1. Ano ang ginahimo sang mga utod nga babayi para sa organisasyon, pero ano ang pila nila ka problema? (Tan-awa ang piktyur sa kober.)

NALIPAY gid kita nga makaupod ang madamo nga matutom kag mapisan nga mga utod nga babayi sa kongregasyon. Nagapakigbahin sila sa mga miting, kag nagabantala sila kag nagatudlo sang maayong balita. Ang iban sa ila nagamentinar sang Kingdom Hall, kag nagabulig sila sa ila mga kauturan. Pero, may mga problema man sila. Ang iban nagaatipan sang ila tigulang na nga mga ginikanan. Ang iban naman ginapamatukan sang ila pamilya. Kag ang iban nagaisahanon na lang nga nagaatipan sa ila kabataan.

2. Ngaa dapat gid naton buligan ang aton mga utod nga babayi?

² Ngaa dapat gid naton buligan ang aton mga utod nga babayi? Bangod sa masami, wala ginarespeto sang mga tawo sa kalibutan ang mga babayi. Ginapalig-on man kita sang Biblia nga buligan naton ang mga babayi. Ginsilingan ni apostol Pablo ang mga kauturan sa Roma nga batunon nila si Febe kag ‘buligan sia sa iya mga kinahanglanon.’ (Roma 16:1, 2) Sang Fariseo pa si Pablo, manubo ang pagtan-aw niya sa mga babayi kay amo ini ang ginahimo sang mga Fariseo. Pero sang nangin Cristiano sia, gin-ilog niya si Jesus. Ginrespeto na niya ang mga babayi kag ginpakitaan sila sang kaayo.—1 Cor. 11:1.

3. Paano gintratar ni Jesus ang mga babayi, kag paano niya gintamod ang mga babayi nga nagatuman sang kabubut-on sang Dios?

³ Ginrespeto ni Jesus ang tanan nga babayi. (Juan 4:27) Wala niya gin-ilog ang ginahimo sang Judiyo nga mga lider sang relihion. Ang isa ka reperensia sa Biblia nagsiling: “Wala gid sing ginsiling si Jesus nga nagpakanubo sa mga babayi.” Paano naman gintamod ni Jesus ang mga babayi nga nagatuman sang kabubut-on sang iya Amay? Mas daku ang pagpabalor niya sa ila. Ang matuod, ginkabig niya sila nga iya mga utod. Kay man, indi lang ang mga lalaki ang ginkabig ni Jesus nga iya pamilya, kundi pati man ang mga babayi.—Mat. 12:50.

4. Ano ang binagbinagon naton sa sini nga artikulo?

⁴ Handa gid pirme si Jesus nga buligan ang mga babayi nga  nagaalagad sa Dios. Ginpabaloran niya ang ila mga ginhimo kag ginpangapinan niya sila. Binagbinagon naton kon paano naton mailog si Jesus sa paghatag sing konsiderasyon sa mga utod nga babayi.

5. Ngaa nabudlayan ang pila ka utod nga babayi nga makig-upod sa mga kauturan?

⁵ Kinahanglan naton tanan ang makapalig-on nga pag-inupdanay. Pero kon kaisa, nabudlayan ang mga utod nga babayi nga himuon ini. Ngaa? Talupangda ang ginsiling sang pila sa ila. Ang isa ka sister nga si Jordan * nagsiling, “Bangod wala ako sing bana, daw indi ako kabalo kon ano ang mabulig ko sa kongregasyon, kag daw nagaka-out of place ako.” Si Kristen, nga isa ka payunir nga nagsaylo sa lugar nga nagakinahanglan sang dugang nga manugbantala, nagsiling, “Kon bag-o ka lang sa kongregasyon, mahimo masubuan ka.” Posible nga amo man sini ang ginabatyag sang pila ka brother. Ang mga utod nga babayi nga nagaisahanon nga Saksi sa ila pamilya mahimo nabudlayan nga mangin suod sa ila mismo pamilya, kag nagabatyag man sila nga indi sila suod sa mga kauturan. Ang iban nasubuan bangod indi sila makahalin sa ila balay kay nagamasakit sila ukon sila ang nagaatipan sa nagabalatian nga miembro sang ila pamilya. Si Annette nagsiling, “Indi ako pirme makaupod sa mga tipontipon sang mga kauturan kay indi ko mabayaan si Nanay kay ako ang nagaatipan sa iya.”

6. Suno sa Lucas 10:38-42, paano ginbuligan ni Jesus sanday Marta kag Maria?

⁶ Nagpain si Jesus sang tion para makaupod niya ang ginakabig niya nga pamilya, kag nangin matuod gid sia nga abyan sa ila. Binagbinaga ang iya mga abyan nga sanday Maria kag Marta nga puro mga dalaga. (Basaha ang Lucas 10:38-42.) Ginpabatyag ni Jesus paagi sa iya mga ginsiling kag ginhimo nga indi sila dapat matahap sa iya. Amo gid sini ang ila nabatyagan. Halimbawa, bilang isa ka disipulo, wala natahap si Maria nga magpungko sa tiilan ni Jesus. * Kag sang nagakabalaka si Marta kay wala sia ginabuligan ni Maria, wala sia natahap nga isugid kay Jesus kon ano ang iya ginabatyag. Sadto nga tion, ginbuligan ni Jesus ining duha ka babayi nga matun-an ang importante nga mga leksion. Ginpakita man niya nga nagaulikid sia sa ila kag sa ila utod nga si Lazaro kay pila ka beses nga ginbisitahan niya sila. (Juan 12:1-3) Gani sang nagmasakit sing grabe si Lazaro, kabalo sanday Maria kag Marta nga makapangabay sila kay Jesus nga buligan sila.—Juan 11:3, 5.

7. Paano naton mapalig-on ang mga utod nga babayi sa kongregasyon?

⁷ Para sa pila naton ka utod nga babayi, ang mga miting amo ang panguna nga paagi para makaupod nila ang mga kauturan. Gani sa tion sang aton mga miting, dapat naton sila abiabihon, istoryahon, kag ipakita nga nagaulikid kita sa ila. Si Jordan, nga ginsambit kaina, nagsiling, “Makapalig-on gid kon ginapasalamatan sang iban ang akon mga komento, ginasilingan nila ako nga updan nila ako sa pagbantala, ukon ginapakita nila nga nagaulikid sila sa akon.” Dapat man naton ipakita sa aton mga utod nga babayi nga importante sila sa aton. Si Kia nagsiling: “Kon indi ako makatambong sa miting, sigurado ako nga may maga-text sa akon para kamustahon ako. Mabatyagan ko gid nga nagaulikid sa akon ang mga kauturan.”

8. Paano pa gid naton mailog si Jesus?

⁸ Pareho kay Jesus, dapat kita magpain sang tion para makaupod naton ang mga utod nga babayi sa kongregasyon. Puede naton sila agdahon sa aton balay para magkaon ukon maglingawlingaw. Kon himuon naton ini, dapat naton siguraduhon nga makapalig-on ang topiko nga  aton ginaistoryahan. (Roma 1:11, 12) Dapat ilugon sang mga gulang ang pagtamod ni Jesus. Kabalo sia nga nabudlayan ang iban nga magpabilin nga soltero ukon dalaga. Pero wala man nagsiling si Jesus nga ang mga mag-asawa ukon ang mga may bata amo lang ang malipayon. (Luc. 11:27, 28) Sa baylo, mangin matuod kita nga malipayon kon unahon naton ang pag-alagad kay Jehova.—Mat. 19:12.

9. Paano mabuligan sang mga gulang ang mga utod nga babayi sa kongregasyon?

⁹ Dapat gid kabigon sang mga gulang ang mga babayi sa kongregasyon nga ila mga utod kag mga iloy. (1 Tim. 5:1, 2) Puede istoryahon sang mga gulang ang mga utod nga babayi antes kag pagkatapos sang miting. Si Kristen nagsiling: “May trabaho ako kag nagapayunir. Natalupangdan sang isa ka gulang nga pirme lang ako masako, gani ginpamangkot niya ako parte sa akon iskedyul. Nagapasalamat gid ako sa iya pag-ulikid.” Kon pirme ginaistorya sang mga gulang ang mga utod nga babayi sa kongregasyon, ginapakita nila nga nagaulikid sila sa ila. * Si Annette, nga ginsambit kaina, may ginsiling nga benepisyo parte sa pirme pag-istorya sa mga gulang. Nagsiling sia: “Mas nakilala ko pa gid sila, kag mas nakilala man nila ako. Gani kon may problema ako, wala ako natahap nga magpangayo sa ila sang bulig.”

10. Ano ang puede naton himuon para mapalig-on ang aton mga utod nga babayi?

¹⁰ Tanan kita, lalaki kag babayi, mapalig-on gid kon ginapabaloran ang aton mga ikasarang kag ginapasalamatan ang aton mga ginahimo. Pero kon ginabalewala sang iban ang aton mga ikasarang kag mga ginahimo, nagaluya ang aton buot. Ang isa ka dalaga nga payunir nga si Abigail nagsiling nga nagabatyag sia nga kon kaisa daw ginabalewala sia. Nagsiling sia: “Daw wala sing may nakakilala sa akon. Para sa iban, utod ako ni kuwan ukon bata ako ni kuwan.” Pero talupangda ang ginsiling sang isa ka dalaga nga sister nga si Pam. Madamo nga tinuig sia nga nangin misyonera. Sang ulihi, nagpauli sia kay kinahanglan niya atipanon ang iya mga ginikanan. Setentahon na sia subong kag nagapayunir sia gihapon. Si Pam nagsiling: “Ginapasalamatan sang mga kauturan ang akon mga ginahimo. Daku gid ang nabulig sini sa akon.”

11. Paano ginpakita ni Jesus nga ginpabaloran niya ang mga babayi nga nagbulig sa iya pagministeryo?

¹¹ Ginpabaloran ni Jesus ang matutom nga mga babayi nga ‘naggamit sang ila mga pagkabutang’ para mag-alagad sa iya. (Luc. 8:1-3) Magluwas nga ginhatagan sila ni Jesus sang pribilehiyo nga mag-alagad sa iya, gintudluan man niya sila sang importante nga mga kamatuoran parte sa kabubut-on sang Dios. Halimbawa, ginsugid niya sa ila nga mapatay sia kag pagabanhawon. (Luc. 24:5-8) Pareho sa ginhimo niya sa mga apostoles, ginbuligan man niya ini nga mga babayi nga mangin handa sa mga pagtilaw nga ila maeksperiensiahan. (Mar. 9:30-32; 10:32-34) Kag talalupangdon man nga sang gin-aresto si Jesus, nalagyo ang iya mga apostoles. Pero sang ginlansang sia sa usok, wala gid sia ginbayaan sang pila ka babayi nga nagaalagad sa iya.—Mat. 26:56; Mar. 15:40, 41.

12. Ano nga mga hilikuton ang ginhatag ni Jesus sa mga babayi?

¹² Ginhatagan ni Jesus sang importante nga mga hilikuton ang mga babayi. Halimbawa, ang matutom nga mga babayi ang una nga nakabalo nga nabanhaw na sia. Ginsugo niya sila nga silingan ang mga apostoles nga nabanhaw na sia. (Mat. 28:5, 9, 10) Kag sang Pentecostes 33 C.E., mahimo nga may mga babayi man sang ginbubo ang balaan nga espiritu. Kon amo, posible gid nga nakabaton man sila sang ikasarang nga makahambal sang lainlain nga lenguahe para sugiran ang iban sang “gamhanan nga mga binuhatan sang Dios.”—Binu. 1:14; 2:2-4, 11.

13. Ano ang ginahimo sang mga utod nga babayi subong, kag paano mo sila mapasalamatan?

¹³ Dapat naton dayawon kag pasalamatan ang aton mga utod nga babayi sa tanan nila nga ginahimo sa pag-alagad kay Jehova. Nalakip sa sini ang pagpatindog kag pagmentinar sang mga pasilidad sang organisasyon, pagbulig sa mga grupo nga nagagamit sang lain nga lenguahe, kag pagboluntaryo sa Bethel. Nagabulig sila sa mga nahalitan sang kalamidad, naga-translate sang aton mga publikasyon, kag nagaalagad bilang mga payunir kag misyonero. Pareho sa mga brother, puede man sila makaeskwela sa Pioneer Service School, School for Kingdom Evangelizers, kag Gilead School. Ginabuligan man sang mga asawa ang ila mga bana para masarangan nila ang mabug-at nga mga responsibilidad sa kongregasyon kag sa organisasyon. Ini nga mga brother amo ang “mga dulot nga mga lalaki,” kag madamo sila sang ginahimo para sa kongregasyon. Pero, mabudlayan gid sila nga himuon ang ila mga responsibilidad kon wala sila ginasuportahan sang ila asawa. (Efe. 4:8) Paano mo mabuligan ang mga utod nga babayi sa ila mga ginahimo?

14. Base sa ginsiling sang Salmo 68:11, ano ang ginahimo sang maalamon nga mga gulang?

¹⁴ Kabalo ang maalamon nga mga gulang nga ang mga utod nga babayi “isa ka daku nga kasuldadusan” nga handa mag-alagad, kag sila sa masami ang maayo magbantala sang maayong balita. (Basaha ang Salmo 68:11.) Gani may matun-an ang mga gulang sa mga eksperiensia sang mga utod nga babayi. Si Abigail, nga ginsambit kaina,  nagsiling nga nalipay sia kon ginapamangkot sia sang mga brother kon ano nga presentasyon ang nakita niya nga epektibo sa ila teritoryo. Nagsiling sia, “Bangod sini, nagabatyag ako nga may importante ako nga mabulig sa organisasyon ni Jehova.” Kabalo man ang mga gulang nga ang matutom kag hamtong nga mga utod nga babayi makabulig gid sa pamatan-on nga mga sister sa ila mga problema. (Tito 2:3-5) Gani dapat gid naton pasalamatan ang aton mga utod nga babayi!

15. Sa ano nga mga sitwasyon mahimo kinahanglan nga buligan kag pangapinan ang mga utod nga babayi?

¹⁵ Kon kaisa, kinahanglan buligan kag pangapinan ang mga utod nga babayi. (Isa. 1:17) Halimbawa, kon ang utod nga babayi isa ka balo ukon diborsiada, mahimo nga dapat sia buligan. Posible nga kinahanglan niya ang isa ka representante nga magahambal para sa iya, kag magabulig sa iya nga asikasuhon ang mga hilikuton nga ginahimo anay sang iya bana. Kon ang utod tigulang na, posible nga kinahanglan niya ang bulig para mag-istorya sa doktor. Posible nga kinahanglan man buligan ang isa ka payunir nga sister nga nagaboluntaryo sa iban pa nga hilikuton sa organisasyon. Halimbawa, kinahanglan may magpangapin sa iya kon ginapakalain sia sang iban nga utod kay talagsa na lang sia makabantala, indi pareho sa iban nga mga payunir. Paano pa gid naton mabuligan ang aton mga utod nga babayi? Binagbinagon naton liwat ang halimbawa ni Jesus.

16. Suno sa Marcos 14:3-9, paano ginpangapinan ni Jesus si Maria?

¹⁶ Ginpangapinan gilayon ni Jesus ang mga babayi nga nagaalagad sa Dios kon ginapakalain sila. Halimbawa, ginpangapinan niya si Maria sang ginpakalain sia ni Marta. (Luc. 10:38-42) Kag ginpangapinan niya liwat si Maria sang ginpakalain sia sang iban kay indi kuno maayo ang iya ginhimo. (Basaha ang Marcos 14:3-9.) Nahangpan ni Jesus ang motibo ni Maria kag gindayaw sia ni Jesus. Nagsiling sia: “Naghimo sia sang maayo sa akon. . . . Ginhimo niya ang iya masarangan.” Gintagna pa gani ni Jesus nga “bisan diin man ibantala [ang] maayong balita sa bug-os nga kalibutan,” isugid man ang maayo nga ginhimo ni Maria. Nangin matuod gid ini kay ginabinagbinag naton ini subong sa sini nga artikulo. Tumalagsahon gid nga sang gindayaw ni Jesus ang ginhimo ni Maria, ginsambit man niya ang parte sa pagbantala sang maayong balita sa bug-os nga kalibutan. Sigurado gid nga bisan pa ginpakalain si Maria, napalig-on sia sa ginsiling ni Jesus!

17. Maghatag sing sitwasyon nga mahimo kinahanglan naton pangapinan ang isa ka sister.

¹⁷ Ginapangapinan mo bala ang imo mga utod nga babayi sa kongregasyon? Binagbinaga ini nga sitwasyon. Natalupangdan sang pila ka kauturan nga pirme lang ulihi mag-abot sa mga miting ang isa ka sister nga indi Saksi ang bana, kag nagapauli sia dayon pagkatapos sang miting. Natalupangdan man nila nga talagsa niya lang ginaupod ang iya kabataan. Gani ginapakalain nila ang sister kay wala niya kuno ginahimo ang iya bug-os nga masarangan para ipaathag sa iya bana ang iya mga ginapatihan. Pero wala sila kabalo nga ginahimo gid sang sister ang iya bug-os nga masarangan, ugaling indi sia makapagusto sa luyag niya nga himuon, kag wala man sia sing mahimo kon indi magpasugot ang iya bana nga updon niya ang ila kabataan. Ano ang puede mo himuon sa sini nga sitwasyon? Kon dayawon mo ang sister sa iya mga pagpanikasog kag isugid mo sa iban nga kauturan ang mga maayo niya nga ginahimo, posible nga magauntat ang pagpakalain sa iya.

18. Paano naton mabuligan ang aton mga utod nga babayi sa kongregasyon?

¹⁸ Mapakita naton sa aton mga utod nga babayi sa kongregasyon nga nagaulikid kita sa ila kon buligan naton sila. (1 Juan 3:18) Amo ini ang ginsiling ni Annette nga nagaatipan sang iya nagamasakit nga iloy: “Nagakadto sa balay ang iban nga kauturan para buslan ako sa pag-atipan kay Nanay, kag may mga nagadala man sang pagkaon.  Nabatyagan ko nga palangga nila ako kag daw isa gid kami ka pamilya sa kongregasyon.” Ang sister nga si Jordan ginbuligan man sang mga kauturan. Halimbawa, gintudluan sia sang isa ka brother kon paano mentinahon ang iya salakyan. Si Jordan nagsiling: “Kanami sa pamatyag nga nagaulikid ang mga kauturan, kag gusto nila nga kondisyon pirme ang akon salakyan para layo ako sa aksidente.”

19. Paano pa gid mabuligan sang mga gulang ang mga utod nga babayi sa kongregasyon?

¹⁹ Ginapanikasugan man sang mga gulang nga buligan ang mga utod nga babayi sa kongregasyon. Kabalo sila nga gusto ni Jehova nga dapat atipanon sing maayo ang mga utod nga babayi. (Sant. 1:27) Gani ginailog sang mga gulang ang pagkamakatarunganon ni Jesus. Wala sila nagahimo sang indi kinahanglanon nga mga pagsulundan kundi nagapakita sila sang kaayo kag pagpasunaid. (Mat. 15:22-28) Kon ginapanikasugan sang mga gulang nga buligan ang ila mga utod nga babayi sa kongregasyon, mabatyagan sini nga mga utod nga palangga sila ni Jehova kag sang iya organisasyon. Sang mabal-an sang manugtatap sang grupo ni Kia nga masaylo sia sang balay, may ginhimo sia dayon para buligan si Kia. Nagsiling si Kia: “Nabuhinan gid ang akon stress. Magluwas nga ginpalig-on nila ako, ginbuligan pa nila ako. Ginpabatyag sa akon sang mga gulang nga importante ako sa kongregasyon kag wala ako nagaisahanon kon may mga problema.”

20-21. Paano naton mapakita nga palangga naton ang tanan naton nga utod nga babayi sa kongregasyon?

²⁰ Sa aton mga kongregasyon, madamo nga matutom kag mapisan nga mga utod nga babayi ang dapat naton buligan. Natun-an naton sa halimbawa ni Jesus nga mabuligan naton sila kon magpain kita sang tion para makaupod sila kag kilalahon sila sing maayo. Pabaloran naton kag pasalamatan ang ila mga ginahimo sa pag-alagad sa Dios. Kag pangapinan naton sila kon kinahanglan.

²¹ Sa katapusan sang sulat ni apostol Pablo sa mga taga-Roma, ginsambit niya ang ngalan sang siam ka utod nga babayi sa kongregasyon. (Roma 16:1, 3, 6, 12, 13, 15) Sigurado gid nga napalig-on sila sang nabatian nila ang pagpangamusta kag pagdayaw sa ila ni Pablo. Dapat man naton buligan ang tanan nga utod nga babayi sa aton kongregasyon. Kon himuon naton ini, ginapakita naton sa ila nga palangga naton sila kag ginakabig naton sila nga pamilya.