰ “Ang paghukom sa dakung makihilawason nga babayi.” (Basaha ang Bugna 17:1, 6; 18:24.) Daku gid nga pagpakahuya ang ginhimo sang Babilonia nga Daku sa ngalan sang Dios. Nagtudlo sia sang mga kabutigan parte sa Dios. Pareho sa imoral nga babayi, nagpakighilawas sia paagi sa pagpakig-alyansa sa mga gumalahom sang duta. Ginpigos niya ang iya mga miembro kag gingamit niya ang ila mga kuarta para sa iya kaugalingon. Madamo man sia sing ginpamatay, lakip ang pila ka alagad sang Dios. (Bug. 19:2) Paano laglagon ni Jehova ang Babilonia nga Daku?

11. Ano ang ginarepresentar sang “mabangis nga sapat nga eskarlata ang kolor,” kag paano ini gamiton sang Dios batok sa Babilonia nga Daku?

¹¹ Gamiton ni Jehova “ang napulo ka sungay” sang “mabangis nga sapat nga eskarlata ang kolor” para laglagon ang “dakung makihilawason nga babayi.” Ining mabangis nga sapat nagarepresentar sa United Nations. Ang napulo ka sungay nagarepresentar sa mga gobierno nga nagasuporta sa sini nga organisasyon. Sa gintalana  nga tion sang Dios, salakayon sini nga mga gobierno ang Babilonia nga Daku. ‘Hapayon nila sia kag hublasan’ paagi sa pagkuha sang iya mga manggad kag pagbuyagyag sang iya kalautan. (Bug. 17:3, 16) Madasig ang iya pagkalaglag nga daw magalawig lang sing “isa ka adlaw.” Gani makibot gid ang mga nagasuporta sa iya, ilabi na kay pirme sia nagapabugal kag nagasiling: “Nagapungko ako subong sang isa ka rayna, indi ako balo, kag indi gid ako maglalaw.”—Bug. 18:7, 8.

12. Ano ang indi pagtugutan ni Jehova nga himuon sang mga pungsod, kag ngaa?

¹² Indi pagtugutan sang Dios nga laglagon sang mga pungsod ang iya katawhan. Ginapabugal sang iya katawhan nga ginadala nila ang iya ngalan, kag gintuman nila ang iya sugo nga maggua sa Babilonia nga Daku. (Binu. 15:16, 17; Bug. 18:4) Nagapanikasog man sila nga buligan ang iban nga makagua sa Babilonia nga Daku. Gani ang mga alagad ni Jehova indi ‘makabaton sang bahin sang mga kalalat-an’ sang Babilonia nga Daku. Pero, pagatilawan gihapon ang ila pagtuo.

13. (a) Sin-o si Gog? (b) Suno sa Ezequiel 38:2, 8, 9, ngaa salakayon ni Gog ang katawhan sang Dios?

¹³ Ang pagsalakay ni Gog. (Basaha ang Ezequiel 38:2, 8, 9.) Kon malaglag na ang tanan nga butig nga relihion, ang katawhan sang Dios mangin pareho sa isa ka kahoy nga nagaisahanon nga nagatindog pagkatapos sang mabaskog nga bagyo. Maakig gid sa sini si Satanas. Ipakita niya ang iya kaakig paagi sa paggamit sang “indi matinlo nga pinamulong sang espiritu,” ukon butig nga mga impormasyon halin sa mga demonyo. Bangod sini, magahimbon ang mga pungsod para salakayon ang mga alagad ni Jehova. (Bug. 16:13, 14) Ini nga paghimbon sang mga pungsod ginatawag nga “Gog sa duta sang Magog.” Kon magsalakay na ang mga pungsod, ara na sila sa simbuliko nga lugar nga ginatawag Armageddon.—Bug. 16:16.

14. Ano ang marealisar ni Gog?

¹⁴ Magasalig si Gog sa iya “butkon nga unod,” ukon sa puersa sang iya militar. (2 Cron. 32:8; footnote) Pero magasalig kita kay Jehova nga aton Dios. Para sa mga pungsod, kabuangan ang aton himuon. Ngaa? Sa sini nga tion, nalaglag na ang gamhanan nga Babilonia nga Daku  kag wala sia maluwas sang iya mga dios batok sa “mabangis nga sapat” kag sa “napulo ka sungay” sini! (Bug. 17:16) Gani magahunahuna si Gog nga mangin mahapos ang paglaglag niya sa aton. Ang iya pagsalakay sa katawhan ni Jehova mangin “kaangay sang gal-um nga magatabon sa duta.” (Ezeq. 38:16) Pero marealisar ni Gog nga nasiod gali sia kag indi na sia makapalagyo. Pareho sa natabo sa Paraon sa Pula nga Dagat, marealisar ni Gog nga nagapakig-away sia kay Jehova.—Ex. 14:1-4; Ezeq. 38:3, 4, 18, 21-23.

15. Ano ang himuon sang Cristo sa inaway sa Armageddon?

¹⁵ Ang Cristo kag ang iya mga kasuldadusan sa langit magaamlig sa katawhan sang Dios kag laglagon nila sing bug-os ang naghimbon nga mga pungsod kag ang ila mga soldado. (Bug. 19:11, 14, 15) Ano ang matabo sa panguna nga kaaway ni Jehova, nga si Satanas, nga nagbinutig sa mga pungsod para salakayon nila ang katawhan sang Dios sa inaway sa Armageddon? Itagbong sia ni Jesus pati ang iya mga demonyo sa kadadalman, kag prisuhon sila didto sa sulod sang isa ka libo ka tuig.—Bug. 20:1-3.

16. (a) Paano naton mapakita nga ‘kilala naton ang Dios’? (b) Kon kilala naton si Jehova, ngaa isa ini ka pagpakamaayo sa inaway sa Armageddon?

¹⁶ Bag-uhan man kita ukon madugay na sa kamatuoran, dapat naton ipakita nga ‘kilala naton ang Dios’ kag ‘ginatuman naton ang maayong balita tuhoy sa aton Ginuong Jesus’ para maluwas kita sa Armageddon. (2 Tes. 1:7-9) ‘Kilala naton ang Dios’ kon nabal-an naton ang iya mga gusto, indi gusto, kag mga talaksan. Ginapakita man naton nga kilala naton sia kon ginahigugma naton sia, ginatuman, kag sia lang ang aton ginasimba. (1 Juan 2:3-5; 5:3) Kon ginapakita naton nga kilala naton ang Dios, ‘kilalahon’ man niya kita, kag amo ini ang magaluwas sa aton sa Armageddon! (1 Cor. 8:3) Ngaa? Bangod ginakahamut-an sang Dios ang iya kilala.

17. Ano ang buot silingon sang ‘pagtuman sa maayong balita tuhoy sa aton Ginuong Jesus’?

¹⁷ Nalakip sa “maayong balita tuhoy sa aton Ginuong Jesus” ang tanan nga kamatuoran nga gintudlo ni Jesus nga mabasa naton sa Pulong sang Dios. Ginatuman naton ang maayong balita kon ginaaplikar naton ini sa aton kabuhi. Nalakip sa  sini ang pag-una sang Ginharian, pagkabuhi suno sa matarong nga mga talaksan sang Dios, kag pagbantala sang Ginharian sang Dios. (Mat. 6:33; 24:14) Nalakip man sa sini ang aton pagsakdag sa hinaplas nga mga utod sang Cristo samtang ginahimo nila ang ila mabug-at nga mga responsibilidad.—Mat. 25:31-40.

18. Paano padyaan sang hinaplas nga mga utod sang Cristo ang mga nagpakita sa ila sang kaayo?

¹⁸ Sa indi madugay, padyaan sang hinaplas nga mga alagad sang Dios ang “iban nga mga karnero” bangod sang kaayo nga ginpakita nila sa ila. (Juan 10:16) Paano? Antes magsugod ang inaway sa Armageddon, ang tanan nga 144,000 ara na sa langit bilang imortal nga mga espiritu. Mangin bahin sila sang mga kasuldadusan sa langit nga magalaglag kay Gog, kag amligan nila ang “daku nga kadam-an” sang katawhan ni Jehova. (Bug. 2:26, 27; 7:9, 10) Huo, pribilehiyo gid sang daku nga kadam-an nga sakdagon ang hinaplas nga mga alagad ni Jehova samtang ari pa sila sa duta!

19-20. Bisan pa may mga pagtilaw, paano kita makapabilin nga matutom samtang nagahilapit ang Armageddon?

¹⁹ Sa sining mabudlay nga tion sang katapusan nga mga adlaw, madamo nga katawhan ni Jehova ang nagabatas sang mga pagtilaw. Pero mabatas naton ini nga may kalipay. (Sant. 1:2-4) Ang isa nga makabulig gid sa aton amo ang padayon nga pagpangamuyo sing tinagipusuon. (Luc. 21:36) Pero indi lang pagpangamuyo ang dapat naton himuon, dapat man naton tun-an ang Pulong sang Dios adlaw-adlaw kag pamalandungan ini, lakip ang tumalagsahon nga mga tagna parte sa aton tion. (Sal. 77:12) Kon himuon naton ini nga mga hilikuton kag kon himuon naton ang aton bug-os nga masarangan sa ministeryo, magabakod ang aton pagtuo kag magalig-on ang aton pagsalig nga matuman gid ang aton mga ginalauman!

²⁰ Hunahunaa ang imo kalipay kon malaglag na ang Babilonia nga Daku kag matapos na ang Armageddon! Labaw sa tanan, imadyina ang imo kalipay kon mabindikar na sing bug-os ang ngalan sang Dios kag ang iya pagkasoberano! (Ezeq. 38:23) Huo, ang Armageddon isa ka maayong balita para sa mga nakakilala sa Dios, nagatuman sa iya Anak, kag nagabatas tubtob sa katapusan.—Mat. 24:13.