TULUN-AN NGA ARTIKULO 37
Kinabubut-on nga Magpasakop kay Jehova
“Indi bala dapat nga mas handa kita nga magpasakop sa aton espirituwal nga Amay?”—HEB. 12:9.
AMBAHANON 9 Si Jehova ang Aton Hari!
ANG BINAGBINAGON SA SINI NGA ARTIKULO *
1. Ngaa dapat kita magpasakop kay Jehova?
DAPAT kita magpasakop * kay Jehova bangod sia ang aton Manunuga. Gani may kinamatarong sia sa pagsiling sa aton kon ano ang dapat naton himuon. (Bug. 4:11) Ang isa pa ka importante nga rason kon ngaa dapat naton sia tumanon amo nga ang iya paggahom amo ang pinakamaayo. Sa kasaysayan sang katawhan, madamo nga tawo ang naggahom sa ila isigkatawo. Kon ikumparar naton sila kay Jehova, makita naton nga si Jehova amo ang pinakamaalam, pinakamahigugmaon, kag pinakamaluluy-on nga Manuggahom sa tanan.—Ex. 34:6; Roma 16:27; 1 Juan 4:8.
2. Suno sa Hebreo 12:9-11, ano ang mga rason kon ngaa dapat kita magpasakop kay Jehova?
2 Gusto ni Jehova nga tumanon naton sia, indi lang bangod nahadlok kita nga indi sia mapahamut-an, kundi bangod palangga naton sia kag ginakabig naton sia nga aton mahigugmaon nga Amay. Sa sulat ni Pablo para sa mga Hebreo, ginpaathag niya nga dapat ‘handa kita nga magpasakop sa aton Amay’ bangod ginahanas niya kita “para sa aton kaayuhan.”—Basaha ang Hebreo 12:9-11.
3. (a) Paano naton mapakita nga nagapasakop kita kay Jehova? (b) Ano nga mga pamangkot ang sabton naton?
3 Nagapasakop kita kay Jehova paagi sa paghimo sang aton bug-os nga masarangan nga tumanon sia sa tanan nga butang, kag paagi sa pagpanikasog nga sikwayon ang aton huyog nga magsalig sa aton paghangop. (Hulu. 3:5) Mangin mahapos sa aton nga magpasakop kay Jehova kon tun-an naton ang iya dalayawon nga mga kinaiya. Ngaa? Bangod ini nga mga kinaiya makita sa tanan niya nga ginahimo. (Sal. 145:9) Samtang nagadamo ang aton nahibal-an parte kay Jehova, mas higugmaon pa gid naton sia. Kag kon ginahigugma naton si Jehova, indi naton kinahanglan ang malaba nga listahan sang mga dapat kag indi dapat himuon. Dapat naton ilugon si Jehova paagi sa pagpanikasog nga higugmaon ang maayo kag dumtan ang malain. (Sal. 97:10) Pero kon kaisa, mahimo nga nabudlayan kita nga tumanon si Jehova. Ngaa? Kag ano ang matun-an sang mga gulang, mga amay, kag mga iloy sa halimbawa ni Gobernador Nehemias, ni Hari David, kag ni Maria nga iloy ni Jesus? Sabton sa sini nga artikulo ini nga mga pamangkot.
NGAA MAHIMO MABUDLAY PARA SA ATON NGA MAGPASAKOP KAY JEHOVA?
4-5. Suno sa Roma 7:21-23, ngaa mahimo mabudlay para sa aton nga magpasakop kay Jehova?
4 Ang isa ka rason kon ngaa mahimo mabudlay para sa aton nga magpasakop kay Jehova amo nga nakapanubli kita tanan sang sala kag indi kita perpekto. Gani may mga tion nga gusto naton magrebelde sa Dios. Sang magrebelde sanday Adan kag Eva sa Dios kag ginkaon nila ang ginadumilian nga prutas, nagdesisyon sila kon ano ang maayo kag malain para sa ila. (Gen. 3:22) Subong, ginasikway gihapon sang kalabanan nga tawo si Jehova kag sila ang nagadesisyon kon ano ang husto kag sala.
5 Bisan ang mga nakakilala kay Jehova kag nagahigugma sa iya nabudlayan kon kaisa nga magpasakop sa iya sing bug-os. Naeksperiensiahan ini ni apostol Pablo. (Basaha ang Roma 7:21-23.) Pareho kay Pablo, gusto naton himuon kon ano ang husto sa panulok ni Jehova. Pero dapat naton pirme pakigbatuan ang aton huyog nga himuon ang malain.
6-7. Ano ang ikaduha nga rason kon ngaa mahimo mabudlay para sa aton nga magpasakop kay Jehova? Maghatag sing halimbawa.
6 Ang isa pa ka rason kon ngaa mahimo mabudlay para sa aton nga magpasakop kay Jehova amo ang impluwensia sang kultura nga aton gindak-an. Madamo nga tawo ang nagatudlo sang mga ideya nga nagasumpakil sa kabubut-on ni Jehova, gani kinahanglan naton magpanikasog nga indi maimpluwensiahan sini. Binagbinaga ang isa ka halimbawa.
7 Sa pila ka lugar, ginapalig-on ang mga pamatan-on nga unahon sa ila kabuhi ang pagmanggaranon. Amo ini ang naeksperiensiahan sang isa ka utod nga si Mary. * Antes sia makatuon parte kay Jehova, nagaeskwela sia sa isa sa pinakabantog nga unibersidad sa ila pungsod. Ginapilit sia sang iya pamilya nga mangita sing trabaho nga daku ang sueldo para respetuhon sia sang iban. Gusto man niya ini. Pero, sang makatuon sia parte kay Jehova kag natun-an niya nga higugmaon sia, nagbag-o ang iya gusto nga himuon. Pero indi ini mahapos. Nagsiling sia: “Kon kaisa, may mga oportunidad nga puede kuntani ako makakuarta sing daku pero makasablag sa akon pag-alagad kay Jehova. Bangod sang kultura nga gindak-an ko, nabudlayan gihapon ako nga pangindian ini nga mga oportunidad. Dapat ko pangabayon si Jehova nga buligan ako nga sikwayon ang pagsulay nga batunon ang obra nga makasablag sa akon pag-alagad sa iya.”—Mat. 6:24.
8. Ano ang binagbinagon naton?
8 Makabenepisyo kita kon magpasakop kita kay Jehova. Pero ang mga ginhatagan sang awtoridad, pareho sang mga gulang, mga amay, kag mga iloy may dugang pa gid nga rason sa pagsunod sang panuytoy sang Dios. Kon magpasakop sila sa Dios, mabuligan nila ang iban. Binagbinagon naton ang pila ka halimbawa sa Biblia nga magatudlo sa aton kon paano gamiton ang aton awtoridad nga makapahamuot kay Jehova.
KON ANO ANG MATUN-AN SANG MGA GULANG KAY NEHEMIAS
Ang mga gulang nagabulig sa mga hilikuton sa Kingdom Hall, pareho kay Nehemias nga nagbulig sa pagkay-o sang Jerusalem (Tan-awa ang parapo 9-11) *
9. Ano nga mga kabudlayan ang gin-atubang ni Nehemias?
9 Gintugyanan ni Jehova ang mga gulang sang importante nga responsibilidad nga bantayan ang iya katawhan. (1 Ped. 5:2) Madamo sing matun-an ang mga gulang sa kon paano gintratar ni Nehemias ang katawhan ni Jehova. Bilang gobernador sang Juda, daku ang awtoridad ni Nehemias. (Neh. 1:11; 2:7, 8; 5:14) Hunahunaa ang pila ka kabudlayan nga gin-atubang ni Nehemias. Nabal-an niya nga gindagtaan sang katawhan ang templo kag wala nila ginatuman ang Kasuguan nga dapat sila maghatag sing amot para sa mga Levinhon. Ginalapas sang mga Judiyo ang kasuguan parte sa Adlaw nga Inugpahuway, kag ang pila ka lalaki nagpangasawa sang mga babayi halin sa iban nga pungsod. Dapat asikasuhon ni Gobernador Nehemias ining mabudlay nga kahimtangan.—Neh. 13:4-30.
10. Paano gin-atubang ni Nehemias ang mga kabudlayan?
10 Wala gingamit ni Nehemias ang iya awtoridad para piliton ang katawhan sang Dios nga sundon ang iya personal nga mga opinyon. Sa baylo, hanuot sia nga nangamuyo kay Jehova para tuytuyan sia, kag gintudluan niya ang katawhan parte sa Kasuguan ni Jehova. (Neh. 1:4-10; 13:1-3) Mapainubuson man nga nag-obra si Nehemias upod sa iya mga utod, kag ginbuligan pa gani niya sila sa pagkay-o sang pader sang Jerusalem.—Neh. 4:15.
11. Suno sa 1 Tesalonica 2:7, 8, paano dapat trataron sang mga gulang ang mga kauturan sa kongregasyon?
11 Mahimo nga indi man pareho kadamo sa problema ni Nehemias ang problema sang mga gulang, pero mailog nila si Nehemias. Halimbawa, nagapangabudlay sila para sa kaayuhan sang ila mga kauturan. Kag wala sila nagabatyag nga mas labaw sila sangsa iban bangod sang awtoridad nga ginhatag sa ila. Sa baylo, ginapalangga nila ang mga kauturan sa kongregasyon. (Basaha ang 1 Tesalonica 2:7, 8.) Bangod mapainubuson sila kag palangga gid nila ang iban, mainayuhon sila magpakighambal sa ila. Si Andrew, nga isa ka madugay na nga gulang, nagsiling: “Natalupangdan ko nga mas gusto sang mga kauturan kon mainayuhon kag mainabyanon ang isa ka gulang. Ini nga mga kinaiya nagapalig-on sa ila nga magkooperar sa mga gulang.” Ang isa pa ka madugay na nga gulang, nga si Tony, nagsiling: “Ginapanikasugan ko nga iaplikar ang laygay sa Filipos 2:3 kag ginatinguhaan ko pirme nga kabigon ang iban nga labaw sangsa akon. Nakabulig ini sa akon nga malikawan nga mangin pareho sa isa ka diktador.”
12. Ngaa dapat mangin mapainubuson ang mga gulang?
12 Ang mga gulang dapat mangin mapainubuson pareho kay Jehova. Bisan pa si Jehova ang Soberano sang uniberso, “nagaduko” sia para pabangunon “ang kubos halin sa yab-ok.” (Sal. 18:35; 113:6, 7) Ang matuod, ginakangil-aran ni Jehova ang mga bugalon kag matinaastaason.—Hulu. 16:5.
13. Ngaa ang mga gulang dapat ‘magrenda sang ila dila’?
13 Ang gulang nga nagapasakop kay Jehova dapat ‘magrenda sang iya dila.’ Kon indi niya ini paghimuon, mahimo nga makahambal sia sing indi maayo kon wala sia ginarespeto. (Sant. 1:26; Gal. 5:14, 15) Si Andrew, nga ginsambit kaina, nagsiling: “Kon kaisa, gusto ko akigan ang utod nga daw wala nagarespeto sa akon bilang isa ka gulang. Pero, bangod ginpamalandungan ko ang mga halimbawa sang mga matutom nga mabasa sa Biblia, nakabulig ini sa akon nga matun-an ang importansia sang pagpaubos.” Kon ang mga gulang mapinalanggaon kag mainayuhon sa ila pag-istorya sa mga kauturan, lakip na sa ila mga masigkagulang, ginapakita nila nga nagapasakop sila kay Jehova.—Col. 4:6.
KON ANO ANG MATUN-AN SANG MGA AMAY KAY HARI DAVID
14. Ano nga responsibilidad ang gintangdo ni Jehova sa mga amay, kag ano ang gusto niya nga himuon nila?
14 Ang amay amo ang gintangdo ni Jehova nga mangin ulo sang pamilya, kag gusto sang Dios nga hanason kag disiplinahon sang amay ang iya mga kabataan. (1 Cor. 11:3; Efe. 6:4) Pero limitado lang ang awtoridad sang isa ka amay. May salabton sia kay Jehova bangod utang sang tanan nga pamilya ang ngalan sini kay Jehova. (Efe. 3:14, 15) Kon ginagamit sang mga amay ang ila awtoridad sa paagi nga nahamut-an sang Dios, ginapakita nila nga nagapasakop sila kay Jehova. Madamo sila sing matun-an sa kabuhi ni Hari David.
Dapat makita sa pangamuyo sang isa ka Cristiano nga amay ang iya pagkamapainubuson (Tan-awa ang parapo 15-16) *
15. Ngaa isa ka maayo nga halimbawa si Hari David para sa mga amay?
15 Gintangdo ni Jehova si David nga mangin ulo, indi lang sang iya kaugalingon nga pamilya, kundi sang bilog gid nga pungsod sang Israel. Bilang hari, daku ang awtoridad ni David. May mga tion nga gingamit niya sa indi maayo ang iya awtoridad kag nakahimo sia sang serioso nga mga sala. (2 Sam. 11:14, 15) Pero nagpasakop sia kay Jehova paagi sa pagbaton sang disiplina. Nangamuyo sia kay Jehova kag ginpabutyag niya ang tanan niya nga ginabatyag. Kag ginpanikasugan gid niya nga tumanon ang laygay ni Jehova. (Sal. 51:1-4) Dugang pa, mapainubuson gid sia kay ginbaton niya, indi lang ang maayo nga mga panugda sang mga lalaki, kundi pati man sang mga babayi. (1 Sam. 19:11, 12; 25:32, 33) Nakatuon si David sa iya mga sala kag ginhimo niya nga pinakaimportante sa iya kabuhi ang pag-alagad kay Jehova.
16. Ano nga mga leksion ang matun-an sang mga amay kay David?
16 Binagbinaga ang pila ka leksion nga matun-an sang mga amay kay Hari David: Indi pag-abusuhi ang awtoridad nga ginhatag sa imo ni Jehova. Akua ang imo mga sala, kag batuna ang laygay sang iban nga ginbase sa Biblia. Kon himuon mo ini, respetuhon ka sang imo pamilya bangod sang imo pagkamapainubuson. Kon nagapangamuyo ka upod sa imo pamilya, ipabutyag kay Jehova ang tanan mo nga ginabatyag para mabatian sang imo pamilya nga nagasalig ka gid sa iya. Labaw sa tanan, himua nga pinakaimportante sa imo kabuhi ang pag-alagad kay Jehova. (Deut. 6:6-9) Ang imo maayo nga halimbawa amo ang isa sa pinakabilidhon nga regalo nga mahatag mo sa imo pamilya.
KON ANO ANG MATUN-AN SANG MGA ILOY KAY MARIA
17. Ano nga responsibilidad ang ginhatag ni Jehova sa mga iloy?
17 Ginhatagan ni Jehova ang mga iloy sang importante nga responsibilidad sa pamilya, kag ginhatagan niya sila sang awtoridad sa ila kabataan. (Hulu. 6:20) Ang matuod, ang ginahimo kag ginasiling sang isa ka iloy sa iya kabataan mahimo makaapekto sa ila sa bilog nila nga kabuhi. (Hulu. 22:6) Talupangda kon ano ang matun-an sang mga iloy kay Maria nga iloy ni Jesus.
18-19. Ano ang matun-an sang mga iloy sa halimbawa ni Maria?
18 Madamo sing ihibalo si Maria sa Kasulatan. Tudok gid ang pagtahod niya kay Jehova kag suod gid ang iya pagpakig-abyan sa iya. Handa sia nga magpasakop kay Jehova, bisan pa nga maapektuhan sini ang bilog niya nga kabuhi.—Luc. 1:35-38, 46-55.
Kon ang isa ka iloy kapoy ukon akig, mahimo nga dapat gid sia magpanikasog para mapabutyag niya ang iya pagpalangga sa iya pamilya (Tan-awa ang parapo 19) *
19 Kon isa ikaw ka iloy, mahimo mo mailog si Maria sa madamo nga paagi. Paano? Una, pabakura ang imo pagpakig-abyan kay Jehova paagi sa personal nga pagtuon sa Biblia kag pangamuyo. Ikaduha, mangin handa sa paghimo sang mga pagbag-o sa imo kabuhi para pahamut-an si Jehova. Halimbawa, kon ang imo mga ginikanan madali maakig kag masakit maghambal, mahimo maghunahuna ka nga normal lang ini nga himuon sa mga kabataan. Bisan pa natun-an mo na ang mga talaksan ni Jehova, posible nga nabudlayan ka gihapon nga mangin kalmado kag mapinasensiahon sa imo mga kabataan, ilabi na kon kapoy ka kag nagapasaway sila. (Efe. 4:31) Sa sini nga mga tion, importante gid nga mangamuyo ka kay Jehova nga buligan ka. Ang isa ka iloy nga si Lydia nagsiling: “Kon kaisa, nagapangamuyo ako sing hanuot para indi ako akig kon istoryahon ko ang akon anak ilabi na kon wala niya ako ginatuman. May mga tion nga nagauntat anay ako sa paghambal kag hipos ako nga nagapangamuyo kay Jehova para magpabulig sa iya. Ang pangamuyo nagabulig sa akon nga mangin kalmado.”—Sal. 37:5.
20. Ano ang nabudlayan nga himuon sang pila ka iloy, kag paano nila ini mabag-o?
20 May pila ka iloy nga nabudlayan magpabatyag sa ila kabataan nga palangga nila sila. (Tito 2:3, 4) Ang pila ka iloy nagdaku sa panimalay nga ang mga ginikanan indi suod sa ila mga kabataan. Kon nagdaku ka sa amo sini nga panimalay, indi pag-iluga ang sala nga paagi sang imo mga ginikanan. Ang iloy nga nagapasakop sa kabubut-on ni Jehova dapat magtuon kon paano niya mapabutyag ang iya pagpalangga sa iya mga anak. Mahimo nga mabudlay para sa iya nga bag-uhon ang iya panghunahuna, balatyagon, kag mga ginahimo. Pero masarangan niya ini bag-uhon, kag makabenepisyo gid sia kag ang iya pamilya.
PADAYON NGA MAGPASAKOP KAY JEHOVA
21-22. Suno sa Isaias 65:13, 14, ano ang mga benepisyo kon magpasakop kita kay Jehova?
21 Kabalo si Hari David sang mga benepisyo sang pagpasakop kay Jehova. Nagsulat sia: “Ang mga mando ni Jehova matarong, nga nagapasadya sa tagipusuon; ang mga sugo ni Jehova matinlo, nga nagapasanag sa mga mata. Paagi sa sini ginapaandaman ang imo alagad; daku ang padya kon tumanon ini.” (Sal. 19:8, 11) Subong, makita naton ang kinatuhayan sang mga nagapasakop kay Jehova kag sang mga nagasikway sang iya mahigugmaon nga mga laygay. Ang mga nagapasakop kay Jehova ‘nagasinggit sa kalipay bangod sang maayo nga kahimtangan sang tagipusuon.’—Basaha ang Isaias 65:13, 14.
22 Kon ang mga gulang, mga amay, kag mga iloy kinabubut-on nga nagapasakop kay Jehova, mas magauswag ang ila kabuhi, mas mangin malipayon ang ila pamilya, kag mas mahiusa ang bilog nga kongregasyon. Labaw sa tanan, mapasadya nila ang tagipusuon ni Jehova. (Hulu. 27:11) May mas maayo pa bala nga padya sangsa sini?
AMBAHANON 123 Mainunungon nga Magpasakop sa Kahimusan sang Dios
^ par. 5 Binagbinagon sa sini nga artikulo kon ngaa dapat kita magpasakop kay Jehova. Binagbinagon man sa sini kon paano dapat gamiton sang mga gulang, mga amay, kag mga iloy ang awtoridad nga ginhatag sa ila ni Jehova. Madamo sila sing matun-an sa halimbawa ni Gobernador Nehemias, ni Hari David, kag ni Maria nga iloy ni Jesus.
^ par. 1 DUGANG NGA PAATHAG: Para sa mga tawo nga ginapilit nga magtuman, ang tinaga nga magpasakop indi gid maayo. Pero, para sa katawhan sang Dios nga handa magtuman sa iya, wala sila nagabatyag nga indi maayo ang magpasakop.
^ par. 7 Gin-islan ang pila ka ngalan sa sini nga artikulo.
^ par. 62 MGA PIKTYUR: Ang isa ka gulang nagabulig sa pagmentinar sang Kingdom Hall upod ang iya anak, pareho sa ginhimo ni Nehemias nga nagbulig sa pagkay-o sang pader sang Jerusalem.
^ par. 64 PIKTYUR: Hanuot nga nagapangamuyo kay Jehova ang isa ka amay upod ang iya pamilya.
^ par. 66 PIKTYUR: Pila na ka oras nga nagahampang ang isa ka bata sang video game, gani wala niya natapos ang mga ginapaobra sa iya kag ang iya asaynment sa eskwelahan. Ang iya iloy, nga kapoy halin sa trabaho, nagadisiplina sa iya sing kalmado kag wala nagahambal sing masakit nga mga tinaga.