1-2. Ano nga pag-uyog ang gintagna ni manalagna Hageo nga matabo sa aton tion?

“SA PILA lang ka minuto, nagkalarumpag ang mga balaligyaan kag ang daan nga mga bilding.” “Nagasinalasala ang mga tawo . . . Madamo ang nagsiling nga mga duha ka minuto nga naglinog. Pero pamatyag ko daw indi na mag-untat ang linog.” Amo ini ang ginsiling sang pila sa mga nakaeksperiensia sang linog sa Nepal sang 2015. Nakaeksperiensia ka man bala sang pareho sini? Posible nga indi mo gid ini malipatan.

² Pero may isa ka klase sang pag-uyog nga nagakatabo subong, kag indi lang isa ka siudad ukon pungsod ang apektado sini. Sa baylo, ginauyog ni Jehova ang tanan nga pungsod sa bilog nga kalibutan, kag madamo nga tinuig na niya ini nga ginahimo. Gintagna ini ni manalagna Hageo. Nagsulat sia: “Amo ini ang ginasiling ni Jehova sang mga kasuldadusan, ‘Sa liwat—sa indi madugay—uyugon ko ang langit kag ang duta kag ang dagat kag ang mamala nga duta.’”—Hag. 2:6.

3. Ngaa indi pareho sa isa ka linog ang ginsambit ni Hageo nga pag-uyog?

³ Puro lang kahalitan ang resulta sang isa ka linog, pero ang pag-uyog nga ginsambit ni Hageo may maayo nga resulta. Si Jehova mismo ang nagasiling sa aton: “Uyugon ko ang tanan nga pungsod, kag magasulod ang malahalon nga mga butang sang tanan nga pungsod; kag pun-on ko sing himaya ini nga balay.” (Hag. 2:7) Ano ang buot silingon sang sini nga tagna para sa mga tawo sang panahon ni Hageo? Kag ano ang buot silingon sang sini nga tagna para sa aton subong? Binagbinagon naton ang mga sabat sa sini nga mga pamangkot, kag tun-an man naton kon paano kita makabulig sa hilikuton nga nagauyog sa mga pungsod subong.

4. Ngaa ginpadala ni Jehova si manalagna Hageo sa Iya katawhan?

⁴ May ginpahimo si Jehova kay manalagna Hageo nga isa ka importante nga hilikuton. Pero binagbinaga ang kahimtangan antes sini. Sang 537 B.C.E., may mga Judiyo nga bihag sa Babilonia nga nagbalik sa Jerusalem. Mahimo nga isa si Hageo sa ila. Wala magdugay pag-abot nila sa Jerusalem, ginpasad sining matutom nga mga alagad ni Jehova ang pundasyon sang iya balay ukon sang templo. (Esd. 3:8, 10) Pero, makapasubo gid ang masunod nga natabo. Nagluya ang ila buot kag gin-untatan nila ang paghimo sang templo bangod ginpamatukan sila sang mga tawo sa palibot nila. (Esd. 4:4; Hag. 1:1, 2) Gani sang 520 B.C.E., ginsugo ni Jehova si Hageo nga palig-unon ang mga Judiyo nga mangin mapisan liwat kag tapuson ang templo. *—Esd. 6:14, 15.

5. Ngaa napalig-on gid ang katawhan sang Dios sa mensahe ni Hageo?

⁵ Ano ang katuyuan sang mensahe ni Hageo? Para pabakuron ang pagtuo sang mga Judiyo kay Jehova. Nagluya ang buot sang mga Judiyo, gani ginpalig-on sila ni Hageo: “‘Magpakabakod kamo tanan nga katawhan sini nga duta,’ siling ni Jehova, ‘kag mag-obra na kamo. Kay kaupod ninyo ako,’ siling ni Jehova sang mga kasuldadusan.” (Hag. 2:4) Napalig-on gid sila sang ekspresyon nga “Jehova sang mga kasuldadusan.” Madamo gid sang anghel si Jehova sa iya kasuldadusan, gani kinahanglan magsalig sa iya ang mga Judiyo para magmadinalag-on sila.

6. Ano ang mangin resulta sang pag-uyog nga gintagna ni Hageo?

⁶ Ginpadala ni Jehova si Hageo para sugiran ang mga Judiyo nga uyugon Niya ang tanan nga pungsod. Napalig-on gid sa sini ang mga Judiyo nga nagluya ang buot kag nag-untat sa paghimo sang templo. Kay man, ginapahangop sang mensahe ni Hageo nga uyugon ni Jehova ang Persia, nga amo ang pinakagamhanan nga pungsod sadto. Kag ano ang mangin resulta sini nga pag-uyog? Una, matapos sang katawhan sang Dios ang pagkay-o sang templo. Dayon, magaupod sa ila pagsimba kay Jehova sa sini nga templo bisan ang mga indi Judiyo. Makapalig-on gid ini nga mensahe para sa katawhan sang Dios!—Zac. 8:9.

7. Ano nga hilikuton nga nagauyog sa bilog nga kalibutan ang may pribilehiyo kita nga makabulig? Ipaathag.

⁷ Ano ang buot silingon sang tagna ni Hageo para sa aton subong? Ginauyog liwat ni Jehova ang tanan nga pungsod, kag nagabulig kita subong sa sini nga hilikuton. Binagbinaga ini: Sang 1914, gintangdo ni Jehova si Jesucristo nga Hari sang Iya Ginharian sa langit. (Sal. 2:6) Malain gid nga balita para sa mga lider sang kalibutan ang pagsugod sang paggahom sini nga Ginharian. Ginapahangop sini nga natapos na “ang gintalana nga mga tion sang mga pungsod,” ukon ang tion nga wala sing manuggahom nga nagarepresentar kay Jehova. (Luc. 21:24) Bangod sini, ginbantala sang katawhan ni Jehova sa mga tawo nga ang Ginharian sang Dios lang ang makasolbar sang tanan nga problema. Nagpokus sila sa sini nga hilikuton ilabi na sugod sang 1919. Nag-uyog ang bilog nga kalibutan bangod sining pagbantala parte sa “maayong balita sang Ginharian.”—Mat. 24:14.

8. Suno sa Salmo 2:1-3, ano ang reaksion sang kalabanan nga pungsod sa sini nga mensahe?

⁸ Ano ang reaksion sang mga tawo sa sini nga mensahe? Indi maayo ang reaksion sang kalabanan. (Basaha ang Salmo 2:1-3.) Nagalalain gid ang mga pungsod. Wala nila ginbaton ang gintangdo ni Jehova nga Manuggahom. Para sa ila, indi “maayong balita” ang aton ginabantala parte sa Ginharian. Ginadumilian pa gani sang iban nga gobierno ang aton pagbantala nga hilikuton. Nagasiling ang madamo nga manuggahom  sang sini nga mga pungsod nga nagaalagad sila sa Dios, pero indi nila gusto nga madulaan sila sang awtoridad. Gani pareho sa ginhimo sang mga manuggahom sang panahon ni Jesus, ginapamatukan man sang mga manuggahom subong ang Hinaplas ni Jehova paagi sa paghingabot sa iya matutom nga mga disipulo.—Binu. 4:25-28.

9. Bangod sang indi maayo nga reaksion sang mga pungsod, ano ang gusto ni Jehova nga himuon nila?

⁹ Bangod sang indi maayo nga reaksion sang mga pungsod, ano ang gusto ni Jehova nga himuon nila? Ang Salmo 2:10-12 nagasabat: “Gani, magmaalam kamo, mga hari; magpatudlo kamo, mga hukom sang duta. Alagda ninyo si Jehova nga may kahadlok, kag magkalipay kamo nga may pagkurog. Padunggi ninyo ang anak, agod ang Dios indi maakig kag indi kamo madula sa matarong nga dalanon, kay ang Iya kaakig magasilabo sa gilayon. Malipayon ang tanan nga nagadangop sa Iya.” Ginapakitaan sila ni Jehova sing kaayo kay ginahatagan niya sila sing tsansa. Puede pa nila bag-uhon ang ila hunahuna kag batunon ang Ginharian ni Jehova. Pero, malip-ot na lang ang tion kay ari na kita “sa katapusan nga mga adlaw” sang sini nga sistema. (2 Tim. 3:1; Isa. 61:2) Gani samtang may tion pa, dapat gid mabal-an sang mga tawo ang kamatuoran kag dapat sila magdesisyon nga alagaron si Jehova.

10. Suno sa Hageo 2:7-9, ano ang maayo nga resulta sang pag-uyog?

¹⁰ Maayo ang reaksion sang pila ka tawo sa pag-uyog nga gintagna ni Hageo. Nagsiling sia nga bangod sang pag-uyog, “magasulod ang malahalon nga mga butang [ukon ang sinsero nga mga tawo] sang tanan nga pungsod” para magsimba kay Jehova. * (Basaha ang Hageo 2:7-9.) May gintagna man si Isaias kag si Miqueas nga pareho sa sini nga matabo “sa katapusan nga mga adlaw.”—Isa. 2:2-4, footnote; Miq. 4:1, 2, footnote.

11. Ano ang ginhimo sang isa ka brother sang nabatian niya ang mensahe sang Ginharian?

¹¹ Binagbinaga ang ginhimo sang isa ka brother nga si Ken sang mabatian niya ang mensahe nga nagauyog sa bilog nga kalibutan. Subong, nagaalagad na sia sa world headquarters. Una niya nga nabatian ang mensahe sang Ginharian mga 40  ka tuig na ang nagligad, pero klaro gihapon ini sa iya hunahuna. Nagsiling si Ken: “Sang una ko nga nabatian ang kamatuoran sa Pulong sang Dios, nalipay gid ako sang natun-an ko nga ari na kita sa katapusan nga mga adlaw sang sini nga sistema. Narealisar ko nga para kahamut-an ako sang Dios kag para may paglaum ako nga mabuhi sing wala sing katapusan, dapat ko siguruhon nga indi ako bahin sining kalibutan nga wala sing kasiguruhan kag dapat ako magdampig kay Jehova. Gani nangamuyo ako kay Jehova kag ginhimo ko dayon ang mga dapat ko himuon. Gintalikdan ko ang kalibutan kag nagdampig ako sa Ginharian sang Dios nga makahatag sang sigurado nga proteksion.”

12. Sa sining tion sang katapusan nga mga adlaw, paano napuno sang himaya ang espirituwal nga templo ni Jehova?

¹² Maathag nga ginapakamaayo gid ni Jehova ang iya katawhan. Sa sining tion sang katapusan nga mga adlaw, madamo ang nangin sumilimba niya. Sang 1914, pila lang kita ka libo. Subong, sobra na kita walo ka milyon nga nagasimba sa Dios, kag minilyon ang nagaupod sa aton kada tuig sa pagsaulog sang Memoryal. Paagi sa sini, napuno sang “malahalon nga mga butang sang tanan nga pungsod” ang dutan-on nga mga luwang sang espirituwal nga templo ni Jehova, ukon ang iya kahimusan para sa putli nga pagsimba. Kag bangod sang ginahimo nila nga mga pagbag-o kag pagsuksok sang bag-o nga personalidad, ginahimaya man ang ngalan ni Jehova.—Efe. 4:22-24.

13. Ano ang iban pa nga mga tagna nga natuman paagi sa sining dalayawon nga mga hitabo? (Tan-awa ang piktyur sa kober.)

¹³ Paagi sa sining dalayawon nga mga hitabo, natuman man ang iban pa nga mga tagna, pareho sang mabasa sa Isaias kapitulo 60. Ang bersikulo 22 sini nga kapitulo nagasiling: “Ang diutay mangin isa ka libo kag ang gamay nga pungsod mangin gamhanan. Ako, si Jehova, magapadasig sini sa nagakaigo nga tion sini.” Dalayawon gid ang nagakatabo bangod nagadamo pa gid ang mga nagasimba kay Jehova. Ining “malahalon nga mga butang,” ukon mga tawo, may sarisari nga mga ikasarang kag gusto gid nila ibantala ang “maayong balita sang Ginharian.” Gani magamit sang katawhan ni Jehova ang ginlaragway ni Isaias nga “gatas sang mga pungsod.” (Isa. 60:5, 16) Paagi sa bulig sining hamili nga mga lalaki kag babayi, ginabantala naton ang maayong balita sa  240 ka pungsod kag nagahimo kita sang mga publikasyon sa sobra 1,000 ka lenguahe.

14. Ano nga desisyon ang dapat himuon sang mga tawo subong?

¹⁴ Bangod sang pag-uyog sa mga pungsod sa sining tion sang katapusan, dapat gid magdesisyon ang mga tawo. Suportahan bala nila ang Ginharian sang Dios, ukon magasalig bala sila sa mga gobierno sini nga kalibutan? Amo ini ang desisyon nga dapat himuon sang tanan. Bisan pa ginatuman sang katawhan ni Jehova ang mga kasuguan sang gobierno sa ila pungsod, wala gid sila nagapasilabot sa pulitika sini nga kalibutan. (Roma 13:1-7) Kabalo sila nga ang Ginharian lang ang makasolbar sa mga problema sang mga tawo, kag ini nga Ginharian indi bahin sang kalibutan.—Juan 18:36, 37.

15. Suno sa Bugna, paano pagatilawan ang katutom sang katawhan sang Dios?

¹⁵ Ginlaragway sa Bugna kon paano pagatilawan ang katutom sang katawhan sang Dios sa katapusan nga mga adlaw. Bangod sini nga pagtilaw, padayon kita nga makaeksperiensia sang grabe nga pagpamatok kag paghingabot. Piliton kita sang mga gobierno sini nga kalibutan nga ‘simbahon’ sila, kag hingabuton nila ang indi magsuporta sa ila. (Bug. 13:12, 15) Piliton nila nga “markahan sa tuo nga kamot ukon sa agtang ang tanan nga tawo, ang mga kubos, ang mga kadalagkuan, ang mga manggaranon, ang mga imol, ang mga hilway, kag ang mga ulipon.” (Bug. 13:16) Sang una, may permanente nga marka ang mga ulipon para mabal-an kon sin-o ang nagapanag-iya sa ila. Subong, daw ginamarkahan man ang mga tawo sa ila kamot ukon agtang. Paagi sa ila ginahunahuna kag ginahimo, mabal-an nga nagapasakop sila kag nagasuporta sa mga gobierno.

16. Ngaa dapat naton siguraduhon subong nga matutom gid kita kay Jehova?

¹⁶ Batunon bala naton ini nga marka kag suportahan ang mga gobierno? Kon indi pagbatunon sang isa ini nga marka, mangin mabudlay gid kag delikado ang iya kabuhi. Ang Bugna nagapaathag: “Wala sing makabakal ukon makabaligya luwas lamang sa tawo nga may marka.” (Bug. 13:17) Pero mabasa sa Bugna 14:9, 10 kon ano ang himuon sang Dios sa mga nagabaton sang marka, kag nabal-an ini sang iya katawhan. Bangod wala nila ginbaton ini nga marka, daw pareho lang nga ginsulatan nila ang ila kamot sing, “Iya ni Jehova.” (Isa. 44:5) Dapat naton siguraduhon subong nga matutom gid kita kay Jehova. Kon matutom kita, malipay gid si Jehova nga magsiling nga sia ang nagapanag-iya sa aton.

17. Ano ang dapat naton tandaan parte sa ginahatag ni Jehova nga kahigayunan sa tanan?

¹⁷ Mapinasensiahon gid si Jehova sa sining katapusan nga mga adlaw kay indi niya gusto nga may malaglag. (2 Ped. 3:9) Ginahatagan niya ang tanan sang kahigayunan nga maghinulsol kag magdesisyon nga alagaron sia. Pero indi asta san-o ini nga kahigayunan. Ang indi magsuporta sa Ginharian sang Dios makaeksperiensia sang pareho sa natabo sa Paraon sang panahon ni Moises. Nagsiling si Jehova sa Paraon: “Mahimo ko na kuntani untayon ang akon kamot agod padalhan ka kag ang imo katawhan sing makamamatay nga balatian, kag malaglag ka sa duta. Apang bangod sini gintugutan ko ikaw nga magpabilin nga buhi: agod ipakita ko sa imo ang akon gahom kag agod makilala ang akon ngalan sa bug-os nga duta.” (Ex. 9:15, 16) Sa ulihi, makilala gid sang tanan nga pungsod nga si Jehova lang ang matuod nga Dios. (Ezeq. 38:23) Paano ini matabo?

18. (a) Ano ang ginapahangop sang pag-uyog nga ginsambit sa Hageo 2:6, 20-22? (b) Ngaa masiling naton nga may isa pa ka katumanan sa palaabuton ang ginsiling ni Hageo?

¹⁸ Pagligad sang madamo nga tinuig pagkatapos mapatay si Hageo, nagsulat si apostol Pablo sa Hebreo nga mga Cristiano parte sa isa pa ka katumanan  sang Hageo 2:6, 20-22 sa palaabuton. (Basaha.) Nagsiling si Pablo: “Karon nagsaad sia: ‘Sa liwat uyugon ko indi lamang ang duta kundi pati man ang langit.’ Karon ining ekspresyon nga ‘sa liwat’ nagakahulugan sang pagkuha sa mga butang nga nagauyog, mga butang nga wala ginhimo sang Dios, agod ang mga butang nga wala nagauyog magpabilin.” (Heb. 12:26, 27) Ini nga pag-uyog indi pareho sa ginsambit sa Hageo 2:7. Kay man, ginapahangop sini nga pag-uyog nga laglagon ang mga wala nagabaton sa paggahom ni Jehova, kag wala na gid sila sing paglaum. Pareho ini sa natabo sa Paraon sang una.

19. Ano ang indi gid mauyog, kag ngaa masiling naton ini?

¹⁹ Ano ang indi gid mauyog ukon indi gid madula? Nagsiling pa si Pablo: “Bangod magabaton kita sang Ginharian nga indi mauyog, padayon kita nga magbaton sang wala tupong nga kaayo, nga paagi sini makahalad kita sang kalahamut-an nga sagrado nga pag-alagad sa Dios nga may diosnon nga kahadlok kag kakugmat.” (Heb. 12:28) Gani indi gid mauyog ang Ginharian sang Dios. Kon matapos na ining katapusan nga pag-uyog, ang Ginharian sang Dios na lang ang magapabilin.—Sal. 110:5, 6; Dan. 2:44.

20. Ano nga desisyon ang dapat himuon sang mga tawo, kag paano naton sila mabuligan?

²⁰ Indi na dapat magpabuyanbuyan ang mga tawo. Dapat sila magdesisyon: Kon padayon nila nga suportahan ini nga kalibutan, malaglag sila. Kon alagaron nila si Jehova kag maghimo sang mga pagbag-o sa ila kabuhi para himuon ang iya kabubut-on, mabaton nila ang kabuhi nga wala sing katapusan. (Heb. 12:25) Paagi sa pagbantala sa mga tawo, mabuligan naton sila nga himuon ining importante nga desisyon. Kabay pa nga madamo pa kita sang mabuligan nga magdampig sa Ginharian sang Dios. Kag pirme naton dumdumon ang ginsiling sang aton Ginuo nga si Jesus: “Ining maayong balita sang Ginharian ibantala sa bug-os nga duta subong panaksi sa tanan nga pungsod, kag dayon magaabot ang katapusan.”—Mat. 24:14.