1-2. (a) Suno sa Hulubaton 16:31, ano dapat ang pagtan-aw naton sa mga kauturan nga tigulang na? (b) Ano nga mga pamangkot ang sabton naton sa sini nga artikulo?

SA ISA ka park sa Arkansas, U.S.A., posible nga makakita ka sang mga diamante sa duta. Pero ang hitsura sini indi pa pareho sa makita sa mga alahas. Gani posible nga agyan-agyan lang ini sang madamo nga tawo bisan pa makita nila ini kay abi nila indi ini mga diamante.

² Daw pareho sini nga mga diamante ang aton mga kauturan nga tigulang na. Hamili gid sila. Ginpaanggid sang Pulong sang Dios sa korona ang ila uban. (Basaha ang Hulubaton 16:31; 20:29) Pero posible nga indi sila mahatagan sing atension kon kaisa. Mga pamatan-on, pabalori ninyo ang mga kauturan nga tigulang na. Kon himuon ninyo ini, sobra pa sa literal nga manggad ang mabaton ninyo nga benepisyo. Sa sini nga artikulo, sabton naton ang tatlo ka pamangkot: Ngaa hamili para kay Jehova ang aton mga kauturan nga tigulang na? Ngaa importante sila sa organisasyon ni Jehova? Ano ang dapat naton himuon para makatuon kita sa ila halimbawa?

3. Suno sa Salmo 92:12-15, ngaa hamili para kay Jehova ang aton mga kauturan nga tigulang na?

³ Hamili para kay Jehova nga Dios ang aton mga kauturan nga tigulang na. Kilala gid niya sila, kag ginapabaloran niya ang ila maayo nga mga kinaiya. Bangod sang ila matutom nga pag-alagad sa iya sa malawig nga panahon, nakatigayon sila sang kaalam. Nalipay sia kon ginatudlo nila ini sa mga pamatan-on. (Job 12:12; Hulu. 1:1-4) Ginapabaloran man ni Jehova ang ila pagbatas.  (Mal. 3:16) Bisan pa may mga problema sila, mabakod gihapon ang ila pagtuo kay Jehova. Sang natun-an nila ang kamatuoran, mabakod ang ila pagsalig nga matuman ang ila ginalauman sa palaabuton. Pero mas nagbakod pa gid ini subong. Kag padayon nila nga ginabantala ang ngalan ni Jehova “bisan tigulang na sila,” gani palangga sila ni Jehova.—Basaha ang Salmo 92:12-15.

4. Ano ang makapalig-on sa aton mga kauturan nga tigulang na?

⁴ Mga kauturan namon nga tigulang na, makasalig kamo nga ginadumdom gid ni Jehova ang inyo ginhimo nga pag-alagad sa iya sang una. (Heb. 6:10) Mapisan kamo nga nagbantala, kag nalipay sa sini ang aton Amay sa langit. Bisan pa may mga problema kamo nga nagpasubo gid sa inyo, ginbatas ninyo ini. Gintuman ninyo ang mga kasuguan sa Biblia, matutom ninyo nga ginhimo ang inyo mga responsibilidad sa organisasyon ni Jehova, kag ginhanas ninyo ang iban. Ginhimo ninyo ang inyo bug-os nga masarangan nga mag-adjust kag magdungan sa madamo nga pagbag-o sa organisasyon ni Jehova. Ginsuportahan ninyo kag ginpalig-on ang mga nagaalagad sing bug-os tion. Palangga gid kamo ni Jehova nga Dios bangod mainunungon kamo. Nagapromisa sia nga “indi niya pagbiyaan ang mga mainunungon sa iya.” (Sal. 37:28) Nagapromisa man sia sa inyo: “Tubtob sa inyo pagkaubanon pas-anon ko gihapon kamo.” (Isa. 46:4) Gani indi ninyo paghunahunaon nga indi na kamo importante sa organisasyon ni Jehova bangod tigulang na kamo. Ang matuod, importante gid kamo.

5. Ano ang dapat dumdumon sang mga tigulang?

⁵ Madamo ang mabulig sang mga tigulang sa organisasyon ni Jehova. Bisan pa posible nga indi na pareho sang una ang masarangan nila himuon subong, may madamo gid sila nga eksperiensia bangod sang ila pag-alagad sa malawig nga panahon. Puede sila gihapon gamiton ni Jehova sa sarisari nga paagi. Ginapakita ini sang masunod nga mga halimbawa sang mga tigulang sang una kag subong.

6-7. Maghatag sing halimbawa sang mga tigulang nga ginsambit sa Biblia nga ginpakamaayo ni Jehova bangod matutom sila nga nag-alagad sa iya.

⁶ Mabasa naton sa Biblia ang parte sa mga alagad ni Jehova nga padayon nga nangin matutom sa iya bisan pa tigulang na sila. Halimbawa, mga  80 anyos na si Moises sang nag-alagad sia bilang manalagna ni Jehova kag lider sang pungsod sang Israel. Bisan pa posible nga sobra 90 anyos na si Daniel, gingamit sia gihapon ni Jehova bilang Iya manalagna. Kag posible nga sobra 90 anyos man si apostol Juan sang gintuytuyan sia sang Dios sa pagsulat sang Bugna.

⁷ Madamo sa matutom nga mga alagad sang Dios ang indi bantog, kag posible nga indi sila matalupangdan sang iban. Pero natalupangdan sila ni Jehova kag ginpadyaan niya sila bangod sang ila katutom. Halimbawa, malip-ot lang ang ginasiling sang Biblia parte sa “matarong kag diosnon” nga si Simeon, pero kilala gid sia ni Jehova. Ginhatagan sia ni Jehova sing pribilehiyo nga makita ang bata nga si Jesus kag magpanagna parte kay Jesus kag kay Maria. (Luc. 2:22, 25-35) Binagbinaga man ang manalagna nga si Ana. Isa sia ka balo nga 84 anyos na, pero ‘wala gid sia nagapalya sa pagsimba sa templo.’ Kon sa aton subong, daw pareho lang nga pirme sia naga-attend sa mga miting. Gani ginpakamaayo sia ni Jehova nga makita man ang bata nga si Jesus. Si Simeon kag si Ana hamili para kay Jehova.—Luc. 2:36-38.

8-9. Ano ang padayon nga ginahimo sang mga sister nga balo na?

⁸ Subong, madamo nga kauturan nga tigulang na ang maayo gid nga halimbawa sa mga pamatan-on. Binagbinaga ang eksperiensia ni Sister Lois Didur. Nangin espesyal payunir sia sa Canada sang 21 anyos pa lang sia. Napamana niya si John, kag madamo nga tinuig sila nga nag-alagad sa sirkito. Sang ulihi, nag-alagad sila sa Bethel sa Canada sing sobra 20 ka tuig. Sang 58 anyos na si Lois, ginhatagan sila ni John sing asaynment nga mag-alagad sa Ukraine. Ano ang ginhimo nila? Nagsiling bala sila nga tigulang na sila kag indi na nila masarangan mag-alagad sa iban nga pungsod? Ginbaton nila ang ila asaynment, kag nag-alagad si John bilang miembro sang Branch Committee didto. Pagligad sang pito ka tuig, napatay si John. Pero nagdesisyon si Lois nga padayon nga mag-alagad didto. Subong, 81 anyos na si Lois. Matutom sia gihapon nga nagaalagad kay Jehova kaupod sang pamilya Bethel sa Ukraine, kag palangga gid nila sia.

⁹ Posible nga indi na masyado matalupangdan sang iban ang mga balo nga pareho kay Lois kon ikumparar sa tion nga buhi pa ang ila bana. Pero hamili sila gihapon para kay Jehova. Ginapabaloran gid niya ang mga sister nga nagsuportar sa ila bana sa malawig nga panahon kag padayon nga nagaalagad sa iya sing matutom. (1 Tim. 5:3) Bangod sini, makapalig-on man sila sa mga pamatan-on.

10. Ano ang maayo gid nga halimbawa ni Tony?

¹⁰ Hamili man ang madamo naton nga kauturan nga tigulang na nga indi na makahalin sa ila balay, nagaisahanon, nagaistar sa ila pamilya nga indi Saksi, ukon ara sa mga nursing home. Halimbawa, ara na sa nursing home ang brother nga si Tony. Nabawtismuhan sia sa Pennsylvania, U.S.A., sang Agosto 1942 sang 20 anyos sia. Dayon, ginpatawag sia nga magsoldado, pero nangindi sia. Gani napriso sia sing duha ka  tuig kag tunga. Napangasawa niya si Hilda, kag may duha sila ka bata nga gintudluan nila sang kamatuoran. Sa sulod sang madamo nga tinuig, nakaalagad si Tony sa tatlo ka kongregasyon bilang nagadumala nga manugtatap (koordenitor sang hubon sang mga gulang subong), kag nag-alagad man sia bilang circuit assembly overseer. Sang una, nagakadto sia sa isa ka prisuhan para maghiwat sang mga miting kag mga Bible study. Bisan pa 98 anyos na si Tony subong, padayon sia gihapon nga nagaalagad. Ginahimo niya ang iya bug-os nga masarangan sa pag-alagad kay Jehova kaupod sang iya mga kauturan sa kongregasyon.

11. Paano naton mapakita nga hamili para sa aton ang mga kauturan nga tigulang na?

¹¹ Paano naton mapadunggan ang mga kauturan nga tigulang na? Kon posible, puede sila mabuligan sang mga gulang para maka-attend ukon makapamati sila sa mga miting kag makabantala. Mapakita naton nga nagaulikid kita sa ila kon duawon naton sila ukon mag-istorya kita sa ila paagi sa video call. Dapat gid naton hatagan sing pinasahi nga atension ang mga kauturan nga tigulang na nga ara sa nursing home nga malayo sa ila kongregasyon. Indi gid naton sila pagkalimtan. Ang pila sa ila posible nga nasaw-ahan mag-istorya parte sa ila kaugalingon. Pero mas maayo kon pamangkuton naton sila parte sa ila makalilipay nga mga eksperiensia sa pag-alagad kay Jehova, kag mapalig-on gid kita kon pamatian naton sila samtang nagaistorya sila.

12. Ano ang puede naton mabal-an parte sa mga kauturan sa aton mismo kongregasyon?

¹² Posible nga may mga tigulang sa aton kongregasyon nga may makapalig-on nga eksperiensia nga wala pa naton mabal-an. Ang isa ka halimbawa amo ang sister nga si Harriette. Sa sulod sang madamo nga tinuig, matutom sia nga nag-alagad kay Jehova sa ila kongregasyon sa New Jersey, U.S.A. Dayon, nagsaylo sia sa iya bata nga babayi nga nagaistar sa iban nga lugar. Nagpanikasog ang mga kauturan sa iya bag-o nga kongregasyon nga makilala sia sing maayo, kag madamo gid sila sing natun-an sa iya. Napalig-on gid sila sa iya gin-istorya. Natun-an niya ang kamatuoran sang mga 1925. Nagsiling sia nga kon nagabantala sia sadto nga tion, nagadala gid sia sang sipilyo engkaso arestuhon sia kag prisuhon. Sang 1933, duha ka beses sia nga napriso, kag isa ka semana sia sa prisuhan sa kada pagpriso sa iya. Sang napriso sia, ginbuligan sia sang iya bana nga indi Saksi paagi sa pag-atipan sang ila tatlo ka bata nga gagmay pa. Ginapakita sini nga dapat gid naton padunggan ang aton mga kauturan nga tigulang na pareho kay Harriette.

13. Ngaa importante gid ang mga tigulang sa organisasyon ni Jehova?

¹³ Importante gid kay Jehova kag sa iya organisasyon ang aton mga kauturan nga tigulang na. Nakita nila nga ginapakamaayo gid ni Jehova ang iya organisasyon, kag naeksperiensiahan man nila ang iya mga pagpakamaayo. May mga sala man sila nga nahimo, pero nakatuon sila sa sini. Kabiga sila nga daw mga “tuburan sang kaalam,” kag tinguhai nga makatuon sa ila eksperiensia. (Hulu. 18:4) Kon panikasugan mo nga makilala sila sing maayo, mapabakod ang imo pagtuo kag madamo ka gid sing matun-an sa ila.

14. Suno sa Deuteronomio 32:7, ano ang dapat himuon sang mga pamatan-on?

¹⁴ Makig-istorya sa mga kauturan nga tigulang na. (Basaha ang Deuteronomio 32:7.) Matuod, mahimo nga indi na sila makakita sing maayo, mahinay na sila maglakat, kag indi na masyado mabatian ang ila panghambal. Pero gusto nila nga madamo pa sila sing mahimo, kag may ‘maayo sila nga ngalan’ kay Jehova. (Man. 7:1) Dumduma kon ngaa hamili sila para kay Jehova.  Padunggi sila pirme, pareho sang ginhimo ni Eliseo. Sa katapusan nga adlaw nga kaupod niya si Elias, namilit gid sia nga updan si Elias. Tatlo ka beses niya nga ginsiling: “Indi ako magbulag sa imo.”—2 Hari 2:2, 4, 6.

15. Ano ang mga puede naton ipamangkot sa mga kauturan nga tigulang na?

¹⁵ Mapakita mo nga nagaulikid ka sa mga kauturan nga tigulang na kon pamangkuton mo sila sang ila mga eksperiensia. (Hulu. 1:5; 20:5; 1 Tim. 5:1, 2) Puede ka mamangkot: “Ano ang nagkumbinsi sa imo nga matuod gid ang ginatudlo sang mga Saksi ni Jehova?” “Ano ang imo mga naeksperiensiahan nga nagpasuod pa gid sa imo kay Jehova?” “Ano ang nakabulig sa imo nga mangin malipayon pirme sa pag-alagad kay Jehova?” (1 Tim. 6:6-8) Dayon, mamati sa ila isugid sa imo.

16. Ngaa pareho nga mapalig-on ang tigulang kag pamatan-on kon nagaistoryahanay sila?

¹⁶ Kon nagaistoryahanay ang tigulang kag ang pamatan-on, pareho sila nga mapalig-on. (Roma 1:12) Kay man, magabakod pa gid ang pagsalig sang pamatan-on nga ginaatipan gid ni Jehova ang iya matutom nga mga alagad, kag mabatyagan sang tigulang nga palangga gid sia. Malipay gid ang tigulang nga isugid sa pamatan-on kon paano sia ginpakamaayo ni Jehova.

17. Ngaa masiling naton nga mas nagatahom ang mga matutom kay Jehova samtang nagatigulang sila?

¹⁷ Ang pisikal nga katahom masami nga nagakadula samtang nagatigulang ang isa. Pero para kay Jehova, mas nagatahom pa gid ang mga matutom sa iya samtang nagatigulang sila. (1 Tes. 1:2, 3) Ngaa masiling naton ini? Bangod madamo na nga tinuig nga nagpagiya sila sa balaan nga espiritu sang Dios para mapakita nila ang maayo nga mga kinaiya. Kon kilalahon pa gid naton sing maayo ang aton pinalangga nga mga kauturan nga tigulang na, kon pirme naton sila padunggan, kag kon panikasugan pa gid naton nga makatuon sa ila halimbawa, mangin mas hamili pa gid sila para sa aton.

18. Ano ang binagbinagon naton sa masunod nga artikulo?

¹⁸ Nagabakod pa gid ang kongregasyon kon pabaloran sang mga pamatan-on ang mga tigulang kag kon pabaloran man sang mga tigulang ang mga pamatan-on. Sa masunod nga artikulo, binagbinagon naton kon paano mapakita sang mga tigulang nga ginapabaloran nila ang mga pamatan-on sa kongregasyon.