Nagasiling ini nga bersikulo: “Indi ka matingala kon makita mo nga ginapigos ang imol kag ginalapas ang katarungan kag pagkamatarong sa inyo lugar. Kay inang mataas nga opisyal ginatan-aw sang mas mataas pa sa iya, kag may mas mataas pa sangsa ila.”—Man. 5:8.

Mahimo pamensaron naton nga nagapatuhoy ini sa mga tawo nga may posisyon sa gobierno. Pero kon binagbinagon naton ini sing maayo, may ginasugid man ini parte kay Jehova. Mapalig-on gid kita kon mabal-an naton ini.

Ginsambit sa Manugwali 5:8 ang isa ka mataas nga opisyal nga nagapigos sa mga imol kag nagadaugdaug sa ila. Dapat dumdumon sini nga opisyal sa gobierno nga posible nga ginatan-aw sia sang isa nga mas mataas ang posisyon sangsa iya. Ang matuod, mahimo nga may mas mataas pa gid sangsa ila nga duha. Pero sa gobierno sang tawo, posible nga korap man ang opisyal nga mas mataas ang posisyon. Bangod sini, nagaantos gid ang mga tawo.

Pero bisan pa pamatyag naton daw indi na mabag-o ang aton sitwasyon, mapalig-on kita kon pamensaron naton nga si Jehova ‘nagatan-aw sa mataas nga mga opisyal’ sa gobierno. Makapangayo kita sang bulig sa Dios kag matugyan naton sa iya ang aton mga problema. (Sal. 55:22; Fil. 4:6, 7) Kabalo kita nga “ang mga mata ni Jehova nagatan-aw sa bug-os nga duta agod ipakita ang iya kusog para sa ila nga ang tagipusuon bug-os sa iya.”—2 Cron. 16:9.

Gani ginapahanumdom sa aton sang Manugwali 5:8 ang matuod nga nagakatabo sa gobierno sang tawo. Ano man ang posisyon sang isa ka opisyal sa gobierno, sigurado nga may mas mataas pa gid sangsa iya. Pero ang mas importante nga ginatudlo sa aton sini nga teksto amo ang kamatuoran nga si Jehova ang may pinakamataas nga posisyon kay sia ang Labing Gamhanan. Nagagahom sia paagi sa iya Anak nga si Jesucristo, nga amo ang Hari sang Ginharian. Makita sang Labing Gamhanan ang tanan, kag makatarunganon gid sia kag ang iya Anak.